Emaroñ pidodo ad eddodo im jemaroñ jaje jen ta ñe juon m̦õttad ej eñtaan kõn an wõr juon an nañinmej ilo kõl̦mãnl̦o̦kjen̦. Ijoke jemaroñ kwal̦o̦k joñan ad kea kake e ikijjeen ad jipañe ñan kijenmej ium̦win apañ ko ej iiooni jãn nañinmej eo an ilo kõl̦mãnl̦o̦kjen̦. Ewi wãween ad maroñ kõm̦m̦ane men in?

‘En m̦õkaj am̦ roñjake.’—JEMES 1:19.

Juon iaan wãween ko rem̦m̦antata ñan jipañ eo m̦õttam̦ ej ñan roñjake ñe ej kõn̦aan kõnnaan. Jab l̦õmn̦ak bwe kwõj aikuj em̦m̦akũt im bar kõnono ñane kõn aolep men ko ej ba. Kaalikkar ñane bwe kwõj lukkuun roñjake im bwe kwõj lukkuun kea kake. Kajjioñ in mel̦el̦e kõn wãween an eñjake, im jab m̦õkaj im ekajete. Keememej bwe emaroñ ba men ko me ear jab itõn kõn̦aan ba im emaroñ ajl̦o̦k kaki tokãlik.​—Job 6:2, 3.

“Kaenõm̦m̦an ro rebũrom̦õj.” —1 TESSALONIKA 5:14.

Eo m̦õttam̦ emaroñ inepata, ak emaroñ pen an bõjrak an bõk l̦õmn̦ak eo bwe ejjel̦o̦k tokjãn. Kwõmaroñ kaenõm̦m̦ane ilo am̦ kõkajoore im ba bwe kwõj kea kake e, meñe kwõjjab lukkuun jel̦a ta eo kwõn ba.

“Juon jeran ej yokwe iien otemjej.” —JABÕN KÕNNAAN 17:17.

Kajjitõk ñe kwõmaroñ jipañ eo m̦õttam̦. Ijello̦kun am̦ l̦õmn̦ak bwe kwõjel̦ã ta eo kwõn kõm̦m̦ane ñan jipañ, kajjitõk ippãn eo m̦õttam̦ ta eo kwõmaroñ  kõm̦m̦ane. El̦aññe epen an eo m̦õttam̦ kõmel̦el̦eik ta eo ej aikuji, kajjioñ kwal̦o̦k ñane juon men em̦m̦an me komiro maroñ kõm̦m̦ane ippãn doon, ãinwõt etal im walk. Ak kwõmaroñ bar kajjitõk ñe kwõmaroñ jipañe ilo kaikujkuj, karreo, ak jerbal ko jet.​—Galetia 6:2.

“Kom̦win . . . meanwõd.”—1 TESSALONIKA 5:14.

Eo m̦õttam̦ emaroñ jab pojak ñan kõnnaan aolep iien. Kõkajoore eo m̦õttam̦ im ba bwe kwõnaaj m̦õn̦õn̦õ in roñjake e ñe ekõn̦aan kõnono. Kõn an wõr an nañinmej ilo kõl̦mãnl̦o̦kjen̦, eo m̦õttam̦ emaroñ ba ak kõm̦m̦ani men ko me rej kõmetak eok. Emaroñ kããnjel̦e bũl̦ããn ko am̦ ippãn im emaroñ nana tam̦m̦win. Kwõn kijenmej wõt ippãn im kwal̦o̦k am̦ mel̦el̦e ilo am̦ jipañe kõn aikuj ko an.​—Jabõn Kõnnaan 18:24.

“Ij kate eõ bwe in juon eo me eo m̦õtta emaroñ bõk jipañ jãne aolep iien. Meñe ejjel̦o̦k uwaakin apañ ko an ippa, ak ij kajjioñ kate eõ aolep iien ñan roñjake ta ko ej ba. Jet iien men eo el̦ap an aikuji ej bwe in baj roñjake wõt e bwe en em̦m̦an an mour.”—Farrah, a eo me eo m̦õttan ej eñtaan jãn nañinmejin eating disorder, nañinmejin anxiety disorder, im nañinmejin clinical depression.

“Juon iaan ro m̦õtta elukkuun jouj im kain armej rot eo me ekõketak. Juon iien ear kũr eõ bwe in m̦õñã ippãn ilo m̦weo im̦õn. Kõn an kar lukkuun l̦ap an kwal̦o̦k yokwe ilo iien in, ekar pidodo aõ maroñ kwal̦o̦k eñjake ko aõ ñane. Innem men in ear lukkuun kõkajoor eõ!”—Ha-eun, eo me ej eñtaan jãn nañinmejin clinical depression.

“Kijenmej elukkuun aorõk. Ñe kõrã eo ippa ej kõm̦m̦ane juon men ej kainepataik eõ, ij kakeememej ña make bwe nañinmej eo an ej kõm̦m̦an bwe en ãindein, im ejjab kõnke lukkuun e eo ear kõm̦m̦ane men in. Men in ejipañ eõ bwe in jab illu ippãn im bwe en l̦apl̦o̦k aõ l̦õmn̦ak kõn eñjake ko an.”—Jacob, eo me kõrã eo ippãn ej eñtaan jãn nañinmejin clinical depression.

“Kõrã eo ippa elukkuun l̦ap an jipañ eõ im kaenõm̦m̦an eõ. Ñe ij eñjake aõ lukkuun inepata, ejjab iuuni eõ ñan kõm̦m̦ane juon men me ijjab kõn̦aan kõm̦m̦ane. Mel̦el̦ein men in bwe jet iien ejjab maroñ kõm̦m̦ani men ko me ekõn̦aan kar kõm̦m̦ani. Ej juon kõrã eo me elukkuun em̦m̦an ippa kõn an kaarmejjeteik e make im kõn an lukkuun jouj.”—Enrico, eo me ej eñtaan jãn nañinmejin anxiety disorder.