Pamela ear kõmel̦el̦e im ba: “Ilo iien ko rej kõm̦adm̦õde nañinmej in kããnjer eo aõ, ekkã aõ kar lukkuun ikkũm̦kũm̦ im mijak. Bõtab ñe ij jar ñan Jeova Anij, ekõm̦m̦an aõ ineem̦m̦an im em̦m̦an aõ maroñ kõl̦mãnl̦o̦kjen̦. Ij eñtaan wõt jãn an ikkutkut aõ metak, bõtab jar ej jipañ eõ ñan bõk wõt l̦õmn̦ak ko rem̦m̦an. Ñe armej rej kajjitõk ejet aõ pãd, ij ba, ‘Ejjab em̦m̦an aõ mour, bõtab im̦õn̦õn̦õ!’”

Ilo m̦ool, jejjab aikuj kõttar an mour ko ad pãd ilo juon wãween ekauwõtata ñan ad kiiõ jar. Kõj aolep jej iioon wãween ko reppen, emaroñ men ko reddik ak men ko rel̦l̦ap, im ekkã ad kile bwe jej aikuj jipañ ñan ad maroñ jelm̦aik ak kõm̦adm̦õdi men kein. Jar emaroñ ke jipañ?

Baibõl̦ eo ej ba: “Kwõn jol̦o̦k menin eddo ko am̦ ioon Jeova, im enaaj bo̦ur eok; Ejãmin likũt ro rem̦m̦an bwe ren m̦akũtkũt.” (Sam 55:22) Ej juon l̦õmn̦ak el̦ap an kaenõm̦m̦an! Innem ewi wãween an jar maroñ jipañ eok? Ñe kwõj jar ñan Anij ilo wãween eo ejim̦we ak ekkar, enaaj jipañ eok kõn ta eo kwõj aikuji ñan am̦ maroñ kõm̦adm̦õde apañ ko kwõj iiooni.​—Lale bo̦o̦k eo “ Ta eo Jar Emaroñ Bõktok ñan Kwe.”