Etke armej rekõn̦aan mour ñan indeeo? Baibõl̦ ej kwal̦o̦k bwe Anij ear likũt kõn̦aan in ilo bũruod. (Ekklisiastis 3:11) Ej bareinwõt ba bwe “Anij yokwe.” (1 Jon 4:8) Innem kõnke Anij ej juon Anij in yokwe, enaaj ke kar likũt ilo bũruod kõn̦aan eo ñan mour indeeo innem tokãlik kõm̦m̦an bwe kõn̦aan in en jab tõprak? Ealikkar bwe eban kar kõm̦m̦ane men in.

Ejjel̦o̦k juon iaad ekõn̦aan mej. Ilo m̦ool, Baibõl̦ ej keidi mej ãinwõt juon “ri-kõjdat.” (1 Korint 15:26) Jet rej mej ke rej dik wõt, ak ro jet emaroñ aetok aer mour. Meñe ãindein ak aolep rej naaj mej wõt. Elõñ armej remijak ñe rej l̦õmn̦ak kõn aer naaj mej. Enaaj ke wõr juon iien ñe ri-kõjdat in mej enaaj jako? Im emaroñ ke lukkuun jako?

Kwõn ke bwilõñ ñe kwaar jel̦ã bwe ejjab kar ankilaan Anij bwe armej ren mej? Bokin Jenesis ilo Baibõl̦ ej kam̦ool bwe kar karõk eo an Anij in bwe armej ren mour ñan indeeo ijin ioon lal̦. Jeova Anij ear kõm̦anm̦an lal̦ in im kõpooje aolep men ko armej renaaj kar aikuji ñan aer mour im m̦õn̦õn̦õ. Innem ear kõm̦anm̦ane em̦m̦aan eo m̦oktata, Adam, im likũti ilo juon pedetaij ak juon jikin kallib ilo Iden. Ãlikin men in, “Anij ear lo men otemjej Ear kõm̦anm̦ani, im lo, rekanooj em̦m̦an.”​—Jenesis 1:26, 31.

Ke Anij ear kõm̦anm̦an Adam, ear kõm̦m̦an bwe en weeppãn ãinwõt E. (Duteronomi 32:4)  Bareinwõt ear ejjel̦o̦k jabdewõt likjab ippãn Iv, kõrã eo pãleen Adam, kõnke ear weeppãn ilo l̦õmn̦ak im ilo ãnbwin. Jeova ear ba ñan erro: “Kom̦win timmon im orl̦o̦k, im koobrak lal̦, im kajoor jãne; im kom̦win irooj ioon ek in lo̦jet, im ioon bao in mejatoto, im ioon men otemjej rej mour im m̦akũtkũt ioon lal̦.”​—Jenesis 1:28.

Ealikkar enaaj kar bõk juon iien elukkuun aetok ñan an Adam im Iv maroñ koobrak lal̦ in. Iv enaaj kar wõr nejin ajri, im ajri rein nejin renaaj kar rũttol̦o̦k im bar neji. Im enaaj kar ãindein m̦aanl̦o̦k m̦ae iien lal̦ in eobrak kõn armej ãinwõt an Anij kar kõn̦aan. (Aiseia 45:18) Alikkar bwe Jeova eban kar ba ñan Adam im Iv bwe ren koobrak lal̦ el̦aññe erro naaj kar mour wõt ñan tõre ko an ro nejier im ro jibwier im reban kar jel̦ã jem̦l̦o̦kin mour ko aer.

Bareinwõt, bar l̦õmn̦ak m̦õk kõn an kar Anij kõmaroñ erro ioon menninmour ko. Anij ear jiroñ Adam bwe en kõm̦m̦an etan menninmour ko, im alikkar enaaj kar bõk iien ñan an kõm̦m̦ane men in. (Jenesis 2:19) Bõtab kõnke kar kõmaroñ erro ioon menninmour kein, mel̦el̦ein bwe renaaj kar aikuj katak kaki im mel̦el̦e kõn wãween aer maroñ kõjparok im lale er. Alikkar enaaj bõk el̦apl̦o̦k iien ñan kõm̦m̦ane men in jãn joñan iien eo ear jol̦o̦ke ñan kõm̦m̦an etaer.

Kõn men in, naanin jiroñ ko an Anij ñan koobrak lal̦ in im ñan lale menninmour ko rej kaalikkar bwe Anij ear kõm̦anm̦ane armej ro jinointata bwe ren mour ium̦win juon iien elukkuun aetok. Ilo m̦ool, ear lukkuun aetok an kar Adam mour.

Baibõl̦ ej kwal̦o̦k bwe ilo kar jinoin, ear lukkuun aetokl̦o̦k an armej mour jãn armej in raan kein. Ej ba: ‘Aolepen raan ko Adam ear mour, 930 iiõ.’ Innem ej kwal̦o̦k kõn bar 6 em̦m̦aan ro me rar mour elõñl̦o̦k jãn 900 iiõ! Em̦m̦aan rein kar Seth, Inosh, Kenan, Jered, Mitusela, im Noa. Aolepeer rar mour m̦okta jãn Ibwijleplep eo ilo raan ko an Noa, im kar 600 an Noa iiõ m̦okta jãn an kar wal̦o̦k Ibwijleplep eo. (Jenesis 5:5-27; 7:6; 9:29) Etke ear maroñ lukkuun aetok an rein mour?

Aolep em̦m̦aan rein rar mour epaakel̦o̦k iien eo Adam im Iv rar jim̦or weeppãn. Bõlen eñin unin ear maroñ lukkuun aetok aer mour. Bõtab, ewi wãween an juon mour eo eweeppãn maroñ jelõt joñan aetokin mour ko ad? Im ewi wãween an naaj mej jako? Bwe jen lo uwaak ko, jej aikuj m̦oktata mel̦el̦e etke jej rũttol̦o̦k im mej.