Etetal Einwõt Jesus Christ Ear Etetal

Eo e ba bwe ej ber ilo [Anij] emõn en etetal einwõt E [Jesus] ar etetal.”​—1 JON 2:6.

1, 2. Ad jerlok ñan Jesus ej kitibuj ta?

 “JEN etõr ilo iaikuij eo emwij likit e imar,” ri jilek Paul ear je, “Im jen jerlok ñõn Jisõs, Dri tel im Dri kowãppen tõmak eo ar.” (Dri Hibru 12:1, 2) Elañe jekõnan lor ial in tiljek jej aikwij jerlok ñan Jesus Christ.

² Nan eo jinoin kin “jen jerlok,” einwõt rej kajerbale ilo Jeje ko ilo kajin Greek, ej melelen “ñan kalimjek juõn men ilo am jab mad kin men ko jet,” “ñan ukõt mejõm jen juõn men ñan lale bar juõn.” Juõn book in kamelele ej ba: “Ien eo wõt juõn Ri Greek ri ettõr ilo jikin ikkure eo ej ukõt mejen jen ial in ettõr eo im mejenkajjik eo ej jibadõke, im ej lale ri aluij ro, joñan mõkaj in an ettõr ej diklok. Men in ej bareinwõt walok ibben juõn Ri Christian.” Ewõr men ko rej kamad kij jen ad wõnmanlok wõt ilo jitõb. Jej aikwij jerlok ñan Jesus Christ. Im ta eo jej bukõte ilo Ri Tel eo? Nan in Greek eo rej ukõte “ri tel” ej melelen “eo ej tel ilo jabdewõt men im ej likit juõn joñok.” Ilo ad jerlok ñan Jesus ej melelen bwe jej aikwij lor joñok eo an.

3, 4. (a) Ñan ad etetal einwõt Jesus Christ ear etetal, ta eo jej aikwij kõmmane? (b) Ta kajitõk ko jej aikwij lemnak kaki?

³ “Eo e ba bwe ej ber ilo E [Anij], emõn en etetal einwõt [Jesus] e ar etetal,” Bible eo ej ba. (1 Jon 2:6) Jej aikwij bed ilo Anij ilo ad bokake kien ko an Jesus einwõt ear bokake kien ko an Jemen.—Jon 15:10.

⁴ Kin men in, etetal einwõt Jesus ear etetal ej aikwiji ad kalimjek e einwõt Ri Tel eo ad Elap im lor buñten nee ko neen. Kajitõk ko raorõk jej aikwij lemnak kaki rej: Ewi wãwen an Christ tel kij rainin? Ñe jej anõk wãwen an etetal, ewi wãwen en jelet kij? Ta tokjen ko rej walok ñe jej lor joñok eo Jesus Christ ear likiti?

Ewi Wãwen an Christ Tel Ri Kalor Ro An

5. Mokta jen an kar wanliñlok ñan lañ, ta eo Jesus ear kallimuri ri kalor ro an?

⁵ Mokta jen an kar wanliñlok ñan lañ, Jesus Christ eo ear jerkakbiji ear weaktok ñan ri kalor ro an im lelok ñan ir juõn jerbal eaorõk. Ear ba: “Komin ilok, im kõmõn dri ailiñ ko otemjej bwe ren dri kalora.” Ilo ien eo Ri Tel eo ad Elap ear bareinwõt kallimur bwe enaj bed ibbeir ilo air kajejjet  jerbal in, ilo an ba: “Lo, Ij ber ibemi ien otemjej ñõn jemlokõn lõl.” (Matu 28:19, 20) Ewi wãwen an Jesus Christ maroñ bed ibben ri kalor ro an ilo ien in ien jemlokin jukjuk im bed in?

6, 7. Ewi wãwen an Jesus tel kij ikijen jitõb kwojarjar eo?

⁶ “A Dri Kainemõn, E Jitõb Kwojarjar, Eo Jema e naj jilkintok ilo eta,” Jesus ear ba, “E naj katakin kom men otemjej, im kakememej men otemjej ñõn kom, men ko I ar ba ñõn kom.” (Jon 14:26) Jitõb kwojarjar, eo kar jilkintok ilo etan Jesus, ej tel im kakajur kij rainin. Ej kameramlok kij kin men ko lor jitõb im jibañ kij ñan melele “men ko re mũlõl an Anij.” (1 Dri Korint 2:10) Bareinwõt, kadkad ko rekwojarjar einwõt “yokwe, lõñliñ, ainemõn, meanwõr, joij, lejokmen, tiljek, inemõn, jadõr” rej mõttan “leen Jitõb.” (Dri Galetia 5:22, 23) Kin jibañ eo jen jitõb kwojarjar, jemaroñ kaddeklok kadkad kein.

⁷ Ke jej katak Bible eo im kate kij ñan jerbale ilo ad mour, jitõb eo an Jehovah enaj jibañ kij ñan eddeklok ilo meletlet, jelãlokjen kin buruõm, maroñ in kili, jelãlokjen, ekajet jimwe, im lolokjen. (Jabõn Kennan Ko 2:1-11) Jitõb kwojarjar ej bareinwõt jibañ kij ñan kijenmij ilo men in kabo im melejoñ ko. (1 Dri Korint 10:13; 2 Dri Korint 4:7; Dri Pilippai 4:13) Rej rejañ Ri Christian ro ñan ‘karreoik ir jen etton otemjej in kanniek kab ad, im kowãppen kwojarjar.’ (2 Dri Korint 7:1) Jemaroñ ke mour ekkar ñan men in aikwij ko an Anij kin kwojarjar, ak erreo, ñe ejelok jibañ jen jitõb kwojarjar? Juõn ian men ko Jesus ej kajerbale ñan tel kij rainin ej jitõb kwojarjar eo, me Jehovah Anij ear kamaroñ Nejin ñan an kajerbale.—Matu 28:18.

8, 9. Ewi wãwen Christ ej kajerbal “dri korijer e tiljek im meletlet” ñan tel kij?

⁸ Lemnak kin bar juõn wãwen Christ ej tel congregation eo rainin. Ilo an konono kin bed eo an im jemlokin jukjuk im bed in, Jesus ear ba: “Wõn eo dri korijer e tiljek im meletlet, eo an iroij e ar likit e bwe en dri kõmñe ion ro dron, bwe en najirik ir ilo ien emõn? Emõnõnõ dri korijeran eo, an iroij e naj itok im lo an kõmõnmõn ein drein. Emol Ij ba ñõn kom, e naj kairoij e ion men ko otemjelok an.”—Matu 24:3, 45-47.

⁹ “Iroij” eo ej Jesus Christ. “Dri korijer” eo ej kumi in Christian ri kabit ro ion lal. Kumi in ej bõk eddon lale men ko an Jesus ion lal im ñan lelok ekan ko lor jitõb ilo ien ekkar. Juõn kumi edik in overseer ro me ewõr air maroñ jen ian class in “dri korijer e tiljek im meletlet” ej ejaake Governing Body eo, me rej jerbal einwõt ro rej jutak ikijen class in ri karejar in. Rej tel jerbal in kwalok nan kin Ailiñ eo im ñan letok ekan ko lor jitõb ilo ien eo ejejjet. Christ ej tel congregation eo ikijen class in ri kabit “dri korijer e tiljek im meletlet” im Governing Body eo.

10. En ewi lemnak eo ad kin elder ro, im etke?

¹⁰ Bar juõn wãwen Christ ej tel kij ej ikijen “men in yokwe ñõn armij rõn”—Christian elder ro, ak overseer ro. Kar letok ir bwe ren “kowãppenlok ro remõn, kin jerbal in jibõñ, kin kalek enbwinin Kraist.” (Dri Epesõs 4:8, 11, 12) Kin ir, Dri Hibru 13:7 ej ba: “Komin kememej ro r’ar ami dri tel, im r’ar ba ñõn kom nan in Anij; im komin kajeoñwe air tõmak, ke komij kalomõnlokjen kin tokjen air ber im kõmõn.” Elder ro rej tel ilo congregation eo. Kinke rej kajeoñe Christ Jesus, ej tellokin ad kajeoñe tõmak eo air. (1 Dri Korint 11:1) Jemaroñ kwalok ad kamolol kin karõk in kin elder ro ilo ad bokake im kõttãik kij ñan “men in yokwe ñõn armij” rein.—Dri Hibru 13:17.

11. Ilo wãwen et ko Christ ej tel ri kalor ro an rainin, im ad etetal einwõt ear etetal ej kitibuj ta?

¹¹ Aet, Jesus Christ ej tel ri kalor ro an rainin ikijen jitõb kwojarjar eo, “dri korijer e tiljek im meletlet,” im elder ro ilo congregation.  Bwe jen etetal einwõt Christ ear etetal, jej aikwij melele kin wãwen an tel kij im ñan kõttãik kij ñane. Ej bareinwõt aikwiji ad kajeoñe wãwen an etetal. “Im emwij kir kom ñõn men in,” ri jilek Peter ear je, “bwe Kraist e ar iñtan kin kom, im likit joñok ñõn kom, bwe komin anõke jenkwon ne ko neen.” (1 Piter 2:21) Ad anõke joñok eo ewãppen an Jesus en jelet kij ilo wãwen et?

Kwon Kwalok Kõmmanwa Ñe Kwoj Jerbale Maroñ eo Am

12. Ta wãwen eo ilo joñok eo an Christ, elder ro ilo congregation eo elaptata air itoklimo kake?

¹² Meñe Jesus ear bõk jen Jemen maroñ eo elaptata jen jabdewõt ian armij, ear kwalok an kõmmanwa ilo wãwen an kar kajerbale. Aolep ro ilo congregation eo—elaptata overseer ro—rej aikwij kõmman bwe air “kamanwa en walok ñõn armij otemjej.” (Dri Pilippai 4:5; 1 Timote 3:2, 3) Kinke elder ro ewõr air maroñ ilo congregation eo, eaorõk bwe ren anõk jenkwon nee ko neen Christ ñe rej kajerbale.

13, 14. Ilo wãwen et eo elder ro remaroñ anõk Christ ilo air rejañ ro jet ñan air karejar ñan Anij?

¹³ Jesus ear lemnak kin joñan maroñ ko an ri kalor ro an. Ear jab kajitõk ellã jen joñan air maroñ. (Jon 16:12) Ilo an jab jibed ir, Jesus ear rejañ ri kalor ro an ñan ‘kate ir’ ñan kõmanman ankil an Anij. (Luk 13:24) Ear kõmman men in ilo an tel ir im kamakit burueir. Eindein, Christian elder ro rainin rejjab kamijak ak kajook ro jet ñan air karejar ñan Anij. Jen men in, rej rejañ ir ñan karejar ñan Jehovah kin air yokwe e im Jesus, im bareinwõt armij ro jet.—Matu 22:37-39.

¹⁴ Jesus ear jab kajerbal maroñ eo an ilo jõkkar ilo an kõbboojoj armij ro. Im ear jab kõmman kien ko ebin an armij lori ak kõmman elõñ kien ko. Ear kõnan kamakit ro jet ilo an kõmman bwe nan in kaiñi ko ilikin kien ko kar liloki ñan Moses ren tõbar burueir. (Matu 5:27, 28) Ilo air kajeoñe Jesus Christ, elder ro rej bõprae air kõmman elõñ kien ko ak iun armij bwe ren lor lemnak ko air make. Ikijen nuknuk im baotokin armij ak men in kamõnõnõ ko, elder ro rej kajeoñ in kõmman bwe nan in kaiñi ko an Anij ren tõbar buruen armij, einwõt ko rej kõlajraki ilo—Micah 6:8; 1 Dri Korint 10:31-33; 1 Timote 2:9, 10.

Kwalok Tiriamokake im Jolok Bwid

15. Ewi wãwen an kar Jesus emmakit ñan likjap ko an ri kalor ro an?

¹⁵ Christ ear likit juõn joñok ñan ad lore ilo wãwen an kar jerbale likjap im bwid ko an ri kalor ro an. Lemnak kin ruo men ko rar walok ilo boñin eo eliktata in an mour ion lal einwõt juõn armij. Elikin air kar tõbar Gethsemane, Jesus ear “añin Piter im Jemes im Jon iben” im ear jiroñ ir bwe ren “ekil.” Inem, “Ej ilok jirik, im buñ ion lõl, im jar.” Ke ear roltok, ear “lo air kiki.” Ewi wãwen an kar Jesus emmakit? Ear ba: “An e kõnan, a kõniek emõjino.” (Mark 14:32-38) Ijellokin an lej an kauweik Peter, James, im John, ear kwalok an tiriamokake ir! Ilo ejja boñin eo wõt, Peter ear karmijeteik Jesus jilu alen. (Mark 14:66-72) Ewi wãwen an Jesus jerbal ibben Peter tokelik? “Iroij e  ar jerkakbiji im e ar weaktok ñõn Saimõn [Peter].” (Luk 24:34) “E ar weaktok ñõn Sipas,” Bible ej ba, “bar juõn ien ñõn ro joñoul im ruo.” (1 Dri Korint 15:5) Ijellokin an lõkatip, Jesus ear jolok bwid eo an ri jilek in ear ukwelok im ear kakajur e. Tokelik, Jesus ear lelok ñan Peter eddo ko relaplok.—Jerbal 2:14; 8:14-17; 10:44, 45.

16. Ewi wãwen jemaroñ etetal einwõt Jesus ear etetal ñe ri tõmak ro mõttad rej kaburomõj ak bwid ñan kij ilo juõn wãwen?

¹⁶ Ñe ri tõmak ro mõttad rej kaburomõj ak bwid nae kij kin ad jab wãppen, jej aikwij kwalok tiriamokake im jolok bwid einwõt Jesus ear kõmmani. Peter ear rejañ ri tõmak ro mõttan: “En buruemi otemjej wõt juõn, komin tiriamokake dron, komin yokwe einwõt jimjãn jimjãten, komin keni, im en etã buruemi: Komin jab lelok nana kin nana, ak kajirere kin kajirere; a ein juõn, jar; bwe emwij kir kom ñõn men in, bwe komin jolit jerammõn.” (1 Piter 3:8, 9) Ta elañe juõn armij ejjab jerbal ibbed einwõt an kar Jesus kõmmane, im ej makoko in kwalok tiriamo im jolok bwid? Meñe eindein jej aikwij kajeoñ in anõk Jesus im emmakit einwõt en kar kõmmane.—1 Jon 3:16.

Likit Men ko an Ailiñ eo Mokta

17. Ta eo ej kwalok bwe Jesus ear kõmman bwe an kõmanman ankil an Anij en moktata ilo an mour?

¹⁷ Ilo bar juõn wãwen, jej aikwij etetal einwõt Jesus Christ ear etetal. Keañ kin news eo emõn kin Ailiñ in Anij ear moktata ilo mour eo an Jesus. Elikin an kar kwalok nan ñan juõn kõrã in Samaria ilo juõn jikin ebak ñan jikin kwelok in Sychar ilo Samaria, Jesus ear jiroñ ri kalor ro an: “Kijiõ bwe In kõmõnmõn ankil an Eo e ar jilkintok Iõ, im bwe In kamwijlok jerbal eo An.” (Jon 4:34) Kõmanman ankil an Jemen ear kejbãrok mour eo an Jesus; ear joñan wõt an kar kakajur, kajuburu, im kemourur e einwõt mõñã. Ilo ad kajeoñe Jesus im lemnak kin ad kõmanman ankil an Anij enaj tellok kij ñan juõn mour emol an wõr melelen im kajuburu.

18. Ta jerammõn ko rej walok jen ad rejañ ro nejid ñan bõk jerbal in kwalok nan full-time?

¹⁸ Ke ro jemen im jinen rej rejañ ro nejiir bwe ren bõk jerbal in kwalok nan full-time, ir aolep rej bõk jerammõn ko. Juõn jemen me ewõr bo ladik ro nejin, ear likit imair mejenkajjik eo kin jerbal in pioneer jen ien eo rar dik wõt. Elikin air kadiojlok jen school, bo ro rar erom pioneer ro. Ke ear lemnak kin lañliñ ko ear iioni itok wõt jen air pioneer, lein ear je: “Ladik ro nejim rar jab kaburomõj kim. Ilo kamolol kim maroñ ba, ‘Lo ajiri rõn men in jolit jen Jeova.’” (Sam Ko 127:3) Im ewi wãwen ajiri ro rej bõk tokjen jen air jibadõk jerbal in kwalok nan full-time? Juõn jinen me ewõr lalem nejin ej ba: “Jerbal in pioneer ear jibañ aolep ro nejiõ bwe ren kaddeklok juõn kõtan ebak ibben Jehovah, kakõmanmanlok manit ko ñan katak ibbeir make, jibañ ir ñan ajej ien ko air ilo meletlet, im ear jibañ ir ñan likit men ko lor jitõb moktata ilo air mour. Meñe aolepeir rar aikwij kõmman oktak ko ilo air mour, ejelok juõn iair ej ajlok kin ial eo ear kãlete.”

19. Ta mejenkajjik ko kin ilju im jeklaj jodikdik ro ren lemnak kaki ilo meletlet?

 ¹⁹ Jodikdik ro, ta mejenkajjik ko ami kin ilju im jeklaj? Kwoj jibadõk ke am tijemlok ilo jikin jerbal eo am? Ak kwoj jibadõk ke jerbal in kwalok nan full-time? “Komin kanuij lale ekijkan ami etetal, jab einwõt dri jaje, a einwõt dri meletlet,” Paul ear kakabilek, “im wiaik ien, bwe ran ko renana.” Ear kobaik: “Kin men in komin jab bwebwe, a komin jelalokjen ta eo ankil an Iroij.”—Dri Epesõs 5:15-17.

Kwon Tiljek

20, 21. Ilo wãwen et eo Jesus ear kwalok an tiljek, im ewi wãwen jemaroñ kajeoñe tiljek eo an?

²⁰ Ñan etetal einwõt Jesus ear etetal, jej aikwij kajeoñe tiljek eo an. Ikijen tiljek eo an Jesus, Bible ej ba: “Ke Ej ilo wãwen Anij, E ar jab lemnok An einwõt Anij men in nibiji, A E ar mõke kejeramel E, im bõk wãwen korijer, im erom nememen armij; Im ke E ar walok im einwõt armij, E ar mõke kõtãik E, im e ar bokake ñõn mij, aet, mij eo ion drebail.” Jesus ear tiljek ilo an jurake iroij bõtata eo an Jehovah ilo an kõmanman ankil an Anij kin e. Ear bokake ñan mij ion juõn drebail ak alal in eñtan. Jej aikwij kõmman bwe “lemnok” in en ber ilo [kij] im ilo tiljek jen kõttãik kij ñan kõmanman ankil an Anij.—Dri Pilippai 2:5-8.

²¹ Jesus ear bareinwõt kwalok tiljek ñan ri jilek ro an. Meñe ekar wõr mõjno ko air, Jesus ear “yokwe ir ñõn jemlokõn.” (Jon 13:1) Eindein, jen jab kõtlok bwe jab wãppen ko an ro jeid im jatid ren kõmman bwe jen bõk juõn lemnak in kõrraat.

Lor Joñok eo Jesus ear Likiti

22, 23. Ta tokjen ko rej walok elañe jej lor joñok eo Jesus ear likiti?

²² Emol, einwõt armij jab wãppen, jejjab maroñ lukkun lor buñten neen Eo ej Joñok eo ad ewãppen ilo jejjet. Bõtab, ñan kate kij ñan kõmmane ej melelen bwe jej aikwij melele im kõttãik kij ñan wãwen tel eo an Christ im ñan lor joñok eo ear likiti.

²³ Ilo ad kajeoñe Christ men in ej tellok ñan elõñ jerammõn ko. Enaj laplok an wõr melele im juburu ilo ad mour kinke jej lemnak kin ad kõmanman ankil an Anij im jab ankil ad wõt. (Jon 5:30; 6:38) Enaj wõr juõn bõklikit emõn im erreo ibbed. Enaj emõn wãwen ad etetal. Jesus ear kirtok aolep ro rej jerbal im ban bwe ren itok ibben im renaj lo air kakije. (Matu 11:28-30) Ñe jej lor joñok eo an Jesus, kij bareinwõt jenaj juõn men in kakajur ñan ro jet ñe jej kamao ibbeir. Inem, jen wõnmanlok im etetal einwõt Jesus ear etetal.

Kwoj Kememej Ke?

• Ewi wãwen an Christ tel ri kalor ro an rainin?

• Ewi wãwen elder ro remaroñ lor tel eo an Christ ñe rej jerbale maroñ eo Anij ear lelok ñan ir?

• Ewi wãwen jemaroñ lor joñok eo an Jesus ñe jej jerbale likjap ko an ro jet?

• Ewi wãwen jodikdik ro remaroñ likit men ko an Ailiñ eo mokta?

[Kajitõk ko ñan katak]

[Pija eo ilo peij 15]

Christian elder ro rej jibañ kij ñan lor Christ

[Pija ko ilo peij 16, 17]

Jodikdik ro, ta mejenkajjik ko komij kõmmani bwe en juburu mour in Christian eo ami?