1-3. (1) En kar ewi wãween eñjake eo ad kõn m̦ool eo jaar katak kake ilo Baibõl̦? Kwal̦o̦k juon waanjoñak. (Lale pija ko itulõñ.) (2) Ta kajjitõk ko jenaaj etali ilo katak in?

RAININ, ej juon m̦anit ippãn armej ro ñan wiaik juon m̦weiuk ilo im̦õn wia ko im bar karo̦o̦le. Kar lo bwe ilo jet aelõñ, ewõr joñan in 9 bõjjããn in m̦weiuk ko ri-wia ro rar wiaiki im bar karo̦o̦li. Im joñan m̦weiuk ko kar wiaiki online im karo̦o̦li, elõñl̦o̦k jãn 30 bõjjããn. Bõlen unin an ri-wia ro ãindein ej kõnke ejjab jubũrueer kõn m̦weiuk eo, ak bõlen ejorrããn jidik, ak redike. Kõn men in, rej jãniji m̦weiuk eo ñan bar juon men ak kajjitõk bwe ren bar karo̦o̦le jããn eo aer.

² Meñe jemaroñ kajjitõk bwe ren bar karo̦o̦ltok jããn eo jaar wiaik m̦weiuk ko kaki, bõtab jelukkuun ban kõm̦m̦ane men in kõn m̦ool eo. Ñe em̦õj ad wiaik m̦ool eo, ak katak m̦ool eo, jejãmin bar karo̦o̦le, ak “wiakake.” (Riit Jabõn Kõnnaan 23:23; 1 Ti. 2:4) Ãinwõt ad kar katak ilo katak eo l̦o̦k, juon wãween jaar wiaik m̦ool eo ej ilo ad kar kaarmejjete iien ko ad bwe jen maroñ katak kõn m̦ool eo. Bareinwõt, jaar wiaik m̦ool eo ilo ad kar kaarmejjete jerbal ko rem̦m̦an im l̦ap on̦ãer, kijenmej ke ear oktak kõtaan eo ad ippãn ro jet, ukot wãween l̦õmn̦ak im kõm̦m̦an ko ad, im jol̦o̦k m̦anit im imminene ko rej n̦ae Baibõl̦ eo. Bõtab, joñan on̦ããn eo jaar kõl̦l̦ãiki ak kaarmejjete ñan bõk m̦ool eo, edik  ñe jej keidi ippãn joñan jeraam̦m̦an ko jej loi.

³ Ñe ej itok ñan m̦ool eo, wãween ad eñjake ej ãinl̦o̦k wõt eñjake eo an kar em̦m̦aan eo me Jesus ear kwal̦o̦k kake ilo juon waanjoñak ekadu. Ñan kwal̦o̦k ewi joñan an aorõk m̦ool eo kõn Aelõñ eo an Anij ippãn ro rej kappukote, Jesus ear kwal̦o̦k kõn juon ri-wiakake m̦weiuk me ear kappok bõõr ko rem̦m̦an im ear loe juon. Ilo m̦ool, joñan an l̦ap on̦ããn im aorõk bõõr in, em̦m̦aan in ear m̦õkaj im ‘ilo̦k im wiakake’ aolepen men ko m̦weien bwe en wiaiki. (Matu 13:45, 46) Ejja ãindeinl̦o̦k wõt men eo jaar kõm̦m̦ane ke jaar loe m̦ool eo me ej jitõñl̦o̦k ñan m̦ool eo kõn Aelõñ eo an Anij im aolepen katak ko jet rem̦ool ilo Baibõl̦. Joñan an l̦ap on̦ããn im aorõk m̦ool eo ippãd, jaar m̦õn̦õn̦õ im m̦õkaj in kaarmejjete men ko jet bwe jen maroñ bõke. El̦aññe jenaaj wõnm̦aanl̦o̦k wõt im kaorõke m̦ool eo, jeban “wiakake” ak etal jãne. Bõtab, ekabũrom̦õjm̦õj bwe jet iaan armej ro an Anij ejako aer kaorõke m̦ool eo im em̦õj aer wiakake ak etal jãne. Jen kate kõj bwe men in en jab wal̦o̦k ñan kõj! Ñan kwal̦o̦k bwe el̦ap ad kaorõke m̦ool eo im bwe jejãmin wiakake, jej aikuj in pokake naanin kakapilõklõk eo ilo Baibõl̦ ñan wõnm̦aanl̦o̦k wõt im “etetal ilo m̦ool” eo. (Riit 3 Jon 2-4.) Mel̦el̦ein bwe jej likũt m̦ool eo bwe en men eo m̦oktata ilo mour eo ad im jej kaalikkare men in ilo wãween ad mour. Kiiõ jen etale kajjitõk kein: Etke im ewi wãween an jet maroñ “wiakake” m̦ool eo? Ewi wãween ad maroñ kõjparok bwe jen jab kõm̦m̦ane men in ekabũrom̦õjm̦õj? Ewi wãween ad maroñ kapenl̦o̦k pepe eo ad ñan wõnm̦aanl̦o̦k wõt im “etetal ilo m̦ool” eo?

4. Etke jet iaan ro ilo raan ko an Jesus rar “wiakake” m̦ool eo?

⁴ Ilo kar raan ko an Jesus, ewõr jet ro me ilo jinoin rar m̦õn̦õn̦õ in roñjake katak ko an Jesus ak tokãlik rar jab wõnm̦aanl̦o̦k wõt im etetal ilo m̦ool eo. Ñan waanjoñak, ãlikin an kar Jesus naajdik juon jarlepju ilo kabwilõñlõñ, armej rein rar l̦oore ñan jait eo juon ilo Lom̦al̦o in Galili. Ke rar pãd ijin, Jesus ear ba juon men me ear kailbõk er. Ear ba: “El̦aññe kom̦ij jab m̦õñã kanniõkin Nejin Armej im idaak bõtõktõkin, ejjel̦o̦k mour ilo kom̦.” Ijello̦kun aer kar kajjitõk ippãn Jesus bwe en kõmel̦el̦eik er kõn men in, rar l̦õkatip kõn naan kein an im ba: “Katak kein el̦ap aer pen. Wõn emaroñi?” Kõn men in, “elõñ iaan ro ri-kal̦ooran rar ro̦o̦l jãne im jab bar etetal ippãn.”​—Jon 6:53-66, UBS.

5, 6. (1) Ta unin an kar jet ilo raan kein oktakl̦o̦k jãn m̦ool eo? (2) Ewi wãween an juon armej maroñ jidik kõn jidik jebwãbwe jãn m̦ool eo?

⁵ Ekabũrom̦õjm̦õj bwe ewõr jet ilo bar raan kein em̦õj aer oktakl̦o̦k jãn m̦ool eo. Jet rar l̦õkatip kõn mel̦el̦e eo ad ekããl kõn juon eoon jãn Baibõl̦ ak kõn ta eo juon iaan em̦m̦aan ro rej tõl kõj rar ba ak kõm̦m̦ane. Ro jet rar illu kõn an juon kar lel̦o̦k naanin kauwe ko jãn Baibõl̦ ñan er, ak kõn an kar wal̦o̦k juon apañ el̦ap ikõtaer ippãn juon ilo eklejia eo. Im bar ro jet rar l̦oore ri-jum̦ae ro me rar ilo̦k jãn m̦ool eo im ri-jum̦ae ro jet me el̦ap aer kariab tõmak eo ad. Erkein ej jet iaan un ko unin an kar jet “oktakl̦o̦k” jãn Jeova im eklejia eo. (Hi. 3:12-14, UBS) Enaaj kar em̦m̦anl̦o̦k ñe rein rar kõjparok wõt tõmak eo aer im lõke wõt Jesus ãinwõt kar rijjilõk Piter! Ke Jesus ear kajjitõk ippãn rijjilõk ro el̦aññe er bareinwõt rar kõn̦aan ilo̦k, Piter ear uwaak ilo m̦õkaj im ba: “Irooj, wõn eo kõm naaj ilo̦k ñan ippãn? Ewõr ippam̦ naan ko rej letok mour indeeo.”​—Jon 6:67-69, UBS.

⁶ Ewõr jet me jidik kõn jidik rar jino aer jebwãbwe jãn m̦ool eo im rar jab kile an men in wal̦o̦k ñan er. Juon armej me ej jino jebwãbwe jãn m̦ool eo ej ãinwõt juon wa me jidik kõn jidik ej jino an pemetol̦o̦k. Baibõl̦ ej kakkõl kõj bwe jen kõjparok “bwe jen jab jebwãbwe.” (Hi. 2:1, UBS) Armej eo ej jebwãbwe jãn m̦ool  eo eoktak jidik jãn ro rej oktakl̦o̦k jãn m̦ool eo kõnke ear jab pepe in kõm̦m̦ane men in. Ijoke, armej in ej kõtl̦o̦k bwe en m̦õjn̦o̦l̦o̦k kõtaan eo an ippãn Jeova, im ejjabto emaroñ jako an jem̦jerãik Jeova. Ewi wãween ad maroñ bõbraik men in bwe en jab wal̦o̦k ñan kõj?

7. Ta eo enaaj jipañ kõj bwe jen jab wiakake m̦ool eo?

⁷ Bwe jen etetal wõt ilo m̦ool eo, jej aikuj m̦õn̦õn̦õ in pokake aolep men ko Jeova ej ba. Jej aikuj likũt m̦ool eo bwe en men eo eaorõktata ilo mour ko ad im jej aikuj mour ekkar ñan naanin kakapilõklõk ko ilo Baibõl̦. Ilo jar eo an Devid ñan Jeova, ear ba: “Inaaj etal ilo m̦ool eo Am̦.” (Sam 86:11) Alikkar bwe Devid ear peek ippãn make bwe enaaj etetal wõt ilo m̦ool eo, im kõj bareinwõt jej aikuj kõm̦m̦ane men in. El̦aññe jejjab, jemaroñ jino ad bar emmel̦o̦ketok men ko jaar kaarmejjeti ñan kar wiaik m̦ool eo im bõlen jemaroñ bar kõn̦aan jepl̦aak im kõm̦m̦ani jet iaan men kein. Bõtab, jejjab maroñ kããlõt ñan l̦oore jet katak jãn Baibõl̦ im kõjekdo̦o̦ni katak ko jet. Jej aikuj etetal ilo “m̦ool otemjej.” (Jon 16:13, UBS) Jen bar etale men ko 5 me jaar aikuj kaarmejjeti bwe jen maroñ wiaik m̦ool eo. Ad kõm̦m̦ane men in enaaj jipañ kõj bwe jen jab emmel̦o̦ketok men kein im kõn̦aan bwe en bar ro̦o̦ltok jidikin on̦ããn eo jaar wiaik m̦ool eo kake.​—Matu 6:19.

8. El̦aññe jejjab kõjerbal iien ko ad ilo mãlõtlõt, ewi wãween an men in maroñ kõm̦m̦an bwe jen jino jebwãbwe jãn m̦ool eo? Kwal̦o̦k juon waanjoñak.

⁸ Iien. Bwe jen jab jebwãbwe jãn m̦ool eo, jej aikuj kõjerbal iien ko ad ilo mãlõtlõt. El̦aññe jejjab kõjparok, emaroñ jino l̦ap ad jol̦o̦k iien ñan menin kam̦õn̦õn̦õ ko im men ko rem̦m̦an ippãd, im bareinwõt ñan lale Internet ak alwõj pija. Meñe ejjab nana men kein, ak joñan iien eo jej jol̦o̦k ñani emaroñ kõm̦m̦an bwe en kiiõ ejjel̦o̦k iien ñan ad katak ippãd make im kõm̦m̦ani m̦akũtkũt ko jet me rej kõkajoor kõtaan eo ad ippãn Jeova. L̦õmn̦ak m̦õk kõn men eo ear wal̦o̦k ñan juon jeid im jatid kõrã etan Emma. * (Lale kõmel̦el̦e eo itulal̦.) Jãn ke Emma ear jo̦dikdik, ear lukkuun em̦m̦an ippãn kidia. Jabdewõt iien ear pel̦l̦o̦k im wõr an maroñ ñan kidia, ear kõm̦m̦ane men in. Ak tokãlik ear jino kile bwe el̦ap wõt an jol̦o̦k iien ñan men in elukkuun em̦m̦an ippãn. Innem ear kõm̦m̦an oktak, im ejjabto ear jel̦ã kõm̦m̦an joñan iien ko ej julo̦ki ñan menin kam̦õn̦õn̦õ ko. Ear bar lukkuun bõk kõketak jãn bwebwenato eo an Cory Wells, juon jeid im jatid kõrã me ekõn juon eo im ej uwe ioon kidia ko ilo jikin kaloojoj ko. * (Lale kõmel̦el̦e eo itulal̦.) Kiiõ el̦apl̦o̦k an Emma iien ñan kõm̦m̦ani m̦akũtkũt ko rej kõkajoor jem̦jerã eo an ippãn Jeova im ebar l̦apl̦o̦k an iien ippãn baam̦le eo an im ro m̦õttan ilo eklejia eo. Ej kile an epaakel̦o̦k Jeova im em̦m̦an an mour, kõnke ejel̦ã bwe ej kõjerbal iien ko an ilo mãlõtlõt.

9. Ewi wãween kõn̦aan eo ñan koorl̦o̦k m̦weiuk emaroñ kõm̦m̦an bwe jet ren likũt aer karejar ñan Jeova bwe en men eo ãlik?

⁹ M̦weiuk im jeraam̦m̦an ko an lal̦ in. Bwe jen maroñ etetal wõt ilo m̦ool eo, jejjab aikuj kõtl̦o̦k bwe m̦weiuk ko ren men ko el̦ap aer aorõk ippãd. Ke jaar katak m̦ool eo, jaar kile bwe ad karejar ñan Jeova el̦apl̦o̦k an aorõk jãn m̦weiuk ko. Jaar m̦õn̦õn̦õ in kaarmejjete m̦weiuk im jeraam̦m̦an ko an lal̦ in bwe jen maroñ etetal ilo m̦ool eo. Ak tokãlik jemaroñ loe an ro elõñ aer jããn wiaiki kein roñjake ko im kein alwõj ko rekããltata, im bar m̦weiuk ko jet. Innem, jej jino bũrom̦õj kõn an ejjel̦o̦k ad. Im kiiõ emaroñ jako ad jokwane kõn men ko ewõr ippãd im jemaroñ jino likũt bwe ad karejar ñan Jeova en ãlik bwe jen bar koorl̦o̦k m̦weiuk ko ñan kõj. Men in ej kakeememej  kõj kõn men eo ear wal̦o̦k ñan Dimas. Joñan an kar Dimas “yokwe lal̦ in,” ear ilo̦k jãn jerbal eo eaorõk me ear kõm̦m̦ane ippãn rijjilõk Paul. (2 Ti. 4:10) Etke ear ilo̦k jãn Paul? Baibõl̦ ejjab lukkuun ba, ak bõlen unin an kar kõm̦m̦ane men in ej kõnke ear yokwe m̦weiuk im jeraam̦m̦an ko an lal̦ in el̦apl̦o̦k jãn an karejar ñan Anij. Ak bõlen ear jako an kõn̦aan kaarmejjeteik e make bwe en maroñ jerbal ippãn Paul. Alikkar, jejjab kõn̦aan bar ro̦o̦llikl̦o̦k ñan iien ko jaar kõn̦aan wõt bwe en lõñ m̦weied im jejjab aikuj kõtl̦o̦k bwe menin kõm̦ad kein ren kõm̦m̦an bwe en jako ad yokwe m̦ool eo.

10. Bwe jen maroñ etetal wõt ilo m̦ool eo, kain ijjiped rot eo jej aikuj jum̦aiki?

¹⁰ Kõtaan eo ad ippãn ro jet. Bwe jen maroñ etetal wõt ilo m̦ool eo, jejjab aikuj mijak im ebbweer kõn ijjiped ko jej iiooni jãn ro jet. Ke jaar jino etetal ilo m̦ool eo, kõtaan eo ad ippãn ro rejjab ri-Kõnnaan ro an Jeova im baam̦le ko ad, ear oktak. Jet iaaer rar kautiej tõmak eo ad, ak jet rar lukkuun jum̦aik kõj. (1 Pi. 4:4, UBS) Meñe jej lukkuun kate kõj bwe en em̦m̦an wõt kõtaan eo ad ippãn baam̦le ko ad im kõm̦m̦ani men ko rejouj ñan er, bõtab jej aikuj kõjparok bwe jen jab kõjekdo̦o̦n kien ko an Jeova ñan kam̦õn̦õn̦õik er. El̦aññe jenaaj keememej naanin kakkõl eo ilo 1 Korint 15:33, jenaaj jem̦jerãik im epaake wõt ro rej yokwe Jeova.

11. Ta eo enaaj jipañ kõj bwe jen jab po ilo l̦õmn̦ak im kõm̦m̦an ko renana?

¹¹ L̦õmn̦ak im kõm̦m̦an ko renana. Aolep ro rej etetal ilo m̦ool eo rej aikuj kwõjarjar. (Ais. 35:8, UBS; riit 1 Piter 1:14-16, UBS.) Ke jaar jino del̦o̦ñtok ilo m̦ool eo, kõj aolep jaar aikuj ukot mour ko ad bwe jen l̦oore kien ko ilo Baibõl̦. Jet rar aikuj kõm̦m̦ani oktak ko rel̦l̦ap ilo mour ko aer. Kõn men in, jelukkuun ban jol̦o̦k wãween mour eo ad kiiõ me erreo im eokkwõjarjar bwe jen bar ro̦o̦llikl̦o̦k ñan wãween mour eo ettoon an lal̦ in. Ta eo enaaj jipañ kõj bwe jen jab po ilo jabdewõt menin kapo ñan kõm̦m̦ani men ko renana? Ej ilo ad kõl̦mãnl̦o̦kjen̦ kõn on̦ããn eo el̦ap Jeova ear kõl̦l̦ãiki bwe jen maroñ kwõjarjar ke ear ajetok mour eo an Nejin Jesus Christ bwe en mej kõn kõj. (1 Pi. 1:18, 19, UBS) Bwe jen maroñ erreo wõt im̦aan mejãn Jeova, aolep iien jej aikuj keememej joñan an aorõk katok in mour eo an Jesus.

12, 13. (1) Etke eaorõk bwe jen keememej wõt l̦õmn̦ak eo an Jeova kõn raan ko rel̦l̦ap an lal̦ in? (2) Ta eo jej itõn etale kiiõ?

¹² M̦anit im imminene ko rej n̦ae Baibõl̦. Baam̦le ko ad im ro jej jerbal im jikuul̦ ippãer, remaroñ kajjioñ iuuni kõj bwe jen kobal̦o̦k ippãer ilo iien birthday im Kũrijm̦õj ak raan ko jet rel̦l̦ap. Ta eo emaroñ jipañ kõj ñan jab po ippãer im kobal̦o̦k ilo m̦anit ko im raan ko rel̦l̦ap me Jeova ejjab buñbũruon kaki? Ej ilo ad keememej un ko unin an Jeova jab m̦õn̦õn̦õ kõn m̦anit im imminene kein. Jemaroñ kappukot mel̦el̦e ko jãn bok ko ad ikijjeen raan ko rel̦l̦ap an lal̦ in im kakeememej kõj make kõn ia eo rar jino jarjar im wal̦o̦ktok jãne. El̦aññe jenaaj kõl̦mãnl̦o̦kjen̦ kõn un ko unin ad jab kobal̦o̦k ilo iien kein, jenaaj lukkuun tõmak bwe jej mour ilo wãween eo “ej kabuñbũruon Irooj.” (Ep. 5:10) El̦aññe jej lõke Jeova im Naan eo an em̦ool, men in enaaj kõjparok kõj bwe jen jab “mijak armej.”​—JK. 29:25.

¹³ Ad etetal ilo m̦ool eo ej juon men jenaaj aikuj wõnm̦aanl̦o̦k wõt im kõm̦m̦ane. Im jej kõjatdikdik bwe jenaaj etetal wõt ie ñan indeeo. Ewi wãween ad maroñ kapenl̦o̦k pepe eo ad ñan etetal wõt ilo m̦ool eo? Jen etale jilu wãween ko.

14. (1) Etke ad wõnm̦aanl̦o̦k wõt im katak Baibõl̦ enaaj kapenl̦o̦k pepe eo ad ñan jab wiakake m̦ool eo? (2) Etke mãlõtlõt, naanin katak, im jel̦ãl̦o̦kjen̦ relukkuun aorõk?

¹⁴ Kein kajuon, kwõn wõnm̦aanl̦o̦k wõt im katak Naanin Anij im kõl̦mãnl̦o̦kjen̦ kõn men  ko kwõj katak kaki. Wiaik m̦ool eo ilo am̦ kõm̦m̦an iien ñan katak Naanin Anij aolep iien. Ñe el̦apl̦o̦k am̦ katak, enaaj l̦apl̦o̦k am̦ yokwe m̦ool eo im enaaj penl̦o̦k pepe eo am̦ ñan jab wiakake. Jabõn Kõnnaan 23:23 ej ba bwe jen ‘wiaik m̦ool im jab wiakake.’ Ej bar ba bwe jen wiaik “mãlõtlõt, im katak, im jel̦ãl̦o̦kjen̦.” Ejabwe ñan baj jel̦ã wõt kõn m̦ool eo. Jej aikuj bar kaalikkar bwe jej mour ekkar ñane. Ikijjeen jel̦ãl̦o̦kjen̦, jemaroñ kile an lukkuun m̦ool im jejjet aolep naan ko an Jeova. Bõtab, mãlõtlõt ej kõm̦akũt kõj ñan kõm̦m̦ani men ko jejel̦ã kaki. Im jet iien, m̦ool eo ej katakin im kajim̦we kõj ilo an kwal̦o̦k ia eo jej aikuj kõm̦m̦an oktak ie. Kõn men in, aolep iien jen m̦õkaj im roñjake naanin katak im kauwe rot in, eo me Baibõl̦ ej ba bwe eaorõkl̦o̦k jãn jelba.​—JK. 8:10.

15. Ewi wãween an m̦ool eo kõjparok kõj ãinwõt juon kañũr?

¹⁵ Kein karuo, kwõn peek ippam̦ make ñan mour ekkar ñan m̦ool eo jãn raan ñan raan. Baibõl̦ ej keidi m̦ool eo ñan kañũr eo me juon rũttarin̦ae ej kañũrñũr kake. (Ep. 6:14) Ilo iien ko ilo Baibõl̦, kañũr eo an juon rũttarin̦ae ej jipañe im kõjparoke ipin im m̦õjñal ko an. Bõtab bwe kañũr eo en maroñ lukkuun kõjparoke ej aikuj kankan. Ñe ebbool̦ol̦ kañũr eo, enaaj jidik wõt an kõjparoke im jipañe. Ewi wãween an m̦ool eo kõjparok kõj ãinwõt juon kañũr? El̦aññe jej kañũrñũr kake im kõkankane aolep iien, enaaj kõjparok kõj jãn ad l̦õmn̦ak ilo juon wãween ebõd im enaaj jipañ kõj ñan kõm̦m̦ani pepe ko rem̦m̦an. Ñe jej iioon juon menin kapo ak juon apañ el̦ap, m̦ool eo ilo Baibõl̦ enaaj jipañ im kapenl̦o̦k pepe eo ad ñan kõm̦m̦ane men eo ejim̦we. Ãinwõt an juon rũttarin̦ae ban etal ñan tarin̦ae ñe ejjab kõn̦ak kañũr eo an, ãindein jej aikuj lale bwe jen jab kabbool̦ol̦e ak utũki kañũr eo ad ilo kõkkar. Jej aikuj kate kõj joñan wõt ad maroñ ñan kõkankane wõt ikijjeen ad mour ekkar ñan m̦ool eo. Bar juon jerbal an kañũr eo, ej kõm̦m̦an jikin jãje eo an rũttarin̦ae eo. Jen kiiõ etale wãween eo tok juon me jemaroñ kõm̦m̦ane ñan kapenl̦o̦k pepe eo ad ñan etetal wõt ilo m̦ool eo.

16. Etke ad bõk kun̦aad ñan katakin ro jet kõn m̦ool eo ej kapenl̦o̦k pepe eo ad ñan etetal wõt ilo m̦ool eo?

¹⁶ Kein kajilu, kwõn bõk kun̦aam̦ ñan katakin ro jet kõn m̦ool eo ilo Baibõl̦ joñan wõt am̦ maroñ. Baibõl̦ ej keidi Naanin Anij ñan juon jãje. Ãinwõt an juon rũttarin̦ae jibwe im dãpiji wõt jãje eo ej ettoto ilo kañũr eo an, ãindein jej aikuj dãpiji wõt ‘Naanin Anij.’ (Ep. 6:17) Kõj aolep jemaroñ kate kõj ñan kal̦apl̦o̦k ad jel̦ã katakin armej bwe en ‘jim̦we wõt ad katakin kõn naanin m̦ool.’ (2 Ti. 2:15) Ñe jej kõjerbal Baibõl̦ ñan jipañ ro jet bwe ren wiaik m̦ool eo im ilo̦k jãn katak ko reriab, men in ej bar kal̦apl̦o̦k wõt ad jel̦ã im yokwe m̦ool eo. Im ej kapenl̦o̦k wõt pepe eo ad ñan etetal wõt ilo m̦ool eo.

17. Etke kwõj lukkuun kaorõke m̦ool eo?

¹⁷ M̦ool eo ej ãinwõt juon menin letok eaorõk jãn Jeova. Ikijjeen menin letok in, jej maroñ bõk men eo m̦weied el̦aptata on̦ããn, ej kõtaan eo ad epaak ippãn Jemãd ilañ. Elukkuun lõñ men ko em̦õj an Jeova katakini kõj tok ñan kiiõ, ak eñin ej kab jidikin tak wõt an katakin kõj! Ej kallim̦ur bwe enaaj wõnm̦aanl̦o̦k wõt im katakin kõj ñan indeeo. Kõn men in, kwõn kaorõke m̦ool eo ãinwõt bõõr eo em̦m̦an im l̦ap on̦ããn. Kwõn wõnm̦aanl̦o̦k wõt im ‘wiaik m̦ool eo im jab wiakake.’ Im ãinwõt Devid, kwõnaaj maroñ kajejjet kallim̦ur in ñan Jeova: “Inaaj etal ilo m̦ool eo Am̦.”​—Sam 86:11.