Kwõmaroñ M̦õn̦õn̦õ kõn Jeraam̦m̦an ko Rej Ñan Indeeo Jãn Anij eo El̦ap an Yokwe
Kokõn̦aan ke mour ilo juon lal̦ me ejjel̦o̦k tarin̦ae, lãj, im poktak ko ie?
Kokõn̦aan ke bwe en kar ejjel̦o̦k nañinmej, eñtaan, im mej?
Kokõn̦aan ke rõl̦o̦k jãn inepata ko? Kokõn̦aan ke jokwe ilo juon jikin me ejjab iioon jorrããn ko jãn l̦añ ko rel̦l̦ap?
Anij eo ad me el̦ap yokwe ippãn me ear kõm̦anm̦an lal̦ in eaiboojoj, em̦õj an kallim̦ur ñan armej ro bwe enaaj kõjeraam̦m̦an er kõn juon mour eaenõm̦m̦an, im ekam̦õn̦õn̦õ ñan indeeo. Men in ejjab juon ettõn̦ak.
Ilo katak ko tok jet, kõmij rõjañ eok ñan etale:
Wãween an ri-Kõm̦anm̦an eo l̦õmn̦ak kõn armej ro
Men ko Naanin Anij ej kaalikkar ñan kõj
Men ko ri-kanaan ro an Anij rar kwal̦o̦k kaki kõn jeraam̦m̦an ko ear kallim̦ur kaki
Men ko jemaroñ kõm̦m̦ani bwe jen maroñ m̦õn̦õn̦õ kiiõ im bõk jeraam̦m̦an ko rej ñan indeeo ilo iien eo em̦õj an Anij kajejjete
Jen jinoe ilo ad etale aolep men ko ri-Kõm̦anm̦an eo ej litok ñan kõj ñan kam̦ool bwe ej yokwe kõj.
