EL̦AÑÑE kwõnaaj kar el̦l̦ã im mour jãn juon jorrããn el̦ap, innem bõlen kwõmel̦el̦e kõn eñjake ko an ro jet me rar bar el̦l̦ã im mour: ekkã aer ilbõk, pen aer tõmak kõn men eo ear wal̦o̦k, lõñ kain l̦õmn̦ak ko rej bũki, inepata, im eitok wõt bwe ren ettõn̦ak kõn men ko rekaamijak. Elõñ iaan rein, rem̦õk im rebbweer, im kõn men in rejjab kõn̦aan kõm̦m̦an jabdewõt ak kajjioñ kõm̦m̦an bwe en em̦m̦anl̦o̦k aer mour.

Ñe em̦õj am̦ iioon apañ jãn jorrããn ko rel̦l̦ap, kwõmaroñ jino l̦õmn̦ak bwe emaat am̦ maroñ ñan kijenmej. Im kwõmaroñ jino l̦õmn̦ak bwe ejjel̦o̦k tokjãn am̦ mour. Bõtab, Baibõl̦ eo ej kwal̦o̦k bwe ewõr tokjãn am̦ mour im bwe ewõr unin am̦ maroñ kõjatdikdik kõn juon ilju em̦m̦an.

Ekklisiastis 7:8 (UBS) ej ba: “Jem̦l̦o̦kin juon men em̦m̦anl̦o̦k jãn jinoin.” Ilo jinoin, ilo iien eo kwõj kajjioñ in kakõm̦anm̦anl̦o̦k am̦ mour kõn wõt jorrããn eo el̦ap kwaar iioone, kwõmaroñ l̦õmn̦ak bwe eban em̦m̦an. Ijoke, ilo am̦ kijenmej wõt im kate eok ñan kõm̦m̦an bwe en bar em̦m̦anl̦o̦k am̦ mour, kwõnaaj lo an em̦m̦anl̦o̦k.

Baibõl̦ eo ej kanaan kõn juon iien me ‘ejjãmin bar wõr jañ, im ejjel̦o̦k en̦ enaaj kũr kõn jipañ.’ (Aiseia 65:19, UBS) Naan kein renaaj jejjet kũtieer ilo iien eo lal̦ in enaaj erom juon pedetaij ium̦win Aelõñ eo an Anij. (Sam 37:11, 29) Aet, eban bar wõr jorrããn ko rel̦l̦ap. Jabdewõt apañ ak jorrããn ko jaar iiooni, jeban bar keememeji, kõnke Anij eo Ekajoor Bõtata ej kallim̦ur im ba: “Ejjel̦o̦k en̦ enaaj keememeji men ko rar wal̦o̦k ilo iien ko rej mootl̦o̦k.”​—Aiseia 65:17, UBS.

Baj l̦õmn̦ak m̦õk, ri-Kõm̦anm̦an eo em̦õj an karõk bwe en “lewaj juon kõtmãne im kõjatdikdik” bwe kwõn maroñ mour im lo aenõm̦m̦an ium̦win tõl eo An eweeppãn. (Jeremaia 29:11) Am̦ jel̦ã kõn kõjatdikdik in, emaroñ ke kõm̦m̦an bwe en wõr unin am̦ wõnm̦aanl̦o̦k im mour? Sally, eo kar kwal̦o̦k kake ilo katak eo m̦oktal̦o̦k, ej ba: “Am̦ kakeememej eok make kõn aolep men ko rem̦m̦an me Aelõñ eo an Anij enaaj kõm̦m̦ane ilju im jekl̦aj, emaroñ jipañ eok bwe kwõn jab l̦õmn̦ak kõn men ko remootl̦o̦k ak kwõn maroñ kijenmej wõt kõn men ko kwõj iiooni ilo tõre in.”

Kwõmaroñ kal̦apl̦o̦k am̦ jel̦ã kõn ta eo Aelõñ eo an Anij enaaj kõm̦m̦ane ñan armej ro! Am̦ kõm̦m̦ane men in enaaj jipañ eok bwe kwõn lõke bwe meñe elõñ jorrããn im apañ ko kwaar iiooni, ak ewõr tokjãn am̦ mour kiiõ ilo am̦ kõttaretok iien eo ñe eban bar wõr jorrããn ko rel̦l̦ap. Bõtab ilo tõre in jej kõttar, kwõmaroñ bõk jipañ jãn naanin kakapilõk ko ilo Baibõl̦ kõn wãween am̦ nãj maroñ kijenmej wõt kõn men ko rej wal̦o̦k jãn wõt jorrããn ko rel̦l̦ap. L̦õmn̦ak kõn jet iaan waanjoñak ko jãn Baibõl̦.