Kwaar ke lukkuun riiti Naan in Keeañ ko an allõñ ko l̦o̦k? Lale kwõmaroñ ke uwaake kajjitõk kein:

Ta kein kam̦ool ko ilo Baibõl̦ me rej kwal̦o̦k bwe Anij emel̦el̦e kõn eñjake ko ad?

Ke Ri-Israel ro rar kõm̦akoko ilo Ijipt, Anij ear jab baj mel̦el̦e wõt kõn aer iioon eñtaan ak ear bar eñjake aer metak im bũrom̦õj. (Ex. 3:7, UBS; Ais. 63:9) Kõnke Anij ear kõm̦anm̦an kõj ilo nemãmeen wõt e, ewõr ad maroñ ñan kwal̦o̦k kadkad ko kadkadin ãinwõt tũriam̦o im mel̦el̦e kõn eñjake ko an ro jet. El̦ap an Anij jel̦ã im mel̦el̦e kõn eñjake ko ad meñe jet iien jej l̦õmn̦ak bwe kõj armej nana ak bwe ejjab tõllo̦kid bwe en tũriam̦o kake kõj.​—wp18.3, peij 8-9.

Ewi wãween an kar Jesus katakin armej ro bwe ren jab kalijekl̦o̦k?

Elõñ ri-Ju ro ilo raan ko an Jesus rar kalijekl̦o̦k. Christ ear kwal̦o̦k ñan armej ro bwe rej aikuj kwal̦o̦k ettã bõro im ear ba bwe ebõd ñan utiej bõro kõn aelõñ ko aer. Ear rõjañ ri-kal̦oor ro an ñan watõk doon ãinwõt jemjein jemjati.​—w18.06, peij 9-10.

Ta eo jej katak jãn an kar Anij jab kõtl̦o̦k bwe Moses en del̦o̦ñe Ãneen Kallim̦ur eo?

Moses ear juon eo ear lukkuun epaake Jeova. (Dt. 34:10, UBS) Ilo jem̦l̦o̦kinl̦o̦k iiõ ko 40 in an kar ri-Israel ro itoitak ilo ãne jem̦aden, armej ro rar bar jino aol̦ kõn an ejjel̦o̦k dãn. Anij ear jiroñ Moses bwe en kõnono ñan dekã eo. Ak Moses ear deñõt dekã eo. Jeova ear lukkuun illu ippãn Moses kõnke ear jab l̦oore naanin tõl ko An im kõnke Moses ear jab lel̦o̦k aiboojoj im nõbar ñan E kõn An kar kõm̦m̦ane menin kabwilõñlõñ eo. (Bõn. 20:6-12) Men in ej katakin kõj kõn aorõkin ad aikuj pokake Jeova im lel̦o̦k aiboojoj im nõbar ñane.​—w18.07, peij 13-14.

Ewi wãween ad maroñ bõd ñe jej ekajete ro jet ekkar ñan paotokier?

Ewõr jilu wãween ko me ekkã an armej ekajete ro jet kõn men ko rej loi kõn er: kil ak aelõñ eo aer, joñan an lõñ aer jããn, im joñan iiõ ko aer. Eaorõk bwe jen kate kõj ñan kalimjek ro jet ãinwõt Anij ilo ad jab kwal̦o̦k kalijekl̦o̦k! (Jrb. 10:34, 35, UBS)—w18.08, peij 8-12.

Ta jet iaan wãween ko Kũrjin ro rerũtto remaroñ jipañ ilo eklejia eo?

Meñe juon jeid im jatid em̦m̦aan emaroñ lukkuun rũtto im oktak kiiõ jerbal ak eddo ko an ilo doulul eo ak Jeova ej wõnm̦aanl̦o̦k wõt ilo an kaorõke im elõñ men ko emaroñ kõm̦m̦ani ñan jipañ ro jet. Emaroñ jipañ ro rejjab pãd ilo m̦ool eo me rej pãleek ro jeid im jatid, jipañ ro ear bõjrak aer kwal̦o̦k naan, katak Baibõl̦ ippãn elõñ armej, im bõk kun̦aan ilo wãween ko jet ilo jerbalin kwal̦o̦k naan.​—w18.09, peij 8-11.

Ta ko ilo Nien Kein Jerbal ko Ad ñan Kwal̦o̦k Naan?

Ewõr kaat jiddik ko im peba in kũr ko. Ebar wõr 8 tũrããk ko im Naan in Keeañ im Awake! ko. Bareinwõt, ewõr jet brochure ko, im 2 bok ko jej kõjerbali ñan katak ippãn armej ro kaki, im 4 pija in alwõj ko, ãinwõt pija eo etan, Etke Kwõj Aikuj Katak Baibõl̦?​—w18.10, peij 16.

Ewi wãween an juon Kũrjin “wiaik m̦ool” eo ekkar ñan Jabõn Kõnnaan 23:23?

Jejjab wiaik m̦ool eo kõn jããn. Bõtab, bwe jen maroñ wiaik m̦ool eo, jej aikuj kõjerbal iien ko ad im kaarmejjete kõj make bwe jen bõke.​—w18.11, peij 4.

Ta eo jemaroñ katak jãn wãween an kar Hoseia kõm̦m̦an ñan kõrã eo pãleen etan Gomer?

Meñe elõñl̦o̦k jãn juon alen an kar Gomer mourin l̦õñ, ak Hoseia ear jol̦o̦k an bõd im pãdwõt ippãn. El̦aññe eo pãleen juon Kũrjin ej l̦õñ, Kũrjin in me ejjel̦o̦k ruõn emaroñ jol̦o̦k an bõd. Ak ñe ej babu ippãn eo pãleen me ear l̦õñ, men in ej kaalikkar bwe em̦õj an jol̦o̦k an eo pãleen bõd im ejjab maroñ kiiõ kõm̦m̦an an peba in jepel.​—w18.12, peij 13.