NAAN IN KEEAÑ—KEIN KATAK Oktoba 2016
Ilo bok in, epãd katak ko jenaaj katak kaki jãn Nobõm̦ba 28 ñan Tijem̦ba 25, 2016.
BWEBWENATO
Iar Kate Eõ ñan L̦oore Joñak ko Rem̦m̦an an Ro Jet
Joñak ko rem̦m̦an an Kũrjin ro me rekajoor ilo tõmak remaroñ jipañ ro jet ñan kõm̦m̦an aer mejãnkajjik ko rem̦m̦an im kate er ñan tõpari. Thomas McLain ej kwal̦o̦k wãween an kar ro jet likũt joñak ko rem̦m̦an ñan e, im wãween an kar l̦oore joñak ko aer ñan jipañ ro jet.
Kom̦win Jab Mel̦o̦kl̦o̦k in Lale Ro Ruwamãejet
Ta l̦õmn̦ak eo an Anij kõn ruwamãejet ro? Ta ko jemaroñ kõm̦m̦ani ñan jipañ aolep ro rej itok jãn aelõñ ko jet bwe ren jab ãliklik im mijak in kobatok ippãn eklejia eo ad?
Kõkajoor Wõt Jem̦jerã eo Am̦ Ippãn Jeova Ñe Kwõj Jipañ ilo Juon Eklejia Eoktak Kajin eo Ie
Aolep ro rej karejar ñan Jeova rej aikuj kate er ñan kõm̦m̦ani men ko renaaj jipañ er im baam̦le eo aer ñan epaake Jeova. Bõtab el̦aññe kwõj jipañ ilo juon eklejia eoktak kajin eo ie, emaroñ lõñ apañ ko jet kwõj iiooni me rej kõm̦m̦an bwe en pen am̦ kõm̦m̦an bwe kwe im baam̦le eo am̦ kom̦win epaake Jeova.
Kwõj Ke “Dãpij Wõt Am̦ Mãlõtlõt”?
Ta eo ej kõm̦m̦an bwe juon eo emãlõtlõt en oktak jãn juon eo ejel̦ãl̦o̦kjen̦ im juon eo emel̦el̦e? Ad jel̦ã oktak eo ikõtaan men kein enaaj l̦ap an jipañ kõj.
Kal̦apl̦o̦k Am̦ Tõmak ilo Men ko Kwõj Kõjatdikdik Kaki
Joñak ko rem̦m̦an an ro rar tiljek ilo iien ko etto im ilo tõre kein ad remaroñ kõkajoor kõj. Ewi wãween am̦ maroñ kõkajoor wõt tõmak eo am̦?
Kwal̦o̦k Am̦ Tõmak ilo Kallim̦ur ko an Jeova
Ta mel̦el̦ein tõmak? Im kajjitõk eo el̦apl̦o̦k an aorõk in, ewi wãween am̦ maroñ kwal̦o̦k am̦ tõmak?
Kwaar Jel̦ã Ke?
Ilo tõre ko an rijjilõk ro, kar ewi joñan maroñ ko an rũtõl ro an RiJu ro ilo Judia ke rar pãd ium̦win kien eo an Rom? Im m̦ool ke bwe ilo iien ko etto armej ro rekõn jeor ine in mar ñan ko̦kkure jikin kallib ko an ro jet?
