ÃLIKIN an wõt im l̦ap kõto ium̦win elõñ raan, ear det im okmããn̦ãn̦ ilo raanin M̦ande, Jeptõm̦ba 1, 1919. Ilo raelepen raan eo, enañin 1,000 ro me rar itok jãn jikin ko jet rar kweilo̦kl̦o̦k ilo juon im̦õn alwõj iukkure me 2,500 armej remaroñ pãd ie. Rar itok bwe ren pãd ilo jinoin kweilo̦k el̦ap in me ear wal̦o̦k ilo Cedar Point, Ohio, ilo Amedka. Ke ear jota, 2,000 bar armej rar tõkeakl̦o̦k. Rar etal ilo tim̦a, wa, im train ko. Ilo Juje eo, ear lõñl̦o̦k oran jarlepju eo, im joñan an kar lõñ uwaaer, rar aikuj kõm̦m̦ane kweilo̦k eo el̦ap inabõj ilo ium̦win wõjke ko.

Kõn an kar meram in al̦ rome armej ro jãn wõjke ko, ear ãinwõt ñe ewõr juwain ilo nuknuk ko an em̦m̦aan ro. Bareinwõt, el̦ak elladikdik tok jãn reba eo etan Erie, ear ejjopãlpãl kool̦an bao ko ilo at ko an kõrã ro. Juon jeid im jatid em̦m̦aan ej keememejtok iien in im ba: “Kõn an kar aenõm̦m̦an im aiboojoj ijo kõmar pãd ie, im kõmar ettol̦o̦k jãn inepata ko an lal̦ in, ear ãinwõt ñe kõmar pãd ilo pedetaij.”

Meñe ear em̦m̦an im aiboojoj raan eo im jikin eo, ak men eo ear l̦apl̦o̦k an em̦m̦an ej bwe ro jeid im jatid rar lukkuun lañlõñ. Juon nuujpeba ej ba: “Jej loe aer aolep lukkuun roñjake im kõl̦mãnl̦o̦kjen̦, bõtab ear lukkuun l̦ap aer m̦õn̦õn̦õ im lañlõñ.” Rũkkatak Baibõl̦ ro rar lukkuun m̦õn̦õn̦õ bwe rej pãd ibwiljin ro jeier im jatier el̦aptata ke ej kab m̦õj aer iiooni elõñ mãlejjoñ ko rel̦l̦ap jejjo iiõ ko remootl̦o̦k. Mãlejjoñ kein rekitibuj an kar armej ro matõrtõr er kõn aer jab tarin̦ae, an wõr rar jum̦ae im etal jãn doulul in, an kilõk Betel̦ eo ilo Brooklyn, an kar elõñ kalbuuj kõn aer kwal̦o̦k naan, im an kar kalbuuj em̦m̦aan ro 8 me rar tõl doulul in im kar ba bwe renaaj kalbuuj ium̦win 20 iiõ. *​—Lale kõmel̦el̦e eo itulal̦.

Kõn an kar jet iaan Rũkkatak Baibõl̦ ro ebbeer im mijak, rar bõjrak jãn aer kwal̦o̦k naan. Bõtab, enañin aolep rar lukkuun kate er ñan wõnm̦aanl̦o̦k ilo jerbal in meñe kien eo ear kajjioñ kabõjrak er. Ñan waanjoñak, juon bwilijmããn̦ ear ba bwe meñe kar kakkõl Rũkkatak Baibõl̦ ro bwe ren jab kwal̦o̦k naan, ak ro me ear kajitũkin er rar ba bwe renaaj “wõnm̦aanl̦o̦k wõt im kwal̦o̦k kõn Naanin Anij ñan jem̦l̦o̦kin.”

Ium̦win iiõ kein me Rũkkatak Baibõl̦ ro rar iiooni mãlejjoñ ko, rar “kõtl̦o̦k bwe Irooj en tõl er, . . . rar jar aolep iien bwe Jemãer ilañ en tõl er.” Kiiõ rar lañlõñ ke rar kweilo̦kl̦o̦k ippãn doon ilo Cedar Point. Juon jeid im jatid kõrã ear kwal̦o̦k kõn eñjake eo an elõñ ro me rar l̦õmn̦ak kõn wãween aer “naaj maroñ bar kal̦apl̦o̦k kun̦aaer ilo jerbalin kwal̦o̦k naan ilo juon wãween elaajrak.” Jerbalin kwal̦o̦k naan ear jerbal eo rar lukkuun kõn̦aan kõm̦m̦ane!

Ilo aolepen wiik eo, rukweilo̦k ro rar kõn̦aan jel̦ã ta  mel̦el̦ein lõta kein “GA” me ear wal̦o̦k ilo bũrookraam̦ in kweilo̦k el̦ap eo, kaat ko, im jain ko ilo jikin kweilo̦k eo. Bõtab, ilo raanin Bõl̦aide eo me rar n̦aetan “Co-Laborers’ Day,” Joseph F. Rutherford ear kwal̦o̦k ta mel̦el̦ein lõta kein ñan rukweilo̦k ro 6,000 uwaaer. “GA” ear jutak kõn etan bok eo ekããl renaaj jino kwal̦o̦k naan kake. Etan bok in ej The Golden Age. *​—Lale kõmel̦el̦e eo itulal̦.

Jeid im Jatid Rutherford ear kwal̦o̦k kõn rũkkapit ro jet m̦õttan ke ear ba: “Kõnke el̦ap tõmak eo aer, rejel̦ã kõn iien eo elukkuun aorõk me Messaia eo enaaj kwal̦o̦k an kajoor ãinwõt juon rũtõl. . . . Rej watõk bwe ej aer eddo im jeraam̦m̦an ñan kwal̦o̦k ñan armej ro ilo lal̦ in kõn iien in eaorõk enaaj itok. Men in ej m̦õttan jerbal eo aer jãn Anij.”

Bok eo etan The Golden Age ear “juon bok ej kwal̦o̦k mel̦el̦e ko rem̦ool, im ej jipañ armej ro bwe en wõr aer kõjatdikdik im tõmak.” Rukwal̦o̦k naan ro renaaj kar jino kõjerbal bok in ãinwõt juon iaan kein jerbal ko aer rekããl ñan kajeededl̦o̦k m̦ool eo. Renaaj kõm̦m̦ane men in ilo aer itoitak jãn em̦ ñan em̦ im kajjitõk ñe armej ro rekõn̦aan bwe bok eo en etal aolep iien bwe ren riiti. Ke kar kajjitõk el̦aññe ewõr en̦ ekõn̦aan bõk kun̦aan ilo jerbal in, aolep rukweilo̦k ro rar jutak im kwal̦o̦k aer m̦õn̦õn̦õ. Kõn an alikkar aer lañlõñ im kijejeto, rar al im ba: “Jilkintok m̦ool eo im meram eo am̦, O Irooj.” Jeid im Jatid J. M. Norris ej ba: “Joñan an l̦ap aer al, ãinwõt ñe wõjke ko rar em̦m̦akũtkũt.”

Ãlikin kar kweilo̦k eo ilo raan eo, rukweilo̦k ro rar jutak ilo l̦ain ium̦win elõñ awa bwe ren ebbõk aer bok. Elõñ rar bõk ejja eñjake eo an Mabel Philbrick, eo ear ba: “Ilukkuun kar m̦õn̦õn̦õ ke iar jel̦ã bwe kõm maroñ bar kal̦apl̦o̦k kun̦aam ilo kwal̦o̦k naan!”

Enañin 7,000 Rũkkatak Baibõl̦ ro rar pojak in kõm̦m̦ane jerbal in. Ear wõr juon peba in kõmel̦el̦e (Organization Method) im bar juon bok (To Whom the Work Is Entrusted) me rar kwal̦o̦k tipdikin jet mel̦el̦e ko. Rar kwal̦o̦k bwe enaaj wõr juon kumi ekããl ilo ra eo el̦ap me jerbal eo aer ej ñan loloorjake jerbalin kwal̦o̦k naan. Kar bar ba bwe enaaj wõr juon Kamiti in Jerbalin Kwal̦o̦k naan ilo eklejia ko im enaaj wõr juon eo naaj kããlõte bwe en tõl ilo an kwal̦o̦k mel̦el̦e im laajrak ko. Bareinwõt kar ba bwe renaaj kõjenolo̦k teretore ko ñan elõñ m̦õttan ko. Tarrin 150 l̦o̦k ñan 200 em̦ renaaj m̦õttan juon teretore. Kar bar ba bwe enaaj wõr juon kweilo̦k ilo Taije jota ñan an rukwal̦o̦k ro kwal̦o̦k ta ko rar iiooni ke rar kwal̦o̦k naan im lel̦o̦k ripoot in kwal̦o̦k naan ko aer.

Herman Philbrick ej ba: “Kõmij ro̦o̦l wõt ñan kapijukunen ko ammim ak kõm kajju itoitak im kajjitõk ñe armej ro rekõn̦aan bwe bok eo en etal aolep iien bwe ren riiti.” Rar iioon elõñ armej ro rar m̦õn̦õn̦õ in roñjake. Beulah Covey ej ba: “Ãlikin kar pata eo im an kar wal̦o̦k elõñ men ko rekabũrom̦õjm̦õj, aolep rar m̦õn̦õn̦õ in roñ kõn ennaan eo bwe juon iien aolep apañ ko renaaj jako im aolep renaaj mour ilo aenõm̦m̦an.” Arthur Claus ear je im ba: “Aolep ro ilo eklejia eo rar lukkuun bwilõñ kõn an lukkuun lõñ armej rar kõn̦aan bwe bok eo en etal aolep iien bwe ren riiti.” Ilowaan wõt ruo allõñ ke ear jino wal̦o̦ktok bok eo The Golden Age, kar leto letak enañin jimattan milien kaape, im ewõr 50,000 armej ro rar kõn̦aan bwe kaape in bok in en etal aolep iien bwe ren riiti.

Jeid im Jatid A. H. Macmillan ear ba bwe katak eo etan “Ennaan eo Em̦m̦an kõn Aelõñ Eo,” ilo juon Naan in Keeañ an Jul̦ae 1, 1920, ear “katak eo jinointata me doulul in ear rõjañ aolep ñan kwal̦o̦k naan ipel̦aakin lal̦ in kõn Aelõñ eo an Anij.” Katak in ear rõjañ aolep rũkkapit ro bwe ren “kwal̦o̦k ñan aolep ilo lal̦ in bwe aelõñin lañ epaak.” Rainin, elõñ milien ro rar kobal̦o̦k ippãn rein jatin Kũraij me “em̦õj kõmaroñ er ñan kõm̦m̦ane jerbal in.” Rej kijejeto ilo jerbalin kwal̦o̦k naan ilo aer kõttare iien eo Messaia eo enaaj jol̦o̦k aolep nana jãn lal̦ in.