KATAK KO KÕN TAITÕL̦IN BOK IN | PIJEN KO REJ KAL̦APL̦O̦K AD MEL̦EL̦E KÕN LAÑ
Kajjitõk ko kõn Ro Rej Pãd Ilañ
Kwõnañin ke l̦õmn̦ak ippam̦ make kõn ta ko rej wal̦o̦k ilañ im wõn ro rej pãd ie? Elõñ armej rej l̦õmn̦ak kõn men in. Ium̦win elõñ to̦ujin iiõ in an armej kwal̦o̦k mel̦el̦e ko aer make kõn men in. Jet rej tõmak bwe ro rej pãd ilañ rej ro jim̦m̦aad jãn iien ko etto me jej aikuj kautiej er. Bar jet rej ba bwe lañ ej juon jikin el̦ap m̦õn̦õn̦õ im aenõm̦m̦an ie im armej ro rem̦m̦an me rar mej kab enjel̦ ro rej pãd ie. Ro jet rej ba bwe lañ ej ijo anij ko aer rej mour ie.
Elõñ rej ba bwe jejjab maroñ jel̦ã kõn lañ kõnke ejjel̦o̦k juon ear itok jãne me emaroñ jipañ kõj ñan mel̦el̦e kake. Bõtab ejjab jim̦we mel̦el̦e in. Jijej Kũraij ear mour ilañ m̦okta jãn an kar itok ñan lal̦ in. Ear kaalikkar men in ke ear jiroñ rũtõlin kabuñ ro ilo tõre ko an im ba: “Iar itok jãn lañ, jab bwe In kõm̦anm̦an ankilaõ, a ankilaan Eo ear jilkintok Eõ.” Bareinwõt, Jijej ear kwal̦o̦k kõn lañ ñan rũkal̦oor ro an ke ear ba: “Elõñ ruum̦ ilo im̦õn Jema.”—Jon 6:38; 14:2, UBS.
Anij ej Jemãn Jijej. Etan Anij ej Jeova, im lañ ej m̦weo “im̦õn.” (Sam 83:18) Kõn men in, ejjel̦o̦k bar juon emaroñ em̦m̦anl̦o̦k an kõmel̦el̦eik ta ko rej wal̦o̦k ilañ ijello̦kun wõt Jeova Anij im Jijej Kũraij. Rar kwal̦o̦k elõñ mel̦el̦e ko kõn lañ ikijjeen pijen ko me rũkarejar ro retiljek an Anij ilo iien ko etto rar loi.
Katak in tok juon enaaj kõmel̦el̦e kõn eoon ko ilo Baibõl̦ me rej kwal̦o̦k ta ko rũkarejar ro an Anij ilo iien ko etto rar loi ilo pijen ko. Ilo am̦ naaj etale pijen kein, keememej bwe lañ im men ko ie rejjab ãinwõt men ko ilo lal̦ in me jemaroñ loi kõn mejãd ak jibwi. Eñin unin, ijello̦kun an kar Anij kõmel̦el̦eik kõj kõn lañ im men ko ie ilo wãween eo me enjel̦ ro wõt remaroñ mel̦el̦e kake, ear kwal̦o̦k pijen ko kõn lañ ilo juon wãween epidodo ñan ad pijaikl̦o̦k ilo l̦õmn̦ak ko ad im mel̦el̦e meñe jejjab maroñ loi kõn mejãd. Pijen kein renaaj jipañ eok ñan mel̦el̦e kõn ro rej pãd ilañ.
