“Kien Jeova” Eban Likjap

“I naj kwalok kien eo [an Jehovah, NW]; Jeova e ar ba ñõn iõ, Kwe nejiõ . . . Kwon kajitõk iba, im I naj lewoj dri ailiñ ko ñõn Yuk bwe ren Am jolit.”​—SAM 2:​7, 8.

1. Ta oktak eo ikõtan karõk eo an Anij im eo an ri ailiñ ko?

 JEHOVAH ANIJ ewõr juõn an karõk kin armij im lal in. Ewõr juõn karõk ibben ailiñ ko bareinwõt. Ak karõk kein elap air oktak jen don! Jej aikwij kõtmene kin men in, kinke Anij ej ba: “Bwe einwõt lõñ ko re utiej jen lõl, ein drein ial ko Aõ re utiej jen ial ko ami, im lemnok ko Aõ jen lemnok ko ami.” Emol bwe karõk eo an Anij enaj jejjet kitien, kinke ej wõnmanlok im ba: “Bwe einwõt wut ej wõnlõltok im sno jen lõñ, im jab jeblak ñan e, a ej kaimlolo brij, im kõmõn bwe en jebar im elle, im lelok ine ñõn dri jeor im ekõn ñõn eo ej mõña; e naj ein drein nan eo ej waloklok jen loñiõ; e jamin jeblaktok ñõn iba im ejelok tokjen, a e naj kõmõn men eo I kõnan, im e naj jerammõn ilo men eo Ij jilkinlok e kake.”​—Aiseia 55:​9-​11.

2, 3. Ta eo ej alikar ilo sam eo kein karuo, ak ta kajitõk ko ej bõkliñtak?

² Sam eo kein karuo ear kalikar bwe karõk eo an Anij kin Messiah eo ear jitõñe bwe en King enaj jejjet kitien. Ri kine sam in, David eo ej King in Israel eo etto, Anij ear kakõrmole bwe en kanan bwe enaj wõr juõn ien  ñe ailiñ ko rej aol. King ro air renaj jutak nae Jehovah Anij im Ri Kabit eo an. Bõtab, ri jeje sam eo ear al bareinwõt: “I naj kwalok kien eo [an Jehovah, NW]: Jeova e ar ba ñõn iõ, Kwe nejiõ . . . Kwon kajitõk iba, im I naj lewoj dri ailiñ ko ñõn Yuk bwe ren Am jolit, im ijo ko retoloktata i lõl bwe ren Am wato.”​—Sam 2:​7, 8.

³ Ta melelen “kien eo an Jehovah” ñan dri ailiñ ko? Ewi wãwen ej jelet armij ro an lal? Emol, men ko rej walok jen “kien eo an Jehovah” ñan ri ailiñ ko ta meleleir ñan aolep ro rej mijak Anij im konono sam eo kein karuo?

Ailiñ Ko Rej Aol

4. Ewi wãwen am maroñ kakobabaik point ko relap ilo Sam 2:​1, 2?

⁴ Ke ear jitõñlok ñan men ko ri ailiñ ko im iroij ro air rar kõmmani, ri jeje sam eo ear jino kine al eo ilo an al: “Etke dri ailiñ ko rej aol, im armij rõn rej lemnok kin men eo ejelok kobõn? Kiñ ro i lõl rej mõke kajutõk ir; iroij ro rej jimor bebe nae Jeova, im nae Dri kabit eo An.”​—Sam 2:​1, 2. *

5, 6. Ri ailiñ ko rej “aol” wõt kin ta “men eo ejelok kobõn”?

⁵ Ta “men eo ejelok kobõn” ri ailiñ ko ran kein rej “lemnok” im konono kake? Jen air kãlet Ri Kabit eo an Anij​—Messiah eo, ak Christ​—ri ailiñ ko rej “lemnok” wõt ak kalmenlokjen kin wãwen air maroñ kaetoklok maroñ in iroij eo air make. Nan kein ilo sam ruo ear jejjet kitien juõn alen ilo ebeben eo kein kajuõn C.E. ke ri utiej ro an Ri Jew im Ri Rom rar jerbal ibben don ñan mõn King eo Anij ear jitõñe, Jesus Christ. Bõtab, ear jejjet kitien ilo wãwen eo elaplok ilo yiõ eo 1914 ke Jesus ear bõk throne eo einwõt King ilañ. Jen ien eo, ejelok juõn kien ak dolul ion lal ear kile King eo Anij ear jitõñe.

⁶ Kar ta melelen nan eo ke ri jeje sam ear kajitõk ‘etke ri ailiñ ko rej lemnak kin men eo ejelok kobban’? Karõk eo air ejelok kobban; enaj likjap wõt. Rejjab maroñ bõktok ainemõn im jokane ñan ijin ion lal. Ak, joñan an nana men ko rej kõmmani rej jumae iroij eo an Anij bareinwõt. Elaptata, rej jutak ibben don nae Anij eo Eutiejtata im Ri Kabit eo an. Juõn men in bwebwe elap!

 King eo an Jehovah Ej Bõk Anjo

7. Ilo jar, ewi wãwen an kar ri kalor ro mokta an Jesus jerbale Sam 2:​1, 2?

⁷ Ri kalor ro an Jesus rej jerbale nan ko ilo Sam 2:​1, 2 ñan e. Kin air bõk matõrtõr kin tõmak eo air, rar jar: “O Iroij, [Jehovah], Kwe kw’ar kõmõnmõn lõñ, im lõl, im lometo, im men otemjej ilo ir: [im ilo jitõb kwojarjar eo, NW] Kwe kw’ar ba kin loñin jimam Devid, dri korijerõm, Etke dri ailiñ ko r’ar buroñ, im armij ro rej lõkõm men ko men in jekron? Kiñ ro i lõl rej jutõk, im iroij ro rej kabata nae Jehovah im Eo E ar kabit E. Bwe emol, Herod, im Pontiõs Pailat, im dri ailiñ ko, im armij in Israel r’ar kabata ilo jikin kwelok in nae Jisõs Dri Korijerõm ekwojarjar, Eo Kw’ar kabit E.” (Jerbal 4:​24-​27; Luk 23:​1-​12) * Aet, rar karõk ilo ittino bwe ren jumae Jesus ri karejar eo an Anij ilo ebeben eo kein kajuõn. Bõtab, sam in enaj kar jejjet kitien bar juõn alen elõñ ebeben ko tokelik.

8. Ewi wãwen an Sam 2:3 jerbal ñan ri ailiñ ko ilo ran kein?

⁸ Ñe Israel eo etto ear wõr juõn king, einwõt David, ro ri ailiñ rejjab tõmak Anij im iroij ro air rar jutak ilo burukuk im jumae Anij im eo ear kabit e.  Ak ta kin ran kein ad? Ri ailiñ ko ran kein rejjab bokake kien ko an Jehovah im Messiah eo. Kin men in, ej einwõt air ba: “Emõn jen mijkõki lukjeir, im jolok to ko air jen kij!” (Sam 2:3) Iroij ro im ri ailiñ ko rej jumae jabdewõt kien eo Anij im Eo Ear kabit e. Emol, jabdewõt kien ko an Anij im Ri Kabit eo an rej kõmmani iroij ro im ri ailiñ ko rej jumae. Emol, jabdewõt wãwen ko rej kate ir ñan kokkure kien ko an Anij naj ejelok tokjen.

Jehovah Ej Kajirere Kake Ir

9, 10. Etke Jehovah ej kajirere kake ri ailiñ ko?

⁹ Jehovah ejjab lemnak kin jabdewõt wãwen ko iroij ro an ailiñ ko rej kõmmane ñan kanemkwoj ir jen Jehovah. Sam eo kein karuo ej wõnmanlok: “Eo ej jijõt ilõñ E naj tõñ; Iroij e naj kajirekake ir.” (Sam 2:4) Anij ej wõnmanlok ilo karõk eo an im watõk iroij ro einwõt men bajjek. Ej ettõñ kin air wãlok im ej kajirere kake ir. Remaroñ kemjãje kin ta eo rekõnan kõmmane. Ekkar ñan lemnak eo an Jehovah rej einwõt juõn men in kajirere. Ej ettõñ kin air jumae meñe ejelok tokjen air kõmman eindein.

¹⁰ Ilo eon ko jet ilo sam ko an, David ej jitõñlok ñan ri kijirãt ro im ri ailiñ ko im al:  “Kwe, O Jeova Anij in jar in tõrinae ko, Anij in Israel, Kwon jerkak im lolok ro dri ailiñ otemjej: Kwon jab tiriamokake jabrewõt dri ketõk enana. Rej jeblaktok ke ejota, rej keroro einwõt kiru rorror: rej etetal iturin jikin kwelok in. Lo rej katorlok jen loñir; jãji ko ilo tieir; bwe re ba, Wõn eo ej roñjake? A Kwe O Jeova kwo naj tõñkake ir; Kwo naj kajirere kake ro dri ailiñ ko otemjej.” (Sam 59:​5-8) Jehovah ej ettõñ kin an ri ailiñ ko kemjãje im bwok ilo ial eo air nae e.

11. Ta eo ej walok ñe ri ailiñ ko rej jumae karõk eo an Anij?

¹¹ Nan ko ilo Sam 2 rej kakajur tõmak eo ad bwe Anij emaroñ kamadmõd jabdewõt abañ. Jemaroñ liki bwe ej kajejjet kitien ankil an ien otemjej im ejamin illok jen ri karejar ro an retiljek. (Sam 94:14) Inem, ta eo enaj walok ñe ri ailiñ ko rej jerbal nae karõk eo an Jehovah? Ekkar ñan sam in, Anij “e naj konono ñõn ir ilo An illu,” einwõt juõn ainikien jorur. Bareinwõt, “ilo An illu,” einwõt ñe jarom ej walok ilo idiñ, e “naj kalelñoñ ir.”​—Sam 2:5.

Kairoij King eo an Anij

12. Sam 2:6 ej jerbal ñan iroij eo an wõn?

¹² Ikijen ri jeje sam ennan eo an Jehovah kiõ ej kaillu ri ailiñ ko. Anij ej ba: “Ak, ña Ij kairoij aõ Iroij ion Zaiõn aõ tol ekwojarjar.” (Sam 2:6) Tol Zion kar juõn tol ilo Jerusalem ijo David ear bed ie einwõt king ion aolepen Israel. Ak King eo ej Messiah eo ejjab jijet ion juõn throne ilo jikin kwelok eo ak jabdewõt jikin ion lal. Emol, emwij an Jehovah kajijet Jesus Christ einwõt King eo ej Messiah eo ion Tol Zion ilañ.​—Reveles̃õn 14:1.

13. Ta bujen eo Jehovah ear kõmmane ibben Nejin?

¹³ King eo ej Messiah eo ej konono kiõ. Ej ba: “I naj kwalok kien eo [an Jehovah, NW] [eo ear kõmman juõn bujen ibben Nejin kin juõn Ailiñ]: Jeova e ar ba ñõn iõ, Kwe nejiõ man, ranin I ar keutak Yuk.” (Sam 2:7) Christ ear jitõñlok ñan bujen Ailiñ eo ke ear jiroñ ri jilek ro an: “Komeo, ro r’ar ber iba ilo men ko r’ar kabo Iõ kaki. Im Ij likit ñõn kom juõn ailiñ einwõt Jema e ar likit ñõn Iõ.”​—Luk 22:28, 29.

14. Etke jemaroñ ba bwe Jesus wõt emaroñ iroij ilo ejelok kajitõk?

¹⁴ Einwõt emwij an kanan kake ilo Sam 2:7, Jehovah ear kalikar bwe Jesus ej Nejin ilo ien eo ear baptais im ilo an kajerkakbijeik e bwe en mour ilo jitõb. (Mark 1:​9-​11; Dri Rom 1:4; Dri Hibru 1:5; 5:5) Aet, King eo an Ailiñ eo ilañ ej Manjen Nejin Anij. (Jon 3:​16) Kinke ej itok jen menmenbwij eo an King David, Jesus ej jolet maroñ eo bwe en king. (2 Samuel 7:​4-​17; Matu 1:​6, 16) Ekkar ñan sam in, Anij ej jiroñ Nejin: “Kwon kajitõk iba, im I naj lewoj dri ailiñ ko ñõn Yuk  bwe ren An jolit, im ijo ko retoloktata i lõl bwe ren Am wato.”​—Sam 2:8.

15. Etke Jesus ear kajitõk in bõk ailiñ ko einwõt men in jolet eo an?

¹⁵ King eo​—Nejin Anij​—ej E wõt eo eutiej ilalin Jehovah. Jesus ej eo etiljek, emõn, im eo ear liki. Bareinwõt, Jesus ear bõk men in jolet eo einwõt Manjen Anij. Emol, Jesus Christ ej “nememen Anij eo je ban lo E, im lotak mokta jen men in kõmõnmõn otemjej.” (Dri Kolosse 1:​15) Men eo wõt ej aikwij kõmmane ej kajitõk im Anij ej ‘lelok ailiñ ko ñan e einwõt men in jolet eo an im ijo ko retoloktata einwõt weto eo an.’ Jesus emaroñ kajitõk kin men kein kinke rej men ko ear ‘lañliñ kaki ke ear bed ibben ro nejin armij’ im kinke ewõr juõn kõnan elap ibben ñan kõmanman ankil an Jemen kin lal in im armij.​—Jabõn Kennan Ko 8:​30, 31.

Kien eo an Jehovah Nae Ri Ailiñ Ko

16, 17. Ekkar ñan Sam 2:9, ta eo enaj walok ñan ri ailiñ ko?

¹⁶ Kinke sam ruo ej jejjet kitien kiõ, ilo ien an Jesus Christ bed, ta eo enaj walok ñan ri ailiñ ko? Mõttan jidik King eo enaj kajejjet kitien kien eo an Anij: “Kwo naj lojaik ir kin mal wãwen alal [jokon mal eo], Kwo naj kokkure ir im joko einwõt jãbi dreka.”​—Sam 2:9.

¹⁷ Ilo ien ko etto jokon mal ko an king ro kar kakõllan wãwen iroij eo air. Jet jokon ko rar kõmmani kin mal, einwõt sam in ear konono kake. Nan in kõkkar eo ilo eon in ej kalikar kin joñan an bidodo an Christ King eo naj kokkure ri ailiñ ko. Juõn jokon mal eo emaroñ kabedakilkile juõn jãbi bũdej ñan maat joñan.

18, 19. Ñan kabuñburuen Anij, ta eo king ro an lal rej aikwij kõmmane?

¹⁸ Iroij ro an ailiñ ko rej aikwij ke lo ien kokkure eo? Jaab, kinke ri jeje sam eo ej akwelap ñan ir ilo nan kein: “Im kiõ, O kiñ ro, komin meletlet; iroij in ekajet in lõl, komin katak.” (Sam 2:​10) Ear kejelãik king ro, bwe ren kiblie, im jerbal ilo meletlet ikijen aikwij in. Rej aikwij melele bwe ejelok tokjen karõk ko air, ñe rej keidi ibben ta eo Ailiñ eo an Anij enaj kõmmane ñan kajerammõn armij.

¹⁹ Ñan kabuñburuen Anij, king ro an lal renaj kar ukõt bebe ko air. Kar kakabilek ir bwe ren “jerbal ñõn Jeova ilo mijõk, im lõñliñ kin wurirrir.” (Sam 2:​11) Ta eo enaj kar walok elañe rar bokake nan in rejañ in? Jen air bwok, remaroñ kar lañliñ ilo kejatdikdik eo me King eo ej Messiah eo enaj likit imair. Iroij ro an lal renaj kar aikwij in wutik utiej burueir im kemjãje eo rej kwalok ilo wãwen air iroij. Bareinwõt, rej aikwij ukõt wãweir ilo mõkaj im jerbale lolokjen eo air kin iroij eo an Jehovah eo eutiej bõtata im ejelok bar juõn ijellokin im kajur eo ekareelel an Anij im King eo an ej Messiah eo.

“Komin Mejenmaik Nejin”

20, 21. Ta melelen “mejenmaik nejin”?

²⁰ Kiõ Sam 2 ej lelok juõn nan in kir ñan iroij ro an ailiñ ko. Jen air koba ibben don im jumae, rej bõk nan in kakabilek eo: “Komin mejenmaik Nejin eo, bwe En [Jehovah] jab illu.” (Sam 2:​12a) Rej aikwij bokake Iroij Bõtata eo Jehovah ñe ej kwalok juõn kien. Ñe Anij ej kajijet nejin ion throne eo, iroij ro an lal rej aikwij bõjrak jen air unojdikdik “kin men eo ejelok kobõn.” Ren kar aikwij kile King eo ilo mõkaj im bokake e kin aolepen burueir.

²¹ Etke rej aikwij “mejenmaik Nejin eo”? Ke rar kine sam in, mejenmaik kar juõn mantin jimjera im rar kõmman eindein ke juõn armij ear karuwaineneik ri lolok ro ñan mweo imõn, ijo rar lañliñ kin karuwainene eo an ri mweo. Mejenmaik emaroñ juõn men ej kõmmane ilo tiljek. (1 Samuel 10:1) Ilo eon in ilo sam ruo, Anij ear kakien ri ailiñ ko bwe ren mejenmaik, ak karuwaineneik Nejin einwõt King eo ear kabit e.

22. Iroij ro an ailiñ ko rej aikwij bokake ta nan in kakkõl eo?

 ²² Ro rejjab kõnan kile maroñ eo an King eo Anij ear kabiti rej kaillu Jehovah. Rej karmijeteik iroij bõtata eo an Jehovah ijoko otemjej ilañ im ion lal im maroñ eo an ñan kãlet King eo emõntata ñan iroij ion armij otemjej. Iroij ro an ailiñ ko renaj lo bwe kwi eo an Anij enaj buñõt ir ilo idiñ, ilo ien eo rej kajeoñ in kajejjet kitien karõk ko air make. “An illu e naj mõkõj an urur.” Iroij ro an ailiñ ko rej aikwij bõk nan in kakkõl in ilo mõnõnõ im jerbal ekkar ñan e. Air kõmman eindein enaj melelen mour indio ñan ir.

23. Ej wõr wõt ien ñan an armij ro kajjojo kõmman ta?

²³ Sam in ej jemlok ilo juõn wãwen ekaitoktoklimo: “Emõnõnõ ro otemjej rej liki E [Jehovah].” (Sam 2:​12b) Ej wõr wõt ien ñan an armij ro bukõt juõn jikin kone. Ej mol men in bareinwõt ñan iroij ro kajjojo me rar errã im rejetake karõk ko an ailiñ ko. Remaroñ ko ñan Jehovah, eo ej lelok jikin kone eo iumin iroij eo an Ailiñ eo. Ak rej aikwij bõke ilo mõkaj mokta jen an Ailiñ eo an Messiah eo kajeebeplok ri ailiñ ko rej jumae.

24. Ewi wãwen ad maroñ mour ilo jokane meñe ilo juõn lal eobrak kin abañ?

²⁴ Elañe jej niknik in katak Bible eo im jerbale nan in kakabilek ko ilo mour eo ad, jemaroñ mour ilo juõn wãwen jej juburu kake meñe kiõ ilo juõn lal eobrak kin abañ. Jerbale nan in kakabilek ko ilo Bible ñan kij ej kalaplok mõnõnõ eo an family eo im kanemkwoj kij jen elõñ inebata im men ko rej kautameik lal in. Lor kien ko ilo Bible eo ej kabin tõmak eo ad bwe jej kabuñburuen Ri Kõmanman eo. Ejelok bar juõn ijellokin Iroij Bõtata eo ijoko otemjej ilañ im ion lal emaroñ kamole kallimur eo kin “mour in, kab mour eo e naj itok.”​—1 Timote 4:8.

25. Kinke “kien Jeova” eban likjap, ta eo jej kõtmene bwe enaj walok ilo ran kein ad?

²⁵ “Kien Jeova” eban likjap. Einwõt Ri Kõmanman eo ad, Anij ejelã kin ta men eo emõntata ñan armij im enaj kajejjet kitien karõk eo an ñan kajerammõn armij ro kin ainemõn, im jokane ñan indio iumin Ailiñ eo an Nejin eo ej jitenburu. Ikijen ran kein ad, ri kanan Daniel ear je: “Ilo ran ko an king ro Anij in lañ enaj kajutak juõn ailiñ eo rejamin kokkure. . . . Enaj kabedakilkil im kokkure ailiñ kein otemjelok, im enaj make bed ñan indio.” (Daniel 2:​44, NW) Inem, emol bwe ej ien kiõ ñan ad “mejenmaik Nejin” im karejar ñan Iroij Bõtata eo, Jehovah!

[Kamelele ko itulal]

Ewi Wãwen Am Naj Kar Uak?

• Ta “men eo ejelok kobõn” ri ailiñ ko rej “aol” kake?

• Etke Jehovah ej kajirere kin ri ailiñ ko?

• Ta eo Anij ear bebe kake nae ri ailiñ ko?

• Ta melelen “mejenmaik nejin”?

[Kajitõk ko ñan katak]

[Pija eo ilo peij 12]

David ear al kin anjo eo an King eo ej Messiah

[Pija eo ilo peij 13]

Iroij ro im armij ro ilo Israel rar karõk ilo ittino ñan jumae Jesus Christ

[Pija eo ilo peij 14]

Emwij an kar kairoij Christ bwe en King ion Tol Zion ilañ