ILO M̦aaj 26, ilo iiõ eo 1937, ruo em̦m̦aan rar tõparl̦o̦k Sydney, ilo Aujtõrõlia. Rar ettõrl̦o̦k kõn juon wa me el̦ap an bũñalñal im ettoon ãlikin aerro kar itoitak jãn jikin ñan jikin. Ium̦win juon iiõ m̦okta jãn iien in, erro kar ettõr elõñl̦o̦k jãn 12,000 m̦ail̦ ñan ijoko rettol̦o̦ktata me rettol̦tol̦ im enana ial̦ ko ie. Em̦m̦aan rein rar jab etal ñan jikin kein ñan aerro jam̦bo im alwõj bajjek. Etan em̦m̦aan rein ej Arthur Willis im Bill Newlands, im erro kar jet iaan bainier ro rekijejeto me rar kate er ñan kwal̦o̦k kõn ennaan eo em̦m̦an kõn Aelõñ eo an Anij ilo jikin ko rettol̦o̦k ilo Aujtõrõlia.

M̦ae jem̦l̦o̦kinl̦o̦k 1920 jim̦a ko, ekkã an kar kumi jidikdik in Rũkkatak Baibõl̦ ro ilo Aujtõrõlia kwal̦o̦k naan ilo jikin ko im bukwõn ko repaake lo̦jet. * (Lale kõmel̦el̦e eo itulal̦.) Ebar wõr jikin ko iol̦apen Aujtõrõlia me relukkuun ettol̦o̦k jãn bukwõn ko elõñ armej ie. Ebwe an m̦õrã jikin kein im joñan depakpakier ej jimattanin Amedka. Meñe ãindein, ak ro jeid im jatid rar jel̦ã bwe ro rej rũkal̦ooran Jijej rej aikuj kwal̦o̦k kõn ennaan eo em̦m̦an kõn e “ñan ãne eo ettol̦o̦ktata ilal̦,” ekoba jikin kein epen tõpari ilo Aujtõrõlia. (Jrb. 1:8) Ak ewi wãween aer kar maroñ katõprak jerbal in ekanooj l̦ap? Kõn aer lukkuun tõmak bwe Jeova enaaj jipañ im kajeraam̦m̦an er, rar peek ippãer make bwe renaaj kate er joñan wõt aer maroñ.

Ilo 1929 eo, eklejia ko ilo Queensland im Western Aujtõrõlia rar kõm̦m̦an jet wa ko repol̦õmãer bwe ren maroñ kõjerbali ñan aer kwal̦o̦k naan ilo jikin ko rettol̦o̦k ilo Aujtõrõlia. Ro im rar ettõr kõn wa kein kar bainier ro me renaaj jel̦ã kilen mour ilo jikin kein rettol̦o̦k im renaaj kar jel̦ã kõm̦adm̦õdi jorrããn ko rej wal̦o̦k ilo wa kein. Bainier rein rar maroñ tõpar elõñ jikin ko me rukwal̦o̦k naan ro rejjañin kar etal ñani.

Bainier ro me ear m̦õjn̦o̦ peier ñan wia waer wa rar kõjerbal baajkõl̦ ñan aer etal ñan jikin kein rettol̦o̦k. Ñan waanjoñak ilo kar 1932 eo, Bennett Brickell eo me 23 an kar iiõ, ear baajkõl̦ jãn bukwõn in Rockhampton ilo Queensland bwe en kõm̦m̦ane juon an tũreep me l̦alem allõñ aetokin. Ilo tũreep in an, enaaj kar kwal̦o̦k naan ilo jikin ko rettol̦o̦k me rej pãd ijoko ituiõñ ilo Queensland. Ilo baajkõl̦ eo waan ear ebbõk ko̦o̦j, nuknuk, kijen m̦õñã, im elõñ bok. Ke ear jorrããn neen baajkõl̦ eo waan, ear wõnm̦aanl̦o̦k wõt kõnke ear lõke bwe Jeova enaaj kar jipañ im tõl  e. Ear bwilli baajkõl̦ eo waan 200 m̦ail̦ ilo ijoko me jet rar mej kõn an kar ejjel̦o̦k dãn. Ium̦win elõñl̦o̦k jãn 30 iiõ ko tokãlik, jeid im jatid Bennett Brickell ear itoitak elõñ to̦ujin m̦ail̦ ilujen Aujtõrõlia ilo an kar kõjerbal baajkõl̦, wõtbai, im wa. E eo jinointata ear kwal̦o̦k naan ñan ro rej lukkuun armejin Aujtõrõlia etaer in Aborigines, im ear jipañ kajutak eklejia ko rekããl. Kõn men in, elõñ ro ilo kar jikin kein rar jel̦ã kajjien im kwal̦o̦k kautiej ñane.

Aujtõrõlia ej juon iaan aelõñ ko ilo lal̦ in me jikin ko ie rejjab obrak kõn armej, el̦aptata ilo jikin ko me rettol̦o̦k kõnke ekkã an m̦õko m̦õn armej ro ilo jikin kein pãd ettol̦o̦k jãn doon. Kõn men in, armej ro an Jeova rar kate er joñan wõt aer maroñ ñan pukot armej ro me rej pãd ilo jikin kein rettol̦o̦k.

Ruo iaan bainier ro me rar kate er ñan kõm̦m̦ane men in ej Stuart Keltie im William Torrington. Ilo kar 1993 eo, rar etal ilujenl̦o̦k Simpson Desert, juon jikin edepakpak me ejeja wõjke im ujooj ko ie im elukkuun bokboke. Rar kijoone ijin bwe ren maroñ kwal̦o̦k naan ilo juon bukwõn etan Alice Springs me ej pãd iol̦apen Aujtõrõlia. Ke ear jorrããn wa eo waerro im erro kar aikuj jol̦o̦ke, jeid im jatid Stuart Keltie, eo im ej kõjerbal neen to̦l̦e ear wõnm̦aanl̦o̦k wõt ilo tũreep in an ñan kwal̦o̦k naan ilo an kar uwe ioon juon kamel̦. Bainier rein rar lo tõprak ke rar iioon juon em̦m̦aan me ej mãnija ñan oteel̦ eo an ilo William Creek, juon jikin me train ko rej bõjrak ie. Tokãlik, em̦m̦aan in an oteel̦ in etan Charles Bernhardt ear itok ñan m̦ool eo. Innem ear wiakake oteel̦ eo an im ear make iaan im bainier ilo jet iaan jikin ko rem̦õrã im rettol̦o̦k tata ilo Aujtõrõlia ium̦win 15 iiõ.

Bainier ro jinointata rar aikuj in peran im kijejeto wõt ñan aer maroñ kijenmej ium̦win elõñ apañ ko rar iiooni. Ke Arthur Willis im Bill Newlands, ro me kar kwal̦o̦k kake er ilo jinoin bwebwenato in, rar kwal̦o̦k naan ilo jikin ko rettol̦o̦k ilo Aujtõrõlia, ewõr juon iien erro kar lukkuun eñtaan ke erro ar etal ilo ãne jem̦aden l̦o̦k. Kõn an kar wõt mijeljel, men in ear kõm̦m̦an an pedkat ial̦ eo im pen aer kijoone jikin ko el̦ap aer bokboke. Kõn men in, ekar bõk ruo wiik in aerro etetal ium̦win 20 m̦ail̦. Jet iien erro ar lukkuun bwil im menokadu kõn aerro bwilli wa eo waerro ioon tol̦ in bok ko ilo iien ko edet jilõñlõñ. Erro ar bar etal ilo kom̦lal̦ ko me redekãke im deblo̦ke reba ko me relim̦lim̦ im relukkuun bokbok. Eokkutkut an kar jorrããn wa eo waerro im ñe ej wal̦o̦k men in, erro kõn etetal ak baajkõl̦ l̦o̦k ium̦win elõñ raan ñan bukwõn ko repaak im kõttar ie ium̦win jet wiik ñan an itok baat ko rej aikuji ñan wa eo waerro. Meñe erro kar iiooni wãween kein reppen, ak erro kar m̦õn̦õn̦õ wõt. Arthur Willis ear ãliji naan ko me rar itok jãn bok eo etan The Golden Age me rej ba: “Ejjel̦o̦k juon ial̦ elukkuun aetok im pen ñan Ri kõnnaan ro an Jeova.”

Charles Harris, eo im eto an kar bainier ear ba bwe an kar iioon wãween ko reppen ke ear kwal̦o̦k naan ilo jikin ko rettol̦o̦k ilo Aujtõrõlia, ear kõm̦m̦an bwe en epaakel̦o̦k wõt Jeova. Ear bar ba: “Jemaroñ lo m̦õn̦õn̦õ wõt ilo mour ko ad meñe ejjab lukkuun lõñ men ko ippãd. El̦aññe ear ejjel̦o̦k jikin an kar Jijej jokwe im kakkije, innem jej aikuj m̦õn̦õn̦õ in bar kõm̦m̦ane men in ilo jerbal eo ad ñe ej menin aikuj.” Eñin men eo elõñ bainier ro rar kõm̦m̦ane. El̦ap ad kam̦m̦oolol er kõn an l̦ap aer kar kate er ñan kõm̦m̦an bwe ennaan eo em̦m̦an en ajeeded ñan aolep jikin ko ilo Aujtõrõlia im kõn aer kar jipañ elõñ armej ro ñan jel̦ã kõn Aelõñ eo an Anij im rejetake.