1. Mourin M̦are

Eokkõtaktak l̦õmn̦ak ko an armej ro kõn mourin m̦are im ta ko ruo rippãlele rej aikuj kõm̦m̦ani bwe pãd eo aerro en lem̦õn̦õn̦õ.

MEL̦EL̦EIN: Anij ear ejaake mourin m̦are, kõn men in ejel̦ã ta ko ruo rippãlele rej aikuji bwe ren maroñ lo m̦õn̦õn̦õ ilo mourin m̦are eo aerro. (Mark 10:​6-9) Bwe erro en lo m̦õn̦õn̦õ, erro jim̦or ej aikuj l̦õmn̦ak kõn aikuj ko an doon, im jab kõn er make. L̦eo ej kwal̦o̦k an yokwe lio ikijjeen wãween an kõm̦m̦an ñan e im lale e. Im lio ej kwal̦o̦k an kautiej l̦eo ikijjeen wãween an kõnnaan im kõm̦m̦an ñan e.

NAANIN TÕL KO JÃN BAIBÕL̦ REJ LUKKUUN JIPAÑ: Quang im Thi, jãn Vietnam, rar jim̦or l̦õmn̦ak bwe erro ban lo m̦õn̦õn̦õ ilo mourin m̦are eo aerro. Ekkã an kar Quang jab kwal̦o̦k jouj. Ej ba: “Iar jab kea kõn eñjake ko an Thi im ekkã aõ kar kõmetake im kajooke.” Thi ear kõn̦aan kõm̦m̦an aerro peba in jepel. Ej ba: “Ear jako aõ lõke im kautiej l̦eo ippa.”

Tokãlik, Quang im Thi rar katak kõn ta eo Baibõl̦ ej katakin im wãween aerro maroñ jerbale Epesõs 5:33 ilo mourin m̦are eo aerro. Quang ej ba, “Eoon in ear jipañ eõ ñan kile bwe ij aikuj kwal̦o̦k jouj ñan Thi im kõm̦m̦an an eñjake bwe ij yokwe e im bwe ij kabwe aikuj ko an ikijjeen kanniõk im ãnbwin, im bwe ij l̦õmn̦ak kõn eñjake ko an. Ñe ij kõm̦m̦ani men kein, el̦apl̦o̦k an yokwe eõ im kautiej eõ.” Im Thi ej ba, “El̦ak l̦apl̦o̦k aõ jerbale Epesõs 5:33 im kautiej l̦eo ippa, el̦apl̦o̦k an kwal̦o̦k an yokwe im kõjparok eõ im kõm̦m̦an aõ eñjake aõ aenõm̦m̦an.”

 2. Wãween ñan Kõm̦m̦an ñan Ro Jet

Ekkã an nana an armej kõm̦m̦an ñan ro eoktak kil ko kilier, aelõñ ko aer, paotokier, kabuñ ko aer, ak ñe rej juon eo me em̦m̦an ippãer pãlele em̦m̦aan ak kõrã.

MEL̦EL̦EIN: Baibõl̦ ejjab katakin kõj ñan dike armej ro me eoktak kil ko kilier, aelõñ ko aer, ak ro me rej pãlele em̦m̦aan ñan em̦m̦aan ak kõrã ñan kõrã. Ijello̦kun an ãindein, ej rõjañ kõj ñan kautiej aolep armej, jekdo̦o̦n aelõñ ko aer, kil ko kilier, ak bõnbõnier. (Jerbal 10:34) Jekdo̦o̦n ñe jejjab errã ippãn kõm̦m̦an ko an juon armej ak men ko ej tõmaki, jemaroñ kwal̦o̦k wõt jouj im kautiej ñane.—Matu 7:12.

NAANIN TÕL KO JÃN BAIBÕL̦ REJ LUKKUUN JIPAÑ: Kar katakin Daniel bwe en watõk armej ro jãn Asia ãinwõt ri-kõjdat ro an aelõñ eo an. Kõn men in, ear dike jabdewõt armej me ear itok jãn Asia im ekkã an kar kajook er ilo̦bwilej. Ej ba: “Ikõn jojomare eõ make im ba bwe unin aõ kar ãindein ej kõnke ij rejetake aelõñ eo aõ. Ekar jab jiktok ilo l̦õmn̦ak e aõ bwe ebõd wãween aõ kar l̦õmn̦ak im men ko iar kõm̦m̦ani.”

Tokãlik, Daniel ear katak kõn ta eo Baibõl̦ ej katakin. Ej ba: “Iar aikuj lukkuun ukot wãween aõ kar l̦õmn̦ak. Iar aikuj kalimjek armej ro ilo ejja wãween eo Anij ej kalimjek er—eñin bwe kõj aolep jej joñan wõt juon jekdo̦o̦n ia eo jej itok jãne.” Daniel ej kõmel̦el̦e kõn wãween an eñjake kiiõ ñe ej iioone armej ro jet. Ej ba: “Ekkã aõ jab l̦õmn̦ak kõn ia eo rej itok jãne. Kiiõ, ij yokwe aolep kain armej im ewõr ro m̦õtta me el̦ap aõ epaake er jãn jikin ko jet ipel̦aakin lal̦ in.”

 3. Jããn

Elõñ armej rej kate er bwe ren m̦weiie ñan aer maroñ lo m̦õn̦õn̦õ im bõk juon ilju im jekl̦aj em̦m̦anl̦o̦k.

MEL̦EL̦EIN: Jej aikuj jããn, bõtab jããn ejjab maroñ kõm̦m̦an bwe jen lo m̦õn̦õn̦õ ilo mour ko ad ak lo juon ilju im jekl̦aj me em̦m̦an. (Jabõn Kõnnaan 18:​11, UBS; 23:​4, 5, UBS) Ijoke, ad lo m̦õn̦õn̦õ eo em̦ool im juon ilju im jekl̦aj me ejokwane ej pedped ioon ad jerbale naanin kakapilõk ko remãlõtlõt jãn Anij me rej pãd ilo Baibõl̦ eo.—1 Timote 6:​17-19.

NAANIN TÕL KO JÃN BAIBÕL̦ REJ LUKKUUN JIPAÑ: Cardo, juon em̦m̦aan jãn Indonesia, ear lukkuun poub ilo an kõttõpar bwe en m̦weiie. Ej ba: “Enañin aolep men ko me armej rar kõn̦aan bwe en wõr aer, eokwe ear wõr ippa. Iar maroñ kãlo̦k im ito-itak ñan aelõñ ko jet, ekoba wiaiki m̦weiuk ko relukkuun l̦ap on̦ããer, wa ko, im em̦ ko.” Bõtab ear jab to an men kein pãd. Cardo ej ba, “Juon armej ear m̦on̦e eõ im ilo bũkkinkwõle ilo rom, aolep jããn ko iar kate eõ ñan koorl̦o̦ki ium̦win elõñ iiõ ko, rar jako. Iar kõjerbal aolepen mour e aõ ñan koorl̦o̦k jããn im m̦weiuk, bõtab ilo jem̦l̦o̦kin, men ko ear wõr wõt ippa ej eñjake in bũrom̦õj kõnke ear ejjel̦o̦k jabdewõt men ippa im iar l̦õmn̦ak bwe ejjel̦o̦k tokja.”

Cardo ear jino jerbale naanin kakapilõk ko jãn Baibõl̦ kõn jããn. Ejako an kõjerbal aolep maroñ ko an ñan jibadek m̦weiie, ijoke ej mour ilo juon wãween el̦amwaan. Ej ba, “Ippa, em̦õj aõ lo m̦weiie eo em̦ool kõnke em̦m̦an kõtaan eo aõ ippãn Anij. Elukkuun em̦m̦an aõ kiki aolep boñ, im ij m̦oolin m̦õn̦õn̦õ kiiõ.”

 4. An Ruo Amej Babu Ippãn Doon

Elukkuun lõñ kain l̦õmn̦ak ko me reoktak jãn doon kõn ta ko rekkar ñe ej itok ñan an ruo amej babu ippãn doon.

MEL̦EL̦EIN: Baibõl̦ ej kwal̦o̦k kõn ta ko rekkar ñe ej itok ñan an ruo armej babu ippãn doon. Naan in “l̦õñ” ej kitibuj an juon ri-m̦are lejãn, an juon wiakake ãnbwinnin, an ruo armej babu ippãn doon ak rejjañin m̦are, an em̦m̦aan ñan em̦m̦aan ak kõrã ñan kõrã babu ippãn doon, im an juon armej babu ippãn menninmour ko. (1 Korint 6:​9, 10) An ruo armej babu ippãn doon ej juon menin letok jãn Anij im ekõn̦aan bwe juon em̦m̦aan im juon kõrã me em̦õj aerro m̦are ren babu ippãn doon.—Jabõn Kõnnaan 5:​18, 19.

NAANIN TÕL KO JÃN BAIBÕL̦ REJ LUKKUUN JIPAÑ: Juon kõrã jãn Australia etan Kylie ej ba: “Ãinwõt juon eo me ejjel̦o̦k pãleen, iar l̦õmn̦ak bwe el̦aññe inaaj babu ippãn juon, innem inaaj eñjake aer yokwe im kõjparok eõ. Bõtab men in ear jab wal̦o̦k. Iar oktak im l̦õmn̦ak bwe ejjel̦o̦k tokja im ear rup bũruõ.”

Tokãlik, Kylie ear katak im jerbali ta eo Baibõl̦ ej katakin kõn an ruo armej babu ippãn doon. Ej ba, “Iar maroñ lo bwe Anij ej letok kien ko an ñan kõjparok kõj jãn ad bũrom̦õj im metak. Kiiõ, ij bõk kõjparok im loe yokwe eo em̦ool kõnke ij l̦oori men ko Jeova ekõn̦aan bwe jen kõm̦m̦ani. Ij kile bwe elõñ wãween ko renana iar maroñ kõjparok eõ jãni itok jãn aõ jerbali naanin tõl ko jãn Baibõl̦!”