1, 2. (1) Wõn ro m̦oktata me naan ko an Jijej ilo Matu 24:12 rar jitõñl̦o̦k ñan er? (2) Ewi wãween an bokin Jerbal kwal̦o̦k bwe enañin aolep Kũrjin ro rar kwal̦o̦k wõt yokwe? (Lale pija eo itulõñ.)

 JUON iaan men ko Jijej ear ba bwe ej kõkal̦l̦en raan ko ãliktata, ej bwe “enaaj m̦õl̦ol̦o̦k yokwe an elõñ armej.” (Matu 24:3, 12, UBS) RiJu ro ilo kar raan ko an rijjilõk ro me rar ba bwe rej armej ro an Anij, rekar kõtl̦o̦k bwe yokwe eo aer ñan Anij en m̦õl̦ol̦o̦k ak dikl̦o̦k.

² Bõtab, enañin aolep Kũrjin ro ilo kar tõre eo rar poub wõt ilo aer “kwal̦o̦k kõn Ennaan eo Em̦m̦an kõn Jijej Messaia eo,” im rar kwal̦o̦k aer yokwe Anij im rũttõmak ro m̦õttaer, ekoba ro rejjañin kar jel̦ã m̦ool eo. Kũrjin rein rar kõm̦m̦ani men ko me rar kõkajoor yokwe eo aer ñan Anij. (Jrb. 2:44-47; 5:42, UBS) Ak ekabũrom̦õjm̦õj bwe ewõr jet iaan Kũrjin ro ilo tõre eo rar kõtl̦o̦k bwe yokwe eo aer en m̦õl̦ol̦o̦k.

3. Ta eo emaroñ kar kõm̦m̦an bwe en m̦õl̦ol̦o̦k yokwe eo an jet iaan Kũrjin ro?

³ Ke Jijej Kũraij ear kõnnaan ñan Kũrjin ro ilo kar Epesõs ãlikin an kar jerkakpeje, ear ba bwe ‘rejjab yokwe Anij kiiõ ãinwõt kar m̦okta.’ (Rev. 2:4, UBS) Ta eo emaroñ kar kõm̦m̦an bwe en m̦õl̦ol̦o̦k  yokwe eo aer? Bõlen rũkal̦oor ro an Kũraij ilo tõre eo rar po ilo l̦õmn̦ak ko an armej ro rej jokwe ibwiljier me el̦ap wõt aer kar kõn̦aan kabuñbũrueer make. (Ep. 2:2, 3) Epesõs ear juon jikin em̦weiie ãinwõt elõñ iaan bar jikin ko ilo raan kein, im armej ro ie el̦apl̦o̦k aer kar kaorõk m̦weiuk ko, menin kam̦õn̦õn̦õ ko, im an em̦m̦an kõjeiier. El̦apl̦o̦k aer kar l̦õmn̦ak kõn aer kam̦õn̦õn̦õik er make jãn aer kwal̦o̦k aer yokwe Anij im ro jet. Bareinwõt, armejin Epesõs rar jab kaorõk kien ko an Anij im el̦ap aer kar mourin l̦õñ im ejej.

4. (1) Ewi wãween an m̦õl̦ol̦o̦k yokwe eo an elõñ ilo raan kein ad? (2) Ta men ko jilu jej aikuj kate kõj ie ñan kõm̦m̦an bwe yokwe eo ad en kajoor wõt?

⁴ Kanaan eo an kar Jijej kõn an naaj dikl̦o̦k an armej yokwe ej wõnm̦aanl̦o̦k wõt ilo raan kein ad. Armejin raan kein ejjab l̦apl̦o̦k ak ej dikl̦o̦k wõt aer yokwe Anij. Elõñ milien armej em̦õj aer el̦l̦o̦k jãn e im reilo̦k ñan kien im doulul ko an armej bwe ren n̦amejal̦an apañ ko aer. Kõn men in, yokwe eo an armej ro me rejjab kabuñ ñan Jeova, ej m̦õl̦ol̦o̦k wõt. Bõtab ãinwõt kar eklejia eo ilo Epesõs, Kũrjin ro rem̦ool ilo raan kein remaroñ bar jino jubũrueer kõn mour eo aer im kõtl̦o̦k bwe yokwe eo aer en m̦õl̦ol̦o̦k. Innem, em̦m̦an bwe jen etale jilu men ko me jej aikuj kate kõj ie ñan kõm̦m̦an bwe yokwe eo ad en kajoor wõt. (1) Yokwe eo ad ñan Jeova, (2) yokwe eo ad ñan m̦ool eo me jaar katak jãn Baibõl̦, (3) im yokwe eo ad ñan ro jeid im jatid.

5. Etke jej aikuj yokwe Anij?

⁵ M̦oktal̦o̦k, ilo ejja kar raan eo wõt me Jijej ear kanaan bwe enaaj dikl̦o̦k an armej yokwe, ear kaalikkar wõn eo el̦aptata ad aikuj yokwe. Ear ba: “‘Kwõn yokwe Irooj am̦ Anij kõn aolepen bũruom̦, im kõn aolepen am̦, im kõn aolepen am̦ l̦ol̦ãtãt.’ Kien eo el̦aptata im aorõktata in.” (Matu 22:37, 38, UBS) Alikkar bwe ad lukkuun yokwe Anij enaaj jipañ kõj ñan pokake kien ko an im ñan kijenmej im dike men ko renana. (Riit Sam 97:10.) Bõtab, Setan im lal̦ in an rej kajjioñ kõm̦m̦an bwe en dikl̦o̦k im jako ad yokwe Anij.

6. Ta eo ej wal̦o̦k ñe ejako an armej yokwe Anij?

⁶ Armej ro ilo lal̦ in ebõd wãween aer l̦õmn̦ak kõn yokwe. Ijello̦kun aer yokwe Anij, rej “yokwe er make.” (2 Ti. 3:2) Lal̦ in me ej pãd ium̦win tõl eo an Setan, el̦ap an kowõnm̦aanl̦o̦k “m̦õm̦ an kanniõk, m̦õm̦ an mej ko im wuj waan an mour in.” (1 Jon 2:16) Rijjilõk Paul ear kakkõl Kũrjin ro m̦õttan bwe ren kõjparok er jãn aer kabuñbũrueer make ilo an kar ba: “L̦õmn̦ak an kanniõk mej . . . Bwe l̦õmn̦ak an kanniõk ej kõjdate Anij.” (Rom 8:6, 7) Armej ro me el̦ap aer jol̦o̦k aolep iien ko aer ñan jibadek m̦weiuk ko ak kajejjet kõn̦aan ko aer renana im rettoon, ekkã aer iioon jorrããn im bũrom̦õj tokãlik.​—1 Ko. 6:18; 1 Ti. 6:9, 10.

7. Ta l̦õmn̦ak eo ekauwõtata me rũkal̦oor ro an Kũraij ilo raan kein rej jelm̦aiki?

⁷ Ilo jet aelõñ, ewõr ro me rejjab tõmak ilo Anij, ro rej pere bwe ewõr Anij, im ro rej tõmak bwe armej rar itok jãn menninmour. Armej rein rej kajeeded l̦õmn̦ak ko me rej kõm̦m̦an an ro jet jab yokwe Anij im tõmak bwe ewõr Anij. Ilo an rein kajjioñ kareel armej ro, ej ãinwõt ñe rej ba bwe armej ro wõt rebwebwe im rar jab kam̦õj aer jikuul̦ rej tõmak bwe ewõr juon Rũkõm̦anm̦an. Bareinwõt, elõñ armej el̦apl̦o̦k aer kautiej jaintiij ro jãn Rũkõm̦anm̦an eo. (Rom 1:25, UBS) Jej aikuj kõjparok kõj jãn l̦õmn̦ak im katak ko an armej rein kõnke remaroñ jelõt kõj. Men in emaroñ kam̦õjn̦o̦ikl̦o̦k jem̦jerã eo ad ippãn Jeova im kõm̦m̦an bwe yokwe eo ad en m̦õl̦ol̦o̦k.​—Hi. 3:12, UBS.

8. (1) Ta apañ ko remaroñ kõm̦m̦an bwe armej ro an Jeova ren ebbeer? (2) Ta naanin kaenõm̦m̦an ko rej pãd ilo bokin Sam 136?

⁸ Bar juon men me emaroñ kam̦õjn̦o̦ikl̦o̦k tõmak eo ad im kõm̦m̦an bwe en m̦õl̦ol̦o̦k yokwe ad ñan Anij, ej ñe jej kõtl̦o̦k bwe jen ebbeer. Ilo lal̦ in enana me ej pãd ium̦win pein Setan, ewõr iien ko kõj aolep jej iioon wãween  ko rekabbeerer. (1 Jon 5:19, UBS) Bõlen ilo tõre in, jej iioon apañ kõn ad lukkuun rũtto, wõr ad nañinmej, ak apañ kõn an jabwe jããn. Ak bõlen jemaroñ ebbeer kõn ad l̦õmn̦ak bwe ejabwe kapeel im jel̦ã ippãd, kõn an jab tõprak men ko jaar kõtmãne kaki, ak kõn ad kar kõm̦m̦an bõd. Bõtab, jejjab aikuj kõtl̦o̦k bwe aolep wãween kein ak eñjake ko rekabbeerer ren kõm̦m̦an ad l̦õmn̦ak bwe em̦õj an Jeova el̦l̦o̦k jãn kõj. Jãn ad ãindein, jen kõl̦mãnl̦o̦kjen̦ kõn naanin kaenõm̦m̦an ko me rej kaalikkar an Jeova lukkuun yokwe im kaorõk kõj. Jemaroñ lo naan kein ilo Sam 136:23 (UBS), me rej ba: “Ear jab mel̦o̦kl̦o̦k kõj ke jaar buñ . . . An yokwe ej ñan indeeo.” Alikkar bwe yokwe eo an Jeova ñan rũkarejar ro an eban oktak. Kõn men in, jemaroñ lõke bwe ej roñjake ñe jej “akwel̦ap” im kajjitõk bwe en jipañ kõj im bwe enaaj uwaaki jar ko ad.​—Sam 116:1; 136:24-26, UBS.

9. Ta eo ear jipañ Paul ñan kõm̦m̦an bwe yokwe eo an ñan Anij en kajoor wõt?

⁹ Ãinwõt rijeje sam eo, Paul ear kõl̦mãnl̦o̦kjen̦ kõn wãween an kar Jeova rejetake, im men in ear jipañe bwe en kajoor wõt. Paul ear je naan kein im ba: “Irooj ej aõ rijjipañ, Ijãmin mijak. Ta eo armej remaroñ kõm̦m̦ane ñan eõ?” (Hi. 13:6, UBS) An kar Paul lukkuun lõke Jeova ear jipañe ñan kijenmej kõn jabdewõt apañ ear iioone. Ear jab kõtl̦o̦k bwe wãween ko renana ren kabbeere. Meñe ear pãd ilowaan kalbuuj, ak ear je lõta ko rekõketak ñan eklejia ko im Kũrjin ro m̦õttan. (Ep. 4:1, UBS; Pil. 1:17, UBS; Pai. 1) Bareinwõt, jekdo̦o̦n ta apañ ko Paul ear iiooni, ak ear jab bõjrak jãn an kõkajoor yokwe eo an ñan Anij. Ta eo ear jipañe bwe yokwe eo an ñan Anij en kajoor wõt? Ej ilo an kar wõnm̦aanl̦o̦k wõt im atartar ioon ‘Anij in aenõm̦m̦an otemjej, Eo ej kaenõm̦m̦ane kõj ilo ad jorrããn otemjej.’ (2 Ko. 1:3, 4) Ewi wãween ad maroñ anõke joñak eo an Paul im kõkajoor wõt yokwe eo ad ñan Jeova?

10. Ewi wãween ad maroñ kõkajoor wõt yokwe eo ad ñan Jeova?

¹⁰ Paul ear bar kwal̦o̦k kõn juon wãween me jemaroñ kõm̦m̦ane ñan kõkajoor yokwe eo ad ñan Jeova, ilo an kar ba: “En jab jokwõd ami jar.” Im tokãlik ear bar je: “Kom̦win niknik ilo jar.” (1 Te. 5:17; Rom 12:12) Ad kõnono ippãn Anij ikijjeen ad jar ñan e ej kõm̦m̦an bwe en epaakl̦o̦k jem̦jerã eo ad ippãn Jeova. (Sam 86:3) Ñe jej lukkuun bõk ad iien im kwal̦o̦k aolepen bũruod im eñjake ko ad ñan Jeova, men in ej jipañ kõj ñan ruwaakl̦o̦k ñan Jemãdwõj ilañ, eo wõt ej “roñjake jar” ko. (Sam 65:2) Bareinwõt, ñe jej kile bwe Jeova ej uwaaki jar ko ad, enaaj l̦apl̦o̦k ad yokwe E. Jej lukkuun lõke bwe “Jeova ej epaak ñan er otemjej rej kũr ñan E.” (Sam 145:18) Ad lukkuun tõmak bwe Jeova ej yokwe im rejetake kõj enaaj jipañ kõj ñan kijenmej kõn jabdewõt apañ jemaroñ iioone kiiõ im ilju im jekl̦aj.

11, 12. Ewi wãween ad kam̦wilal̦l̦o̦k ad yokwe m̦ool eo jãn Baibõl̦?

¹¹ Ãinwõt ro rej Kũrjin, el̦ap ad kaorõk m̦ool eo. Naanin Anij ej wũnjãn m̦ool otemjej. Ke Jijej ear jar ñan Jemãn, ear ba: “Am̦ in naan m̦ool eo.” (Jon 17:17) Innem bwe jen maroñ yokwe m̦ool eo, jej aikuj in m̦okta jel̦ã ta eo Baibõl̦ ej ba. (Kol. 1:10, UBS) Bõtab, ijello̦kun ad baj katak ñan jel̦ã wõt, ewõr bar juon men jej aikuj kõm̦m̦ane. Eo ear je Sam 119 ej jipañ kõj ñan mel̦el̦e ta eo jej aikuj kõm̦m̦ane bwe jen maroñ yokwe m̦ool eo jaar katak jãn Baibõl̦. (Riit Sam 119:97-100, UBS.) Ñe jej riit Baibõl̦ kajjojo raan, jej ke bõk iien im kõl̦mãnl̦o̦kjen̦ kõn eoon ko jaar riiti, ilo aolepen raan eo? Ilo ad kõl̦mãnl̦o̦kjen̦ kõn ewi wãween ad maroñ l̦oore eoon ko jãn Baibõl̦ ilo mour ko ad, enaaj l̦apl̦o̦k ad yokwe im kaorõk m̦ool eo.

¹² Rijeje sam ear wõnm̦aanl̦o̦k wõt im  ba: “Enañin tõñal naan ko Am̦ ñe I edjoñi, aet retõñal jãn honey ilo lo̦ñiũ.” (Sam 119:103) Ilo ejja wãween in wõt, bok ko im katak ko rej pedped ioon Baibõl̦ me doulul in ej kõpooji im litok ñan kõj rej ãinwõt m̦õñã ko retõñal im renno̦. Ñe jej m̦õñã m̦õñã ko renno̦, jej lukkuun bõk ad iien im m̦õñã. Ejjel̦o̦k oktak jãn ñe jej katak, jen lukkuun bõk ad iien im mootl̦o̦k ad iien ippãn katak ko. Ilo wãween in, enaaj pidodo ad keememej wõt “naan ko rem̦m̦an” ilo Baibõl̦ me jej riiti im kõjerbali ñan jipañ ro jet.​—Ekl. 12:10.

13. Ta eo ear jipañ Jeremaia ñan yokwe m̦ool eo jãn Naanin Anij, im ewi wãween an kar men in jelõt e?

¹³ Rũkanaan Jeremaia ear yokwe m̦ool eo jãn Naanin Anij. L̦õmn̦ak m̦õk kõn wãween an kar naan ko an Anij jelõt bũruon! Ear ba: “Em̦õj lo naan ko Am̦ im iar kañi, im naan ko Am̦ rar ñan eõ menin m̦õn̦õn̦õ im lañlõñ an bũruõ, bwe em̦õj n̦a eta kõn Etam̦, O Jeova Anij in inelep.” (Jer. 15:16) Ilo kõkkar, Jeremaia ear kañi naan ko raorõk an Anij im bõk an iien ñan mei. Ewi wãween? Ikijjeen an kar kõl̦mãnl̦o̦kjen̦ kaki. Ilo wãween in, ear l̦apl̦o̦k an kam̦m̦oolol kõn jeraam̦m̦an eo ñan jutak ikijjeen etan Jeova im keeañ kõn ennaan eo An. El̦aññe jej yokwe m̦ool eo jãn Baibõl̦, jenaaj kile bwe ej juon jeraam̦m̦an el̦ap ñan bõk ãt eo etan Anij ãinwõt Ri Kõnnaan ro an Jeova im ñan kwal̦o̦k naan kõn Aelõñ eo an ilo raan kein ãliktata.

14. Ewi wãween ad maroñ kal̦apl̦o̦k ad yokwe m̦ool eo jaar katak jãn Baibõl̦?

¹⁴ Ijello̦kun ad riiti Baibõl̦ im bok ko ad me rej pedped ioon Baibõl̦, ta ko jet remaroñ bar jipañ kõj ñan kam̦wilal̦l̦o̦k ad yokwe m̦ool eo? Jemaroñ bar kal̦apl̦o̦k ad yokwe m̦ool eo jaar katak jãn Baibõl̦ ikijjeen ad keini ad pãd ilo kweilo̦k ko. Katak eo kõn Naan in Keeañ me jej katak kajjojo wiik ej wãween eo el̦aptata Jeova ej katakin kõj. Kõn men in, bwe jen maroñ lukkuun mel̦el̦e kõn unin tõl in katak eo jenaaj katak kake ilo iien ad etale Naan in Keeañ eo, jej aikuj in kõpooje l̦o̦k im̦aan. Juon wãween jemaroñ kõm̦m̦ane men in ej ikijjeen ad lale aolep eoon ko ilo katak eo. Rainin, jemaroñ kiiõ taunl̦outi Naan in Keeañ eo jãn Weep jait eo jw.org, im bareinwõt ilo JW Library app eo ilo elõñ kajin ko. Ilo jet kajin, kwõmaroñ taunl̦outi Naan in Keeañ eo ñan kampiutõr im tablet eo nejũm̦ jãn jet bũrookraam̦, me rej kõm̦m̦an bwe en pidodo am̦  riiti im lo kobban eoon ko. Bõtab jekdo̦o̦n ta kõl ko jej kõm̦m̦ani ñan ad katak, ak ad bõk ad iien im riiti eoon kein im kõl̦mãnl̦o̦kjen̦ kaki enaaj kam̦wilal̦l̦o̦k ad yokwe m̦ool eo jaar katak jãn Baibõl̦.​—Riit Sam 1:2, UBS.

15, 16. (1) Ekkar ñan Jon 13:34, 35, ta eo Jijej ear kakien kõj ñan kõm̦m̦ane? (2) Ewi wãween an yokwe eo ad ñan ro jeid im jatid ekkejell̦o̦k ippãn yokwe eo ad ñan Anij im Baibõl̦ eo?

¹⁵ Ilo boñõn eo ãliktata in an kar Jijej mour ioon lal̦ in, ear ba ñan rũkal̦oor ro an: “Kien ekããl Ij lewaj ñan kom̦, kom̦win yokwe doon; ãinwõt Iar yokwe kom̦, kom̦win bareinwõt yokwe doon. Ilo men in armej otemjej renaaj jel̦ã bwe kom̦ij rũkal̦oora, el̦aññe kom̦ij yokwe doon.”​—Jon 13:34, 35.

¹⁶ Ad yokwe ro jeid im jatid ej ekkejell̦o̦k ippãn yokwe eo ad ñan Jeova. El̦aññe jejjab yokwe Anij, jejjab maroñ yokwe ro jeid im jatid. Im el̦aññe jejjab yokwe ro jeid im jatid, jejjab maroñ yokwe Anij. Rijjilõk Jon ear je naan kein im ba: “El̦aññe armej ej ba, ‘Ña ij yokwe Anij,’ im ej kõjdate jein im jatin, e rũriab; bwe eo ejjab yokwe jein im jatin eo ear lo e, eban yokwe Anij eo ear jab loe.” (1 Jon 4:20) Bareinwõt, yokwe eo ad ñan Jeova im yokwe eo ad ñan ro jeid im jatid rej juon wõt ippãn yokwe eo ad ñan Naanin Anij, Baibõl̦ eo. Etke? Kõnke ad yokwe m̦ool eo ej kõm̦akũt kõj ñan pokake kien ko ilo Baibõl̦ me rej ba bwe jen yokwe Anij im yokwe ro jeid im jatid.​—1 Pi. 1:22; 1 Jon 4:21.

17. Ta jet iaan wãween ko me jemaroñ kõm̦m̦ani ñan kwal̦o̦k yokwe?

¹⁷ Riit 1 Tessalonika 4:9, 10, UBS. Ta jet iaan wãween ko jemaroñ kõm̦m̦ani ñan kwal̦o̦k yokwe ñan ro ilo eklejia eo ad? Eokwe, bõlen juon iaan l̦al̦l̦ap ak lel̦l̦ap ro ilo eklejia eo eaikuj ial̦ ñan kweilo̦k im ial̦an an ro̦o̦l jãn kweilo̦k. Ak bõlen juon jeid im jatid kõrã me emej l̦eo pãleen eaikuj jipañ ñan kõm̦m̦ane jikin ko rejorrããn ilo m̦weo im̦õn. (Jem. 1:27) Bareinwõt ewõr ro jeid im jatid, ro redik im ro rerũtto jim̦or me rej ebbeer, ak rej bũrom̦õj im l̦õmn̦ak bwe ejjel̦o̦k tokjãer, ak rej iioon mãlejjoñ ko reppen. Rein el̦ap aer aikuj naanin kaenõm̦m̦an im rõjañ im ad kwal̦o̦k yokwe ñan er. (JK. 12:25, UBS; Kol. 4:11) Jej kwal̦o̦k bwe jelukkuun yokwe “ro rej nukũd im m̦õttad ilo tõmak” ilo wãween ad kõnono im kõm̦m̦an ñan er.​—Ga. 6:10, UBS.

18. Ta eo enaaj jipañ kõj ñan kõm̦adm̦õd apañ ko redik rej wal̦o̦k ikõtaad im rũttõmak ro m̦õttad?

¹⁸ Baibõl̦ ear kanaan bwe ilo “raan ko ãliktata” an jukjukun pãd in enana, enaaj l̦ap an armej l̦õmn̦ak kõn er make im kũbbon̦. (2 Ti. 3:1, 2) Ãinwõt ro rej Kũrjin, jej aikuj kate kõj ñan kal̦apl̦o̦k ad yokwe Anij im ad yokwe m̦ool eo jaar katak jãn Baibõl̦, im bareinwõt kal̦apl̦o̦k ad yokwe doon. Em̦ool bwe kõn ad jab weeppãn, enaaj wõr iien jenaaj illu im jab errã ippãn ro jeid im jatid. Ak kõnke jej yokwe doon, jenaaj kate kõj ñan kõm̦adm̦õde apañ eo ikõtaad ilo wãween eo ejouj im ilo iien eo em̦õkajtata! (Ep. 4:32; Kol. 3:14, UBS) Kõn men in, jen kate kõj im jab kõtl̦o̦k bwe yokwe eo ad en m̦õl̦ol̦o̦k! Im jen wõnm̦aanl̦o̦k wõt ilo ad lukkuun yokwe Jeova, Naan eo an, im ro jeid im jatid.