Jesus ear kanaan im ba bwe renaaj kwal̦o̦k nuuj eo em̦m̦an kõn Aelõñ eo an Anij iaolepen lal̦, im rainin em̦õj an jejjet kũtien men in. (Matu 24:14, UBS) Ekkar ñan bokin Daniel, Aelõñ in an Anij ej jitõñl̦o̦k ñan kien eo an Anij. Ilo jebta 2 ej kwal̦o̦k kõn juon kanaan me ej kõnono kõn jet iaan kien ak aelõñ ko rekajoor an lal̦ in, jino jãn kar kien eo an Babil̦on eo etto tok ñan kien ko ilo raan kein. Im ilo Daniel 2:44 ej kanaan kõn ta eo enaaj wal̦o̦k ilju im jekl̦aj ñan kien ko an armej, ej ba:

“Anij in lañ enaaj kajutak juon aelõñ eo eban jako indeeo, im aelõñ in reban lel̦o̦k ñan armej ro jet. Enaaj kapedakilkil im ko̦kkure aolep aelõñ kein, im enaaj jutak ñan indeeo.”

Kanaan in im kanaan ko jet ilo Baibõl̦ rej ba bwe Aelõñ eo an Anij enaaj bõk jikin aolep kien ko an armej im bõktok aenõm̦m̦an im jokwane ñan armej ro ioon lal̦ in. Enaaj ewi wãween mour ñe Aelõñ in enaaj tõl im irooj ioon lal̦ in? Erkein jet iaan kallim̦ur ko rem̦m̦an me m̦õttan jidik renaaj jejjet im m̦ool.

• EJJEL̦O̦K BAR TARIN̦AE

  Sam 46:9 (UBS) ej ba: “[Anij] ej kabõjrak tarin̦ae ko ioon aolepen lal̦; Ej ruje lippo̦n̦ ko, im ko̦kkure m̦ade ko; Ej tile kein kattõrak ko.”

  Baj l̦õmn̦ake m̦õk men in, ñe juon iien jããn ko im kapeel ko an armej me rej kõjerbali kiiõ ñan kõm̦m̦an kein tarin̦ae, renaaj jerbal wõt ñan kõm̦m̦ani men ko renaaj jipañ armej ro im jab ñan bõk mour ko aer! Eokwe kallim̦ur in bwe enaaj ejjel̦o̦k bar tarin̦ae, enaaj jejjet im m̦ool ñe kien eo an Anij enaaj jino an tõl im irooj ioon lal̦ in.

• ENAAJ EJJEL̦O̦K BAR NAÑINMEJ

  Aiseia 33:24 ej ba: “Rũjokwe ie ejãmin ba, ‘Inañinmej.’”

  Pijaikl̦o̦k mo̦k an naaj jako aolep nañinmej ko rej wal̦o̦k rainin im kõm̦m̦an an elõñ armej lukkuun eñtaan im bũrom̦õj! Enaaj ejjel̦o̦k bar nañinmej in jorrããn menono, kããnjõr (cancer), tõñal, im bar nañinmej ko jet rel̦l̦ap. Innem l̦õmn̦ake m̦õk, jeban bar aikuj hospital im uno! Eokwe, enaaj wãween dein ilju im jekl̦aj eo an ro renaaj mour im amn̦ak ioon lal̦ in. Enaaj juon iien me aolep renaaj lukkuun ãjmour im m̦õn̦õn̦õ ñan indeeo.

• ENAAJ EJJEL̦O̦K BAR KWÕLE

  Sam 72:16 (UBS) ej ba: “Ãneo en obrak kõn wiit (wheat); Keinikkan ko en kabwe ioon tol̦ ko.”

  Enaaj kanooj in lõñ m̦õñã ilo lal̦ in im bwe ñan aolep armej. Unin kõnke bwidej enaaj em̦m̦an im wãmourur ñan an aolep kõm̦m̦an aer jikin kallib m̦õñã. Mel̦el̦ein bwe ejjel̦o̦k juon enaaj bar kwõle im bõk nañinmej in jabwe õn.

• ENAAJ EJJEL̦O̦K BAR EÑTAAN, BŨROM̦ÕJ IM MEJ

  Revelesõn 21:4 ej ba: “[Anij] enaaj kõm̦õrãik jãn mejãer dãnnin kõmjaal̦al̦ otemjej, im enaaj ejjel̦o̦k bar mej, im rejãmin bar liaajlo̦l̦, ak jañ, ak eñtaan; bwe men ko m̦okta rejako.”

   Mel̦el̦ein bwe armej renaaj mour m̦aanl̦o̦k wõt ñan indeeo ijin ioon lal̦ kõnke kiiõ renaaj weeppãn! Eñin kallim̦ur eo elukkuun em̦m̦an jãn Jeova, Rũkõm̦anm̦an eo ad me el̦ap an jouj im yokwe.

Aolep kallim̦ur kein renaaj ke lukkuun jejjet im m̦ool? Eokwe meñe enañin aolep armej em̦m̦an aer roñ kõn wãween mour eo Baibõl̦ ej kallim̦ur kake, bõtab elõñ epen aer mel̦el̦e im tõmak bwe jemaroñ mour ioon lal̦ in ñan indeeo. Im jejjab bwilõñ kõnke ejjañin wõr juon armej enañin mour ñan indeeo im ear jiroñ kõj kõn men in.

Joñan an to an armej ro lo eñtaan, bũrom̦õj, im apañ ko reppen itok jãn aer pãd ium̦win jerawiwi im mej, etal im reimminene kake men in im rej l̦õmn̦ak bwe ãindein mour. Bõtab, ejjab kar karõk eo in an Rũkõm̦anm̦an eo, Jeova Anij, ñan kõj armej.

Ñan jipañ kõj bwe jen lukkuun tõmak bwe enaaj m̦ool kallim̦ur kein, Anij ear ba: “Naan eo ej wal̦o̦ktok jãn lo̦ñiũ ejãmin jepl̦aaktok ñan ippa im ejjel̦o̦k tokjãn, a enaaj kõm̦m̦an men eo Ikõn̦aan, im enaaj jeraam̦m̦an ilo men eo Ij jilkinl̦o̦k e kake.”​—Aiseia 55:11.

Baibõl̦ ej kwal̦o̦k kõn Jeova bwe ej juon Anij “eban riab.” (Taitõs 1:2) Innem, kõnke em̦õj an kallim̦ur kõn juon ilju im jekl̦aj eo em̦m̦an, el̦ap an aorõk bwe jen l̦õmn̦ak kõn kajjitõk kein: Enaaj ke lukkuun m̦ool bwe armej remaroñ mour indeeo ilo Pedetaij ijin ioon lal̦? Ta eo jej aikuj kõm̦m̦ane bwe jen maroñ bõk tokjãn kallim̦ur kein an Anij? Eokwe, kwõnaaj lo uwaak ko el̦aññe kwõnaaj wõnm̦aanl̦o̦k wõt im riiti peij ko tok im̦aan.