Eñin ej juon iaan men ko rellõñ rũkõjdat ro rar kappok ruon Jijej im rũkal̦oor ro an kaki. Ilo Kien Moses, elõñ kien ko kõn ta ko armej ro rej aikuj kõm̦m̦ani ñan karreoik er ñe rej to̦o̦rl̦o̦k, ñe rej bõk nañinmej in lõba, im ñe ej mej juon armej ak menninmour ko nejier. Ear bar wõr naanin tõl ko kõn wãween bwe en jako an armej ro ettoon jãn men kein. Rar aikuj kõm̦m̦an katok, tutu im kwal̦i nuknuk ko aer, ak utdikdik dãn ioer im ioon men ko m̦weieer.​—Livitikõs, jebta 11-15; Bõnbõn jebta 19.

Rũtõlin kabuñ ro an RiJu ro rar kobaiktok elõñ mo̦ im kien ko ñan aolep kien kein. Juon bok ear ba bwe ñe juon ejjab erreo, renaaj aikuj “etale ta eo ear kõm̦m̦an bwe en nañinmej ak ettoon, wãween im joñan an naaj ajeeded ñan ro jet, ta kein jerbal im men ko renaaj ettoon ak jab ettoon jãn an uñũri, im ãliktata, ta m̦anit im men ko ej aikuj kõm̦m̦ani ñan karreoik e.”

Ro rar kõjdate Jijej rar kajjitõk ippãn im ba: “Etke ro rũkal̦ooram̦ rejjab l̦oori katak ko ro jim̦m̦aad rar litok, ak rej m̦õñã kõn pã ko rejjab erreo?” (Mark 7:5, UBS) Rũtõlin kabuñ rein rar jab kõnnaan kõn aer aikuj kwal̦ peier m̦okta jãn aer m̦õñã. Rar kõnnaan kõn m̦anit eo rej kõm̦m̦ane me rej jauni peier kõn dãn m̦okta jãn aer m̦õñã. Bok eo kar kwal̦o̦k kake m̦oktal̦o̦k ear wõnm̦aanl̦o̦k im ba: “Rar bar aikuj lale kain jãpe rot eo rej kõjerbale ñan jauni peier kake, kain dãn rot eo ekkar, wõn eo ej aikuj jauni peier, im jãn ia ñan ia ilo peier rej aikuj jauni kõn dãn.”

Ear alikkar l̦õmn̦ak eo an Jijej kõn aolep kien kein me kõm̦m̦an in armej. Ear jiroñ rũtõl ro an RiJu ro im ba: “Em̦ool wõt an kar Aiseia kanaan kõn kom̦! Kom̦ rietao, ãinwõt an kar je: ‘Anij ej ba, armej rein rej nõbar eõ kõn naan ko aer, ak bũrueer el̦ap an ettol̦o̦k jãn eõ. Ejjel̦o̦k tokjãn aer kabuñ ñan eõ, bwe rej katakin kõn kien ko kõm̦m̦an in armej ãinwõt ñe kar kien Anij!’ . . . Kom̦ij kõjekdo̦o̦n kien Anij im dãpij katak an armej.”​—Mark 7:6-8, UBS.