Men In Bwilõñ Ko An Jesus Remol Ke Ak Rej Inoñ Bajjek?

“REJ bõktok ñõn E [Jesus Christ] elõñ ro dimon r’ar miok na enbwinir: [im] Ej kajutõklok jitõb ro kin juõn nan im kemour ro otemjej re nañinmij.” (Matu 8:​16) “Im Ej [Jesus] jerkak im kowe kõto, im ba ñõn lomalo, Kwon jab makõtkit, kwon lur. Im kõto e joko, im elap lur.” (Mark 4:​39) Ewi am lemnak kin nan kein? Kwoj tõmak ke bwe rej kwalok kin men ko rar lukkun walok, ak kwoj lemnak ke bwe rej bwebwenato in kõkkar ko, inoñ ko bajjek?

Elõñ rainin rej bere kin men in kabwilõñlõñ ko an Jesus. Ilo ebeben in me elõñ men in ellolo ko an science, einwõt telescope im microscope, air etale ijoko ilañ, im kõmman oktak ko ilo kij in men in kõmanman ko, elõñ rej makoko in tõmak ennan ko kin men in bwilõñ ko.

Jet rej lemnak bwe bwebwenato ko kin men in bwilõñ ko rele jen ad maroñ tõmaki ak rej men in kõkkar ko. Bwebwenato ko kin men in bwilõñ ko an Christ, ekkar ñan juõn emaan eo ear jeje juõn book eo ej ba bwe ej etale kin Jesus eo “emol,” rej baj “men in kareelel ko” ñan kowõnmanlok kabuñ in Christian.

Ro jet rej watõk men in bwilõñ ko an Jesus einwõt men in mon ko. Jet ien rej ba bwe Jesus ej mone armij. Ekkar ñan Justin Martyr ilo ebeben eo kein karuo C.E., ro rej bukõt ruõn Jesus rar “naetan juõn ri anijnij im ri mon.” Jet rej ba bwe Jesus “ear jab kõmman men in bwilõñ ko an einwõt juõn ri  kanan an Ri Jew ro, ak einwõt juõn ri anijnij, juõn eo kar katakin e ilo temple ko an ri pagan ro.”

Kameleleik Nan in Eban

Kwomaroñ lemnak bwe ilikin lemnak in bere kein, ewõr unin an armij abwin tõmak kin men in bwilõñ ko. Rej lo bwe ebin ñan air bõk lemnak eo bwe ewõr juõn kajur eo elaplok me ej kõmman men in bwilõñ kein. “Men in bwilõñ ko reban otem ban walok,” juõn jodikdik eo ejjab lukkun jelã elañe ewõr juõn Anij ear ba. Inem ear elij nan ko an David Hume, juõn ri meletlet jen Scotland ilo ebeben eo kein ka-joñoul ralitõk, eo ear je: “juõn men in bwilõñ ej rupe kien ko kin men in kõmanman ko an lal.”

Bõtab, elõñ renaj kar kejbãrok ilo air ba bwe juõn men ekabwilõñlõñ eban walok. The World Book Encyclopedia ej kamelele kin juõn men in bwilõñ einwõt “juõn men eo ej walok me kien ko an men in kõmanman ko rejjab maroñ kameleleiki.” Ekkar ñan kamelele in, kelok ilo mejatoto, wireless communication, im kamadmõd in tel jen satellite ko renaj kar “men in bwilõñ ko” enañin jibuki yiõ ko remotlok. Inem ejjab men in meletlet ñan ba bwe men in bwilõñ ko reban walok kinke jejjab maroñ kameleleiki ekkar ñan jelãlokjen eo ad kiõ.

Elañe jej etale jet kein kamol ko rej bedbed ion Bible me ewõr kõtair ñan men in bwilõñ ko an Jesus Christ, ta eo jenaj loe? Men in bwilõñ ko an Jesus remol ke ak rej inoñ bajjek?