1, 2. (1) Etke jet iien jej inepata? (Lale pija eo itulõñ.) (2) Ta ko jenaaj etali ilo katak in?

 RAININ, el̦ap an Setan Tepil̦ eo illu im ej ‘ãinwõt juon l̦aiõn erorror me ej pukot wõn eo emaroñ kañe.’ (1 Piter 5:8; Revelesõn 12:17) Eñin unin elukkuun pen mour ilo raan kein im elõñ apañ ko rej kõm̦m̦an bwe rũkarejar ro an Anij ren inepata. Rũkarejar ro an Anij ilo iien ko etto rar bar inepata. Ñan waanjoñak, Baibõl̦ ej kwal̦o̦k bwe ewõr iien Kiiñ Devid ear “inepata.” (Sam 13:2) Bareinwõt, rijjilõk Paul ear inepata kõn aolep eklejia ko ilo tõre eo an kõnke ear lukkuun kõn̦aan jipañ er. (2 Korint 11:28, UBS) Bõtab, ta ko jemaroñ kõm̦m̦ani ñe el̦ap ad inepata?

² Jemãdwõj ilañ ear jipañ rũkarejar ro an ilo iien ko etto ke rar inepata, im ekõn̦aan bar jipañ kõj ilo raan kein. Baibõl̦ ej rõjañ kõj im ba: “Kom̦win likũt ami inepata otemjej n̦a Ippãn, bwe kwõaorõk Ippãn.” (1 Piter 5:7) Bõtab ewi wãween ad maroñ kõm̦m̦ane men in? Jen etale emãn men ko me jemaroñ kõm̦m̦ani. Jemaroñ (1) jar ñan Jeova, (2) riit im kõl̦mãnl̦o̦kjen̦ kõn Naanin Anij, (3) kajjitõk ippãn Jeova kõn jetõb kwõjarjar eo an, im (4) kwal̦o̦k inepata ko ad ñan juon eo jepaake im jej lõke. Ilo ad naaj etale men kein emãn, kwõmaroñ lale ewi iaan men kein me kokõn̦aan kal̦apl̦o̦k am̦ kate eok ñan kõm̦m̦ane.

3. Ewi wãween am̦ maroñ “jol̦o̦k menin eddo ko am̦ ioon Jeova”?

³ Men eo kein kajuon jemaroñ kõm̦m̦ane ñe jej inepata ej kepaak Jeova ilo jar. Ñe kwõj iioon wãween ko me rej kõm̦m̦an am̦ inepata, kwõmaroñ kwal̦o̦k bũruom̦ ñan Jem̦am̦ ilañ, Jeova. Devid, juon iaan ro rar je bokin Sam, ear akwel̦ap ñan Jeova im ba: “Kwõn eo̦roñ aõ jar, O Anij.” Innem ilo ejja jebta in wõt me ear jei naan kein ie, ear bar ba: “Kwõn jol̦o̦k menin eddo ko am̦ ioon Jeova, im Enaaj bo̦ur eok.” (Sam 55:1, 22) Ãlikin am̦ kate eok joñan wõt am̦ maroñ ñan kõm̦adm̦õde apañ eo kwõj iioone, em̦m̦an ñe kwõj kwal̦o̦k bũruom̦ ñan Jeova ilo jar ijello̦kun am̦ inepata. Am̦ jar enaaj l̦apl̦o̦k an jipañ eok jãn ñe kwõj inepata. Bõtab ewi wãween an jar maroñ jipañ eok bwe en jab l̦ap am̦ inepata?​—Sam 94:18, 19, UBS.

4. Ñe jej lukkuun inepata, etke elukkuun aorõk bwe jen jar?

⁴ Riit Pilippai 4:6, 7. Ñe jej wõnm̦aanl̦o̦k wõt ilo ad jar im kwal̦o̦k bũruod ñan Jeova, enaaj uwaake jar ko ad. Enaaj jipañ kõj bwe jen aenõm̦m̦an im bwe jen jol̦o̦k l̦õmn̦ak im eñjake ko rekabbeerer. Elõñ rar lo an Jeova jipañ er ilo wãween in. Ke rar mijak im lukkuun inepata, Anij ear jipañ er bwe en aenõm̦m̦an bũrueer. Jeova emaroñ bar jipañ eok ilo wãween in. ‘Aenõm̦m̦an eo jãn Anij’ emaroñ jipañ eok jekdo̦o̦n ta apañ eo kwõj iioone. Kwõmaroñ lõke kallim̦ur in an Jeova me ej ba: “Kwõn jab lõl̦ño̦ñ, bwe Ña am̦ Anij; Inaaj kõkajoor eok, aet, Inaaj jipañ eok.”​—Aiseia 41:10.

5. Ewi wãween an Naanin Anij jipañ kõj bwe jen aenõm̦m̦an?

⁵ Men eo kein karuo jemaroñ kõm̦m̦ane me enaaj jipañ kõj ñan lo aenõm̦m̦an ej ilo ad riit im kõl̦mãnl̦o̦kjen̦ kõn eoon ko ilo Baibõl̦. Etke eaorõk ñan kõm̦m̦ane men in? Elõñ naanin kakapilõk ko ilo Baibõl̦ me remaroñ jipañ kõj ñan kadikl̦o̦k ad inepata ak jel̦ã ta ko jen kõm̦m̦ani ñe jej inepata. Remaroñ bar jipañ kõj ñan jab kõm̦m̦ani men ko renaaj kõm̦m̦an ad inepata. Baibõl̦ emaroñ lukkuun jipañ im kõkajoor eok kõnke naan ko ie rej itok jãn Rũkõm̦anm̦an eo ad. Ilo am̦ kõl̦mãnl̦o̦kjen̦ kajjojo raan kõn naanin kakapilõk ko an Anij im kõn wãween an naanin kakapilõk kein maroñ jipañ eok, men in enaaj l̦ap an kõkajoor eok. Jeova ear kaalikkar bwe ilo ad riiti naan ko an, men in enaaj kõm̦m̦an bwe jen ‘kajoor im peran,’ im eban kõm̦m̦an bwe jen ‘mijak im lõl̦ño̦ñ.’—Joshua 1:7-9.

6. Ewi wãween an naan ko an Jijej maroñ jipañ eok?

⁶ Jemaroñ lo naan ko rekaenõm̦m̦an an Jijej ilo Baibõl̦. Naan ko an im katak ko ear kwal̦o̦ki rar lukkuun kõkajoor im kaenõm̦m̦an armej ro. Elõñ rar kõn̦aan kepaake kõnke naan ko an rar l̦ap aer kõkajoor im kaenõm̦m̦an er, el̦aptata ro rar inepata im bũrom̦õj. (Riit Matu 11:28-30.) Jijej ear jel̦ã l̦õmn̦ak kõn aikuj ko an ro jet. (Mark 6:30-32) Ãinwõt an kar kallim̦ur bwe enaaj kar jipañ rijjilõk ro an me rar itoitak ippãn, ãindein an naaj bar jipañ kõj ilo raan kein. Jijej ejjab aikuj pãd ippãd ijin ioon lal̦ ñan ad maroñ bõk jipañ jãne. Kiiõ ej juon Kiiñ ilañ, im ej wõnm̦aanl̦o̦k wõt ilo an kwal̦o̦k yokwe ñan kõj. Kõn men in, ñe kwõj inepata, kwõmaroñ lõke bwe enaaj jipañ eok ilo iien ko kwõj aikuj jipañ. Jijej emaroñ jipañ kõj bwe jen peran im bwe en wõr ad kõjatdikdik, im men kein remaroñ jipañ kõm̦m̦an bwe en jako ad inepata.​—Hibru 2:17, 18, UBS; 4:16.

7. Ta tokjãn ko jenaaj loi ñe Anij ej letok jetõb kwõjarjar eo an?

⁷ Jijej ear kallim̦ur bwe Jemãd ilañ enaaj lel̦o̦k jetõb kwõjarjar eo An ñan ro rej kajjitõk  Ippãn. (Luk 11:10-13) Eñin men eo kein kajilu me emaroñ jipañ kõj kadikl̦o̦k ad inepata. Jetõb kwõjarjar ak kajoor eo an Anij emaroñ jipañ kõj ñan kwal̦o̦k wãween ko rem̦m̦an me Anij eo ad ekajoor bõtata ej kwal̦o̦ki. (Riit Galetia 5:22, 23; Kolosse 3:10, UBS) Ilo ad kate kõj ñan kwal̦o̦ki wãween kein rem̦m̦an, men in enaaj kõm̦m̦an bwe en em̦m̦an kõtaan eo ad ippãn ro jet, im enaaj bõbrae an wal̦o̦k apañ ak wãween ko me rej kõm̦m̦an ad inepata. Jen etale wãween kein rem̦m̦an me rej leen jetõb kwõjarjar eo an Anij im lale wãween aer maroñ jipañ kõj.

8-12. Ñe jej kwal̦o̦k wãween ko rem̦m̦an me rej leen jetõb kwõjarjar eo an Anij, ewi wãween an men in maroñ jipañ kõj?

⁸ “Yokwe, lañlõñ, aenõm̦m̦an.” Ñe kwõj kate eok ñan kwal̦o̦k kautiej ñan ro jet, kwõnaaj kile an men in jipañ eok bwe en jab l̦ap am̦ inepata. Etke jemaroñ ba men in? Kõnke ñe kwõj kwal̦o̦k yokwe im kautiej ñan ro jet, men in enaaj bõbrae an wal̦o̦k apañ ko me remaroñ kõm̦m̦an am̦ lukkuun illu im inepata. Men in enaaj kõm̦m̦an bwe en pidodo am̦ aenõm̦m̦an wõt ippãn ro jet.​—Rom 12:10, UBS.

⁹ “Meanwõd, jouj, em̦m̦an.” Baibõl̦ ej ba: “Kom̦win jouj im em̦m̦an bũruomi ñan doon; kom̦win jol̦o̦k an doon bõd.” (Epesõs 4:32, UBS) Ñe kwõnaaj l̦oore naanin kakapilõk in, men in enaaj jipañ eok bwe en aenõm̦m̦an kõtaan eo am̦ ippãn ro jet im bwe kwõn bõbrae an wal̦o̦k apañ ko me remaroñ kõm̦m̦an am̦ inepata. Enaaj bareinwõt kõm̦m̦an bwe en pidodo am̦ kõm̦adm̦õdi apañ ko me rej wal̦o̦k kõn ad jab weeppãn.

¹⁰ “[Tõmak, NW].” Ilo raan kein, ekkã ad inepata kõn jããn im m̦weiuk. (Jabõn Kõnnaan 18:11, UBS) Ta eo emaroñ jipañ kõj bwe jen jab inepata kõn men kein? Jej aikuj l̦oore naanin kakapilõk eo an Paul. Ear ba: “Kom̦win jokwane kõn men ko ewõr ippemi.” El̦aññe jej lukkuun tõmak bwe Jeova enaaj lale kõj im kabwe aikuj ko ad, men in enaaj jipañ kõj bwe jen jab inepata. Anij ear kallim̦ur im ba: “Ijãmin el̦l̦o̦k jãn eok; ijãmin likũt eok make iaam̦.” Eñin unin, ãinwõt Paul jemaroñ ba naan kein: “Irooj ej aõ rijjipañ, ijãmin mijak. Ta eo armej remaroñ kõm̦m̦ane ñan eõ?”​—Hibru 13:5, 6, UBS.

¹¹ “Ineem̦m̦an, jatõr.” Baj l̦õmn̦ak m̦õk kõn tokjãn ko kwõnaaj loi ñe kwõj kwal̦o̦k ineem̦m̦an im kwõjel̦ã irooj ioon eñjake ko am̦. Ñe kwõj kwal̦o̦k wãween kein, kwõnaaj maroñ bõbrae am̦ ba ak kõm̦m̦ani men ko me remaroñ kõm̦m̦an am̦ inepata. Bareinwõt, kwõnaaj jel̦ã kilen kõjparok bwe kwõn jab ‘illu, airuwaro, kõnono n̦ae,’ im men ko ãierl̦o̦kwõt.​—Epesõs 4:31.

¹² Ej aikuj ettã bũruod bwe jen maroñ ‘kõttãik kõj ium̦win pein Anij ekajoor’ im ‘likũt inepata ko ad otemjej’ ñan ippãn. (1 Piter 5:6, 7) Ñe jej kate kõj ñan kwal̦o̦k ettã bõro, Anij enaaj buñbũruon ippãd im enaaj jipañ kõj. (Maika 6:8) Ettã bõro emaroñ kõm̦akũt kõj ñan kile ta ko ewõr ad maroñ ñan kõm̦m̦ani im ta ko ejjel̦o̦k ad maroñ ñan kõm̦m̦ani. Ad kile men in enaaj jipañ kõj ñan reilo̦k wõt ñan Anij im jab atartar iood make. Innem ñe jej lo an Anij kwal̦o̦k an yokwe im jipañ kõj, men in enaaj kõm̦m̦an bwe en jab l̦ap ad inepata.

13. Ta mel̦el̦ein an kar Jijej ba: “Kom̦win jab inepata”?

¹³ Ilo bokin Matu 6:34 (UBS) (riit), Jijej ear ba: “Kom̦win jab inepata.” Em̦õj ad katak im jel̦ã bwe ewõr iien Devid im Paul rar inepata. Kõn men in, Jijej ear jel̦ã bwe ro rej karejar ñan Anij renaaj baj iioon wõt inepata. Innem ta mel̦el̦ein an kar Jijej ba, “Kom̦win jab inepata”? Jijej ear ba men in ñan kajjioñ rõjañ rũkal̦oor ro an bwe en jab l̦ap jãn joñan aer inepata kõnke men in eban jipañ er ñan kõm̦adm̦õdi apañ ko rej iiooni. Ewõr apañ im inepata ko rej wal̦o̦k ñan kõj kajjojo raan. Kõn men in, ro rej karejar ñan Anij rejjab aikuj kal̦apl̦o̦k wõt aer inepata ilo aer  l̦õmn̦ak kõn inepata ko an ilju ak inepata ko an raan ko remootl̦o̦k. Ewi wãween am̦ maroñ l̦oore naanin kakapilõk in an Jijej? Im ewi wãween an naanin kakapilõk in an maroñ jipañ eok bwe en dikl̦o̦k am̦ inepata?

14. Ta eo kwõmaroñ kõm̦m̦ane ñe el̦ap am̦ inepata kõn men ko kwaar kõm̦m̦ani m̦okta?

¹⁴ Jet iien armej rej lukkuun inepata kõn likjab ak bõd ko rar kõm̦m̦ani m̦okta. Emaroñ l̦ap aer eddodo kõn men ko rar kõm̦m̦ani meñe em̦õj an mootl̦o̦k elõñ iiõ. Ewõr iien Kiiñ Devid ear lukkuun inepata kõn bõd ko ear kõm̦m̦ani, joñan ear ba bwe ej ãinwõt ñe ‘jerawiwi ko an rej kamal̦oñe.’ Ear bar ba: “Bũruõ ej inepata im ij iññũr kõn aõ metak.” (Sam 38:3, 4, 8, 18, UBS) Ke Devid ear inepata im eddodo, ta men eo ejim̦we ear kõm̦m̦ane? Ear reilo̦k ñan Jeova bwe en tũriam̦okake im jol̦o̦k an bõd. Eñin unin Devid ear m̦õn̦õn̦õ kõnke ear jel̦ã bwe em̦õj an Anij jol̦o̦k an bõd.​—Riit Sam 32:1-3, 5, UBS.

15. (1) Ta eo jej bar katak jãn joñak eo an Devid? (2) Ta ko kwõmaroñ kõm̦m̦ani ñan kadikl̦o̦k am̦ inepata? (Lale bo̦o̦k eo “ Jet Iaan Wãween ko Kwõmaroñ Kõm̦m̦ani ñan Kadikl̦o̦k Am̦ Inepata.”)

¹⁵ Jet iien emaroñ l̦ap am̦ inepata kõn apañ ko kwõj iiooni kiiõ. Ñan waanjoñak, ke Devid ear je jebta 55 ilo bokin Sam, ear kwal̦o̦k kõn an mijak ñe ro rar kõjdate renaaj m̦ane ñan mej. (Sam 55:2-5) Meñe ãindein, ak ear jab bõjrak jãn an lõke im tõmak ilo Jeova. Ear jar im akwel̦ap ñan Jeova bwe en jipañe kõn apañ ko an, bõtab ear bar mel̦el̦e bwe ej aikuj kõm̦m̦ane ijo kun̦aan ñan kõm̦adm̦õdi apañ ko ear iiooni bwe en dikl̦o̦k an inepata. (2 Samuel 15:30-34, UBS) Jemaroñ katak jãn joñak in an Devid. Ijello̦kun ad kõtl̦o̦k bwe en l̦ap jãn joñan ad inepata, jen kate kõj ñan kõm̦m̦ani men ko ewõr ad maroñ ñan kõm̦m̦ani ñan kõm̦adm̦õdi apañ ko jej iiooni im lõke bwe Jeova enaaj lale im kõjparok kõj.

16. Etke am̦ jel̦ã mel̦el̦ein ãt eo etan Anij emaroñ jipañ eok bwe en l̦apl̦o̦k am̦ tõmak?

¹⁶ Jet iien emaroñ l̦ap an juon eo ej karejar ñan Anij l̦õmn̦ak kõn inepata ko an raan ko repãd im̦aan. Bõtab kwõjjab aikuj inepata kõn men ko me rejjañin wal̦o̦k. Etke? Kõnke men ko jej inepata kaki ekkã aer jab wal̦o̦k ilo wãween eo me jaar l̦õmn̦ak renaaj kar wal̦o̦k. Bareinwõt, ewõr an Anij maroñ ñan jipañ kõj im kõm̦adm̦õde jabdewõt apañ ko rej wal̦o̦k. Ãt eo etan ej mel̦el̦ein “Ej Kõm̦m̦an bwe En Erom.” (Exodus 3:14) Kõn men in, jejjab aikuj inepata kõn men ko an raan ko repãd im̦aan kõnke mel̦el̦ein etan Anij ej kam̦ool ñan kõj bwe ewõr an Anij maroñ ñan kõm̦m̦ane jabdewõt men bwe en jejjet karõk ko an. Jemaroñ tõmak im lõke bwe Anij enaaj kajeraam̦m̦an rũkarejar ro an retiljek, im enaaj jipañ er bwe ren jab inepata kõn men ko rar wal̦o̦k m̦okta ilo mour ko aer, men ko rej wal̦o̦k kiiõ, im men ko remaroñ wal̦o̦k ilo raan ko repãd im̦aan.

17, 18. Ñe kwõj bwebwenato im kwal̦o̦k bũruom̦ ñan ro jet, etke men in emaroñ l̦ap an jipañ eok?

¹⁷ Wãween eo kein kãmen kwõmaroñ kõm̦m̦ane  ñan kadikl̦o̦k am̦ inepata ej ilo am̦ kwal̦o̦k inepata ko am̦ ñan juon eo kwõj epaake im lõke, ãinwõt eo pãleem̦, eo m̦õttam̦, ak juon iaan ro rej lale eklejia. Rein remaroñ jipañ eok ñan bõk l̦õmn̦ak eo ejim̦we kõn apañ eo kwõj iioone. Baibõl̦ ej ba: “Inepata ej kõm̦m̦an bwe en eddo bũruon juon armej, a naan em̦m̦an ej kabuñbũruon.” (Jabõn Kõnnaan 12:25) Ilo am̦ kwal̦o̦k bũruom̦ im bwebwenato ippãn armej eo me kwõj lõke, men in enaaj l̦ap an jipañ eok bwe en l̦apl̦o̦k am̦ mel̦el̦e kõn apañ eo kwõj iioone im jel̦ã ta ko kwõmaroñ kõm̦m̦ani ñan kõm̦adm̦õde. Baibõl̦ ej bar ba: “Ijo ejjel̦o̦k pepe, em̦õj kajettokjãn l̦õmn̦ak ko m̦okta; a ijo elõñ ripepe, em̦õj kapen l̦õmn̦ak ko.”​—Jabõn Kõnnaan 15:22.

¹⁸ Jeova ej bar jipañ kõj bwe en dikl̦o̦k ad inepata ikijjeen kweilo̦k ko rej wal̦o̦k kajjojo wiik. Ilo kweilo̦k kein, kwõmaroñ bwebwenato ippãn rũttõmak ro m̦õttam̦, ro im rej kea kake eok im rekõn̦aan jipañ im kõkajoor eok. (Hibru 10:24, 25, UBS) Ilo ad “jipañ doon” ilo iien kein, men in enaaj kõkajoor kõj im kõm̦m̦an bwe jen maroñ kijenmej kõn inepata ak apañ ko jej iiooni.​—Rom 1:12, UBS.

19. Etke kwõmaroñ lõke bwe jem̦jerã eo am̦ ippãn Jeova enaaj kõkajoor eok?

¹⁹ Juon em̦m̦aan ej lale eklejia ilo Canada ear kile joñan an lukkuun aorõk ñan an jol̦o̦k inepata ko an ñan ippãn Jeova. Ear jerbal ãinwõt juon rũkaki ilo jikuul̦ im juon eo ej lel̦o̦k naanin kakapilõk ñan rijikuul̦ ro. Jerbal in ear juon jerbal el̦ap an kam̦m̦õkm̦õk im pen, im ear wõr juon an nañinmej me ej kõm̦m̦an bwe en l̦ap an inepata. Ta eo ear jipañe? Em̦m̦aan in ej ba: “Ilo aõ kate eõ ñan kõkajoor jem̦jerã eo aõ ippãn Jeova, eñin men eo el̦aptata an jipañ eõ ñe el̦ap aõ inepata. El̦ap an bar rũttõmak ro m̦õtta jipañ eõ ilo iien ko relukkuun pen ñan ña, im ij kwal̦o̦k bũruõ im inepata ko aõ ñan kõrã eo ippa. Ear bar l̦ap an em̦m̦aan ro rej lale eklejia im em̦m̦aan eo ej lotok eklejia ko jipañ eõ ñan bõk l̦õmn̦ak ko rejim̦we kõn wãween ko reppen ij iiooni. Iar bareinwõt kappok jipañ jãn juon taktõ kõn nañinmej eo aõ, im iar kõm̦m̦an oktak ko ilo wãween aõ kõjerbal iien ko aõ im kõm̦m̦an iien ñan kakkije im kõkajoor ãnbwinnũ. Jidik kõn jidik iar maroñ jel̦ã irooj ioon eñjake ko aõ im jel̦ã ta ko in kõm̦m̦ani ilo iien ko reppen. Ñe ij iioon men ko me ejjel̦o̦k aõ maroñ ioer, ij reilo̦k ñan Jeova bwe en jipañ eõ.”

20. (1) Ewi wãween ad maroñ jol̦o̦k inepata ko ad ñan ippãn Anij? (2) Ta eo jenaaj etale ilo katak in tok juon?

²⁰ Ilo katak in, jaar katak kõn joñan an aorõk ñan ad jol̦o̦k inepata ko ad ñan ippãn Jeova ilo ad jar ñane im ilo ad riit im kõl̦mãnl̦o̦kjen̦ kõn naan ko an ilo Baibõl̦. Bareinwõt jaar katak kõn aorõkin ad kwal̦o̦k wãween ko rem̦m̦an me rej leen jetõb kwõjarjar eo an Anij, kwal̦o̦k bũruod ñan juon eo jej lõke, im ñan pãd ilo iien kweilo̦k ko. Ilo katak in tok juon, jenaaj katak kõn kallim̦ur eo an Jeova ñan kajeraam̦m̦an kõj im wãween an men in jipañ kõj.​—Hibru 11:6.