Eoktak an Matu bwebwenato kõn iien eo Jijej ear l̦otak im bareinwõt mour eo an ke ear dik, jãn an Luk bwebwenato kake kõnke rijeje rein rar kwal̦o̦k kõn ruo armej ro reoktak jãn doon, im kõn men ko rar wal̦o̦k ñan er im l̦õmn̦ak ko aer.

El̦apl̦o̦k an Matu bwebwenato kõn men ko rar wal̦o̦k ñan Josep. Ej kõmel̦el̦e kõn l̦õmn̦ak eo an Josep ke ear roñ bwe Meri ebõro̦ro, im kõn ettõn̦ak eo an ke juon enjel̦ ear jãdel̦o̦k im kõmel̦el̦e kõn ta eo ear wal̦o̦k ñan Meri, im kilen an kar l̦oore naanin tõl ko an enjel̦ eo. (Matu 1:19-25, UBS) Ej bar kõmel̦el̦eik wãween an juon enjel̦ kar kakkõle bwe en ko ñan Ijipt ippãn baam̦le eo an, im kõn an Josep kar pokake. Innem Matu ej bar jiroñ kõj bwe Josep ear bar tõn̦ake an juon enjel̦ ro̦o̦ll̦o̦k im ba ñan Josep bwe e im baam̦le eo an ren jepl̦aak ñan aelõñ in Israel im jokwe ilo Nazeret.​—Matu 2:13, 14, UBS; 19-23.

Ak el̦ap wõt an Luk bwebwenato kõn Meri. Ej kwal̦o̦k kõn iien eo juon enjel̦ etan Gebriel ear lol̦o̦k Meri, kõn iien eo Meri ear lol̦o̦k lio nukũn Elisabet, im naan in nõbar ko an Meri ñan Jeova. (Luk 1:26-56) Ej bareinwõt kõmel̦el̦e kõn ta eo Simeon ear ba ñan Meri kõn an naaj Jijej eñtaan. Luk ej bar kwal̦o̦k kõn iien eo Jijej im baam̦le eo an rar etal ñan tampel̦ eo ke ear 12 an iiõ. Ilo bwebwenato in, Luk ej kwal̦o̦k kõn naan ko wõt an Meri im jab naan ko an Josep. Im Luk ej jiroñ kõj bwe men kein rar wal̦o̦k elukkuun kar l̦ap aer jelõt Meri. (Luk 2:19, 34, 35, 48, 51, UBS) Innem ealikkar bwe bok in Matu el̦ap wõt an bwebwenato kõn l̦õmn̦ak im kõm̦m̦an ko an Josep. Ak bokin Luk ej kwal̦o̦k wõt kõn l̦õmn̦ak ko an Meri im men ko rar wal̦o̦k ñane.

Ebareinwõt oktak laajrakin menmenbwij eo an baam̦le eo an Jijej ilo Gospel kein ruo. Matu ej kõllaajrake baam̦le eo an Josep im kwal̦o̦k bwe Jijej ej kõkkaajiriri eo nejin Josep, im ewõr an maroñ in irooj ekkar ñan kien ilo l̦ain eo an Devid. Etke? Kõnke Josep ej jãn bwijjin Kiiñ Devid ikijjeen Solomon l̦eo nejin Devid. (Matu 1:6, 16) Bõtab, Luk ej laajrake menmenbwij eo an baam̦le eo an Meri im kwal̦o̦k bwe ewõr an Jijej maroñ in irooj ilo l̦ain eo an Devid ekkar ñan bõtõktõk. (Rom 1:3) Etke? Kõnke Meri ej itok jãn bwijjin Kiiñ Devid ikijjeen Netan l̦eo nejin Devid. (Luk 3:31) Ak etke Luk ejjab kõllaajrak Meri ãinwõt nejin Hilai? Kõnke ekkar ñan m̦anit eo, menmenbwij ko rej itok ikijjeen em̦m̦aan ro ilo juon baam̦le. Innem ke Luk ear kõmel̦el̦eik laajrak eo an Josep, ear kwal̦o̦k bwe Josep ej nejin Hilai, ak armej ro rar jel̦ã bwe Josep ej l̦eo pãleen Meri, lio nejin Hilai.​—Luk 3:23.

Menmenbwij kein ruo in baam̦le eo an Jijej ilo Gospel kein Matu im Luk, rej kam̦ool bwe Jijej ej Messaia eo me Anij ear kallim̦ur kake. Ekar l̦ap an armej ro jel̦ã kõn mel̦el̦e eo bwe Jijej ej itok jãn bwijjin Kiiñ Devid. Joñan, Parisi ro im Saddusi ro rar jab maroñ kariabe. Wãween an Matu im Luk kõmel̦el̦e kõn l̦ain in baam̦le eo an Jijej relukkuun aorõk ñan tõmak eo ad, im rej kõm̦m̦an bwe en wõr ad lõke bwe kallim̦ur ko an Anij renaaj jejjet im m̦ool.