JESUS ear kanaan bwe rũkal̦oor ro an renaaj m̦õn̦õn̦õ kõn juon jonikkan el̦ap ilo jem̦l̦o̦kin jukjukun pãd in. (Matu 9:37; 24:14) Elukkuun alikkar an naan ko an jejjet im m̦ool ilo juon wãween em̦m̦an ilo jikin eo etan Transcarpathia, ilo aelõñin Ukraine. Ilo bukwõn ko jilu epaake Transcarpathia, ewõr 50 eklejia ko im elõñl̦o̦k jãn 5,400 rukwal̦o̦k naan ro. * (Lale kõmel̦el̦e eo itulal̦.) Elukkuun kabwilõñlõñ bwe 25 bõjjããn in armej ro jãn bukwõn kein jilu rej Ri Kõnnaan ro an Jeova!

Armej ro ilo teretore ko ilo jikin in rej ke itoklimo in roñjake ennaan eo em̦m̦an? Eokwe, juon jeid im jatid em̦m̦aan jãn jikin in etan, Vasile ej ba, “Armej ro ijin el̦ap aer kautiej Baibõl̦, kaorõk ekajet jim̦we, kaorõk baam̦le ko aer, im relukkuun kate er ñan jipañ doon.” Ej bar ba: “Ejjab aolep iien rej errã kõn tõmak eo ad, ak ñe kõmij kwal̦o̦k ñan er juon men jãn Baibõl̦, relukkuun roñjake.”

Bõtab ewõr apañ ko reoktak ro jeid im jatid ijin rej iiooni kõn an lõñ rukwal̦o̦k naan ro. Ñan waanjoñak, ilo juon eklejia ewõr 134 rukwal̦o̦k naan ro ie bõtab ilo teretore ko aer ewõr 50 wõt em̦! Innem ewi wãween an ro jeid in jatid ijin kwal̦o̦k aer jel̦ã ukoktak?

Elõñ ro jeid im jatid rej kate er ñan kwal̦o̦k naan ilo jikin ko jet el̦ap aer aikuj jipañ ie. Juon jeid im jatid em̦m̦aan 90 an iiõ etan Ionash ej ba, “Ilo teretore eo ammim, emaroñ tarrin juon rukwal̦o̦k naan ñan ruo em̦. Kiiõ, kõn aõ nañinmej ij kwal̦o̦k naan ilo bukwõn eo ij jokwe ie. Ak kar m̦okta ikõn uwe ilo train enañin 100 m̦ail̦ ñan jibadekl̦o̦k juon jikin ettol̦o̦k me ejjel̦o̦k rukwal̦o̦k naan ie, im kwal̦o̦k naan ilo kajin Hungary.” Elõñ rukwal̦o̦k naan ro rar aikuj kaarmejjeteik elõñ men ko bwe ren maroñ jipañ ilo teretore ko jet. Ionash ej wõnm̦aanl̦o̦k im ba: “Iar aikuj ruj in 4:00 awa jimmarok bwe in uwe ilo train eo im iar kwal̦o̦k naan ñan 6:00 awa jota im bar uwe ilo train im ro̦o̦l ñan jikin eo ij jokwe ie. Iar l̦oore jikejuul̦ in ruo ak jilu alen kajjojo wiik.” Ionash ear ke ajl̦o̦k kõn an kar kõm̦m̦ane wãween in? Ej uwaak im ba, “Iar lukkuun m̦õn̦õn̦õ kõn wãween in iar kõm̦m̦ane ñan bõk kun̦aõ ilo jerbalin kwal̦o̦k naan, im ear juon jeraam̦m̦an bwe in jipañ juon baam̦le ear jokwe ilo juon jikin ekar ejjel̦o̦k eklejia ie ñan katak kõn m̦ool eo.”

Alikkar bwe ejjab aolep ilo eklejia ko ilo jikin in remaroñ kõm̦m̦ane men in. Bõtab aolep, ekoba ro rerũtto rej kate er bwe en lukkuun lõt aer kwal̦o̦k naan ilo teretore ko an eklejia eo aer. Kõn men in ilo iiõ eo 2017, kobain aolep ro rar itok ñan iien Kwõjkwõjin Keememej Mej eo an Jesus jãn aolep eklejia ko ilo bukwõn kein jilu, ekar ruo alen lõñl̦o̦k jãn oran aolep rukwal̦o̦k naan ro ak jen ba jimattanin oran aolep armej ro rej jokwe ilo bukwõn kein. Aet, jekdo̦o̦n ia eo jej pãd ie, jekõn̦aan bwe jen ‘kijejeto iien otemjej ilo ad jerbal ñan Irooj.’​—1 Ko. 15:58, UBS.