M̦õttan wõt jidik kien eo an Anij ilañ enaaj irooj ioon aolepen armej ro ijin ioon lal̦. Ilo naaj iien en̦, lal̦ in enaaj juon jikin ekam̦õn̦õn̦õ im armej ro ie renaaj bõrokuk ippãn doon im kõm̦m̦ani jerbal ko rem̦m̦an. Anij ear jitõñe Jesus Christ bwe en irooj ioon lal̦ in. Jesus elukkuun oktak jãn ri-tõl ro an lal̦ rainin, kõnke aolep iien enaaj kõm̦m̦ani men ko rem̦m̦antata ñan armej. Wãween an Jesus naaj irooj ak tõl enaaj pedped wõt ioon yokwe, im enaaj juon Kiiñ ejouj, etũriam̦o, im ejjel̦o̦k kalijekl̦o̦k ippãn.​—Aiseia 11:4.

Armej ro ilo jukjukun pãd eo ekããl reban jepel kõn an oktak aelõñ ak m̦anit ko aer jãn doon. Ijoke, armej otemjej renaaj bõrokuk ippãn doon. (Revelesõn 7:9, 10) Aolep ro renaaj mour ilo lal̦ in renaaj yokwe Anij im ro ri-turier. Bareinwõt, renaaj jerbal ippãn doon ilo aenõm̦m̦an ñan kajejjet karõk eo an Anij jãn jinoin ilo aer kõjparoke ijo jikier ijin ioon lal̦.​—Sam 115:16.

Ñe Aelõñ eo an Anij ej irooj ioon lal̦ in, ri-Kõm̦anm̦an eo enaaj bõk eddon ta ko rej wal̦o̦k ñan mejatoto bwe en em̦m̦an aolep iien. (Sam 24:1, 2) Ke Jesus ear pãd ijin ioon lal̦, ear kwal̦o̦k jidikin kajoor eo Anij ear lel̦o̦k ñane ke ear pidodo an kalur juon l̦añ el̦ap. (Mark 4:39, 41) Ium̦win tõl eo an Christ, armej reban aikuj mijak l̦añ ko rel̦l̦ap. Innem, ñe Aelõñ eo an Anij ej irooj, jenaaj mour ilo aenõm̦m̦an ippãn mennin kõm̦anm̦an ko im ejjel̦o̦k juon enaaj ko̦kkure lal̦ in.​—Hoseia 2:18.

Aolep renaaj m̦õn̦õn̦õ kõn aer lukkuun ãjmour. Ejjel̦o̦k juon enaaj nañinmej, rũttol̦o̦k, ak mej. (Aiseia 35:5, 6) Armej ro renaaj m̦õn̦õn̦õ kõn juon lal̦ eaiboojoj im erreo ãinwõt kar jikin kallibin Iden, me rippãlele ro ruo m̦oktata rar m̦õn̦õn̦õ kake. Ilo lal̦ eo ekããl, enaaj obrak kõn kein ekkan ko im enaaj lõñ m̦õñã ñan aolep. (Jenesis 2:9) Ãinwõt kar armej ro an Anij ilo iien ko etto, aolep ro ilo Pedetaij renaaj “m̦õñã ñan mat.”​—Livitikõs 26:4, 5, UBS.

Ium̦win kien eo an Anij, armej otemjej renaaj mour ilo aenõm̦m̦an im enaaj em̦m̦an im jim̦we aer kõm̦m̦an ñan doon. Enaaj ejjel̦o̦k tarin̦ae, bareinwõt ejjel̦o̦k juon enaaj kõjerbale maroñ eo an ñan ko̦kkure ro jet, im naaj kabwe aolep aer aikuj. Baibõl̦ eo ej kallim̦ur im ba: “Armej otemjej renaaj mour ilo aenõm̦m̦an iturin jikin kallibin kũreep ko im wõjke fig ko kõtkaer, im ejjel̦o̦k enaaj kamijak er.”​—Maika 4:3, 4, UBS.

Kajjojo baam̦le enaaj wõr m̦weer make im reban aikuj mijak bwe juon enaaj kõm̦akũt er jãne. Im aolep jerbal ko jenaaj kõm̦m̦ani renaaj kalañlõñ kõj. Ãinwõt an Baibõl̦ eo ba, ro im rej jokwe ilo lal̦ eo ekããl an Anij “rejjãmin jerbal pata.”​—Aiseia 65:21-23.

Baibõl̦ eo ej kallim̦ur im ba: “Lal̦ enaaj obrak kõn jel̦ã Jeova.” (Aiseia 11:9) Ro renaaj mour ilo jukjukun pãd eo ekããl renaaj katak kõn mãlõtlõt eo an ri-Kõm̦anm̦an eo aer, Jeova, im renaaj bar katak kõn menin kõm̦anm̦an ko an raiboojoj. Reban kõjerbale jel̦ãl̦o̦kjen̦ eo aer ñan kõm̦m̦an kein tarin̦ae ko ak ñan ko̦kkure armej ro jet. (Aiseia 2:4) Ijoke, renaaj katak kilen mour ippãn doon ilo aenõm̦m̦an im wãween aer maroñ lale im kõjparok lal̦ in.​—Sam 37:11.

Anij ear kõm̦anm̦an lal̦ in ilo juon wãween ñan ad maroñ m̦õn̦õn̦õ kõn mour kajjojo raan. Kõn̦aan eo an in ej bwe armej ren mour ñan indeeo ijin ioon lal̦. (Sam 37:29; Aiseia 45:18) Ñan kajejjet karõk eo an jãn jinoin, Anij enaaj “orañl̦o̦k mej ñan indeeo.” (Aiseia 25:8) Baibõl̦ eo ej kallim̦ur bwe “enaaj ejjel̦o̦k bar mej, bũrom̦õj, lim̦õ im eñtaan.” (Revelesõn 21:4) Anij enaaj lel̦o̦k ñan aolep armej kõjatdikdik eo ñan mour indeeo. Rein ekitibuj ro me Enaaj lo̦mo̦o̦ren er ñe ej ko̦kkure jukjukun pãd in enana im bareinwõt ro me enaaj kõjerkak er jãn mej ilo lal̦ eo ekããl.​—Jon 5:28, 29; Jerbal 24:15.

 Elõñ milien armej rej kõpooj er make kiiõ ñan mour eo ekããl me m̦õttan jidik enaaj wal̦o̦k ium̦win kien ak Aelõñ eo an Anij. Meñe ilo tõrein rejjab weeppãn, ak rej kate er ñan erom kain armej rot eo Anij enaaj kõn̦aan bwe ren pãd ilo lal̦ eo an ekããl. Ewi wãween aer kõm̦m̦ane men in? Ikijjeen aer katak kõn Jeova Anij im Jesus Christ eo ear jilkintok.​—Jon 17:3.

Kal̦apl̦o̦k am̦ mel̦el̦e kõn wãween eo kwõmaroñ el̦l̦ã jãn jem̦l̦o̦kin jukjukun pãd in im mour ilo juon lal̦ em̦m̦anl̦o̦k me m̦õttan jidik enaaj wal̦o̦k. Kwõj ruwainene ñan bwebwenato im katak kõn Baibõl̦ eo ippãn juon iaan Ri-Kõnnaan ro an Jeova ilo ejjel̦o̦k on̦ããn, ilo ami kõjerbale bok eo etan M̦õn̦õn̦õ kõn Mour ñan Indeeo!