“Kimij Kõnan Ba, ‘Aet!’ ”

RA EO an Ri Kennan ro an Jehovah ilo Nigeria ear bõk juõn letter me, jidik in, ear ba nan kein:

“Ladik eo nejim, Anderson, ear mij ke ear 14 yiõ dettan. Mokta jen an kar mij, ear lale ruo bao ko. Ear kõnan wiakaki inem jilkinlok money eo ñan ra eo einwõt juõn jabawõt ñan jerbal in kwalok nan eo ibelakin lal. Ak ear mij mokta jen an kar maroñ wiakaki.

“Ilo lemnak kin kõnan eo an, kim, jemen im jinen, kimar lale bao ko im wiakaki. Kimij jilkinwõj money eo einwõt jabawõt eo an Anderson. Kin kallimur eo an Jehovah, kimij liki bwe mõttan jidik​—elukkun ebak⁠—kim naj bar lo Anderson. Kimij kõnan ba, ‘Aet!’ ñe ej kajitõk elañe kimar kajejjet kõnan eo an. Emol, kimij reimanlok ñan lo jab Anderson wõt ak bareinwõt juõn ‘kõro elap in ri kennan ro’ me renaj jerkakbiji.”​—Dri Hibru 12:1; Jon 5:​28, 29.

Einwõt an alikar loe ilo letter eo ilõñ, tõmak ilo jerkakbiji eo ej juõn kejatdikdik me ej kakajurlok Ri Christian ro remol. Elõñ million family ko renaj lañliñ ñe rej, einwõt family eo an Anderson, karuwaineneiktok ro jitenburu ibbeir me rar luji ir ñan ri kijirãt eo mij!​—1 Dri Korint 15:24-​26.

Nan eo an Anij ej letok kejatdikdik in ej kainemõn kin jerkakbiji einwõt juõn ian elõñ men ko raibujuij me renaj walok ilo lal eo ekãl im wãnik iumin Ailiñ in Anij. (2 Piter 3:​13) Ilo an konono kin ta eo Anij enaj kõmmane ñan armij ro ilo ien eo, Bible eo ej ba: “E naj kõmõraik jen mejeir dren in kemjãlãl otemjej, im e naj ejelok bar mij, im re jamin bar liãjlol, ak jõñ, ak iñtan; bwe men ko mokta re joko.”​—Reveles̃õn 21:4.