GEIÕS im Kũrjin ro jet ilo kar tõre ko an rijjilõk ro, rar iioon wãween ko reppen. Ekar wõr ro me rar kajeeded katak ko reriab im kajjioñ kõm̦m̦an jepel ilowaan eklejia eo im kam̦õjn̦o̦ik ro jet. (1 Jon 2:18, 19; 2 Jon 7, UBS) Juon em̦m̦aan etan Diotrepis ear “kõnono n̦ae” rijjilõk Jon im ro jet, im ear jab kõn̦aan karwaineneik Kũrjin ro me rar lotok eklejia eo. L̦ein ear bareinwõt kõn̦aan bwe ro jet ren l̦oor joñak eo an. (3 Jon 9, 10) Kar eñin men eo ear wal̦o̦k ke Jon ear jejel̦o̦k ñan Geiõs. Ear je lõta eo an ilo kar iiõ eo 98, im lõta in an ewal̦o̦k ilo bokin jilu Jon.

Meñe Geiõs ear iioon wãween kein reppen ak ear wõnm̦aanl̦o̦k wõt ilo an karejar ñan Jeova im tiljek ñane. Ewi wãween an kar kwal̦o̦k an tiljek? Etke jekõn̦aan bar anõke joñak in an Geiõs ilo raan kein? Im ewi wãween an lõta eo an Jon maroñ jipañ kõj ñan kõm̦m̦ane men in?

Eo ear je bokin 3 Jon ear jeje kõn e make im ba “ña elder.” Ejjel̦o̦k pere bwe ke Geiõs ej lo naan kein, ear kile bwe rijjilõk Jon eo ear jeje ñane. Jon ear ba bwe Geiõs ej juon eo ‘ejitõnbõro ippãn, eo em̦ool an yokwe.’ Innem ear ba ej kõjatdikdik bwe em̦m̦an an Geiõs mour ãinwõt an em̦m̦an im kajoor tõmak eo an. Alikkar bwe Jon ear lukkuun yokwe im nõbar Geiõs ilo an kar kwal̦o̦k naan kein.​—3 Jon 1, 2, 4.

Geiõs emaroñ kar juon em̦m̦aan eo ej lale eklejia, bõtab lõta in ejjab lukkuun kwal̦o̦k kõn men in. Jon ear nõbar Geiõs kõn an kar karwaineneik rũttõmak ro jein im jatin meñe ear jab lukkuun jel̦ã kajjier. Ear ba bwe men in ear kam̦ool an Geiõs tiljek kõnke ad kwal̦o̦k karwainene ej juon iaan kõkal̦l̦e ko kõkal̦l̦en rũkarejar ro an Anij.​—Jen. 18:1-8; 1 Ti. 3:2, UBS; 3 Jon 5.

Naanin kam̦m̦oolol ko an Jon ñan Geiõs kõn an kar kwal̦o̦k karwainene ñan rũttõmak ro jein im jatin, rej kaalikkar bwe ekkã an Kũrjin ro etal jãn ijo Jon ej jokwe ie ñan lol̦o̦k eklejia ko jet. Im ejjel̦o̦k pere bwe rein rekõn kwal̦o̦k ñan Jon kõn ta ko rar iiooni ilo ial̦ eo aer. Bõlen eñin wãween an kar Jon jel̦ã ennaanin eklejia kein im ta ko rej wal̦o̦k ie.

Kũrjin rein me ekkã aer itoitak rar kõn̦aan kiki ippãn rũttõmak ro jet m̦õttaer. Ilo kajjojo bukwõn, ekar wõr im̦õn jokwe ko me ruwamãejet ro remaroñ kõl̦l̦ã on̦ãn aer kiki ie, bõtab rekar jab em̦m̦an kõnke ro rej jerbal ilo m̦õkein enana aer jerbal im lale ro rej jokwe ie, im rekar jikin an ro jet kõm̦m̦ani m̦anit ko rettoon. Kõn men in, ruwamãejet ro me rekõn itoitak im ewõr m̦õttaer ilo jikin kein, ekkã aer kõn̦aan jokwe ippãn ro m̦õttaer. Im Kũrjin ro  rar kõn̦aan jokwe ippãn rũttõmak ro jeier im jatier.

Rijjilõk Jon ear rõjañ Geiõs ñan bar kwal̦o̦k karwainene kõnke ear kajjitõk bwe en “jipañ [ro rar itoitak] bwe ren wõnm̦aanl̦o̦k wõt ilo ial̦ eo aer ilo wãween eo enaaj kabuñbũruon Anij.” Mel̦el̦ein men in bwe ear aikuj jipañ rein kõn aikuj ko aer im lel̦o̦k aolep men ko rein renaaj aikuji ilo ial̦ eo aer ñan ijo rej jibadekl̦o̦k. Alikkar bwe Geiõs ear bar kõm̦m̦ane men in m̦oktal̦o̦k ñan ro rar lol̦o̦k e kõnke ke rein rar bar jepl̦aak ippãn Jon, rar kwal̦o̦k kõn an kar Geiõs karwaineneik er im an kajoor tõmak eo an.​—3 Jon 3, 6, UBS.

Ro rar lol̦o̦k Geiõs emaroñ kar mijinede ro, ro rar bõkl̦o̦k ennaan ko an Jon, ak ro rar lol̦o̦k eklejia ko. Jekdo̦o̦n jerbal ta eo an kar rilotok rein, ak rar itoitak ñan kwal̦o̦k kõn nuuj eo em̦m̦an. Jon ear ba: “Bwe kõn Ãt eo, rar ilo̦k.” (3 Jon 7) Ke Jon ear ba men in, ear jitõñl̦o̦k ñan Anij (lale eoon 6), innem naan kein “bwe kõn Ãt eo” rej jitõñl̦o̦k ñan ãt eo etan Jeova. Kõn men in, rein me rar lol̦o̦k Geiõs rar bar m̦õttan eklejia eo an Kũrjin ro im ej tõllo̦kier bwe ro jeier im jatier ren kwal̦o̦k karwainene ñan er. Ej alikkar men in ilo naan ko an Jon ke ear ba: “Innem kõj, ro rũttõmak, jej aikuj jipañ armej rein, bwe jen bareinwõt bõk kun̦aad ilo jerbal eo aer ñan m̦ool eo.”​—3 Jon 8, UBS.

Jon ear jab je lõta eo an ñan baj kwal̦o̦k wõt an kam̦m̦oolole Geiõs. Jon ear bar kõn̦aan jipañ Geiõs ñan kõm̦adm̦õde juon apañ el̦ap me ear wal̦o̦k. Juon iaan ro uwaan eklejia eo an Kũrjin ro etan Diotrepis, ear jab kõn̦aan kwal̦o̦k karwainene ñan Kũrjin ro me rar itoitak. Im l̦ein ear bar bõbraik ro jet jãn aer kwal̦o̦k karwainene.​—3 Jon 9, 10.

Ejjel̦o̦k pere bwe Kũrjin ro retiljek reban kar kõn̦aan jokwe ippãn Diotrepis meñe ear pel̦l̦o̦k m̦weo im̦õn ñan aer jokwe ie. L̦ein ear kõn̦aan bwe en utiejtata ilo eklejia eo, ear m̦akoko in roñjake Jon im jab kautieje, im ear ruruwe im kananaik rijjilõk ro im ro jet. Meñe Jon ear jab ba bwe Diotrepis ear juon rũkaki eriab, ak Diotrepis ear jum̦ae maroñ eo an rijjilõk ro. Kõn an kar kõn̦aan bwe en utiej jãn ro jet im kwal̦o̦k wãween ko rejjab jim̦we, men in ear kaalikkar an jab tiljek. Waanjoñak in an Diotrepis ej kwal̦o̦k bwe ro me eutiej bũrueer im rekõn̦aan bwe ren utiej jãn ro jet, remaroñ kõm̦m̦an bwe en wõr jepel ilowaan eklejia eo. Kõn men in, Jon ear jiroñ Geiõs im bareinwõt kõj ilo raan kein im ba: “Kwõn jab kajjioñe eo enana.”​—3 Jon 11.

Jon ear kwal̦o̦k kõn juon Kũrjin etan Demitriõs me em̦m̦an joñak eo an im ear jab ãinwõt Diotrepis. Jon ear ba: “Armej otemjej rej kõnono em̦m̦an kõn Demitriõs . . . Kõmij bareinwõt rejetak kõnnaan kein kõn e, im kwõjel̦ã bwe men eo kõmij ba em̦ool.” (3 Jon 12, UBS) Demitriõs emaroñ kar aikuji jipañ eo an Geiõs, innem bõlen bokin 3 Jon emaroñ kar juon wãween ñan an rijjilõk Jon kwal̦o̦k kajjien Demitriõs, im kaalikkar bwe ej juon armej remaroñ lõke im kõjerbale. Im emaroñ kar Demitriõs eo ear bõkl̦o̦k lõta in ñan Geiõs. Innem ãinwõt juon iaan ro rar bõkl̦o̦k ennaan ko an Jon ak bõlen juon eo ej lol̦o̦k eklejia ko, Demitriõs emaroñ kar kam̦ool naan ko Jon ear jei ilo lõta eo an.

Etke Jon ear rõjañ Geiõs bwe en wõnm̦aanl̦o̦k wõt im kwal̦o̦k karwainene meñe em̦õj an kar kõm̦m̦ane men in m̦oktal̦o̦k? Jon ear ke kile bwe eaikuj kaperanl̦o̦k Geiõs? Ear ke inepata bwe Geiõs enaaj kar kiiõ mijak kõnke ear jel̦ã bwe Diotrepis ej jol̦o̦k Kũrjin ro jãn eklejia eo ñe rej kwal̦o̦k karwainene? Jekdo̦o̦n ta ko emaroñ kar inepata kaki, ak Jon ear kakeememej Geiõs ilo an kar ba: “Jabdewõt eo ej kõm̦m̦an em̦m̦an, ej an Anij.” (3 Jon 11, UBS) Eñin ej un eo em̦m̦antata unin ad aikuj wõnm̦aanl̦o̦k wõt im kõm̦m̦ani men ko rem̦m̦an.

Lõta eo an Jon ear ke kõm̦akũt Geiõs ñan an  wõnm̦aanl̦o̦k wõt im kwal̦o̦k karwainene? Eokwe, kõnke bokin 3 Jon ej m̦õttan bok ko ilo Baibõl̦ me rej kakũrm̦ool an Anij im armej ro rej kõjerbale wõt ñan rainin ñan rõjañ ro jet bwe ren “kõm̦m̦an em̦m̦an,” men in ej kaalikkar bwe lõta in an Jon ear jipañ Geiõs.

Ejjab lukkuun l̦ap an Baibõl̦ kwal̦o̦k kõn em̦m̦aan in jeid im jatid ejitõnbõro etan Geiõs. Im meñe jidik wõt an Baibõl̦ kwal̦o̦k kõn mour eo an, ak mel̦el̦e kein kar jei kõn e remaroñ jipañ kõj ilo elõñ wãween ko.

Kein kajuon, el̦ap ad kam̦m̦oolol ro retiljek me rar itok jãn ijoko jikier ñan jipañ kõj bwe jen jel̦ã kõn m̦ool eo. Ejjab aolep ro uwaan eklejia eo an Kũrjin ro rainin rej etal ñan ijoko rettol̦o̦k ñan kwal̦o̦k kõn ennaan eo em̦m̦an. Bõtab ãinwõt Geiõs, jemaroñ kwal̦o̦k ad rejetak im rõjañ ro me rej itoitak ñan jikin ko jet, ãinwõt em̦m̦aan eo ej lol̦o̦k eklejia ko im kõrã eo ippãn. Ak bõlen jemaroñ bar jipañ im rejetak ro jeid im jatid me rar em̦m̦akũt ñan bukwõn ko jet ilo aelõñ eo jej pãd ie ak ñan aelõñ ko jet ñan aer jipañ ijo el̦ap aikuj rukwal̦o̦k naan ie. Innem, jen wõnm̦aanl̦o̦k wõt im kwal̦o̦k karwainene ñan ro jet.​—Rom 12:13, UBS; 1 Ti. 5:9, 10.

Kein karuo, jejjab aikuj bwilõñ el̦aññe jet iien ewõr ro ilo eklejia ko ad ilo raan kein me rej jum̦ae im rekõn̦aan bwe ren utiej jãn ro jet. Ewõr ro me rar bar jum̦aik maroñ eo an Jon im bareinwõt rijjilõk Paul. (2 Ko. 10:7-12; 12:11-13) Innem, ta eo jemaroñ kõm̦m̦ane ñe jej iioon ejja wãween kein reppen jãn ro ilowaan eklejia eo? Paul ear rõjañ Timote im ba: “Im rũkarejeran Irooj, en jab akwããl, a en jouj ñan armej otemjej im pojak in katakin armej, en meanwõd, ilo ineem̦m̦an en kajim̦we ro rej jum̦ae.” El̦aññe jej ineem̦m̦an im meanwõd wõt meñe ro jet rej kalluuk kõj, jidik kõn jidik men in enaaj kõm̦akũt rein ñan kõm̦m̦an oktak. Ilo wãween in, Jeova emaroñ “lel̦o̦k ñan er ukel̦o̦k bwe ren jel̦ã m̦ool.”​—2 Ti. 2:24, 25.

Kein kajilu, jej aikuj kwal̦o̦k ad kile im nõbar ro jeid im jatid me rej tiljek wõt ñan Jeova meñe rej iioon jum̦ae. Rijjilõk Jon ear kakeememej im rõjañ Geiõs bwe men eo ej kõm̦m̦ane ejim̦we. Ãindeinl̦o̦k wõt, em̦m̦aan ro rej lale eklejia ilo raan kein, rej aikuj l̦oor joñak in an Jon ilo aer rõjañ ro jeier im jatier bwe ren “jab m̦õk.”​—Ais. 40:31, UBS; 1 Te. 5:11.

Lõta eo an rijjilõk Jon ñan Geiõs ej bok eo ekadutata ilo Baibõl̦ kõnke ewõr 219 wõt naan ko ie ilo jeje ko ilo kajin Grik. Meñe ãindein, ak bok in el̦ap an aorõk im wõr tokjãn ñan Kũrjin ro ilo raan kein.