Ewõr jet armej rej l̦õmn̦ak el̦aññe Naanin Anij em̦õj an oktak. Ri-kanaan Aiseia ear ba bwe Naanin Anij enaaj “pãd ñan indeeo.” (Aiseia 40:8, UBS) Ewi wãween ad maroñ lukkuun jel̦ã el̦aññe kar kõjparok wõt bwe kallim̦ur ko an Anij ren jim̦we im jejjet?

Ewõr an Anij maroñ ñan kõjparok Naan ko an im bõbraik jãn an jorrããn ak oktakl̦o̦k. Ilo iien ko etto, ñe rej jeje ñan kõm̦m̦an kaape ko, ri-jeje ro me el̦ap aer kõjparok rekõn bwine kajjojo lõta ilo jeje ko rekkwõjarjar ñan lukkuun lale bwe en ejjel̦o̦k naan en̦ rar kobaiki, ukote, ak jol̦o̦ke. Meñe ãindein, ak armej rejjab weeppãn, im jet ri-jeje rar kõm̦m̦an jijiddikdik likjab ko.

Elõñ to̦ujin kaape in jeje ko jãn etto me rej m̦õttan Jeje ko Rekkwõjarjar. El̦aññe ewõr oktak ilo juon iaan kaape in jeje ko, meñe jidik wõt ak remaroñ keidi ippãn kaape ko jet ñan kwal̦o̦k mel̦el̦e eo em̦ool.​—Ñan kal̦apl̦o̦k am̦ mel̦el̦e, lale katak eo etan “Has the Bible Been Changed or Tampered With?” ilo jw.org.

Ñan waanjoñak, juon kumi rej n̦aetaer bedouin rar lo kaape in jeje kein me rej n̦aetaer Bok Lemlem in Lom̦al̦o in Mej iturin Lom̦al̦o in Mej ilo 1947 eo. Ilo jeje kein, ewõr m̦õttan ko ie me rej jãn Jeje ko Rekkwõjarjar elõñl̦o̦k jãn ruo to̦ujin iiõ ko remootl̦o̦k. Rimmãlõtlõt ro rar keidi kaape kein jãn etto ippãn Jeje ko Rekkwõjarjar me ewõr ippãd ilo raan kein. Ta ko rar loi?

Rimmãlõtlõt ro me rej ekkatak kõn mour an armej rar loe bwe naan ko ilo Naan ko an Anij me repãd ippãd ilo raan kein rej ãinwõt bar jeje ko jãn etto. * Kar lukkuun etale jeje ko jãn etto im lo bwe men kein rej kam̦ool ak kaalikkar bwe men ko jej riiti ilo Jeje ko Rekkwõjarjar rej ennaan eo an Anij jãn kar jinoin. Jemaroñ lukkuun lõke bwe Anij ear lukkuun kõjparok bwe en pãdwõt mel̦el̦e eo ejim̦we im ejejjet ilo Jeje ko an Rekkwõjarjar ñan kõj ilo raan kein.

Kõn men in, jemaroñ riiti Naanin Anij im lukkuun tõmak im lõke bwe naan ko ie rejim̦we im jejjet. Ilo ad kõl̦mãnl̦o̦kjen̦ kõn men in, jen kiiõ etale ta ko jemaroñ katak kõn Anij jãn ri-kanaan ro an.