EWÕR ke juon jerbal me kokõn̦aan kõm̦m̦ane ilo eklejia eo ak kwõjjab maroñ kõm̦m̦ane kiiõ? Bõlen ej juon eddo me juon ej m̦õn̦õn̦õ kake. Ak emaroñ bõlen juon iaan jerbal ko ilo doulul in, ak eddo eo me kwaar kõm̦m̦ane m̦okta. Bõtab kõn am̦ rũttol̦o̦k, nañinmej, apañ kõn jããn, ak wõr am̦ eddo ilo baam̦le eo, kwõjjab maroñ kiiõ kõm̦m̦ani men ko kwokõn kar kõm̦m̦ani m̦okta. Ak bõlen emaroñ kõn an wõr oktak ko ilo doulul in, kwaar aikuj bõjrak jãn juon jerbal me eto am̦ kõm̦m̦ane. Jekdo̦o̦n ta un eo, kwõmaroñ l̦õmn̦ak bwe kwõjjab kõm̦m̦ane aolep men ko me kokõn̦aan kõm̦m̦ani ilo jerbal eo an Anij. Ilo wãween kein, jemel̦el̦e bwe kwõmaroñ jet iien inepata im jab m̦õn̦õn̦õ. Meñe ãindein, ewi wãween am̦ maroñ kõjparok bwe eñjake ko rejjab em̦m̦an ãinwõt ebbweer, inepata, ak dãpij am̦ illu, ren jab pãd ilo bũruom̦? Ewi wãween am̦ maroñ dãpij wõt am̦ lañlõñ?

Jemaroñ katak ñan dãpij wõt ad lañlõñ ilo ad etale waanjoñak eo an Jon ri-Peptaij. Jon ear lañlõñ kõn eddo ko an me ejejuwaer, ak emaroñ kar jab kõtmãne bwe enaaj kar iiooni wãween ko rar wal̦o̦k ilo mour eo an. Emaroñ kar jab l̦õmn̦ak bwe joñan iien eo enaaj kar pãd ilo kalbuuj enaaj l̦apl̦o̦k jãn joñan iien eo ear kõm̦m̦ane jerbalin kwal̦o̦k naan eo an. Meñe ãindein, ak Jon ear wõnm̦aanl̦o̦k im lañlõñ wõt, im ear dãpij wõt l̦õmn̦ak in em̦m̦an toon wõt an mour. Ta eo ear jipañ e? Im ewi wãween ad maroñ dãpij wõt ad lañlõñ meñe jej iiooni wãween ko rej kabũrom̦õj kõj?

Emaroñ ilo kar allõñin Eprõl̦ ilo iiõ eo 29, Jon ear kõpooj armej ro ñan itok eo an Messaia eo, ilo an kar ba, “Kom̦win ukel̦o̦k bwe Aelõñin lañ epaaktok.” (Matu 3:2; Luk 1:12-17) Im elõñ rar roñjake e. Joñan, elõñ jarin armej ro rar itok jãn ijoko rettol̦o̦k ñan roñjake ennaan eo an, im elõñ rar ukel̦o̦k im peptaij. Jon ear bareinwõt peran in kakkõl ri-tõl in kabuñ ro rar kõwãnõk er make kõn iien ekajet eo me ej kattõre er el̦aññe rejjab kõm̦m̦an oktak. (Matu 3:5-12) Jon ear kõm̦m̦ane men eo aorõktata ilo jerbalin kwal̦o̦k naan eo an ke ear peptaiji Jesus ilo kar Oktoba, ilo iiõ eo 29. Jãn iien eo im m̦aanl̦o̦k, Jon ear ba bwe ro jet ren l̦oore Jesus, Messaia eo kar kallim̦ur kake.​—Jon 1:32-37.

Ikijjeen jerbal eo ejejuwaan an Jon, Jesus ekar maroñ ba, “Iaan aolep armej ro im rar mour,  ejjañin kar wõr juon en̦ eutiejl̦o̦k jãn Jon ri-Peptaij.” (Matu 11:11) Ejjel̦o̦k pere bwe Jon ear lañlõñ kõn jeraam̦m̦an ko ear bũki. Ãinwõt Jon, elõñ raanin rar bar bõk elõñ jeraam̦m̦an ko jãn Anij. Juon waanjoñak ej kõn juon jeid im jatid l̦al̦l̦ap etan in Terry. E im lel̦l̦ap eo ippãn, Sandra, elõñl̦o̦k jãn 50 iiõ in aerro kar jerbal ñan Jeova ilo jerbalin full-time. Terry ej ba, “Elukkuun lõñ jeraam̦m̦an ko iar bũki. Iar jerbalin rekũl̦ar bainier, pãd ilo Betel̦, jipejel̦ bainier, juon eo ej lol̦o̦k eklejia ko, juon district overseer, im kiiõ ij bar juon jipejel̦ bainier.” El̦ap ad m̦õn̦õn̦õ ñe jej bõk juon jerbal ilo doulul eo an Jeova, ak ãinwõt ad naaj katak jãn joñak eo an Jon, ej menin aikuj ñan kate kõj bwe jen dãpij wõt ad lañlõñ ñe ewõr oktak ilo mour ko ad.

Men eo el̦ap an kar jipañ Jon ri-peptaij ñan lañlõñ wõt ej bwe ear jab jako an kam̦m̦oolol kõn eddo ko an. Jen etale juon waanjoñak. Ãlikin an kar Jesus peptaij, jerbalin kwal̦o̦k naan eo an Jon ear dikl̦o̦k ak jerbalin kwal̦o̦k naan eo an Jesus ear l̦apl̦o̦k. Ri-kal̦oor ro an Jon rar inepata kõn men in im rar ba ñan Jon, “Eokwe, eñen̦ ej peptaij armej, im aolep rej etal ñan ippãn.” (Jon 3:26) Jon ear ba ñan er, “Kõrã eo ej m̦are ej an em̦m̦aan eo ej m̦areiki. Bõtab, ñe l̦eo m̦õttan em̦m̦aan eo ej m̦are ej jutak im roñ ainikien em̦m̦aan eo, el̦ap an m̦õn̦õn̦õ ke ej roñ ainikien. Ãindein ña, el̦ap aõ m̦õn̦õn̦õ.” (Jon 3:29) Jon ear jab jiãe ippãn Jesus im ear jab bar l̦õmn̦ak bwe jerbal eo an Jesus me el̦apl̦o̦k an aorõk ear kõm̦m̦an bwe en dikl̦o̦k tokjãn jerbal eo an. Ijoke, Jon ear dãpij wõt an lañlõñ kõnke ear kaorõk eddo eo an ãinwõt “l̦eo m̦õttan em̦m̦aan eo ej m̦are.”

Wãween an Jon l̦õmn̦ak ear jipañe bwe en m̦õn̦õn̦õ wõt jekdo̦o̦n ñe jerbal eo an ear jab pidodo. Ñan waanjoñak, Jon ear juon ri-Nazirait jãn ke ear l̦otak, im kõn men in ear mo̦ an idaak wain. (Luk 1:15) Jesus ear kõnnaan kõn mour eo el̦amwaan an Jon ke ear ba, “Jon ear jab m̦õñã ak idaak.” Bõtab, Jesus im ri-kal̦oor ro an rar jab aikuj l̦oori men ko emo̦ an juon ri-Nazirait kõm̦m̦ani im rar mour ãinwõt enañin aolep armej ro jet. (Matu 11:18, 19) Bareinwõt, meñe Jon ear jab kõm̦m̦an menin kabwilõñlõñ ko, ak ear jel̦ã bwe ri-kal̦oor ro an Jesus, ekoba jet iaan ro rar bar l̦oore e ilo jinoin, rar maroñ kõm̦m̦an menin bwilõñ. (Matu 10:1; Jon 10:41) Ijello̦kun an kar l̦õmn̦ak wõt kõn men kein, ear kijejeto wõt im eddãp ñan jerbal eo Jeova ear lel̦o̦k ñane.

El̦aññe jej bar kaorõk jerbal eo jej kõm̦m̦ane kiiõ ilo jerbal eo an Jeova, jemaroñ dãpij wõt ad lañlõñ. Terry, eo kar kwal̦o̦k kake m̦oktal̦o̦k, ej ba, “Iar l̦õmn̦ak wõt kõn kajjojo iaan jerbal ko kar litok bwe in kõm̦m̦ani.” Ilo an reilikl̦o̦k im l̦õmn̦ak kõn jerbal ko ear kõm̦m̦ani ilo mour eo an ilo jerbalin full-time, ej ba, “Ejjel̦o̦k men ij ajl̦o̦k kake ñan jidik, men ko wõt ij keememeji ej men ko rem̦m̦an iar kõm̦m̦ani.”

Jemaroñ kal̦apl̦o̦k ad lañlõñ ilo jerbal eo an Anij ilo ad kõl̦mãnl̦o̦kjen̦ kõn ta eo ej kõm̦m̦an bwe jabdewõt jerbal ilo doulul in en juon jerbal ejejuwaan. Jeraam̦m̦an eo ej bwe jej “ri-jerbal ippãn Anij.” (1 Kor. 3:9) Ãinwõt ad karabõlbõle juon menin jolõt bwe en erabõlbõl wõt, ad kõl̦mãnl̦o̦kjen̦ kõn jeraam̦m̦an eo ñan jerbal ñan Anij emaroñ bõbraik l̦õmn̦ak ko rebõd jãn aer kõm̦m̦an bwe en jakol̦o̦k ad lañlõñ. Jenaaj kõjparok bwe jen jab keidi menin katok ko ad ippãn menin katok ko an ro jet. Jeban l̦õmn̦ak bwe edikl̦o̦k tokjãn jerbal eo ad kõnke kar lel̦o̦k jerbal ko ñan ro jet.​—Gal. 6:4.

Jon emaroñ kar jel̦ã bwe juon iien jerbalin kwal̦o̦k naan eo an enaaj bõjrak, bõtab emaroñ kar jab jel̦ã bwe enaaj jem̦l̦o̦k ilo jidimkij. (Jon 3:30) Ilo iiõ eo 30, enañin 6 allõñ ko tokãlik jãn iien eo Jon ear peptaiji Jesus, Kiiñ Herod ear kalbuuji. Meñe ãindein, ak Jon ear kõm̦m̦ane ijo emaroñe ñan wõnm̦aanl̦o̦k wõt im kwal̦o̦k naan. (Mark 6:17-20) Ta eo enaaj kar jipañe ñan dãpij wõt an lañlõñ ikijjeen oktak kein? Ear l̦õmn̦ak wõt kõn men ko raorõk ippãn Jeova.

Ke Jon ear pãd ilo jikin kalbuuj, ear roñ ennaan ko rem̦m̦an kõn an ererakl̦o̦k jerbalin kwal̦o̦k naan eo an Jesus. (Matu 11:2; Luk 7:18) Jon ear tõmak bwe Jesus ej Messaia eo ak emaroñ kar l̦õmn̦ak ewi wãween an naaj Jesus maroñ kajejjet kũtien aolep men ko Jeje ko rar ba bwe Messaia eo enaaj kar katõpraki. Kõnke Jon ear jel̦ã bwe Messaia eo enaaj kar erom Kiiñ, emaroñ kar  l̦õmn̦ak el̦aññe m̦õttan jidik Jesus enaaj Kiiñ. Emaroñ kar bar l̦õmn̦ak ñe Jesus enaaj kanemkwõje jãn jikin kalbuuj. Jon ear kõn̦aan kal̦apl̦o̦k an jel̦ã kõn ta eo Jesus enaaj kar kõm̦m̦ane. Kõn men in, ear jilkinl̦o̦k ruo iaan ri-kal̦oor ro an bwe ren kajjitõk ippãn Jesus kajjitõk kein, “Kwe eo ke kõmij kõttare? Ke ta, kõmin kõttar bar juon armej?” (Luk 7:19) Ke ri-kal̦oor ro an rar jepl̦aak, Jon emaroñ kar lukkuun roñjake aer kwal̦o̦k kõn an Jesus kõm̦m̦ani menin bwilõñ ko ilo an kõmour ro renañinmej. Emaroñ kar bar lukkuun roñjake ke Jesus ear kõjepl̦aak er ñan ippãn bwe ren ba ñane, “Ro rar pilo rej kiiõ lol̦o̦kjen̦, ro rar jaje etetal rej etetal, ro rar lõba rerreo kiiõ, ro rar jarroñroñ rej roñl̦o̦kjen̦, ro rar mej rebar mour, im ro rejeram̦õl rej roñjake ennaan eo em̦m̦an.”​—Luk 7:20-22.

Ejjel̦o̦k pere bwe ennaan in ear kõkajoore Jon. Men in ear kam̦ool bwe Jesus ej kajejjet kũtien kanaan ko kõn Messaia eo. Meñe itok eo an Jesus ear jab tõll̦o̦k ñan an kanemkwõj Jon jãn jikin kalbuuj, Jon ear jel̦ã bwe ear jab ejjel̦o̦k tokjãn jerbal eo an. Jekdo̦o̦n ta ko ear iiooni, ak ekar wõr unin an m̦õn̦õn̦õ.

Ãinwõt Jon, ñe jej l̦õmn̦ak wõt kõn men ko raorõk ippãn Jeova, jenaaj maroñ dãpij wõt ad lañlõñ im kijenmej. (Kol. 1:9-11) Jemaroñ kõm̦m̦ane men in ilo ad riiti Baibõl̦ eo im kõl̦mãnl̦o̦kjen̦ kake, im kakeememej kõj make bwe jerbal eo ad ñan Anij ejjab jejtokjãn. (1 Kor. 15:58) Sandra ej ba, “Aõ riiti juon jebta ilo Baibõl̦ eo kajjojo raan ear jipañ eõ ñan epaakel̦o̦k Jeova. Ej jipañ eõ bwe in l̦õmn̦ak wõt kõn e im jab kõn ña make.” Jemaroñ bar l̦õmn̦ak kõn ripoot ko kõn jerbal ko ro jeid im jatid rej kõm̦m̦ani ñan Jeova, me remaroñ jipañ kõj ñan jab l̦õmn̦ak kõn wãween ko jej iiooni im l̦õmn̦ak wõt kõn men ko Jeova ej katõpraki. Sandra ej ba, “Pija eo ilo JW Broadcast^® me ej wal̦o̦k ilo aolep allõñ ej kõm̦m̦an bwe jen epaakel̦o̦k doulul eo, im ej jipañ kõj ñan dãpij wõt ad lañlõñ ilo jerbal eo ad.”

Jon ear kõm̦m̦ane jerbal eo an me ear jab aetok kũtien “kõn kajoor im maroñ ãinwõt kar Ilaija,” im ãinwõt Ilaija, ear “juon armej me eñjake ko an rar ãinwõt eñjake ko ad.” (Luk 1:17; Jem. 5:17) Ñe jej anõke joñak eo an ilo ad kwal̦o̦k kam̦m̦oolol im l̦õmn̦ak wõt kõn ad jerbal ñan Jeova, kõj bareinwõt jemaroñ dãpij wõt ad lañlõñ ilo jerbal ko ad ñan Aelõñ eo an Anij, jekdo̦o̦n ta ko rej wal̦o̦k ilo mour ko ad.