El̦aññe kwõjjañin kar, eokwe bõlen em̦õj am̦ loe an wal̦o̦k ilo wãween ko jet. Elukkuun lõñ nuuj ko rej kwal̦o̦k kõn an armej iioon kõjdat itok wõt jãn an oktak aelõñ ko aer, kil ko kilier, im kõn aer pãlele em̦m̦aan ñan em̦m̦aan ak kõrã ñan kõrã (homosexual). Kõn men in, elõñ kien ko rej kõm̦m̦an aer kakien n̦ae jorrããn ko rej wal̦o̦k itok wõt jãn kõjdat.

Ñe ej wõr kõjdat, epidodo an kõm̦m̦an bwe en l̦apl̦o̦k wõt an wal̦o̦k kõjdat. Armej ro me rej iioon kõjdat ekkã aer oktak im ukotl̦o̦k nana eo ñan ro jet im kõm̦m̦an bwe en wõnm̦aanl̦o̦k wõt kõjdat.

Bõlen em̦õj am̦ iioon wãween kein: kalijekl̦o̦k, an bõd an ro jet watõk ak kalimjek eok, aer kajjirere kõn kwe, kõrraat ak kõnanaik eok, im kaamijak eok. Meñe ãindein, ak el̦apl̦o̦k jorrããn ko rej wal̦o̦k jãn kõjdat. Ekkã an kõjdat l̦apl̦o̦k im oktak ñan kõm̦m̦an ko rellãj, ãinwõt ũrõrmej (bullying), ko̦kkuri men ko m̦weien ro jet, rape ak ko̦kkure armej ro jet ilo wãween ko rettoon, ko̦kkure ak m̦anm̦an armej, ak to̦o̦rl̦o̦kboke juon bwij ak kumi in armej.

Magazine in enaaj uwaaki kajjitõk kein itulal̦ im kwal̦o̦k ewi wãween jemaroñ anjo̦ ioon kõjdat:

• Etke elukkuun l̦ap kõjdat?

• Ewi wãween bwe en maroñ bõjrak an wõnm̦aanl̦o̦k wõt kõjdat?

• Ewõr ke juon iien enaaj jako kõjdat ñan indeeo?