Ñan María, Raúl, Arne, im elõñ bar ro jet, jar ej juon menin letok ejejuwaan. Rej kile bwe ikijjeen jar, remaroñ kõnnaan ippãn Anij, kam̦m̦oolole, im kajjitõk jipañ jãne. Rej lukkuun tõmak kõn aolepen bũrueer kõn ta eo Baibõl̦ ej ba ikijjeen ad jar ñan Anij, me ej ba: “Men eo in jej lõke e kake, bwe jabdewõt men eo jej kajjitõk kake im ej ekkar ñan ankilaan, ej roñjake kõj.”​—1 Jon 5:14.

Ijoke, elõñ armej ro jet me epen aer errã ippãn ta eo Baibõl̦ ej ba kõn jar. Steve ej kwal̦o̦k kõn wãween an kar l̦õmn̦ak kõn jar, ej ba: “Ke ear 17 aõ iiõ, ekar wõr jilu m̦õtta me rar mej ilo ruo kain ãkjitõn. Juon ear mej ilo juon wa me ear kũrããj im ruo iaaer rar mal̦oñ ilo lo̦jet.” Ta eo Steve ear kõm̦m̦ane? Ej ba: “Iar jar im kajjitõk ippãn Anij bwe en letok uwaak ko kõn etke aolep men kein rar wal̦o̦k, bõtab iar  jab lo uwaakin jar ko aõ. Kõn men in, iar kajjitõk ippa make, ‘Ewõr ke tokjãn ñan jar?’” Kõn an elõñ armej l̦õmn̦ak bwe kar jab uwaaki jar ko aer, men in ekõm̦m̦an bwe ren kajjitõk el̦aññe ewõr unin aer jar.

Ebar wõr un ko jet unin an armej l̦õmn̦ak el̦aññe ewõr tokjãn ñan aer jar. Jet rej ba bwe kõnke Anij ejel̦ã men otemjej, em̦õj an jel̦ã kadede kõn aikuj ko ad im apañ ko ad, innem ejjab menin aikuj ñan ba men kein ñane.

Jet armej rej tõmak bwe Anij em̦akoko in roñjaki jar ko aer kõn wõt bõd ko rar kõm̦m̦ani kar m̦okta. Jenny ej ba, “Apañ eo el̦aptata ippa ej bwe ij l̦õmn̦ak bwe elukkuun ejjel̦o̦k tokja. Ewõr men ko iar kõm̦m̦ani me ij ajl̦o̦k kaki, im kõn men in ij ba ñan ña make bwe ijjab juon eo me ej tõllo̦kũn bwe Anij en eo̦roñ an jar.”

Ta l̦õmn̦ak eo am̦ kõn jar? El̦aññe em̦õj am̦ kar bõk l̦õmn̦ak rot kein kõn jar, kwõmaroñ bõk kaenõm̦m̦an ilo am̦ jel̦ã bwe Baibõl̦ eo emaroñ lewaj uwaakin kajjitõk ko am̦. Im kwõmaroñ lõke ta eo Baibõl̦ ej ba kõn jar, * emaroñ jipañ eok ñan lo uwaakin kajjitõk ko ãinwõt:

• Lukkuun m̦ool ke bwe Anij ej roñjake jar ko ad?

• Etke ewõr jet jar me kar jab uwaaki?

• Ewi wãween am̦ maroñ jar im bwe Anij en eo̦roñ eok?

• Ta tokjãn ko kwõmaroñ bũki itok jãn am̦ jar?