RO REJ katak Baibõl̦ rej ãinl̦o̦kwõt ro rej kappok kool̦. Rej aikuj wõnm̦aanl̦o̦k wõt im kate er ilo aer katak Baibõl̦ bwe ren maroñ bõk mãlõtlõt eo jãn Anij. Ewõr jilu wãween ko juon armej emaroñ ellolo kool̦. Ta ko jemaroñ katak jãn wãween kein?

Pijaikl̦o̦k m̦õk am̦ etetal iturin juon reba im kwõj loe juon men jidikdik ej ejjatõltõl waj. Ke kwõj jillo̦k im loe bwe ej juon kool̦, elukkuun l̦ap am̦ m̦õn̦õn̦õ. Kool̦ in edikl̦o̦k jãn mejãn juon mãjet im ejeja loe jãn taim̦on̦ ko raorõk. Ejjel̦o̦k pere bwe kwõnaaj kiiõ wõnm̦aanl̦o̦k im etetal iturin ijo im lale ewõr ke bar kool̦ kwõnaaj loe.

Men in ej ãinl̦o̦kwõt iien eo juon iaan Ri Kõnnaan ro an Jeova ear iioon eok ilo m̦weo im̦õm̦ im kõnnaan ippam̦ kõn ennaan eo em̦m̦an jãn Baibõl̦. Bõlen kwõj keememej wõt ennaan eo em̦m̦an jãn Baibõl̦ me kwaar jino jel̦ã kake. Men in ej ãinwõt juon m̦õttan kool̦ jidikdik me kwaar loe. Kwõmaroñ kar bwilõñ ke kwaar jino lo etan Anij, Jeova, ilo Baibõl̦. (Sam 83:18) Ak bõlen kwõj kab kar jel̦ã bwe kwõmaroñ jem̦jerãik Jeova. (Jemes 2:23) Ilo iien in, kwaar m̦õkaj im kile bwe kwaar loe jet men rem̦m̦anl̦o̦k jãn kool̦! Kõn men in, kwaar kõn̦aan kal̦apl̦o̦k wõt am̦ jel̦ã kõn ennaan ko jet ilo Baibõl̦.

Jet iien ro rej kappok kool̦ rej ae m̦õttan kool̦ jãn reba ko. Ro rej kate er kappok kool̦ ilo jikin kein, remaroñ lo el̦ap tõprak ãlikin jejjo allõñ. Jet iien rej aini kool̦ kein im loe jejjo bo̦un in kool̦ ko me to̦ujin tal̦a joñan aorõkier.

Ke kwaar jino katak Baibõl̦ ippãn juon iaan Ri Kõnnaan ro an Jeova, kwõmaroñ kar ãinwõt ro rej ae elõñ m̦õttan kool̦ jãn reba ko. Ilo am̦ kar kõl̦mãnl̦o̦kjen̦ kõn kajjojo eoon ko jãn Baibõl̦, ear jino l̦apl̦o̦k am̦ mel̦el̦e kõn katak ko rem̦ool im men in ear kal̦apl̦o̦k am̦ tõmak. Im ilo am̦ kar m̦õn̦õn̦õ in wõnm̦aanl̦o̦k im katak im kõl̦mãnl̦o̦kjen̦ kõn katak ko rem̦ool jãn Baibõl̦, kwaar jino jel̦ã ta ko kwõmaroñ kõm̦m̦ani ñan am̦ maroñ epaakel̦o̦k Jeova im pãdwõt ilo yokwe eo an bwe kwõn maroñ mour indeeo.​—Jemes 4:8; Jud 20, 21, UBS.

Ãinwõt ro rej kappok kool̦ jãn reba ko, bõlen kwaar bar kate eok im niknik ilo am̦ katak bwe kwõn jel̦ã kõn katak ko rem̦ool. Ãlikin am̦ kar jel̦ã, kwaar kõm̦m̦an wõnm̦aanl̦o̦k ko me rar tõll̦o̦k eok ñan am̦ ajel̦o̦k mour eo am̦ ñan Jeova im peptaij.​—Matu 28:19, 20.

Juon eo ej kappok kool̦ emaroñ ellolo kool̦ jãn ilowaan dekã in tol̦ ko. Ilo jet jikin ilo tol̦ ko, ñe rej loe bwe ewõr dekã ko me emaroñ lõñ kool̦ ilowaaer, rej bũki im kattipdikdiki bwe ren maroñ bõk kool̦ kein jãn ilowaaer. Ilo jinoin, kwõmaroñ jab jel̦ã el̦aññe ewõr kool̦ ilowaan dekã kein. Etke? Kõnke emaroñ wõr tarrin wõt joñan in 0.0206 bo̦un (10 g) in kool̦ ilowaan juon tõn in dekã ko kwõj kattipdikdiki im ebbõk kool̦ ilowaaer! Meñe ãindein, ak ippãn ro rej kappok kool̦, ewõr tokjãn aer kate er ñan kattipdikdiki dekã kein im bũki kool̦ kein.

Ãlikin an juon jel̦ã kõn katak ko rem̦ool, ej aikuj wõnm̦aanl̦o̦k im kate ñan kal̦apl̦o̦k an jel̦ã kõn katak ko rem̦wilal̦ ilo Baibõl̦. (Hibru 6:1, 2, UBS) Ñe kwõj katak ippam̦ make, kwõj aikuj kate eok bwe kwõn jel̦ã kõn katak ak mel̦el̦e ko kwõjjañin kar jel̦ã kaki im lale ta mel̦el̦e ko rem̦m̦an ñan am̦ l̦oori ilo mour eo am̦. Kõn men in, ta eo kwõmaroñ kõm̦m̦ane bwe kwõn wõnm̦aanl̦o̦k wõt im bõk el̦ap tokjãn jãn am̦ katak Baibõl̦ ippam̦ make, meñe emaroñ lõñ iiõ in am̦ kõm̦m̦ane men in?

Kate eok bwe en jab jako am̦ itoklimo in kal̦apl̦o̦k am̦ jel̦ã katak ko ilo Baibõl̦. Lukkuun etale tipdikin mel̦el̦e ko. Ilo am̦ kate eok im niknik ilo katak, men in enaaj jipañ eok bwe kwõn loe mãlõtlõt im jel̦ãl̦o̦kjen̦ eo jãn Anij. (Rom 11:33) Kwõmaroñ kõjerbal kein kappok mel̦el̦e ko ilo kajin eo am̦ ilo iien am̦ katak bwe en l̦apl̦o̦k am̦ mel̦el̦e kõn eoon ko ilo Baibõl̦. Kijenmej wõt ñe kwõj kappok naanin tõl ko kwõj aikuji im ñe ewõr kajjitõk ko kwõj pukot uwaakier jãn Baibõl̦. Kajjitõk ippãn ro jet kõn eoon ta ko ak katak ta ko ilo bok ko ad rar l̦ap aer jipañ er im kõkajoor er. Ñe ewõr jet mel̦el̦e ko rem̦m̦an ippam̦ jãn am̦ katak ippam̦ make, kwõmaroñ bwebwenato kaki ippãn ro jet.

Bõtab, ñe kwõj katak, mejãnkajjik eo am̦ ejjab bwe en lukkuun l̦ap wõt am̦ jel̦ã kõn kobban Baibõl̦. Etke? Kõnke rijjilõk Paul ear kakkõl Kũrjin ro im ba: “Jel̦ãl̦o̦kjen̦ rot in ej kõm̦m̦an an juon armej utiej bõro.” (1 Korint 8:1, UBS) Kõn men in, wõnm̦aanl̦o̦k wõt im kõttãik bũruom̦ im kate eok bwe en kajoor wõt tõmak eo am̦. Am̦ niknik in katak ippãn baam̦le eo am̦ im ippam̦ make, enaaj jipañ eok bwe kwõn mour ekkar ñan kien ko an Jeova. Bareinwõt, enaaj kõm̦akũt eok bwe kwõn jipañ ro jet. El̦aptata, enaaj l̦ap am̦ m̦õn̦õn̦õ bwe ewõr juon men kwaar loe me em̦m̦anl̦o̦k jãn kool̦.​—Jabõn Kõnnaan 3:13, 14.