Kwaar ke lukkuun riiti Naan in Keeañ ko an allõñ ko l̦o̦k? Lale kwõmaroñ ke uwaake kajjitõk kein:

Ke Jijej ear kwal̦o̦k naanin kakapilõk eo an ilo Matu 18:15-17 (UBS), kain jerawiwi rot eo ear kõnnaan kake?

Ear kõnnaan kõn bõd ko me armej ro remaroñ kõm̦adm̦õdi ikõtaer make. Bõd kein ebwe aer l̦ap kõnke armej ro rej kõm̦m̦ani remaroñ aikuj bukwel̦o̦k el̦aññe rejjab kõm̦m̦an oktak. Jerawiwi eo me eoon in ej kwal̦o̦k kake ekitibuj an juon riab n̦ae juon ñan kõm̦m̦an bwe en nana etan ak kõm̦m̦ani jerbal ko rejjab jim̦we me rekitibuj ko̦o̦t.​—w16.05, p. 7.

Ta ko jemaroñ kõm̦m̦ani bwe jen lukkuun bõk tokjãn jãn aolep eoon ko jej riiti ilo Baibõl̦?

Erkein jet iaan men ko jemaroñ kõm̦m̦ani: Ñe jej riit, jen lale ta ko jemaroñ katak jãn eoon ko im l̦oori, im jen jab l̦õmn̦ak bwe jet iaan mel̦el̦e ko rejjab ñan kõj; jen kajjitõk ippãd make kajjitõk ko ãinwõt, ‘Ewi wãween aõ maroñ kõjerbal eoon kein ñan jipañ ro jet?’; im jen kõjerbal kein kappok mel̦el̦e ko ñan kal̦apl̦o̦k ad mel̦el̦e kõn eoon ko jej riiti.​—w16.05, p. 24-26.

Kõnke juon eo ej karejar ñan Anij ej tõmak bwe ro remej renaaj bar mour, ebõd ke ñan an kwal̦o̦k an bũrom̦õj ñe ej mej juon eo ejitõnbõro ippãn?

Ñe ej mej juon eo ejitõnbõro ippãd, jenaaj baj bũrom̦õj wõt meñe jej tõmak ilo kallim̦ur eo bwe ro remej renaaj bar mour. Ebream ear jañũt Sera ke ear mej. (Jenesis 23:2) Ñe emootl̦o̦k elõñ iiõ, enaaj etal im dikl̦o̦k ad bũrom̦õj.​—wp16.3, p. 4.

Wõn em̦m̦aan eo ewõr kein jeje ippãn im em̦m̦aan ro jiljino ewõr kein ko̦kkure ippãer me bokin Ezekiel jebta 9 ej kwal̦o̦k kake er?

Em̦m̦aan rein rej pijaikl̦o̦k enjel̦ ro me rar bõk kun̦aaer ilo iien eo kar ko̦kkure Jerusalem im renaaj bar bõk kun̦aaer ñan kõjem̦l̦o̦k jukjukun pãd in enana an Setan ilo Armagedon. Em̦m̦aan eo ewõr kein jeje ippãn ej jutak kõn Jijej Kũraij, e eo ej kõkal̦l̦eik dem̦an armej ro renaaj el̦l̦ã im mour.​—w16.06, p. 16-17.

Baibõl̦ ej pãdwõt ñan rainin meñe elõñ men ko rar wal̦o̦k me remaroñ kar kõm̦m̦an bwe en jako. Ta jet iaan men kein?

Baibõl̦ eo ej pãdwõt ñan rainin meñe (1) peba ko kar jeje ioer rar m̦õkaj aer m̦or; (2) rũtõl ro an kien im kabuñ rar kajjioñ jol̦o̦ke; im (3) jet rar kajjioñ ukot mel̦el̦e ko ie.​—wp16.4, p. 4-7.

Ta ko juon Kũrjin emaroñ kõm̦m̦ani bwe en maroñ kal̦apl̦o̦k kun̦aan?

Lale ta ko kwõj lukkuun aikuji, im jab wiaiki men ko kwõjjab aikuji. Bajete jããn ko am̦. Aji men ko kwõjjab kõjerbali, im kõl̦l̦ãik aolep m̦uri ko am̦. Kadikl̦o̦k awa in am̦ jerbal ilo jikin jerbal eo am̦, im l̦õmn̦ak kõn wãween am̦ maroñ kal̦apl̦o̦k kun̦aam̦.​—w16.07, p. 10.

Ekkar ñan Baibõl̦, ta men eo em̦m̦anl̦o̦k jãn kool̦ ak jelba?

Bokin Job 28:12, 15 ej kwal̦o̦k bwe mãlõtlõt eo jãn Anij em̦m̦anl̦o̦k jãn kool̦ ak jelba. Ilo am̦ pukot mãlõtlõt eo jãn Anij, wõnm̦aanl̦o̦k wõt im kõttãik bũruom̦ im kate eok bwe en kajoor wõt tõmak eo am̦.​—w16.08, p. 18-19.

Ilo raan kein, ekkar ke bwe en wõr an em̦m̦aan im likao ro kwõdeak?

Ilo jet aelõñ ko, ñe ej wõr an em̦m̦aan ro kwõdeak me erreo im em̦m̦an joñan aer kõkaduuki, men in ejjab juon men armej ro rej kananaiki im ejjab kõm̦m̦an aer l̦õkatip im jab kõn̦aan roñjake ennaan eo kõn Aelõñ eo. Meñe ãindein, ak jet em̦m̦aan im likao ro rej pepe in jab kõm̦m̦an aer kwõdeak. (1 Korint 8:9) Ilo aelõñ ko jet, ejjab juon m̦anit bwe en wõr an em̦m̦aan ro kwõdeak im armej ro rej watõk bwe ro rej Kũrjin rejjab aikuj wõr aer kwõdeak.​—w16.09, p. 21.

Etke jemaroñ tõmak bwe bwebwenato eo ilo Baibõl̦ kõn Devid im Golaiat ear lukkuun wal̦o̦k?

Ñe jej keidi joñan aetokin em̦m̦aan eo eaetoktata ilo raan kein ñan joñan aetokin kar Golaiat, jenaaj loe bwe Golaiat ej 6 wõt inij aetokl̦o̦k jãn em̦m̦aan in. Jejel̦ã bwe Devid ear juon armej me ear mour ilo iien ko etto kõnke Jijej ear kõnnaan kake im ewõr juon men rar loe jãn iien ko etto me kar je im kwal̦o̦k kõn m̦weo im̦õn Devid. Bareinwõt, elõñ kein kam̦ool ko rej kwal̦o̦k bwe jikin ko rej wal̦o̦k ilo bwebwenato in rej m̦oolin jikin.​—wp16.5, p. 13.

Ewi wãween an mãlõtlõt oktak jãn jel̦ãl̦o̦kjen̦ im mel̦el̦e?

Juon eo ejel̦ãl̦o̦kjen̦ ejel̦ã wõt kõn mel̦el̦e ko rem̦ool kõn juon men. Im juon eo emel̦el̦e kõn juon men emaroñ loe wãween an men eo ekkejell̦o̦k ippãn mel̦el̦e ko jet. Bõtab, ñe Baibõl̦ ej kõnnaan kõn juon eo emãlõtlõt, ej jitõñl̦o̦k ñan juon eo ej kõm̦m̦an ekkar ñan men ko ewõr an jel̦ã im mel̦el̦e kaki.​—w16.10, p. 18.