Iien eo Enaaj Jako Kõjdat ñan Indeeo!
Meñe jemaroñ jol̦o̦k kõjdat jãn bũruod, ak jejjab maroñ kõm̦m̦an bwe armej ro jet ren jol̦o̦k kõjdat jãn bũrueer. Kõn men in, ejjab bõjrak an armej ro me ejjel̦o̦k rueer eñtaan kõn wõt an wal̦o̦k kõjdat. Innem, ta eo enaaj lukkuun jol̦o̦k im n̦amejal̦an apañ eo kõn kõjdat?
Jeova Anij wõt emaroñ lukkuun jol̦o̦k kõjdat ñan indeeo. Im eñin men eo Baibõl̦ ej kallim̦ur bwe enaaj kõm̦m̦ane.—Jabõn Kõnnaan 20:22.
ANIJ ENAAJ JOL̦O̦K MEN KO REJ UNLEPLEPIN AN WAL̦O̦K KÕJDAT
-
1. SETAN TEPIL̦ EO. Setan, enjel̦ eo me el̦ap an jum̦ae, ej e eo me ej unleplepin an wal̦o̦k kõjdat rainin. Anij enaaj ko̦kkure Setan im aolep ro rej kwal̦o̦k kõjdat ãinwõt e.—Sam 37:38; Rom 16:20.
-
2. LAL̦ IN AN SETAN ME EOBRAK KÕN KÕJDAT. Anij enaaj to̦o̦rl̦o̦kboke aolep men ko renana ilo lal̦ in, ekitibuj ri-kien ro renana im ri-tõlin kabuñ ro me rej kowõnm̦aanl̦o̦k kõjdat. Anij enaaj bareinwõt jol̦o̦k peejnej ko an lal̦ me rej koorl̦o̦k jããn ilo aer m̦on̦e armej.—2 Piter 3:13.
-
3. AN ARMEJ JAB WEEPPÃN. Baibõl̦ eo ej kwal̦o̦k bwe aolep armej rar jolõt jab weeppãn, innem eitok wõt bwe jen jerawiwi ilo l̦õmn̦ak, eñjake, im kõm̦m̦an ko ad. (Rom 5:12) Ad dãpij im kwal̦o̦k ad dike ro jet ej m̦õttan jerawiwi in jaar jolõte. Anij enaaj jipañ armej bwe en jako ñan indeeo aolep jerawiwi ko me rej kõm̦m̦an an wal̦o̦k kõjdat.—Aiseia 54:13.
BAIBÕL̦ EJ KALLIM̦UR KÕN JUON LAL̦ EJJEL̦O̦K KÕJDAT IE
-
1. EJJEL̦O̦K JUON ENAAJ IIOON WÃWEEN KO REJJAB JIM̦WE. Aelõñ eo an Anij ak kien eo an me ej pãd ilañ, enaaj irooj ioon lal̦ in ilo juon wãween ejim̦we im ejejjet ñan indeeo. (Daniel 2:44) Eban bar wal̦o̦k kalijekl̦o̦k im kõjdat. Anij enaaj kajim̦we aolep men ko armej rej iiooni rainin me rejjab jim̦we.—Luk 18:7.
-
2. AOLEP RENAAJ LO AENÕM̦M̦AN. Ejjel̦o̦k juon armej enaaj eñtaan kõn wõt kowadoñ im tarin̦ae. (Sam 46:9) Lal̦ in enaaj juon jikin eaenõm̦m̦an im ejokwane, im armej ro wõt renaaj jukjuk im amn̦ak ie ej ro me rej yokwe aenõm̦m̦an.—Sam 72:7.
-
3. AOLEP RENAAJ MOUR ÑAN INDEEO ILO JUON LAL̦ EWEEPPÃN. Aolep ro renaaj mour ilo tõre en̦, enaaj m̦ool aer yokwe ro ri-turier. (Matu 22:39) Ejjel̦o̦k men en̦ enaaj kõm̦m̦an an armej inepata im eñtaan, ekoba ad eñtaan kõn l̦õmn̦ak ko ak men ko jej ememeji me rejjab em̦m̦an. (Aiseia 65:17) Ilo tõre en̦ enaaj ejjel̦o̦k kõjdat, im armej ro “renaaj m̦õn̦õn̦õ kõn aenõm̦m̦an el̦ap.”—Sam 37:11.
Kokõn̦aan ke mour ilo juon lal̦ ãinwõt in? Meñe jej mour ilo lal̦ in rainin ak elõñ armej ro rej katak ñan jol̦o̦k kõjdat ikijjeen aer jerbale naanin kakapilõk ko ilo Baibõl̦. (Sam 37:8) Eñin men eo elõñ milien Ri-Kõnnaan ro an Jeova ipel̦aakin lal̦ in rej kõm̦m̦ane. Meñe eoktak wãween aer kar dik im rũttol̦o̦k im m̦anit ko aer jãn doon, ak rej m̦õn̦õn̦õ ippãn doon ãinwõt juon baam̦le ebõrokuk im el̦ap yokwe ippãer.—Aiseia 2:2-4.
Ri-Kõnnaan ro an Jeova renaaj m̦õn̦õn̦õ in kwal̦o̦k ta ko rar jipañ er ñan kijenmej ium̦win kalijekl̦o̦k im wãween ko rejjab jim̦we. Men ko kwõnaaj katak kaki remaroñ jipañ eok kõm̦m̦an bwe yokwe en jidik kõn jidik bõk jikin kõjdat. Kwõnaaj katak kilen kwal̦o̦k jouj ñan aolep armej ekoba ro ejjel̦o̦k aer kam̦m̦oolol ak ñan ro rej kwal̦o̦k kõjdat. Tokjãn men in, enaaj l̦apl̦o̦k am̦ m̦õn̦õn̦õ kiiõ, im kõtaan eo am̦ ippãn ro jet enaaj em̦m̦anl̦o̦k wõt. El̦aptata, kwõnaaj katak kõn men ko kwõj aikuj kõm̦m̦ani ñan am̦ mour ium̦win tõl eo an Aelõñ eo an Anij, ñe enaaj ejjel̦o̦k kõjdat ñan indeeo.—Sam 37:29.
You May Also Like
NAAN IN KEEAÑ
Ta ko Aelõñ eo an Anij Enaaj Katõpraki?
Jesus ear jel̦ã bwe Aelõñ eo wõt an Anij ej kien eo wõt enaaj n̦amejal̦an apañ ko ilo lal̦ in. Ta ko em̦õj an Aelõñ eo an Anij kõm̦m̦ani ñan ad maroñ kal̦apl̦o̦k ad lõke?
