Ilo m̦ool, ejjel̦o̦k juon armej rainin emaroñ lukkuun jel̦ã kõn kar paotokin Paul. Innem pija ko ilo bok ko ad rej wal̦o̦k jãn l̦õmn̦ak ko an ro rej jiña im rejjab pedped ioon ekjab ak men ko jet rũmmãlõtlõt ro rar kõp im loe.

Bõtab ewõr jet l̦õmn̦ak im mel̦el̦e ko kõn paotokin Paul. Ñan waanjoñak, juon Naan in Keeañ ilo M̦aaj 1, 1902 eo ear kwal̦o̦k kõn juon bok in etto etan Acts of Paul and Thecla, me kar je ilo iiõ eo 150 (A.D.) im ej kõnnaan jidik kõn paotokin Paul. Naan in Keeañ in ear wõnm̦aanl̦o̦k im ba bwe ilo bok in “ewõr mel̦el̦e ko rem̦m̦an kõn paotokin Paul im remaroñ lukkuun m̦ool. Kar kwal̦o̦k bwe Paul ear ‘kadu, pil̦õl̦, peñpeñ, koba ãtin, aetok bo̦tin, im eperakrõk an etetal.’”

Juon tũkjinede etan, The Oxford Dictionary of the Christian Church (jãn 1997 eo) ear bar kwal̦o̦k kõn bok in Acts of Paul and Thecla im ej ba: “Kõmel̦el̦e ko ilo bok in remaroñ lukkuun m̦ool.” Alikkar bwe ear l̦ap an ro jet ilo iien ko etto tõmak mel̦el̦e ko ilo bok in kõnke rar kõm̦m̦an 80 kaape ko ilo kajin Grik im kaape ko jet ilo bar jet kajin. Kõn men in, pija ko ilo doulul in ad kõn Paul rej errã ippãn l̦õmn̦ak im mel̦el̦e ko jãn iien ko etto.

Bõtab jen keememej bwe ewõr men ko raorõkl̦o̦k jãn paotokin Paul me jemaroñ katak im jel̦ã kaki. Ke Paul ear kõm̦m̦an jerbalin kwal̦o̦k naan, jet armej rar kajjirere kake im ba bwe “em̦õjn̦o̦ im naan ko an ejej tokjãer!” (2 Ko. 10:10, UBS) Ak jen jab mel̦o̦kl̦o̦k bwe ilo kabwilõñlõñ Paul ear erom juon Kũrjin ãlikin an kar Jesus wal̦o̦k ñane. Em̦m̦an ñe jej bar l̦õmn̦ak kõn aolep jerbal ko Paul ear kõm̦m̦ani ke kar ‘kããlõte bwe en jerbal ñan [Christ], im kwal̦o̦k etan [Jesus] ñan riaelõñ ko.’ (Jrb. 9:3-5, 15, UBS; 22:6-8, UBS) Im ejjel̦o̦k pere bwe jej bar bõk tokjãn jãn aolep bok ko ilo Baibõl̦ me Jeova ear kõm̦akũt Paul ñan jeiki.

Paul ear jab kõmjãje kõn men ko rar wal̦o̦k ilo mour eo an m̦okta jãn an kar erom juon Kũrjin, im ear jab make kwal̦o̦k kõn paotokin. (Jrb. 26:4, 5, UBS; Pi. 3:4-6, UBS) Ear errã ilo an ba: “Ña diktata iaan aolep ro rijjilõk, im ibbet kake bwe ren likũt eta rijjilõk.” (1 Ko. 15:9, UBS) Im tokãlik ear je: “Ña diktata iaan ro doon Anij; bõtab Anij ear letok jouj eo an bwe in bõkl̦o̦k ñan riaelõñ ko Naan eo Em̦m̦an kõn jeraam̦m̦an ko rel̦l̦ap an Christ.” (Ep. 3:8, UBS) Alikkar bwe ennaan in me Paul ear kwal̦o̦k kake el̦apl̦o̦k an aorõk jãn jabdewõt l̦õmn̦ak im mel̦el̦e ko an armej kõn paotokin.