1, 2. (1) Jerbal ta eo ear eaorõktata ilo mour eo an Jesus, im etke? (2) Ta eo jej aikuj kõm̦m̦ane bwe jen lo tõprak ãinwõt “ri-jerbal ippãn Anij”?

JESUS CHRIST ear juon ri-kaam̦tõ im juon ri-katakin. (Mark 6:3; Jon 13:13) Ear lukkuun kapeel ilo an kõm̦m̦ani aolep jerbal kein ruo. Ãinwõt juon kaam̦tõ, ear katak kilen kõjerbali kein jerbal ko an ñan kõm̦m̦ani men ko rej kõm̦m̦an jãn al̦al̦ ãinwõt jea, tebõl̦, im men ko ãierl̦o̦kwõt. Im ãinwõt juon ri-katakin kõn nuuj eo em̦m̦an, ear lukkuun mel̦el̦e kõn eoon ko ilo Baibõl̦ im ear kõjerbale jel̦ãl̦o̦kjen̦ in an ñan jipañ armej ro bwe ren mel̦el̦e katak ko rem̦ool jãn Naanin Anij. (Matu 7:28, UBS; Luk 24:32, 45, UBS) Ke Jesus ear 30 an iiõ, ear bõjrak jãn an jerbalin kaam̦tõ kõnke ear jel̦ã bwe jerbalin ri-katakin kõn nuuj eo em̦m̦an ear aorõkl̦o̦k. Ear ba bwe juon iaan un ko unin an kar Anij jilkintok ñan lal̦ ej bwe en kwal̦o̦k kõn nuuj eo em̦m̦an kõn Aelõñin Anij. (Matu 20:28; Luk 3:23; 4:43, UBS) Jesus ear likũt bwe jerbalin kwal̦o̦k naan en men eo eaorõktata ilo mour eo an, im ear kõn̦aan bwe ro jet ren bar anõke im kõm̦m̦ane jerbal in.​—Matu 9:35-38.

² Jemaroñ jab juon ri-kaam̦tõ, ak jej ri-katakin kõn nuuj eo em̦m̦an. Joñan an aorõk jerbal in, Anij ej bar jipañ kõj kõm̦m̦ane, im eñin unin Baibõl̦ ej ba bwe jej “ri-jerbal ippãn Anij.” (1 Ko. 3:9; 2 Ko. 6:4) Jej errã ippãn ri-jeje sam me ear ba: “Aolepen Am̦ in naan, m̦ool.” Em̦ool bwe naan ko an Jeova rem̦ool. (Sam 119:159, 160) Eñin unin jej aikuj in lale bwe en ‘jim̦we ad katakin kõn naan eo em̦ool an Anij’ ñe jej kwal̦o̦k naan. (Riit 2 Timote 2:15, UBS.) Kõn men in, jej aikuj kal̦apl̦o̦k ad jel̦ã kilen kõjerbale kein jerbal eo ad  eaorõktata Baibõl̦ eo, ñan katakin ro jet kõn Jeova, Jesus, im Aelõñ eo an. Innem ñan jipañ kõj lo tõprak ilo jerbalin kwal̦o̦k naan, doulul eo an Jeova em̦õj an litok jet kein jerbal ko raorõk im jej aikuj bar jel̦ã kilen kõjerbali men kein. Kein jerbal kein rej pãd ilo Nien Kein Jerbal eo ad ñan Kwal̦o̦k Naan.

3. Kõnke epaaktok jem̦l̦o̦kin jukjukun pãd in, ta men eo eaorõk jej aikuj kõm̦m̦ane ñe jej jerbalin kwal̦o̦k naan, im ewi wãween an Jerbal 13:48, NW jipañ kõj ñan kõm̦m̦ane men in?

³ Kar kõm̦m̦ani Kein Jerbal ko ad ñan Kwal̦o̦k Naan bwe jen katakin armej ro. Unin ej kõnke, “kwal̦o̦k” ej mel̦el̦ein ñan kwal̦o̦k wõt juon ennaan. Bõtab ñan “katakin” ej mel̦el̦ein ñan kõmel̦el̦eik ennaan eo jej kwal̦o̦k kake bwe juon armej en mel̦el̦e im em̦m̦akũt im jerbali men ko ej katak kaki. Im kõnke epaaktok jem̦l̦o̦kin jukjukun pãd in, men eo eaorõk jen kõm̦m̦ane ej ñan pukot ro reitoklimo im katakin er kõn m̦ool eo bwe ren erom ri-kal̦ooran Christ. Men in ej mel̦el̦ein bwe jej aikuj kate kõj ñan kappukot “aolep ro em̦m̦an bũrueer ñan bõk mour indeeo,” im jipañ er bwe ren erom rũttõmak.​—Riit Jerbal 13:44-47, im 48 jãn kõmel̦el̦e eo itulal̦. *

4. Ewi wãween ad jel̦ã wõn ro “ej tõllo̦kier ñan bõk mour indeeo,” im ewi wãween ad maroñ tõpar rein?

⁴ Ewi wãween ad jel̦ã wõn ro “ej tõllo̦kier ñan bõk mour indeeo?” Ãinwõt ilo kar tõre ko an rijjilõk ro, wãween eo wõt bwe ren kar maroñ loe armej rein ej ilo aer kwal̦o̦k naan. Kõn men in, jej aikuj kõm̦m̦ane men eo Jesus ear jiroñ kõj ilo an kar ba: “Ñe kom̦ij tõprakl̦o̦k juon jikin kweilo̦k ak juon bukwõn, kom̦win del̦o̦ñl̦o̦k im pukot wõn eo em̦õn̦õn̦õ in karwaineneik kom̦.” (Matu 10:11) Ejjel̦o̦k pere bwe ro rejjab kwal̦o̦k jouj, eutiej bũrueer, ak rejjab kea kõn Anij, jejjab kõtmãne bwe renaaj m̦õn̦õn̦õ in roñjake nuuj eo em̦m̦an. Jej kappukot ro em̦ool bũrueer, ro ettã bũrueer, im ro rej kwõle kõn m̦ool eo. Jemaroñ keidi ad kappukot armej rein ñan men eo Jesus ear kõm̦m̦ane ke ear juon ri-kaam̦tõ. Jesus ear aikuj kappukot al̦al̦ ko rejejjet ñan an kõm̦m̦ani men ko ãinwõt jea, kõjãm, al̦al̦ ko me rej likũti ilo kenwan kau kom̦aan ko ñan dãpiji kein poktak bwidej eo, im bar men ko jet. Ãlikin, ej bõktok nien kein jerbal ko an, im ej kõjerbal kapeel eo ewõr ippãn ñan kõm̦m̦ani men kein. Im ejja ilo raan kein, jej aikuj pukot m̦okta ro em̦ool bũrueer, innem jemaroñ kõjerbal kein jerbal ko ad im kapeel eo ewõr ippãd ñan jipañ rein bwe ren erom ri-kal̦oor.​—Matu 28:19, 20.

5. Ta eo jej aikuj keememej kõn kajjojo iaan kein jerbal ko ad ñan kwal̦o̦k naan? Kwal̦o̦k juon waanjoñak. (Lale pija ko ilo jinoin katak in.)

⁵ Ilo jabdewõt nien kein jerbal, aolep kein jerbal ko ie ewõr tokjãer im ewõr aer make jerbal. Ñan waanjoñak, l̦õmn̦ak kõn kein jerbal ko Jesus ear kõjerbali ke ear juon ri-kaam̦tõ. * (Lale kõmel̦el̦e eo itulal̦.) Ear aikuj kein jerbal ko ñan joñi al̦al̦ ko, jidpãni, kimliji, kõm̦m̦an jekjekier, im bareinwõt l̦ãbõl̦i im kobaiki ippãn doon. Ejja ãindeinl̦o̦k wõt, ilo Kein Jerbal ko ad ñan Kwal̦o̦k Naan ewõr aer kajjojo make jerbal. Kõn men in, jen lale ewi wãween ad maroñ kõjerbale kein jerbal kein ñan Kwal̦o̦k Naan.

6, 7. (1) Ewi wãween am̦ kar kõjerbale kaat jiddik ko? (2) Ta wãween ko ruo me jej kõjerbale peba in kũr eo ñan kweilo̦k ko ad?

⁶ Kaat Jiddik ko. Kaat kein reddik ak el̦ap aer jipañ ñan kwal̦o̦k kõn wõn kõj ñan armej ro im kwal̦o̦k ñan er weepjait eo ad. Ñe armej rej etal ñan weepjait eo ad, remaroñ kal̦apl̦o̦k aer jel̦ã kõn wõn kõj, im jujen kajjitõk an juon katak Baibõl̦ ippãer. Elõñl̦o̦k jãn 400,000 armej ro rar kajjitõk aer katak Baibõl̦ ilo jw.org, im elõñ bar bukwi armej rej kajjitõk ñan katak  Baibõl̦ ilo weepjait in ad kajjojo raan! Bõlen kwõmaroñ bõk jet kaat jiddik ippam̦ im kõjerbali ñan kõnono ippãn ro kwõj iioon er jabdewõt iien.

⁷ Peba in kũr eo ñan kweilo̦k ko. Jej kõjerbale peba in kũr in ilo ruo wãween. Ilo peba in, ej ba: “Kwõj ruwainene ñan katak Baibõl̦ ippãn Ri Kõnnaan ro an Jeova.” Innem ej kwal̦o̦k ruo wãween ko armej ro remaroñ kããlõti ñan katak Baibõl̦, ilo “iien kweilo̦k ko ammim” ak “ippãn juon.” Kõn men in, kein jerbal in ejjab kwal̦o̦k wõt kõn wõn kõj ak ej bar kũr ro jet me rej “jeram̦õl ilo bũrueer” ak rej kile bwe rej aikuji tõl eo an Anij ñan katak Baibõl̦ ippãd. (Matu 5:3) El̦ap an armej ro ruwainene ñan itok ñan kweilo̦k ko ad meñe rej katak Baibõl̦ ak jab. Im ñe rein rej itok ñan kweilo̦k ko ad, renaaj kile joñan an lõñ men ko renaaj katak jãn Baibõl̦.

8. Etke elukkuun aorõk bwe armej ro ren itok ñan kweilo̦k ko ad meñe juon wõt alen aer itok? Jouj im kwal̦o̦k juon waanjoñak.

⁸ Elukkuun aorõk bwe jen wõnm̦aanl̦o̦k im kũrtok armej ro ñan kweilo̦k ko ad meñe juon wõt alen aer itok. Etke? Kõnke ñe renaaj itok ñan kweilo̦k ko ad, renaaj lo an lukkuun oktak wãween an Ri Kõnnaan ro an Jeova katakin ro jet m̦ool eo jãn Baibõl̦ im jipañ er ñan jel̦ã kõn Anij jãn kabuñ ko rewaan. (Ais. 65:13) Ruo rippãlele ilo Amedka rar kile men in jet iiõ ko remootl̦o̦k. Ray im Linda rar pepe bwe erro aikuj jino etal im jar. Erro ar tõmak ilo Anij im rar kõn̦aan jel̦ã kajjien. Kõn men in rar pepe bwe m̦okta jãn aerro pãd im m̦õttan juon kabuñ, erro kar kõn̦aan etal ñan aolep im̦õn jar ko ilo jikin eo rej pãd ie im lale el̦aññe ewõr men kein ruo. Kein kajuon, ear aikuj wõr juon men erro ej katak jãn im̦õn jar eo im kein karuo, armej ro ilo im̦õn jar eo rej aikuj nuknuk im tõrejab ãinwõt ro rej ba bwe rej karejar ñan Anij. Ear bõk jet iiõ in aerro kõm̦m̦ane men in kõnke ear lukkuun lõñ kabuñ ko. Bõtab erro ar jab lo tõprak. Ejjel̦o̦k men en̦ erro ar katak, im armej ro ilo im̦õn jar ko ear jab em̦m̦an paotokier im wãween aer nuknuk. Ãlikin aerro etal jãn im̦õn jar eo ãliktata me ear pãd ilo laajrak eo aerro, Linda ear etal im jerbal ak Ray ear ro̦o̦l ñan m̦weo im̦weerro. Ke Ray ej ro̦o̦l, ear ettõr iturin juon iaan Im̦õn Kweilo̦k ko ad im kajjitõk ippãn make, ‘Etke ijjab del̦o̦ñ ñan lale ta ko rej wal̦o̦k ijin?’ Alikkar, eñin ej ijo em̦m̦antata ear etal ñane iaan aolep im̦õn jar ko. Aolep ro ilo Im̦õn Kweilo̦k eo rar lukkuun jouj im ear em̦m̦an paotokier im wãween aer nuknuk. Ray ear jijet ilo jea ko im̦aantata im ear lukkuun em̦m̦an ippãn katak ko ear roñjaki! Men in ear ãinl̦o̦kwõt men eo Paul ear ba kõn juon eo me ej kab kein kajuon an itok ñan kweilo̦k ko ad im ej ba: “Em̦ool, Anij ej pãd ippemi!” (1 Ko. 14:23-25, UBS) Ãlikin iien in, Ray ear etal ñan aolep kweilo̦k ko ilo Jabõt. Im tokãlik ear bar etal ñan kweilo̦k ko ilo lukwõl̦pãn wiik. Linda ear bareinwõt jino etal ñan kweilo̦k ko, im meñe ear 70 jim̦a aerro iiõ ilo tõre in, ak erro ar katak Baibõl̦ im peptaij.

9, 10. (1) Etke epidodo kõjerbali tũrããk ko? (2) Kwal̦o̦k ewi wãween ad kõjerbal tũrããk eo etan Ta in Aelõñ eo an Anij?

⁹ Tũrããk ko. Ewõr ralitõk tũrããk ko epidodo ñan ad kõjerbali ñan jipañ kõj jino bwebwenato ippãn armej. Jãn ke ear wõr tũrããk kein ilo kar 2013 eo tok ñan kiiõ, ewõr joñan in l̦alem billion me em̦õj bũriini! Men eo elukkuun em̦m̦an kõn tũrããk kein ej bwe ñe kwõj katak kilen kõjerbal juon iaaer, kwõnaaj jel̦ã kilen kõjerbale aolepeer kõnke juon wõt wãween kar kõm̦m̦ani. Ewi wãween am̦ kõjerbale juon tũrããk ñan jino bwebwenato ippãn juon armej?

¹⁰ Kwõmaroñ kããlõt ñan kõjerbale tũrããk eo Ta in Aelõñ eo an Anij? Kwal̦o̦k kajjitõk eo itum̦aanin tũrããk eo ñan armej eo im ba: “Em̦õj ke am̦ l̦õmn̦ak kõn ta in Aelõñ eo an Anij? Ta l̦õmn̦ak n̦e am̦ ej ke . . . ?” Innem kajjitõk ippãn ewi iaan uwaak ko jilu enaaj kar kããlõti. Ijello̦kun am̦ ba el̦aññe uwaak eo an ejim̦we ak ebõd, kõpel̦l̦o̦k ñan itulowaan tũrããk eo ilo ijo ej ba “Ekkar ñan Baibõl̦” im riiti eoon ko em̦õj  likũti ãinwõt Daniel 2:44 im Aiseia 9:6. Innem el̦aññe ewõr iien ak armej eo eitoklimo, wõnm̦aanl̦o̦k wõt im bwebwenato ippãn. Ãliktata, kwal̦o̦k kajjitõk eo itulikin tũrããk eo ium̦win ijo ej ba “Jouj im L̦õmn̦ak kõn Kajjitõk in”: “Enãj ewi wãween mour ilo lal̦ in ñe jenaaj pãd ium̦win tõl eo an Aelõñ ak kien eo an Anij?” Men in enaaj kõm̦m̦an bwe en wõr pedpedin am̦ bar jepl̦aak ñan ippãn armej eo. Innem ñe komiro bar iioon doon, kwõmaroñ jitõñl̦o̦k ñan katak 7 ilo bok eo Juon Ennaan Em̦m̦an Jãn Anij!, me ej juon iaan kein jerbal ko ad ñan jino katak Baibõl̦ ippãn armej.

11. Etke kar kõm̦m̦ani Naan in Keeañ im Awake! ko, im ta eo jej aikuj jel̦ã ilo ad kõjerbale bok kein?

¹¹ Naan in Keeañ im Awake! ko. Iaan aolepen bok ko (magazines) ipel̦aakin lal̦ in, Naan in Keeañ im Awake! ko rej bok ko el̦aptata aer bũriini im ukoti ñan elõñ kajin ko. Kõnke armej ro ilo elõñ aelõñ rej riiti bok kein, kar kõm̦m̦ane taitõl̦ ko ilo kilin bok kein ñan kãitoklimoik aolep armej. Jen kõjerbali bok kein ñan jipañ armej ro ñan l̦õmn̦ak kõn men ko raorõk ilo raan kein. Bõtab m̦okta, jej aikuj jel̦ã ewi iaan bok kein ruo renaaj jejjet ñan armej ro bwe en em̦m̦an ad kõjerbali.

12. Kar kõm̦m̦ane bok eo Awake! ñan wõn, im ta unin kar kõm̦m̦ane bok in?

¹² Kar kõm̦m̦ane bok eo, Awake! ñan armej ro me ewõr jidik aer jel̦ã kõn Baibõl̦ im bareinwõt ro ejjel̦o̦k aer jel̦ã ñan jidik. Rein remaroñ jab jel̦ã kõn katak ko jãn Baibõl̦, remaroñ jab lõke kabuñ ko, ak remaroñ jab kile bwe Baibõl̦ eo emaroñ jipañ er ilo mour ko aer. Juon iaan un ko unin kar kõm̦m̦ane Awake! ko ej ñan kam̦ool ñan armej ro bwe ewõr Anij. (Rom 1:20; Hi. 11:6) Ej bareinwõt jipañ armej ro ñan tõmak bwe Baibõl̦ eo ej lukkuun “naan in Anij.” (1 Te. 2:13) Taitõl̦in Awake! ko jilu an 2018 ej: “The Way of Happiness,” “12 Secrets of Successful Families,” im “Help for Those Who Grieve.”

13. (1) Naan in Keeañ ko jej leto letak ilo kwal̦o̦k naan kar kõm̦m̦ani ñan wõn? (2) Ta tokjãn ko rem̦m̦an kwaar loi ke kwaar kõjerbale kein jerbal in?

¹³ Kar kõm̦m̦ani Naan in Keeañ ko me jej leto letak ñan armej ilo kwal̦o̦k naan ñan kõmel̦el̦eik katak ko ilo Baibõl̦ ñan ro ewõr aer kautiej Anij im Baibõl̦ eo. Meñe rein remaroñ jel̦ã jidik kõn Baibõl̦, ak ejjab lukkuun jim̦we aer mel̦el̦e kõn katak ko ie. (Rom 10:2, UBS; 1 Ti. 2:3, 4) Katak ko jilu ilo Naan in Keeañ ko an 2018 rej uwaaki kajjitõk kein: “Ewõr Ke Tokjãn Baibõl̦ ilo Raan Kein?,” “Ta Kobban Ilju im Jekl̦aj?,” im “Anij Ej Ke Kaorõk Eok?”

14. (1) Ta jerbal ko an pijain alwõj ko emãn me rej pãd ilo nien kein jerbal eo ad ñan kwal̦o̦k naan? (2) Ta tõprak ko kwaar loi jãn am̦ kar kaalwõj armej ro pija kein?

¹⁴ Pijain alwõj ko. Ilo raan ko an Jesus, ri-kaam̦tõ ro rej kõjerbal wõt kein jerbal ko me rejjab kõjerbal jarom. Ak ilo raan kein, ri-kaam̦tõ ro rej kõjerbal kein jerbal ko rej le pãtõre ak jarom ãinwõt jidpãn, kimlij, jaanpeba, im men ko jet. Ãindeinl̦o̦k wõt, kobal̦o̦k ippãn bok ko rej bũriini, ewõr ad kiiõ pijain alwõj ko relukkuun em̦m̦an ñan kwal̦o̦k ñan armej ro. Emãn iaan pijain alwõj kein rej pãd ilo nien kein jerbal eo ad ñan kwal̦o̦k naan: Etke Kwõj Aikuj Katak Baibõl̦?, Ta ko Rej Wal̦o̦k Ñe Kõmij Katak Baibõl̦ Ippãn Armej?, Ta ko Rej Wal̦o̦k ilo Im̦õn Kweilo̦k ko Ammim?, Wõn Kõm​—Ri Kõnnaan ro an Jeova? Pijain alwõj ko me 2 minit dikl̦o̦k, rejejjet ñan iien eo jinoin ad kwal̦o̦k naan ippãn armej. Ikijjeen pijain alwõj ko raetok, jemaroñ kõjo̦i ñan ro jej bar jepl̦aak ippãer im ro ewõr aer iien ñan alwõji. Kein jerbal kein rekanooj em̦m̦an remaroñ kõm̦akũt armej ro ñan kõn̦aan katak Baibõl̦ im itok ñan kweilo̦k ko ad.

15. Ta tokjãn ko rej wal̦o̦k ñe armej rej alwõji pija ko ad ilo kajin eo aer make? Kwal̦o̦k jet waanjoñak.

¹⁵ Ñan waanjoñak, juon jeid im jatid kõrã ear iioone juon kõrã me ear em̦m̦akũt jãn aelõñ ko ilo Micronesia im ej juon ri-Yap. Kõrã eo  jeid im jatid ear kõjo̦e ñane pija eo Etke Kwõj Aikuj Katak Baibõl̦? ilo kajin Yap. Ke ear jino jo pija eo, kõrã eo ear ba: “Kajin eo aõ in. Ijjab tõmak! Ij kile ilo wãween an kõnono ke ej jãn ãne eo ij tok jãne. Ej kajin Yap!” Ãlikin, kõrã in ear ba bwe enaaj riit im alwõji aolep pija ko ilo kajin eo an ilo jw.org. (Keidi Jerbal 2:8, 11, UBS.) L̦õmn̦ak kõn bar juon waanjoñak. Ekar wõr juon jeid im jatid kõrã ej jokwe ilo Amedka im l̦adik eo nãj nejin ear jokwe ilo bar juon aelõñ. Kõrã in ear e-mail l̦o̦k ñan l̦adik in juon link me enaaj kajju ñan ejja pija eo wõt ilo weepjait eo ad, ilo kajin eo an. Ãlikin an kar l̦adik in alwõje pija eo, ear e-mail e kõrã eo jinen im ba: “Ijo ej ba bwe ewõr juon ri-nana ej kõjbwebweik men ko rej wal̦o̦k ilo lal̦ in ear lukkuun jelõt eõ. Em̦õj aõ kanne form eo ñan katak Baibõl̦.” Elukkuun em̦m̦an kõnke ijo l̦adik in ej pãd ie em̦õj kamo jerbalin kwal̦o̦k naan!

16. Jouj im kõmel̦el̦eiki jerbal ko an kajjojo iaan brochure kein: (1) Roñjake Anij im Kwõnaaj Mour Indeeo. (2) Juon Ennaan Em̦m̦an Jãn Anij! (3) Wõn Ro Rej Kõm̦anm̦an Ankilaan Jeova Rainin?

¹⁶ Brochure ko. Ewi wãween ad maroñ katakin juon eo me ejjab lukkuun jel̦ã riit ak ejjel̦o̦k bok ko ad ilo kajin eo an? Eokwe jemaroñ kõjerbal brochure eo etan Roñjake Anij im Kwõnaaj Mour Indeeo. * (Lale kõmel̦el̦e eo itulal̦.) Brochure eo juon elukkuun jejjet ñan jino katak ippãn armej ej Juon Ennaan Em̦m̦an Jãn Anij! Kwõmaroñ kwal̦o̦k ñan armej eo laajrakin katak ko 14 itulikin bok in im kajjitõk ippãn ewi iaan katak ko ej itoklimo kake. Ãlikin, kwõmaroñ jino am̦ katak ippãn ilo katak eo. Em̦õj ke am̦ kajjioñe men in ippãn ro kwaar jepl̦aak ippãer? Brochure eo kein kajilu ilo nien kein jerbal in kwal̦o̦k naan eo ad ej Wõn Ro Rej Kõm̦anm̦an Ankilaan Jeova Rainin? Kar kõm̦m̦ane brochure in ñan katakin rũkkatak ro kõn doulul in. Ñan jel̦ã kilen kõjerbale brochure in ilo kajjojo iien kwõj katak ippãn armej, lale bok eo etan Jerbal eo ad im Wãween Ad Mour​—Kein Katak an allõñin M̦aaj 2017.

17. (1) Ta jerbal ko an kajjojo iaan bokin katak kein? (2) Ta eo juon rũkkatak ej aikuj wõnm̦aanl̦o̦k wõt kake meñe em̦õj an peptaij, im etke?

¹⁷ Bok ko. Ãlikin am̦ jino katak ippãn juon kõn juon iaan brochure kein, jabdewõt iien kwõmaroñ jãniji ñan bok eo etan Ta eo Baibõl̦ Ej Lukkuun Katakin Kõj? Kein jerbal in enaaj kal̦apl̦o̦k an armej eo mel̦el̦e kõn katak ko rem̦ool ilo Baibõl̦. Ãlikin an kõjem̦l̦o̦ke bok in im ñe ej kõm̦m̦an wõnm̦aanl̦o̦k ko, eokwe wõnm̦aanl̦o̦k wõt im katak ippãn kõn bok eo Pãd Wõt ilo Yokwe eo an Anij. Kein jerbal in enaaj katakin rũkkatak eo kõn wãween an maroñ jerbali naanin kakapilõk ko ilo Baibõl̦ ilo mour eo an. Ãlikin an peptaij, keememej bwe ej aikuj wõnm̦aanl̦o̦k wõt im katak m̦ae iien ejem̦l̦o̦k an katak kõn bok kein. Wãween in enaaj jipañe bwe en kajoor wõt tõmak eo an ilo Jeova im dãpij wõt an tiljek ñane.​—Riit Kolosse 2:6, 7.

18. (1) Ta eo 1 Timote 4:16 ej rõjañ kõj bwe jen kõm̦m̦ane ãinwõt ro rej katakin kõn m̦ool eo, im ta tokjãn ko renaaj wal̦o̦k? (2) Ta kõttõpar eo ad ñe jej kortokjãn Kein Jerbal Ko Ad ñan Kwal̦o̦k Naan?

¹⁸ Ãinwõt Ri Kõnnaan ro an Jeova, kar letok ñan kõj eddo eo ñan katakin armej ro kõn “naanin keeañ eo em̦ool” me enaaj tõll̦o̦k er ñan bõk mour indeeo. (Kol. 1:5, UBS; riit 1 Timote 4:16.) Ñan jipañ kõj kõm̦m̦ane men in, em̦õj kõllaajraki kein jerbal ko ad ñan kwal̦o̦k naan me rejejjet im ekkar ñan aikuj ko ad. (Lale bo̦o̦k eo etan “ Nien Kein Jerbal ko Ad ñan Kwal̦o̦k Naan.”) Jen kate kõj ñan jel̦ã kilen kõjerbal kein jerbal kein joñan wõt ad maroñ. Kajjojo ri-kwal̦o̦k emaroñ make kããlõt kein jerbal ta eo emaroñ kõjerbale ippãn armej eo ej itoklimo in roñjake im ñããt. Kõttõpar eo ad ejjab ñan leto letak wõt bok ko im jejjab bareinwõt lel̦o̦k ñan armej ro rejjab itoklimo in roñjake ennaan eo jej kwal̦o̦ke. Ijoke, kõttõpar eo ad ej ñan kõm̦m̦an bwe armej ro em̦ool bũrueer, ettã bũrueer, im ro el̦ap aer aikuji m̦ool eo ren erom ri-kal̦oor im “ej tõllo̦kier ñan bõk mour indeeo.”​—Jrb. 13:48, NW; Matu 28:19, 20.