Jehovah Ej Kwalok Aibujuij Eo An Ñan Ro Ettã Burueir

“Wõnan etã buru im mijõk Jeova, mweiuk, im nebar, im mour.”​—JABÕN KENNAN KO 22:4.

1, 2. (a) Ewi wãwen an book in Jerbal kwalok bwe Stephen ear “juõn armij e obrõk kin tõmak im Jitõb Kwojarjar”? (b) Ta eo ear kamol bwe Stephen ear ettã buru?

 STEPHEN ear “juõn armij e obrõk kin tõmak im Jitõb Kwojarjar.” Bareinwõt ear “obrõk kin joij im kajur.” Einwõt juõn ian ri kalor ro mokta an Jesus, ear kwalok men in bwilõñ ko relap im kakõlle ko ibben armij ro. Juõn ien, jet emaan rar akwel ibben, ak “re ban jumae meletlet im Jitõb eo ej konono kake.” (Jerbal 6:​5, 8-​10) Alikar bwe Stephen ear juõn ri kwalok ekabel kin Nan in Anij, im ilo beran ear jojomar iman mejen ri tel ro an kabuñ eo an Ri Jew ro ilo ran ko an. Ennan eo an ilo tibdikin, jej loe ilo book in Jerbal chapter 7, ej kamol kin an lukkun itoklimo in kwalok jidik kin jidik kin karõk eo an Anij.

² Jab einwõt ri tel ro an kabuñ, me jerbal im jelãlokjen eo air ear kautiej ir ilõñin armij ro rettã, Stephen ear ettã buru. (Matu 23:​2-7; Jon 7:​49) Meñe ear lukkun jelã kin Jeje ko ilo Bible, ear juburuen ilo jerbal eo an ñan “jerbale tebel ko” im najidik armij bwe ri jilek ro ren boub wõt ien otemjej “ilo jar, im ilo kwalok nan.” Stephen ear bõk juõn ãt emõn ibwiljin ri tõmak ro mõttan im rar kãlet e bwe en juõn ian emaan ro jiljilimjuõn ñan bõkto-bõktak mõñã ko. Ilo ettã buru ear mõnõnõ in bõk jerbal in.​—Jerbal 6:​1-6.

3. Ta men eo ejejuan kin wãwen an Anij kwalok joij ilo yokwe Stephen ear loe?

³ Ettã buru eo an Stephen, ekoba itoklimo eo an kin men ko ilo jitõb im an tiljek, Jehovah ear loi. Ke Stephen ear kwalok nan ibben ri tel ro an Ri Jew ro relej ilo imõn ekajet eo etan Sanhedrin, ro rar jumae e rar “lo turin mejen, einwõt turin mejen enjel.” (Jerbal 6:​15) Wãwen turin mejen kar einwõt juõn ri keañ an Anij, eo ear bõk ainemõn jen Anij in aibujuij eo, Jehovah. Elikin an kwalok nan ilo beran ibben ro uan Sanhedrin, Stephen ear lo juõn men ekabwilõñlõñ kin joij eo an Anij. “A Ej obrõk kin Jitõb Kwojarjar, im ej kalimjeke lõñ, im lo aibujuij an Anij, im Jisõs ej jutõk i anbijmaroñõn Anij.” (Jerbal 7:​55) Ñan Stephen, vision in ekabwilõñlõñ ear kamole bed eo an Jesus einwõt Nejin Anij im Messiah eo. Ear kakajur Stephen eo ettã buru im kamol ñan e bwe ear kabuñburuen Jehovah.

4. Jehovah ej kwalok aibujuij eo an ñan wõn?

⁴ Einwõt an kar vision eo Stephen ear bõke kalikare, Jehovah ej kwalok aibujuij eo an im karõk eo an ñan armij ro kajjojo rej mijak-Anij im ettã burueir im rej kamolol kin kõtan eo air ibben. “Wõnan etã buru im mijõk Jeova, mweiuk, im nebar, im mour,” Bible ej ba. (Jabõn Kennan Ko 22:4) Kin men in, eaorõk bwe jen melele kin ta in ettã buru eo emol, ewi wãwen ad maroñ kaddek kadkad in eaorõk, im ewi wãwen ad maroñ bõk tokjen jen ad kalikare ilo wãwen otemjej ilo mour.

Etta Buru​—Kadkad Eo Anij Ej Kwaloke

5, 6. (a) Ta in ettã buru? (b) Ewi wãwen an kar Jehovah kwalok ettã buru? (c) Ewi wãwen ettã buru eo an Jehovah en jelet kij?

⁵ Emaroñ juõn men ekabwilõñlõñ ibben jet armij ñan jelã bwe Jehovah Anij, eo eutiejtata im aibujuij ilõñin men otemjej  ilañ im ion lal, ej joñok eo emõntata kin ettã buru. Ñan Jehovah, King David ear ba: “Kwonaj letok likepijñak in lomor eo am, im anbwijmaroñõm enaj debij iõ, im ettã buru eo am enaj kautiej iõ.” (Psalm 18:​35, NW) Ke David ear kamelele kin ettã buru eo an Jehovah, David ear kajerbal juõn nan in Hibru eo ej melelen “badikdik.” Ijellokin nan in, “ettã buru,” nan ko jet ilo kajin Hibru rej ekkejel ñan nan in badikdik, rekoba “ettã ilo lemnak,” “inemõn,” im “ilo joij kõttãik emake ñan joñan wõt ijo armij ro rejjab aorõk rej bed ie.” Inem Jehovah ear kwalok ettã buru ke ear kõttãik e bwe en jerbal ibben emaan eo ejjab wãppen David im kajerbal e bwe en iroij ilo etan einwõt king. Einwõt jeje ko redik itulalin Sam 18 rej kwalok, Jehovah ear kejbãrok im rejetak David, ilo an “lomoren jen pein ro otemjej dri kijirãte e, im kab jen pein Saul.” Ilo wãwen in lok wõt David, ear jelã bwe jabdewõt wãwen ebuñbuñ ak aibujuij ear bõke einwõt juõn king ear wawa ion an Jehovah kõttãik emake ñan jerbal ibben. Ilo an kile men in ear jibañ David bwe en ettã buruen.

⁶ Ewi wãwen ad maroñ jerbale men in ñan kij? Jehovah ear beek bwe en katakin kij kin mol eo, im emaroñ kar letok jerammõn ko ejejuair kin jerbal ilo dolul eo an, ak emaroñ kar kajerbal kij ilo juõn wãwen ñan kõmanman ankil an. En kar ewi lemnak eo ad kin men in? En kar jab kamakit ke buruõd bwe jen kwalok ettã buru? En kar jab ke kamakit kij ke ñan kamolol kin an Jehovah kwalok ettã buru im jab kautiej kij make, bwe emol enaj tellok ñan jorrãn?​—Jabõn Kennan Ko 16:18; 29:23.

7, 8. (a) Ewi wãwen Jehovah ear kwalok ettã buru ke ear jerbal ibben Manasseh? (b) Ilo wãwen et eo Jehovah, im Manasseh, rar jimor kwalok juõn joñok emõn ñan kij bwe jen kwalok ettã buru?

⁷ Jehovah ear jab lap an kwalok ettã buru wõt ke ear jerbal ibben armij ro rejjab wãppen ak ear bareinwõt mõnõnõ in tiriamokake ro ettã burueir, im elaptata ear kajerkak, ak kautiej, ro rar kõttãik ir make. (Sam 113:​4-7) Ñan wanjoñok, lemnak kin King Manasseh ilo Judah. Ear kajerbal maroñ eo an einwõt king ñan kowõnmanlok kabuñ wan im “e ar kõmõn elõñ nana iman mejen Jeova, im kaillu E.” (2 Kronikel 33:6) Eliktata, Jehovah ear kajeik Manasseh ilo an kõtlok bwe kin in Assyria eo en kajibokweik king in. Ilo kalbuj eo, Manasseh “e ar akwelap ñõn Jeova Anij eo an, im kanuij kõttãik e mõke,” im Jehovah ear bar karol e ñan throne eo an ilo Jerusalem, im Manasseh ear “jelã bwe Jeova e Anij.” (2 Kronikel  33:11-​13) Aet, ilo jemlokin, ettã buru eo an Manasseh ear kabuñburuen Jehovah, im ear kamakit e bwe en jolok bwid eo an im bar kajijet e einwõt king.

⁸ Mõnõnõ eo an Jehovah ñan jolok bwid im an Manasseh ukwelok ilo ettã buru rej katakin kij kin jet katak ko raorõk kin ettã buru. Jej aikwij kememej wõt bwe wãwen ad kõmmane ñan juõn armij ej kalõkatip kij im lemnak eo jej kwalok e ñe jej jerawiwi emaroñ jelet wãwen an Jehovah jerbal ibbed. Elañe jej mõnõnõ in jolok bwid ko an armij ro jet im ilo ettã buru kwalok bwid ko ad, jemaroñ reilok ñan Jehovah bwe en tiriamokake kij.​—Matu 5:​23, 24; 6:​12.

Aibujuij eo an Anij Ej Alikar ñan Ro Ettã Burueir

9. Ettã buru ej juõn kakõllan mõjno ke? Kamelele.

⁹ Bõtab jen jab bõk juõn lemnak ebwid bwe ettã buru im kadkad ko einlok wõt, rej kakõllan mõjno ak kõtlok manit ko renana. Einwõt an Jeje ko Rekwojarjar kwalok, Jehovah ej ettã buru, ak ej kwalok kwi eo ewãnik im kajur eo elap ñe ej aikwiji. Kin an ettã buru, Jehovah ej bed ebak ñan ro ettã burueir ñan jibañ ir, ak ej bed etolok jen ro eutiej burueir. (Sam 138:6) Ewi wãwen an kar Jehovah kwalok itoklimo eo an ilo juõn wãwen ejejuan ñan ri karejar ro an ettã burueir?

10. Ta eo Jehovah ej kwalok ñan ro ettã burueir, ekkar ñan 1 Dri Korint 2:6-10?

¹⁰ Ilo ien eo ej karõke im ikijen ial eo ear kãlete ñan konono, Jehovah ear kwalok ñan ro ettã burueir elõñ men ko ilo tibdikin kin ewi wãwen an naj kajejjet kitien karõk eo an. Men kein raibujuij rar nojak jen ro eutiej burueir rej atartar ion, meletlet eo an armij. (1 Dri Korint 2:​6-​10) Ak ro ettã burueir, kinke rar bõk jelãlokjen eo ejejjet im jimwe kin karõk eo an Jehovah, rej emmakit ñan kalaplok air jerbal ñan kaibujuij Jehovah kinke rej kamolol kin wãwen an aibujuij eo an jelet burueir.

11. Ilo ebeben eo kein kajuõn, ewi wãwen an kar jet armij kwalok bwe rar utiej buru, im ewi wãwen men in ear kajorrãn ir?

¹¹ Ilo ebeben eo kein kajuõn, elõñ, ekoba jet armij rar ba rej Christian, rar jab kwalok ettã buru im rar lõkatip kin ta eo ri jilek Paul ear kwalok ñan ir kin karõk eo an Anij. Paul ear erom juõn “dri jilik ñõn dri ailiñ ko,” ak ear jab bedbed ion kilin, jelãlokjen eo an, dettan, ak juõn men in kamol kin eaetok jerbal ko an remõn. (Dri Rom 11:13) Ekkã an walok bwe, ro rejjab kajur ilo jitõb rar ba bwe Jehovah ear etale aikwij kein ñan beek wõn ro enaj kãlet einwõt ri jerbal ro an. (1 Dri Korint 1:​26-​29; 3:1; Dri Kolosse 2:​18) Bõtab, Jehovah ear kãlet Paul, ekkar ñan joij eo an ear kwalok ilo yokwe im karõk eo ewãnik. (1 Dri Korint 15:​8-10) Ro me Paul ear naetair “dri jilik reutiejtata,” im ri jumae ro jet, rar jab errã ibben Paul im lemnak eo an jen Jeje ko ilo Bible. Kinke rar jab ettã burueir men in ear bõprae ir jen air bõk jelãlokjen im melele kin wãwen eo eaibujuij Jehovah ej kajejjet kitien karõk eo an. Inem jen jab kajettokjen ro me Jehovah ej kãlet ñan kajejjet kitien ankil an.​—2 Dri Korint 11:​4-6.

12. Ewi wãwen an joñok eo an Moses kwalok bwe Jehovah ear buñburuen kake ro ettã burueir?

¹² Ilo wãwen eo juõn, elõñ wanjoñok ko ilo Bible rej kalikar kin ewi wãwen an armij ro ettã burueir bõk jerammõn in lo jidikin aibujuij eo an Anij. Moses, eo “e ar inemõn” jen  armij otemjej, ear lo aibujuij eo an Anij im lañliñ ilo bed eo an ibben Anij. (Bwinbwin 12:3) Emaan in ettã buruen, ear juõn shepherd ettã iumin 40 yiõ, im enañin aolep yiõ kein ear jokwe ilo Arabian Peninsula, Ri Kõmanman eo ear buñburuen kake ilo elõñ wãwen ko. (Exodus 6:​12, 30) Kin jibañ eo jen Jehovah, Moses ear erom ri konono im ri kilajrak eo elap ñan ailiñ in Israel. Ear mõnõnõ in konono ibben Anij. Ikijen juõn vision, ear lo “wãwen Jeova.” (Bwinbwin 12:​7, 8; Exodus 24:10, 11) Ro rar bõk im kautiej ri karejar in ettã buruen eo ear jerbal ilo etan Anij rar bõk jerammõn. Ilo ejja wãwen in lok wõt, jenaj lo jerammõn elañe jej kile im bokake ri kanan eo elaplok jen Moses, Jesus, im eo ear kãlete “dri korijer eo etiljek im meletlet.”​—Matu 24:45, 46; Jerbal 3:​22.

13. Ewi wãwen an shepherd ro ilo ebeben eo kein kajuõn kar lo aibujuij eo an Jehovah?

¹³ ’Aibujuij eo an Jehovah ear romak’ ñan wõn ro ke enjel eo ear keañ kin news eo emõn bwe “Dri Lomor, E Jisõs Iroij”? Ear jab ñan ri tel ro an kabuñ eutiej burueir im ro reutiej ilo kien ak ear kebak shepherd ro ettã burueir rar “ber ilo jikin ujoij, im lale bwijin s̃ip ko air ilo boñ.” (Luk 2:​8-​11) Armij rein rar jab utiej kin air kabel im meletlet ilo jerbal. Ak, Jehovah ear lo ir im kãlet im kejelãik ir mokta kin lotak eo an Messiah eo. Aet, Jehovah ej kwalok aibujuij eo an ñan ro ettã burueir im rej mijak Anij.

14. Ta jerammõn ko Anij ear lelok ñan ro ettã burueir?

¹⁴ Ta eo wanjoñok kein rej katakin kij kake? Rej kwalok bwe Jehovah ej buñburuen im kwalok jelãlokjen im meletlet kin karõk eo an ñan ro ettã burueir. Ej kãlet armij ro me remaroñ jab tõbar jet men in aikwij ko ekkar ñan lemnak eo an armij im ej kajerbal ir ñan kwalok karõk ko an raibujuij ñan ro jet. Men in en kar kamakit kij ñan reilok wõt ñan Jehovah, Nan in kanan ko an, im dolul eo an ñan bõk nan in jiroñ ko an. Jej liki wõt bwe Jehovah enaj kejelãik wõt ri karejar ro an rettã burueir kin karõk eo an eaibujuij. Ri kanan Amos ear ba: “Bwe Iroij Bõtata eo Jehovah ejamin kõmman jabdewõt men elañe ejañin konono kake ibben ri karejar ro an ri kanan ro wõt.”​—Amos 3:​7, NW.

Kalaplok Ettã Buru im Bõk Jerammõn jen Anij

15. Etke jej aikwij kate kij ñan debij ettã buru, im ewi wãwen an joñok eo an King Saul in Israel kar kalikar men in?

¹⁵ Ñan bõk jerammõn jen Anij, jej aikwij ettã buru wõt. Meñe juõn emaroñ ettã buru juõn ien ejjab melelen enaj eindein aolep ien. Juõn armij emaroñ luji ettã buru eo an im kautiej emake, eo ej tellok ñan wãlok im jorrãn. Saul, eo moktata rar kabit bwe en king in Israel, ear wãwen dein. Ke rar kãlete ilo jinoin, ear ba bwe ear ‘juõn armij ettã buruen.’ (1 Samuel 15:17) Bõtab, elikin an iroij iumin ruo yiõ, ear wãlok. Ear kajekdon karõk eo an Jehovah bwe lelok men in katok ko kar jerbal eo an ri kanan Samuel, im ilo jekben ear kamelele kin unin an wãlok im bõk eddo eo an ñan lelok men in katok ko. (1 Samuel 13:​1, 8-​14) Men in kar jinoin men ko rar kalikar bwe ettã buru eo an ear jakolok. Ilo jemlokin, ear luji jitõb kwojarjar eo im buñburu eo an Anij, im eliktata ear mij ilo juõn wãwen ekajookok. (1 Samuel 15:​3-​19, 26; 28:6; 31:4) Katak eo ej alikar: Jej aikwij kate wõt bwe jen ettã buru im kõttãik kij im bõprae jabdewõt eñjake in kautiej kij make, inem jenaj kejbãrok kij jen jabdewõt jerbal ko rewãlok renaj jemlok ilo ad kaillu Jehovah.

16. Ñe jej kalmenlokjen kin kõtan eo ad ibben Jehovah im ri jerbal ro mõttad ewi wãwen emaroñ jibañ kij ñan kaddek ettã buru?

¹⁶ Meñe ettã buru ejjab mõttan leen jitõbõn Anij, ej juõn kadkad eo ekwojarjar jej aikwij kaddek ilo buruõd. (Dri Galetia 5:​22, 23; Dri Kolosse 3:​10, 12) Kinke ej kitibuj juõn wãwen lemnak​—jen ba, wãwen ad lemnak kin kij make im ro jet​—ej aikwij bwe jen kate  kij in kaddek kadkad in. Lukkun lemnak ilo kõmmanwa im kalmenlokjen kin bed eo ad ibben Jehovah im ro ri turud emaroñ jibañ kij ñan ettã buru wõt. Iman mejen Anij, aolep armij rejjab wãppen im rej einwõt ujoj ej eddek iumin juõn ien, mõrãlok im jako. Armij ro rej einwõt jelo ko ilo melaj. (Aiseia 40:​6, 7, 22) Juõn bwilikõn ujoj ewõr ke unin an kemjãje kinke ej aetoklok jen bwilik ko jet? Juõn jelo ewõr ke unin an jua kinke emaroñ kelok etolok jen jelo ko jet? Ej juõn lemnak ebwebwe ñan ad ba eindein. Inem, ri jilek Paul ear kakememej Ri Christian ro mõttan: “Wõn ej kalijeklok yuk? im ta eo ibõm, im kw’ar jab bõke? a elañe kw’ar bõke, etke kwoj kimjãje einwõt elañe kw’ar jab bõk e?” (1 Dri Korint 4:7) Kalmenlokjen kin jeje rot kein ilo Bible emaroñ jibañ kij ñan kaddek im kwalok ettã buru.

17. Ta eo ear jibañ ri kanan Daniel bwe en kaddek ettã buru, im ta eo emaroñ jibañ kij ñan kõmman eindein?

¹⁷ Rar kwalok bwe ri kanan Ri Hibru eo Daniel kar “juõn armij emõn” iman mejen Anij kinke ear “kõtãik” emake, melelen bwe ear ettã buruen. (Daniel 10:11, 12, NW) Ta eo ear jibañ Daniel ñan kaddek ettã buru? Moktata, ear lukkun liki Jehovah, ekkeini an jar ñan e. (Daniel 6:​10, 11, NW) Bareinwõt, Daniel ear juõn ri katak eniknik im emmakit ilo jimwe kin Nan in Anij, im men in ear jibañ e bwe en likit karõk eo eaibujuij an Anij iman mejen. Bareinwõt ear mõnõnõ in kwalok likjap ko an, jab an armij ro an wõt. Im ear lukkun itoklimo in kowõnmanlok wãnik eo an Anij, jab an make. (Daniel 9:​2, 5, 7, NW) Jemaroñ ke katak jen joñok eo emõn an Daniel im kate wõt in kaddek im kwalok ettã buru ilo aolep wãwen mour eo ad?

18. Ta aibujuij eo ej kõttar ro ettã burueir ilo ran kein?

¹⁸ “Wõnan etã buru im mijõk Jeova, mweiuk, im nebar, im mour,” Jabõn Kennan Ko 22:4 ej ba. Aet, Jehovah ej buñburuen kake ro ettã burueir, im tokjen men in ej aibujuij  im mour. Elikin an enañin illok jen jerbal eo an ñan Anij ak Jehovah ear kajimwe lemnak eo an, ri jeje sam Asaph ear kile ilo ettã buru: “Kwo naj bakajen aõ ial kin Am bebe, im tokelik bõk iõ ñõn aibujuij.” (Sam 73:24) Ta kin ran kein? Ta aibujuij eo ro ettã burueir rej kõttare? Ijellokin air lañliñ ilo air bed ilo juõn kõtan emõn im ekabuñburuen Jehovah, rej reimanlok in lo nan in kakõrmol ko an King David naj jejjet kitieir: “Ro etã burueir re naj jolit ene eo, im re naj kalõñliñ ir mõke kin ainemõn elõñlok.” Emol bwe ej juõn ran in ilju eo ekanuij aibujuij!​—Sam 37:11.

Kwoj Kememej Ke?

• Ewi wãwen an kar Stephen likit juõn joñok emõn einwõt juõn armij ettã buru me Jehovah ear kwalok aibujuij eo an ñan e?

• Ilo wãwen et ko Jehovah Anij ear kwalok ettã buru?

• Ta wanjoñok ko rej kwalok bwe Jehovah ej kwalok aibujuij eo an ñan ro ettã burueir?

• Ewi wãwen an kar Daniel likit juõn joñok ñan jibañ kij ñan kwalok ettã buru?

[Kajitõk ko ñan katak]

[Bo̦o̦k eo ilo peij 21]

Ekajur ak Ettã Buru

Ilo 1919 ilo Cedar Point, Ohio, U.S.A., ilo juõn convention an Bible Students (ak Ri Kennan ro an Jehovah ilo ran kein), J. F. Rutherford eo ear 50 an yiõ, ear tel jerbal eo, ear bõk kunan ilo mõnõnõ einwõt juõn bellhop, im bõkto-bõktak ieb in nuknuk ko air im ãñinlok ri kwelok ro ñan room ko ilo hotel ko rar kiki ie. Ilo ran eo eliktata ilo convention eo, ear kabwilõñ ri kwelok ro 7,000 orair kin nan kein: “Komij ri keañ ro an King in king ro im Iroij in iroij ro, im kejelãik armij kin . . . ailiñ eo eaibujuij an Iroij eo ad.” Meñe Brother Rutherford ear kajur ilo tõmak eo an, ear buñbuñ kin an kwalok nan ilo beran im jab ebbururu kin men ko ear tõmak kaki, bareinwõt ear ettã buru iman mejen Anij, im ekkã an kar alikar ilo jar ko an ke rar kwelok kin unin tel in ran ilo jibboñ ilo Bethel.

[Pija eo ilo peij 18]

Stephen, ear juõn ri kwalok ekabel kin Bible eo, im ear lale table ko im najidik armij

[Pija eo ilo peij 19]

Ettã buru eo an Manesseh ear kabuñburuen Jehovah

[Pija eo ilo peij 21]

Ta eo ear kõmman bwe Daniel en “juõn armij emõn”?