1. Ta eo kõj aolep jekõn̦aan bwe en wal̦o̦k ñan baam̦le ko ad?

JUON jeid im jatid kõrã etan Pauline ej ba: “Jãn iien eo iar katak im jel̦ã m̦ool eo, iar kõn̦aan bwe baam̦le eo aõ en kab pãd ippa ilo Pedetaij. El̦aptata, iar kõn̦aan bwe l̦eo ippa, Wayne, im l̦adik eo nejũm̦ro me ej dik wõt ren kobatok ippa im karejar ñan Jeova.” * (Lale kõmel̦el̦e eo itulal̦.) Ewõr ke ilo baam̦le eo am̦ me ejjañin de jel̦ã kõn Jeova im yokwe e? Bõlen kwõj bõk ejja eñjake eo wõt an Pauline kõn baam̦le eo an.

2. Ta kajjitõk ko jenaaj etali ilo katak in?

² Jejjab maroñ iuuni baam̦le ko ad bwe ren roñjake nuuj eo em̦m̦an. Bõtab, jemaroñ rõjañ er bwe ren kõpel̦l̦o̦k l̦õmn̦ak ko aer im bũrueer ñan bõk ennaan eo jãn Baibõl̦. (2 Tim. 3:14, 15) Etke jen kwal̦o̦k naan ñan baam̦le ko ad? Etke jej aikuj kwal̦o̦k ad mel̦el̦e kõn eñjake ko aer? Ta ko jemaroñ kõm̦m̦ani ñan jipañ er bwe ren jino yokwe Jeova ãinwõt kõj? Im ewi wãween an aolep ro ilo eklejia eo ad maroñ jipañ kõj?

3. Ekkar ñan 2 Piter 3:9, etke jen kwal̦o̦k naan ñan baam̦le ko ad?

³ M̦õttan jidik, Jeova enaaj bõktok jem̦l̦o̦kin jukjukun pãd in. Im ro wõt me “em̦m̦an bũrueer ñan bõk mour indeeo” renaaj el̦l̦ã im mour. (Jrb. 13:48) Jej lukkuun jol̦o̦k iien im kajoor ko ad ñan kwal̦o̦k naan ippãn armej ro jejaje kajjier ilo jikin eo jej jokwe ie, kõn men in ej piktokid bwe jen bar kõn̦aan bwe baam̦le ko ad ren kobatok ippãd im karejar ñan Jeova. Eo Jemãd me el̦ap yokwe ippãn, Jeova, “ejjab kõn̦aan bwe jabdewõt en jako, ak ekõn̦aan bwe aolep ren ukel̦o̦k.”​—Riit 2 Piter 3:9.

4. Ta bõd eo jemaroñ kõm̦m̦ane ñe jej kwal̦o̦k naan ñan baam̦le ko ad?

 ⁴ Jej aikuj keememej bwe ewõr juon wãween ejim̦we im ewõr juon wãween ebõd ñan kwal̦o̦k kõn ennaan eo an Anij ñan bõk lo̦mo̦o̦r. Ñan waanjoñak, ñe jej kwal̦o̦k naan ñan juon armej me jejaje kajjien, jemaroñ lukkuun jouj. Bõtab ñe jej kwal̦o̦k naan ñan baam̦le ko ad jemaroñ lukkuun kajju.

5. Ta eo jen keememeje m̦okta jãn ad kwal̦o̦k kõn m̦ool eo ñan baam̦le ko ad?

⁵ Elõñ iaad jemaroñ reilikl̦o̦k im ajl̦o̦k kõn wãween ad kar kwal̦o̦k naan ñan baam̦le ko ad ilo jinoin im jekõn̦aan bwe en kar oktakl̦o̦k jidik wãween ad kwal̦o̦k naan ñan er. Rijjilõk Paul ear kakapilõke Kũrjin ro im ba: “Ami kõnono en ilo jouj iien otemjej, im kom̦win kãreiki kõn jo̦o̦l̦ bwe kom̦win maroñ jel̦ã kilen uwaake kajjojo armej.” (Kol. 4:5, 6) Em̦m̦an bwe jen keememej naanin kakapilõklõk in ñe jej kõnnaan ñan baam̦le ko ad. Kõnke ñe jejjab, jemaroñ jujen kõm̦m̦an bwe ren kattol̦o̦k er ijello̦kun ad kareel er.

6-7. Kwal̦o̦k juon waanjoñak kõn unin an aorõk bwe Kũrjin ro ren kwal̦o̦k aer mel̦el̦e kõn eñjake ko an ro pãleer me rejjab pãd ilo tõmak.

⁶ Kwal̦o̦k am̦ mel̦el̦e kõn eñjake ko aer. Pauline, eo kar kwal̦o̦k kake m̦oktal̦o̦k, ej ba: “Ilo jinoin, iar kõn̦aan wõt kõnono ippãn l̦eo ippa kõn Anij im Baibõl̦ eo. Kõm̦ro ar jab kõnono kõn men ko jet me rar wal̦o̦k jãn raan ñan raan.” Bõtab, l̦eo pãleen Pauline etan Wayne, jidik wõt an kar jel̦ã kõn Baibõl̦ eo im ear jab mel̦el̦e kõn men ko Pauline ear kõnono kaki. El̦ak lale men eo wõt el̦ap an Pauline l̦õmn̦ak kake ej kabuñ eo an. Im ear inepata ñe kõrã in ippãn ear kobal̦o̦k ippãn juon kumi ekauwõtata me rej kõjenolo̦k er im bwe em̦õj aer m̦on̦e.

 ⁷ Pauline ej kwal̦o̦k m̦ool bwe ium̦win jidik iien, ekõn l̦ap an jol̦o̦k iien ippãn ro jein im jatin ilo eklejia eo ilo jota im wiikããn. Ekõn kõm̦m̦ane men in ilo iien kweilo̦k ko, ilo kwal̦o̦k naan, im ilo iien m̦õñã im iiãio ko. Pauline ej ba: “Jet iien ñe Wayne ej ro̦o̦l ñan m̦weo, ejjel̦o̦k armej im ear bũrom̦õj bwe emake iaan.” Jemel̦el̦e bwe Wayne ear oñkake kõrã eo pãleen im l̦adik eo nejin. Ear jab jel̦ã kajjien armej ro me rej pãd ippãer, im el̦ak lale ãinwõt el̦apl̦o̦k an kõrã eo pãleen kaorõke ro m̦õttan rekããl jãn e. Wayne ear illu im kakore Pauline ilo an ba bwe ej itõn kõm̦m̦an peba in jepel. Kwõj ke lo wãween ko me Pauline emaroñ kar kõm̦m̦ani ñan kwal̦o̦k an mel̦el̦e kõn eñjake ko an eo pãleen?

8. Ekkar ñan 1 Piter 3:1, 2, ta eo ekkã an l̦aptata an kõm̦akũt baam̦le ko ad?

⁸ Kõtl̦o̦k bwe m̦wilũm̦ en kõnono ñan kwe. Ekkã wõt an men ko jej kõm̦m̦ani l̦apl̦o̦k aer kõm̦akũt baam̦le ko ad jãn men ko jej ba. (Riit 1 Piter 3:1, 2.) Tokãlik, Pauline ear maroñ kile bwe men in em̦ool. Ej ba: “Iar jel̦ã bwe Wayne ear yokwe kom̦ro l̦adik eo nejũm̦ro im bwe ear jab kõn̦aan jepel. Bõtab, ke ear ba bwe ej itõn kõm̦m̦an peba in jepel iar kile bwe iar aikuj jino jerbali men ko Jeova ej ba ikijjeen mourin pãlele. Ijello̦kun an kar l̦ap aõ kõnnaan, iar aikuj kõm̦m̦an juon joñak em̦m̦an ikijjeen kõm̦m̦an ko aõ.” Pauline ear bõjrak jãn an iuuni Wayne bwe en kõnono kõn Baibõl̦, im ear jino an bwebwenato ippãn kõn men ko jet me rej wal̦o̦k jãn raan ñan raan. Wayne ear loe an Pauline jel̦ãl̦o̦k kõm̦m̦an aenõm̦m̦an, im ear loe an em̦m̦anl̦o̦k m̦wilin l̦adik eo nejierro. (JK. 31:18, 27, 28) Ke Wayne ear loe wãween an ennaan eo jãn Baibõl̦ jelõt kõrã eo ippãn im l̦adik eo nejierro, men in ear  kõpel̦l̦o̦k l̦õmn̦ak ko an im bũruon ñan roñjake Naanin Anij.​—1 Kor. 7:12-14, 16.

9. Etke jej aikuj kate wõt kõj ñan kajjioñ jipañ baam̦le ko ad?

⁹ Kate wõt eok ñan kajjioñ jipañ baam̦le ko am̦. Jeova ej likũt juon joñak ñan kõj. ‘Ejjab bõjrak’ jãn an lel̦o̦k juon iien em̦m̦an ñan an armej ro roñjake nuuj eo em̦m̦an im bõk mour indeeo. (Jrm. 44:4) Im rijjilõk Paul ear jiroñ Timote bwe en lukkuun kate wõt e ilo an jipañ ro jet. Etke? Kõnke ilo an naaj kar kõm̦m̦ane men in, enaaj maroñ lo̦mo̦o̦ren e make im ro rej roñjake e. (1 Tim. 4:16) Jej yokwe baam̦le ko ad, im kõn men in jekõn̦aan bwe ren jel̦ã katak ko rem̦ool jãn Naanin Anij. Jet iien tokãlik, naan im kõm̦m̦an ko an Pauline rar jelõt baam̦le eo an ilo juon wãween em̦m̦an. El̦ap an m̦õn̦õn̦õ bwe kiiõ ej karejar ñan Jeova ippãn l̦eo pãleen. Erro jim̦or ej bainier, im Wayne ej juon iaan em̦m̦aan ro rej lale eklejia.

10. Etke jej aikuj kijenmej wõt?

¹⁰ Kijenmej wõt. Ñe jej ukot mour ko ad bwe jen mour ekkar ñan l̦õmn̦ak ko an Anij, emaroñ pen ñan an baam̦le ko ad errã ilo tõmak eo ad ekããl im wãween mour eo ad kiiõ. Men eo m̦oktata ekkã aer kile ej bwe ejako ad kobal̦o̦k ippãer ilo iien ko rel̦l̦ap an kabuñ ko im ejako ad bõk kun̦aad ilo m̦akũtkũt ko an kien. Jet iaan baam̦le ko ad remaroñ illu ippãd ilo jinoin. (Matu 10:35, 36) Bõtab, jen jab l̦õmn̦ak bwe reban oktak. El̦aññe jej bõjrak jãn ad kajjioñ jipañ er ñan mel̦el̦e kõn tõmak eo ad, ej ãinwõt ñe em̦õj ad kadede ekajete er bwe ejjab tõllo̦kier ñan bõk mour indeeo. Jeova ejjañin kar letok jerbalin ekajet ñan kõj. Ear lel̦o̦k jerbal in ñan Jesus. (Jon 5:22) El̦aññe jej kijenmej wõt, bõlen juon iien baam̦le ko ad renaaj m̦õn̦õn̦õ in roñjake ad kwal̦o̦k naan ñan er.​—Lale bo̦o̦k eo etan “ Kõjerbal Weepjait eo Ad ñan Katakin.”

11-13. Ta eo jej katak jãn wãween an kar Alice kõm̦m̦an ñan jemãn im jinen?

¹¹ Kwal̦o̦k am̦ jutak pen ak ilo jouj. (JK. 15:2) L̦õmn̦ak kõn waanjoñak eo an Alice. Ear katak kõn Jeova ke ear jokwe ilo juon jikin ettol̦o̦k jãn jemãn im jinen, me rar jab tõmak ilo Anij im el̦ap aer kar bõk kun̦aaer ilo m̦akũtkũt ko an kien. Ear kile bwe ear aikuj karoñ erro ilo iien eo em̦õkajtata kõn men ko rem̦m̦an ear katak kaki. Alice ej ba, “El̦aññe kwõj kõttar m̦ae juon iien tokãlik ñan kwal̦o̦k bwe eoktak tõmak eo am̦ im men ko kwõj kõm̦m̦ani, enaaj l̦apl̦o̦k an baam̦le eo am̦ inepata ippam̦.” Alice ear kajjioñ pukot katak ko me ear kõjatdikdik bwe renaaj kãitoklimoik jemãn im jinen, ãinwõt yokwe. Innem ear jeje lõta ñan erro im kwal̦o̦k ta eo Baibõl̦ ej ba kõn men kein im kajjitõk ejet aerro l̦õmn̦ak kaki. (1 Kor. 13:1-13) Ear kam̦m̦oolol jemãn im jinen kõn aerro kar lale im kõjparok e, im ear jilkinl̦o̦k menin lel̦o̦k ko ñan erro. Ilo iien ko ekõn jam̦bol̦o̦k ñan m̦weo im̦õn rũtto ro jemãn im jinen, ear kõmaat joñan an maroñ ñan jipañ jinen kõm̦m̦ani jerbal ko ilo m̦weo. Ilo jinoin, jemãn im jinen Alice rar jab m̦õn̦õn̦õ ke ear ba ñan erro kõn tõmak eo an ekããl.

¹² Ke Alice ear pãd m̦weo ippãn jemãn im jinen, ear l̦oore wõt jikejuul̦ eo an ñan riit Baibõl̦ aolep raan. Alice ej ba, “Men in ear jipañ jinõ ñan mel̦el̦e ewi joñan an aorõk Baibõl̦ eo ippa.” Ilo tõre in, jemãn ear pepe ñan riiti Baibõl̦ bwe en maroñ mel̦el̦e etke eoktak l̦õmn̦ak eo an ledik eo nejin, im bareinwõt ear kõn̦aan kappok bõd ilo Baibõl̦. Alice ej ba: “Iar lel̦o̦k juon an Baibõl̦ im iar je jet naan ñane ilo lowaan.” Ta eo ear wal̦o̦k tokãlik? Ijello̦kun an kar jemãn Alice ellolo bõd, men ko ear riiti ilo Naanin Anij rar lukkuun kõm̦akũt bũruon.

¹³ Jej aikuj kwal̦o̦k ad jutak pen ak ilo juon wãween ejouj, meñe ej mel̦el̦ein bwe jenaaj  aikuj in kijenmej ium̦win mãlejjoñ ko reppen. (1 Kor. 4:12) Ñan waanjoñak, Alice ear aikuj kijenmej ke ear iioon jum̦ae jãn jinen. Ej ba: “Ke iar peptaij, m̦am̦a ear jiroñtok eõ im ba bwe ilukkuun kabbwil.” Ta eo Alice ear kõm̦m̦ane? Ej ba: “Ijello̦kun aõ kar kõjekdo̦o̦ne apañ eo, iar kõmel̦el̦eiki ilo jouj im kautiej bwe em̦õj aõ pepe ippa make bwe in erom juon iaan Ri-Kõnnaan ro an Jeova im bwe iban ukot aõ l̦õmn̦ak. Iar kajjioñ kõm̦m̦an bwe jinõ en lukkuun tõmak bwe el̦ap aõ yokwe e. Innem kom̦ro jim̦or ar jañ, im iar kõmat juon kijen m̦õñã enno̦. Jãn tõre eo m̦aanl̦o̦k, jinõ ear jino kwal̦o̦k an kile bwe Baibõl̦ eo ear kõm̦m̦an bwe in juon armej eo em̦m̦anl̦o̦k.”

14. Etke jejjab aikuj in kõtl̦o̦k bwe baam̦le ko ad ren ukot pepe eo ad ñan karejar ñan Jeova?

¹⁴ Emaroñ bõk iien ñan an baam̦le ko ad lukkuun mel̦el̦e ewi joñan ad kaorõk ad karejar ñan Jeova. Ñan waanjoñak, ke Alice ear pepe in bainier im jab jibadek jerbal eo jemãn im jinen rar kõn̦aan bwe en bõke, jinen ear bar jañ. Bõtab, Alice ear jutak pen wõt. Ej ba: “El̦aññe kwõj kõtl̦o̦k bwe baam̦le eo am̦ en ukote pepe eo am̦ kõn juon men, renaaj bar bõlen kajjioñ ukot pepe eo am̦ kõn men ko jet. Ijoke, el̦aññe kwõj kwal̦o̦k am̦ jutak pen ak ilo jouj, jet iaan baam̦le eo am̦ remaroñ roñjake eok.” Eñin men eo ear wal̦o̦k ñan Alice. Kiiõ jemãn im jinen rej jim̦or bainier, im jemãn ej juon iaan ro rej lale eklejia.

15. Ekkar ñan Matu 5:14-16 im 1 Piter 2:12, ewi wãween an “jerbal ko rem̦m̦an” an ro jet maroñ jipañ baam̦le ko ad?

¹⁵ Jeova ej karuwaaktok armej ro ñan ippãn ikijjeen “jerbal ko rem̦m̦an” an eklejia eo.  (Riit Matu 5:14-16; 1 Piter 2:12.) El̦aññe eo pãleem̦ ejjab juon iaan Ri-Kõnnaan ro an Jeova, enañin ke iioone ro uwaan eklejia eo am̦? Pauline, eo kar kwal̦o̦k kake m̦oktal̦o̦k, ear kũrl̦o̦k ro jeid im jatid ñan m̦weo im̦õn bwe l̦eo ippãn, Wayne, en maroñ jino jel̦ã kajjier. Wayne ej keememejtok an kar juon jeid im jatid em̦m̦aan jipañe bwe en jako wãween an bõd an l̦õmn̦ak kõn Ri-Kõnnaan ro an Jeova. Wayne ej ba: “Ear bõk juon raanin kakkije jãn jikin jerbal eo an bwe en alwõj keem ippa. Im iar l̦õmn̦ak ippa make, ‘L̦ein ebar wõr an itoklimo kõn men ko jet ãinwõt enañin aolep armej!’”

16. Etke jej aikuj kũr baam̦le ko ad bwe ren itok im kweilo̦k?

¹⁶ Juon wãween em̦m̦antata ñan jipañ baam̦le ko ad ej ñan kũr er bwe ren itok im kweilo̦k ippãd. (1 Kor. 14:24, 25) Kweilo̦k eo jinointata Wayne ear etal ñane ej Kwõjkwõj eo. Ekar maroñ etal kõnke ear wal̦o̦k ilo ãlikin jerbal im ejjab lukkuun aetok. Ej ba: “Iar jab lukkuun mel̦el̦e kõn katak eo, bõtab iar keememej armej ro. Rar itok ñan ippa im karwaineneik eõ im rar letok peier im lukkuun yokyokweik eõ. Iar maroñ kile bwe rej jet armej ro rem̦m̦an.” Ekar wõr ruo rippãlele me rekõn kwal̦o̦k jouj ñan Pauline m̦oktal̦o̦k im jipañe kõn l̦adik eo nejin ilo iien kweilo̦k im ilo jerbalin kwal̦o̦k naan. Innem tokãlik ke Wayne ear pepe in kal̦apl̦o̦k an mel̦el̦e kõn tõmak eo ekããl an Pauline, ear kajjitõk ippãn em̦m̦aan eo bwe en katak Baibõl̦ ippãn.

17. Ta eo jejjab aikuj n̦aruod make kake, im etke jejjab aikuj in ebbweer jãn baam̦le ko ad im l̦õmn̦ak bwe reban oktak?

¹⁷ Jej kõjatdikdik bwe aolepen baam̦le ko ad renaaj kobatok ippãd im karejar ñan Jeova. Bõtab, jekdo̦o̦n ewi joñan ad kate kõj ñan jipañ baam̦le ko ad bwe ren erom ri-karejar ro an Anij, remaroñ jab itok ñan m̦ool eo. El̦aññe ej ãindein, jejjab aikuj n̦aruod make kõn pepe eo aer. Jejjab maroñ iuun jabdewõt bwe ren oktak ñan tõmak eo ad. Ijoke, jab pere wãween an joñak eo am̦ maroñ jelõt baam̦le ko am̦ ñe rej loe am̦ m̦õn̦õn̦õ kõn am̦ karejar ñan Jeova. Jar kõn er. Kõnono ñan er ilo jouj. Im jab bõjrak jãn am̦ kajjioñ jipañ er! (Jrb. 20:20) Kwõn lõke bwe Jeova enaaj kõjeraam̦m̦an eok kõn am̦ lukkuun kate eok. Im el̦aññe baam̦le ko am̦ rej kããlõt ñan roñjake eok, Anij enaaj lo̦mo̦o̦ren er!