Etetal Kin Tõmak Jab Kin Loe!
Etetal Kin Tõmak Jab Kin Loe!
“Jej etetal kin tõmak, jab kin loe.”—2 DRI KORINT 5:7.
1. Ta eo ej kwalok bwe ri jilek Paul ear etetal kin tõmak, im jab kin loe?
YIÕ eo kar 55 C.E. Enañin 20 yiõ kar motlok jen ke juõn emaan etan Saul, juõn eo ear matõrtõr Ri Christian ro, ear oktak im juõn Ri Christian. Ear jab kõtlok bwe an motlok ien en kamõjnoik tõmak eo an ñan Anij. Meñe ear jab lo kin mejen men ko ilañ, ear bin wõt ilo tõmak eo an. Ke ear jejelok ñan Christian ri kabit ro, ro me kejatdikdik eo air ej ñan mour ilañ, ri jilek Paul ear ba: “jej etetal kin tõmak, jab kin loe.”—2 Dri Korint 5:7.
2, 3. (a) Ewi wãwen jej kwalok bwe jej etetal kin tõmak? (b) Ta melelen etetal kin loe?
2 Ñan etetal ilo tõmak jej aikwij lukkun liki maroñ eo an Anij ñan an tel mour ko ad. Jej aikwij tõmak kin aolepen buruõd bwe e jelã ta eo emõntata ñan kij. (Sam Ko 119:66) Ñe jej kõmman bebe ko im jerbali ilo ad mour, jej lemnak kin “men ko je jab loi.” (Dri Hibru 11:1) Men kein rekoba “lõñ ko rekal im lõl ekal” emwij an kallimur kaki. (2 Piter 3:13) Ijo turãjet, etetal kin loe ej melelen jej jibadõk juõn wãwen mour me ej wawa ion men ko jej loi ikijen maroñ ko ilo enbwinid (einwõt mejed, botid lojilñid im men ko eierlok wõt). Men in ekauwatata kinke emaroñ tellok ñan ad kajekdon ankil an Anij.—Sam Ko 81:12; Ekklisiastis 11:9.
3 Meñe jej mõttan “bwij edik,” me renaj mour ilañ, ak mõttan “sheep ro jet,” me renaj mour ijin ion lal, kij kajjojo jej aikwij bõk ñan buruõd nan in kakabilek eo ñan etetal kin tõmak im jab kin loe. (Luk 12:32; Jon 10:16) Ilo ad lor nan in kakabilek in, jen lale ewi wãwen emaroñ kejbãrok kij jen ad bo ilo aujid eo kin “mõnõnõ ko an jerawiwi jirik ien,” jen arõk mweiuk, im jen ad bõk lemnak eo bwe jemlokin jukjuk im bed in etto wõt. Jenaj bareinwõt etale kauwatata ko rej walok kin ad etetal kin loe.—Dri Hibru 11:25.
Karmijeteik “Mõnõnõ ko an Jerawiwi Jirik Ien”
4. Ta jokãlet eo Moses ear kõmmane, im etke?
4 Lemnak kin kain mour rot eo Moses, likao eo nejin Amram, ear maroñ bõke. Kinke ear rittolok ibwiljin ro nejin Iroij eo ilo Egypt in etto, Moses ear maroñ bõk kajur, mweie, im maroñ. Moses emaroñ kar lemnak: ‘Kar katakin iõ ilo meletlet otemjej an ri Egypt, im ij kajur ilo nan im jerbal. Elañe ij bedwõt ilo mweo imõn iroij eo, I maroñ kajerbal utiej eo aõ ñan tokjen eo an Ri Hebrew ro jeiõ im jatiõ rej bed ilo ijjibed ko!’ (Jerbal 7:22) Jen an kõmman eindein, Moses ear kãlet bwe en “iñtan iben ro dron Anij.” Etke? Ta eo ear kamakit Moses ñan an karmijeteik aolep jerammõn ko ear maroñ bõki ilo Egypt? Bible eo ej uak: “Kin tõmak e ar illok jen Ijipt, im jab mijõk illu an kiñ eo, bwe ej kijenmij einwõt an lo Eo re ban lo E.” (Dri Hibru 11:24-27) Tõmak eo an Moses bwe Jehovah enaj lelok jinekjej kin jerbal ko rewãnik ear jibañ e ñan jumae jerawiwi im men in kamõnõnõ ko iumin jidik ien.
5. Ewi wãwen joñok eo an Moses ej rejañ kij?
5 Kij bareinwõt ekkã ad jelmae aikwij eo ñan kõmman bebe ko rebin kin men rot kein: ‘In jolok ke manit ko ak iminene ko me rejjab ekkar ñan nan in kakabilek ko ilo Bible? In bõk ke juõn jerbal me enaj bõktok elõñ jerammõn ko ak enaj kautameik wõnmanlok eo aõ ilo jitõb?’ Joñok eo an Moses ej rejañ kij bwe jen jab kõmman jokãlet ko me rej kwalok lemnak eo an lal in; jen men in, jej aikwij jerbale tõmak ilo meletlet eo an “Eo re ban lo E”—Jehovah Anij. Einwõt Moses, jej aikwij kaorõk jimjera eo ad ibben Jehovah elaplok jen jabdewõt men me lal in ej letoke.
6, 7. (a) Ewi wãwen an kar Esau kwalok bwe ear kõnan etetal kin loe? (b) Ta eo jemaroñ katak jen joñok eo an Esau?
6 Keidi Moses ibben Esau, leo nejin Isaac. Esau ear kõnan bõk mõnõnõ kiõkiõ wõt. (Jenesis 25:30-34) Kin an jab kamolol kin men ko rekwojarjar, Esau ear wiakake men in jolet ko rej tellokin juõn manje “kin juõn mõña.” (Dri Hibru 12:16) Ear likjap in lemnak kin ewi wãwen bebe eo an ñan wiakake manje eo an enaj kar jelet kõtan eo an ibben Jehovah ak ewi wãwen enaj jelet ro nejin. Kinke kar ejelok lolokjen ilo jitõb ibben Esau, ear kajettokjen kallimur ko raorõk an Anij. Ear etetal kin loe, jab kin tõmak.
7 Esau ej juõn joñok in kakkõl ñan kij rainin. (1 Dri Korint 10:11) Ñe jej aikwij kõmman bebe ko, jekdon elañe relap ak redik, jen jab kõtlok bwe lemnak in lal eo an Satan en kabo kij, eo ej ba bwe jej aikwij bõk men ko jekõnan kiõkiõ wõt. Jej aikwij kajitõkin kij make: ‘Wãwen lemnak eo an Esau ej walok ke ilo bebe ko ij kõmmani? Elañe ij jibadõk kiõ men eo ikõnan ej melelen ke bwe inaj likit kõnan ko aõ mokta jen men ko lor jitõb? Jokãlet ko aõ renaj kokkure ke jimjera eo aõ ibben Anij im jinekjej eo aõ ilo ran ko renaj itok? Kain joñok rot ij likiti ñan ro jet?’ Elañe jokãlet ko ad rej kwalok kamolol eo ad kin men ko rekwojarjar, Jehovah enaj kajerammõn kij.—Jabõn Kennan Ko 10:22.
Bõprae Aujid eo kin Arõk Mweiuk
8. Ta nan in kakkõl eo Ri Christian ro ilo Laodicea rar bõke, im etke jej aikwij itoklimo kake?
8 Ilo juõn vision kar leloke ñan ri jilek John ilo tujemlokin ebeben eo kein kajuõn, Jesus Christ eo emwij kaibujuije ear lelok juõn ennan ñan congregation eo ilo Laodicea, Asia Minor. Ear juõn ennan in kakkõl nae arõk mweiuk. Meñe rar mweie ilo kanniek, Ri Christian ro ilo Laodicea rar jeramel ilo jitõb. Jen air etetal wõt ilo tõmak, rar kõtlok bwe mweiuk ko ren kabiloik ir ilo jitõb. (Reveles̃õn 3:14-18) Eindein an arõk mweiuk jelet kij ilo ran kein. Ej kamõjnolok tõmak eo ad im kõmman bwe jen bõjrak jen ad ‘ettõr ilo iaikwij’ in mour. (Dri Hibru 12:1) Elañe jejjab kejbãrok, “mõnõnõ ko an mour in ” remaroñ “koutameik” makitkit ko ilo jitõb.—Luk 8:14.
9. Ewi wãwen jokane im kamolol kin ekan ko lor jitõb ej kejbãrok kij?
9 Juõn key ñan bõk kejbãrok ilo men ko lor jitõb ej ilo ad jokane im jab lukkun jerbale lal in im kamweie kij make. (1 Dri Korint 7:31; 1 Timote 6:6-8) Ñe jej etetal kin tõmak im jab kin loe, jej lo lañliñ ilo paradise eo ilo jitõb. Ñe jej bõk kakajur jen ekan ko lor jitõb, ej kamakit kij ñan ad “al kin lõñliñ an buru.” (Aiseia 65:13, 14) Bareinwõt, jej mõnõnõ in koba ibben ro rej kwalok leen jitõb eo an Anij. (Dri Galetia 5:22, 23) Elap an aorõk bwe jen lo juburu im kakajur ilo ta eo Jehovah ej letok ilo jitõb!
10. Ta kajitõk ko emõn ñan ad kajitõkin kij make?
10 Jen kajitõkin kij make kin kajitõk kein: ‘Ewi joñan an aorõk mweiuk ko ñan iõ? Ij kajerbal men ko mweiõ ñan aõ kamõnõnõik iõ make ke ak ñan kowõnmanlok kabuñ eo emol? Ta eo elap an kajuburuõ? Aõ katak kin Bible im kamao ilo kwelok ko an Christian ke ak ilo aõ jako jen eddo ko an Christian ilo weekend ko? Ij karõk weekend ko ñan aõ ikkure ke ak ñan kwalok nan im makitkit ko jet an kabuñ eo erreo?’ Etetal ilo tõmak ej melelen bwe jej boub wõt ilo jerbal eo an Ailiñ eo, ilo ad liki kallimur ko an Jehovah.—1 Dri Korint 15:58.
Lemnak Wõt bwe Ebak Jemlokin
11. Ewi wãwen etetal kin tõmak ej jibañ kij lemnak bwe ebak jemlokin?
11 Etetal ilo tõmak ej jibañ kij bõprae ad bõk lemnak ko lor kanniek bwe jemlokin etto wõt an itok ak bwe ejamin itok. Einjuõn jen ro rej kajirere kake kanan ko ilo Bible, jej kile kin ewi wãwen men ko rej walok ilo lal in rej kajejjet kitien ta eo Nan in Anij ear kanan kin ran ko ad. (2 Piter 3:3, 4) Ñan wanjoñok, lemnak im mwilin armij rejjab kamol ke bwe jej bed ilo “ran ko eliktata”? (2 Timote 3:1-5) Kin mejen buruõd, jej kile bwe men ko rej walok ilo lal in rainin rejjab baj men ko ekkã air walok ilo bwebwenato in armij. Jen men in, rej ejaake “kakõlõn [an Christ] naj itok im lokõn lõl.”—Matu 24:1-14.
12. Ewi wãwen nan ko an Jesus ilo Luk 21:20, 21 rar jejjet kitieir ilo ebeben eo kein kajuõn?
12 Lemnak kin men eo ear walok ilo ebeben eo kein kajuõn C.E. me ej einlok wõt ilo ran kein. Ke ear bed ion lal, Jesus Christ ear kakkõl ri kalor ro an: “Ñe kom naj lo jaran dri tõrinae ro rej kabol Jerusalem, inem kom naj jela ebak kejeebeplok e. Inem ro rej ber i Judia ren ko ñõn tol ko: im ro rej ber iolapin ren drioijlok; im ro rej ber i ene ko iturin ren jab dreloñ iloan.” (Luk 21:20, 21) Ilo jejjet in kitien kanan in, jar in tarinae eo an Rome iumin tel eo an Cestius Gallus ear nitbwili Jerusalem ilo 66 C.E. Ak ilo idiñ jar in tarinae eo ear ilok, men in kar kakõlle eo bwe Ri Christian ro ren ‘ko ñan tol ko.’ Ilo 70 C.E., jar in tarinae eo an Rome ear bar jeblak, im kokkure jikin kwelok in Jerusalem im temple eo. Josephus ear kwalok bwe elõñlok jen juõn million Ri Jew ro rar mij, im 97,000 kar kajibõkweik ir. Anij ear ekajete jukjuk im bed eo an Ri Jew ro. Ro rar etetal kin tõmak im bokake nan in kakkõl eo an Jesus rar deor jen jorrãn.
13, 14. (a) Ta men ko rebojak in walok? (b) Etke jej aikwij ekkõl wõt kin jejjet in kitien kanan ko ilo Bible?
13 Juõn wãwen einwõt in ebojak in walok ilo ran kein. Ailiñ ko ilo United Nations me elõñ air jar in tarinae naj kajerbali ñan kajejjet ekajet eo an Anij. Einwõt kar karõk jar in tarinae eo an Rome ilo ebeben eo kein kajuõn ñan kejbãrok Pax Romana (Ainemõn ilo Rome), United Nations eo rainin ej kein jerbal eo ñan kejbãrok ainemõn. Meñe jar in tarinae eo an Rome ear kajeoñ in kejbãrok ainemõn ilo lal in ilo ien eo, ear oktak im e eo ear kokkure Jerusalem. Eindein rainin, kanan eo ilo Bible ej kalikar bwe jar in tarinae ko ilo United Nations renaj watõk kabuñ ko einwõt juõn men in kauwatata im renaj emmakit ñan air kokkure kabuñ ko rewan an ro rej ba rej Christian im kabuñ ko an ri pagan. (Reveles̃õn 17:12-17) Aet, aolepen dolul in kabuñ wan ebojak in jorrãn.
14 Jeebeplok eo an kabuñ ko rewan ej kakõllan jinoin eñtan eo elap. Ilo tujemlokin eñtan eo elap, dolul ko jet an jukjuk im bed in enana renaj jako. (Matu 24:29, 30; Reveles̃õn 16:14, 16) Etetal kin tõmak ej kõmman bwe jen ekkõl wõt ñan jejjet in kitien kanan ko ilo Bible. Jen jab bõk lemnak in bwe jabdewõt dolul me armij rej kajutake einwõt United Nations ej ial eo Anij ej kajerbale ñan bõktok ainemõn im jokane eo emol. Inem, wãwen mour eo ad en kar kalikar tõmak eo ad bwe “ran eo elab an Iroij ebak.”—Zephaniah 1:14.
Etetal kin Loe—Ewi Joñan an Kauwatata?
15. Meñe rar lo kajerammõn eo an Anij, ailiñ in Israel ear lorak ilo aujid et eo?
15 Men ko rar walok ñan Israel eo etto rej kwalok kin uwõta ko rej walok elañe juõn armij ej kõtlok bwe etetal kin loe en kamõjnolok tõmak eo an. Meñe rar lo men in kaeñtan ko joñoul me rar kajook anij wan ko an Ri Egypt im lo wãwen an Anij lomoren ir ilo kabwilõñlõñ ilujen Lomalo Ekilmir, Ri Israel ro ilo jab bokake rar kõmmane juõn kon in cow gold im jino kabuñ ñane. Rar mõk in kõttar Moses, eo ear “rumij an . . . wõnlõltok jen tol eo.” (Exodus 32:1-4) Jaje meanwõd ear kamakit ir ñan air kabuñ ñan juõn ekjap rar maroñ loe kin mejeir. Kin air etetal kin loe rar kwalok air kajekdon Jehovah im ear tellok ñan an jako “e nañin jilu tausan armij.” (Exodus 32:25-29) Elap an kaburomõjmõj ñe juõn ri kabuñ an Jehovah rainin ej kõmman bebe ko me rej kalikar bwe ejjab liki maroñ eo an Jehovah ñan kajejjet kallimur ko an!
16. Ewi wãwen men ko rej loi rar jelet Ri Israel ro?
16 Men ko rej loi rar jelet Ri Israel ro ilo nana ilo wãwen ko jet. Etetal kin loe ear kõmman bwe ren wũdiddid kin air mijak ri kijirãt ro air. (Bwinbwin 13:28, 32; Duteronomi 1:28) Ear kamakit ir ñan jumae maroñ eo Anij ear lelok ñan Moses im ñan air aol kin wãwen mour eo air. Kinke ear ejelok air tõmak, men in ear tellok ñan air kõnan bed ilo Egypt eo ear bed iumin kilan dimon ro jen air kõnan etal ñan Enen Kallimur eo. (Bwinbwin 14:1-4; Sam Ko 106:24) Men in elap an kar kaburomõj Jehovah ke ear lo bwe armij ro an rar jab kwalok air kautiej King eo air rejjab lo kin mejeir!
17. Ta eo ear kamakit Ri Israel ro bwe ren karmijeteik nan in tel eo an Jehovah ilo ran ko an Samuel?
17 Bar ilo ran ko an ri kanan Samuel, ailiñ in Israel ear lorak ilo aujid eo kin etetal kin loe. Armij ro rar kõnan juõn king me rar maroñ loe kin mejeir. Meñe Jehovah ear kõmman elõñ men ko ñan kalikar bwe e eo ej air King, men kein rar jab bwe ñan kamakit ir ñan air etetal kin tõmak. (1 Samuel 8:4-9) Ilo bwebwe rar karmijeteik nan in tel ko an Jehovah rewãppen, im rar kãlet bwe ren einwõt ri ailiñ ko ibelakiir, menin ear bõktok jorrãn ko ioir make.—1 Samuel 8:19, 20.
18. Ta eo jemaroñ katak kin men in kauwatata ko rej walok ilo ad etetal kin loe?
18 Einwõt ri karejar ro an Jehovah ilo ran kein, jej kaorõk kõtan eo ad emõn ibben Anij. Jej kijoror in katak im jerbale ilo ad mour men ko jaar katak jen ien ko etto. (Dri Rom 15:4) Ke Ri Israel ro rar etetal kin loe, rar meloklok bwe Anij ikijen Moses ear tel ir. Elañe jejjab kejbãrok, kij bareinwõt jemaroñ meloklok bwe Jehovah Anij, im Moses eo Elaplok, Jesus Christ, rej tel congregation an Christian rainin. (Reveles̃õn 1:12-16) Jej aikwij kejbãrok bwe jen jab bõk juõn lemnak ebwid kin dolul eo an Jehovah ijin ion lal. Elañe jej kõmmane menin emaroñ tellok kij bwe jen bõk juõn jitõb in ellotan im luji kamolol eo ad kin ro rej jutak ikijen Jehovah im bareinwõt kin ekan ko lor jitõb me “dri korijer e tiljek im meletlet” ej litoki.—Matu 24:45.
Kwon Beek ñan Etetal ilo Tõmak
19, 20. Ta eo emwij am beek bwe kwon kõmmane, im etke?
19 “Bwe aruij oktak,” Bible eo ej ba, “e jab iben bõtõktõk im kõniek, a iben jiõb ro, iben ro re kajur, iben ro iroij in marok i lõl, iben jaran jitõb renana ijo ko i lõñ.” (Dri Epesõs 6:12) Ri kijirãt eo ad elaptata ej Satan Devil eo. Mejenkajjik eo an ej ñan kokkure tõmak eo ad ilo Jehovah. E jamin likjap in lo jabdewõt men me emaroñ kajeorlok kij jen bebe eo ad ñan karejar ñan Anij. (1 Piter 5:8) Ta eo enaj kejbãrok kij bwe jen jab bo kin men ko an jukjuk im bed in an Satan? Etetal kin tõmak, jab kin loe! Liki ilo kallimur ko an Jehovah enaj kejbãrok kij bwe en jab ‘rup im mejõljõllok tõmak eo ad.’ (1 Timote 1:19) Inem, jen bebe ilo buruõd ñan ad etetal wõt ilo tõmak, im liki bwe Jehovah enaj kajerammõn kij. Im jen jar wõt bwe jen maroñ deor jen men otemjej renaj walok ilo ran ko renaj itok.—Luk 21:36.
20 Ke jej etetal kin tõmak, jab kin loe, ewõr ibbed Eo Ej Joñok eo emõntata. “Bwe Kraist e ar iñtan kin kom,” Bible eo ej ba, “im likit joñok ñõn kom, bwe komin anõke jenkwõn ne ko neen.” (1 Piter 2:21) Katak in tok juõn enaj bwebwenato kin ewi wãwen jemaroñ etetal einwõt ear etetal.
Kwoj Kememej Ke?
• Ta eo kwar katak jen joñok ko an Moses im Esau ikijen etetal kin tõmak, jab kin loe?
• Ta key eo ñan bõprae arõk mweiuk?
• Ewi wãwen etetal kin tõmak ej jibañ kij bõprae lemnak eo bwe jemlokin jukjuk im bed in etto wõt an itok?
• Etke etetal kin loe ekauwatata?
[Kajitõk ko ñan katak]
[Pija eo ilo peij 9]
Moses ear etetal kin tõmak
[Pija eo ilo peij 10]
Men in kamõnõnõ ko ekkã ke air kamad yuk jen jerbal ko an Anij?
[Pija eo ilo peij 12]
Ewi wãwen am liñõre Nan eo an Anij emaroñ kejbãrok yuk?