Etke El̦ap an Wõnm̦aanl̦o̦k Wõt Kõjdat?
Etke elukkuun l̦apl̦o̦k an wal̦o̦k im wõnm̦aanl̦o̦k wõt kõjdat ilo lal̦ in? Bwe jen jel̦ã un eo, jej aikuj mel̦el̦e ta in kõjdat, ta eo ej kõm̦m̦an bwe armej ro ren jino kõjdat, im wãween an ajeeded.
Ta in Kõjdat?
Kõjdat ej juon eñjake in dike me elukkuun kajoor ak ñe juon ej lukkuun matõrtõr juon armej ak juon kumi in armej. Ej juon eñjake in illu me ejjab bõjrak.
TA EO EJ KÕM̦M̦AN BWE ARMEJ RO REN JINO KÕJDAT
Elukkuun lõñ un ko rej kõm̦m̦an an armej ro jino kõjdat. Ekkã an armej kõjdate ro jet emaroñ jab kõn men ko rej kõm̦m̦ani, ak emaroñ kõn wõn er. Remaroñ dike rein kõnke rej watõk er bwe renana, rekõn̦aan ko̦kkure ro jet, ak rejjab maroñ oktak ñan juon armej em̦m̦an. Remaroñ watõk er bwe rettã, rekauwõtata, ak bwe er eo rej kõm̦m̦an bwe en wal̦o̦k apañ ko. Ro me rej kõjdate ro jet remaroñ kar iioon wãween ko relãj, ekajet jab jim̦we, ak wãween ko jet me remaroñ kar kõm̦m̦an bwe en eddek eñjake in kõjdat ippãer.
WÃWEEN AN AJEEDED
Juon armej emaroñ dike ro jet meñe ejjañin kar iioon er. Ñan waanjoñak, juon armej emaroñ bõk l̦õmn̦ak ko rekalijekl̦o̦k an ro ej kautiej er ak ro epaake er ilo an jab jel̦ã kake. Innem emaroñ pidodo an ajeeded kõjdat im aolep ro ilo juon kumi remaroñ oktak im juon wõt l̦õmn̦ak kake.
Ñe jemel̦el̦e kõn joñan an pidodo an ajeeded kõjdat, innem jenaaj mel̦el̦e kõn unin an elõñ armej dike ro jet. Ijoke, ñan kabõjrak an wõnm̦aanl̦o̦k wõt kõjdat eo me elukkuun l̦ap an wal̦o̦k ilo lal̦ in, jej aikuj lukkuun etale wãween an kar jino wal̦o̦k kõjdat. Im Baibõl̦ eo ej kwal̦o̦k kõn men in.
BAIBÕL̦ EJ KWAL̦O̦K IA EO KÕJDAT EAR JEDJED IM WAL̦O̦K JÃNE
KÕJDAT EAR JAB JEDJED IM WAL̦O̦KTOK JÃN IPPÃN ARMEJ. Kõjdat ekar ijjino ippãn juon enjel̦ ilo lañ ke ear jum̦aik Anij me tokãlik kar n̦aetan Setan Tepil̦ eo. Tepil̦ eo ear “juon ri-uror jãn kar jinoin” an kar jum̦ae. Ãinwõt juon “ri-riab im jemãn aolep ri-riab,” ej kõm̦m̦an bwe en wõnm̦aanl̦o̦k wõt kõjdat im lãj. (Jon 8:44; 1 Jon 3:11, 12) Baibõl̦ ej kwal̦o̦k kõn e ãinwõt juon eo enana, ellu, im elãj.—Job 2:7; Revelesõn 12:9, 12, 17.
KÕN AD JAB WEEPPÃN, EITOK WÕT BWE JEN KÕJDAT. Armej eo m̦oktata, Adam, ear l̦oore ial̦ eo enana an Setan. Kõn wõt wãween in, aolep armej rar jolõt jerawiwi im jab weeppãn. (Rom 5:12) L̦eo erũttotata nejin Adam, Kein, ear m̦an l̦eo jatin, Ebel, kõn an lukkuun kõjdate. (1 Jon 3:12) Em̦ool bwe elõñ armej rej kwal̦o̦k yokwe im tũriam̦o. Bõtab kõn wõt ad kar jolõt jerawiwi, eitok wõt bwe elõñ ren kwal̦o̦k kũbbon̦, ebbanban, im utiej bõro—kadkad kein me rej kõm̦m̦an bwe en wõr kõjdat.—2 Timote 3:1-5.
KÕJDAT EJ WÕNM̦AANL̦O̦K WÕT ÑE JUON EJ DIKE L̦ÕMN̦AK IM KÕM̦M̦AN KO REOKTAKL̦O̦K AN RO JET. Lal̦ in me jej mour ie ej kõm̦m̦an bwe en wõr kõjdat ilo an kowõnm̦aanl̦o̦k l̦õmn̦ak im kõm̦m̦an ko rekauwõtata me ejjel̦o̦k tũriam̦o ie. Dike l̦õmn̦ak im kõm̦m̦an ko reoktakl̦o̦k an ro jet, kalijekl̦o̦k, naan ko rekõmmetak, ũrõrmej (bullying), im kõm̦m̦an jorrããn ko rel̦l̦ap rej wõnm̦aanl̦o̦k wõt kõnke “aolepen lal̦ in ej pãd ium̦win pein ri-nana eo,” Setan Tepil̦ eo.—1 Jon 5:19.
Meñe ãindein, ak Baibõl̦ ejjab baj kwal̦o̦k wõt kõn wãween an kar kõjdat jedjed im wal̦o̦k. Bõtab ej bar kwal̦o̦k kõn wãween bwe men in en maroñ jako.
