Wõn Jesus Christ?

BAJ lemnak kin joñan mõnõnõ im bwilõñ eo an juõn likao in Ri Jew etan Andrew ke ear roñjake nan ko an Ri Nazareth eo Jesus! Bible eo ej ba bwe Andrew ear kaiurlok ñan ibben eo jein im ba: “Kim ar lo Messaia, (ukotõn nan Kraist.)” (Jon 1:41) Ilo kajin Hibru im Greek, nan kien, “Messaia” im “Christ” rej melelen “Ri Kabit eo.” Jesus ear Ri Kabit eo, ak Eo me Anij ear Kãlete—ak Ri Tel eo kar kallimur kake. (Aiseia 55:4) Ewõr kanan ko kin e ilo Jeje ko ilo Bible, im Ri Jew ro ilo ien eo rar kijoror in kõttar e.—Luk 3:15.

Ewi wãwen ad jelã bwe Jesus Eo me Anij ear Kãlete? Eokwe, lemnak kin ta eo ear walok ilo 29 C.E. ke Jesus ear 30 an yiõ. Ear kebak Jon Ri Baptais bwe en baptais e ilo River Jordan. Bible eo ej ba: “Im ke emwij an Jisõs baptais, emõkõj An ato jen dren: im lo, emjãllok lõñ ñõn E, im Ej lo Jitõb õn Anij ej kãlõltak einwõt mule, im jok ion; Im lo, ainiken jen lõñ ej ba, E in Nejiõ jitenburu iba, Ij mõnõnõ kake.” (Matu 3:16, 17) Elikin an roñjake nan kein, ear wõr ke unin an Jon bere bwe Jesus ej E eo me Anij ear Kãlete? Ilo an lutõklok jitõb eo an ion Jesus, Jehovah Anij ear kabiti ak kãlet e, bwe en King ilo Ailiñ eo An. Inem, Jesus ear erom Jesus Christ, ak Jesus eo Anij Ear Kãlete. Bõtab, ilo wãwen et eo, Jesus ej Nejin Anij? Kar ta jinoin?

Jinoin Ear “Jen Etto”

Jemaroñ ajeje ien mour eo an Jesus ilo jilu mõttan ko. Mõttan eo kein kajuõn kar ijjino moktalok jen an kar lotak ion lal. Micah 5:2 ej ba bwe, “ear bed wõt jen etto.” Jesus make ear ba: “Inem kom jen lõl; Ña jen lõñ: kom an lõl in; Ña I jab an lõl in.” (Jon 8:23) Ear bed ilañ einwõt juõn jitõb ekajur.

Mokta jen an Anij kar kõmanman men otemjej, ear make ian. Bõtab, ilo ien ko etto, Anij ear erom Ri Kõmanman eo.Wõn eo ear kõmanmane moktata? Book eo eliktata ilo Bible eo ej kalikar bwe Jesus ej “Jinoin kõmõnmõn an Anij.” (Reveles̃õn 3:14) Jesus ear “lotak mokta jen men in kõmõnmõn otemjej.” Ear eindein kinke “kin E emwij kõmõn men ko otemjej, men ko ilõñ kab men ko ion lõl, ko jej loi im ko je jab loi.” (Dri Kolosse 1:16) Aet, Jesus wõt Anij ear make kõmanmane. Eñin unin kar naetan “juõn wõt Nejin E ar keutak.” (Jon 3:16) Manje eo Nejin ej bareinwõt bõk title in “Nan” eo. (Jon 1:14) Etke? Kinke mokta jen an kar erom juõn armij, ear jerbal ilañ einwõt ri konono an Anij.

“Nan” eo ear bed ibben Jehovah Anij ilo “jinoin,” ke ear kõmanman “lõñ im lõl.” E eo Anij ear ba ñan e: “Jen kõmõnmõn armij ilo wãwer im einwot Kij.” (Jon 1:1; Jenesis 1:1, 26) Nejin Jehovah ear bed iturin, im jerbal ibben ilo kijejeto. Jabõn Kennan Ko 8:22-31 ear konono kin e ke ear ba: “Ien eo I ar ber iturin, einwõt juõn dri mejerik; im I ar jitenburu iben ran otemjej, im I ar mõnõnõ ien otemjej iman, Im mõnõnõ kin lõl, jikin jokwe; im aõ lõñliñ e ar iben ro nejin armij.”

Jehovah Anij im Nejin eo ej make wõt ear keotak rar bed ilo juõn kõtan ebake don  ke rar jerbal ibben don! Kõtan in ibben Jehovah iumin elõñ ebeben ko ear lap an jelet eo Nejin Anij. Im Nejin ekiblie ear einwõt nememen Jehovah, Jemen. Emol, Dri Kolosse 1:15 ej naetan Jesus “Eo ej ilo nememen Anij eo je ban lo E.” Eñin unin jelãlokjen eo kin Jesus ej aorõk ñan kabwe aikwij eo ad ilo jitõb im kõnan eo ad ñan jelã kajjen Anij. Men otemjej Jesus ear kõmmane ion lal rej men ko Jehovah ear kõnan bwe en kõmmani. Kin men in, jelã kin Jesus ej melelen bareinwõt bwe jen kalaplok jelãlokjen eo ad kin Jehovah. (Jon 8:28; 14:8-10) Ak ewi wãwen an kar Jesus bed ion lal?

Ke Ear Mour Ion Lal Einwõt Juõn Emaan

Mõttan eo kein karuo in mour eo an Jesus kar jino ke Anij ear jilkintok Nejin ñan lal. Jehovah ear kõmman men in ke ear ukõt mour eo an Jesus jen lañ ñan lojen juõn virgin in Ri Jew etan Mary. Jesus ear jab bõrañe jabdewõt kadkadin jab wãppen kinke jemen ear jab juõn armij. Jitõb kwojarjar eo an Jehovah, ak kajur eo an ej jerbal, ear itok ion Mary, im kajur eo an ear ‘kalur’ e, im ilo juõn wãwen ekabwilõñlõñ ear kõmman bwe Mary en bõroru. (Luk 1:34, 35) Inem Mary ear keotak juõn niñniñ ewãppen. Kar juõn ajiri eo me ri carpenter eo Joseph ear kakajiririk, ear rittolok ilo juõn family ejjab mweie ak utiej im ear ajiri eo erittotata ilo family eo.—Aiseia 7:14; Matu 1:22, 23; Mark 6:3.

Jejjab kanuij jelã kin mour eo an Jesus ke ear dik, ak ekar wõr juõn wõt ien eaorõk. Ke Jesus ear 12 an yiõ, jemen im jinen rar ãñinlok e ñan Jerusalem ñan kwojkwoj in Kijone eo. Ke rar bed ijo, ear jolok elap ien ilo temple eo, im “jijõt iolapin ro dri kaki, Ej roñjake ir, im kajitõk ibeir.” Bareinwõt, “ir otemjej rej roñjake re bwilõñ kin An meletlet im nan in uak.” Aet, Jesus ear jab kwalok wõt kajitõk ko remũlal ilo jitõb, ak ear bareinwõt kwalok uak ko remeletlet im kabwilõñ armij ro jet. (Luk 2:41-50) Ke ear rittolok ilo jikin kwelok eo Nazareth, ear katak kin jerbal in carpenter jen jemen eo ear kakajiririk e, Joseph.—Matu 13:55.

Jesus ear jokwe ilo Nazareth mae ien ear 30 an yiõ. Inem ear ilok ñan Jon bwe en baptais. Elikin an baptais, Jesus ear jino an jerbal in kwalok nan. Iumin jilu im jimettan yiõ, ear itoitak ibelakin kabijuknen eo an im kwalok news eo emõn kin Ailiñ eo an Anij. Ear kamol bwe Anij ear jilkintok e. Ewi wãwen? Ilo an kõmman elõñ men in bwilõñ ko—jerbal ko rekajur me armij ro rejjab maroñ kõmmani.—Matu 4:17; Luk 19:37, 38.

Jesus ear bareinwõt kwalok joij im tiriamokake. Joij eo an ear alikar ilo wãwen an kar lemnak im jerbal ibben ro jet. Armij ro rar mõnõnõ in kebak Jesus kin an joij. Ajiri ro bareinwõt rar mõnõnõ in bed ibben.  (Mark 10:13-16) Jesus ear kautiej kõrã ro meñe jet armij rar jab kõmman eindein ilo ran ko an. (Jon 4:9, 27) Ear jibañ ro rejeramel im buromõj bwe ren ‘lo air kakije.’ (Matu 11:28-30) Wãwen an katakin armij ear alikar, ebidodo, im keie. Im men eo ear katakin kake ear kalikar bwe ear lukkun kõnan bwe ri roñjake ro an ren jelã kin Anij eo emol, Jehovah.—Jon 17:6-8.

Ilo an kajerbal jitõb kwojarjar eo an Anij ñan kõmman men in bwilõñ ko, Jesus ilo an tiriamokake armij ear kejmour ro renañinmij im eñtan. (Matu 15:30, 31) Ñan wanjoñok, juõn ri leper ear kebak e im ba: “Elañe kwo kõnan, kwoj maroñ karreo iõ.” Ta eo Jesus ear kõmmane? Ear erlokwe pein im uñur leo im ba: “I kõnan, kwon erreo.” Im ri leper eo ear ejmour!—Matu 8:2-4.

Bareinwõt, lemnak kin ien eo ke juõn jar in armij rar itok ñan ibben Jesus im bed ibben iumin jilu ran. Ear ejelok kijeir mõñã. Ear tiriamokake armij rein im ilo kabwilõñlõñ ear najidik “emen thousand, ijellokin kõrã im ajiri.” (Matu 15:32-38) Bar juõn ien, Jesus ear kalur juõn lañ ear iten kajorrãn ro jeran. (Mark 4:37-39) Ear kajerkakbijeik ro rar mij. * (Luk 7:22; Jon 11:43, 44) Bareinwõt Jesus ear mõnõnõ in lelok mour eo an ewãppen bwe armij ro rejjab wãppen ren maroñ bõk juõn kejatdikdik emõn ilo ran ko renaj itok. Emol bwe Jesus ear lukkun yokwe armij!

Jesus Ej Bed Ia Rainin?

Jesus ear mij ion alal in eñtan eo ke ear 33 1/2 yiõ dettan. * Ak mij ear jab jemlokin wãwen mour eo an. Mõttan eo kein kajilu in mour eo an ear jino jilu ran ko tokelik ke Jehovah Anij ear kajerkakbijeik Nejin einwõt juõn jitõb. Elikin jerkakbiji eo an, Jesus ear weaklok iman elõñ buki armij ro rar mour ilo ebeben eo kein kajuõn C.E. (1 Dri Korint 15:3-8) Tokelik, ear “jijõt i anbijmaroñin Anij” im kõttar mae ien ear erom juõn king. (Dri Hibru 10:12, 13) Ke ej mottok ien eo, Jesus ear jino jerbal einwõt juõn King. Inem en ewi lemnak eo ad kin Jesus ilo ran kein? Jej lemnak ke kin e einwõt juõn emaan ej eñtan ke rej mõne ñan mij? Ak jej watõk e einwõt juõn eo jej aikwij kabuñ ñan e? Jesus ejjab juõn emaan ak Anij Ekajur Bõtata. Jen men in, ej juõn jitõb ekajur, im juõn King ej iroij kiõ. Mõttan jidik, enaj kamol iroij eo an ion lal in ad eobrak kin abañ.

Ilo an kajerbal nan in kõkkar, Reveles̃õn 19:11-16 ej kwalok kin Jesus Christ einwõt juõn king im ej jijet ion juõn horse emouj im ej itok ñan ekajet im tarinae ilo wãnik. Ewõr ibben juõn “jãji ekõñ, bwe En mõn dri ailiñ kake.” Aet, Jesus enaj kajerbal kajur eo an elap ñan kokkure ri nana ro. Im ta kin ro rej kate ir ñan lor joñok eo an ke ear bed ion lal? (1 Piter 2:21) E im Jemen renaj kejbãrok ir ilo ien “tõrinae in ran elap, ran in Anij ekajur otem kajur”—ekkã air naetan Armageddon—bwe ren maroñ mour indio ion lal einwõt ri karejar ro an Ailiñ eo an Anij ilañ.—Reveles̃õn 7:9, 14; 16:14, 16; 21:3, 4.

Ilo ien iroij eo an ilo ainemõn, Jesus enaj kõmman elõñ men in bwilõñ ko ñan jibañ armij! (Aiseia 9:6, 7; 11:1-10) Enaj kejmour ro renañinmij im kajemlok mij. Anij enaj kajerbal Jesus ñan kajerkakbijeik elõñ billion armij ro, im lelok ñan ir juõn ien emõn bwe ren bõk mour indio ion lal. (Jon 5:28, 29) Jejjab maroñ pijaik ewi joñan ad naj mõnõnõ iumin iroij eo an Ailiñ eo. Inem, eaorõk bwe jen wõnmanlok im bõk jelãlokjen jen Bible eo im kalaplok ad jelã kin Jesus Christ.

[Kamelele ko itulal]

 [Bo̦o̦k eo ilo peij 7]

JESUS EJ ANIJ EO EUTIEJTATA KE?

Elõñ armij ro rej tõmak ilo kabuñ rej ba bwe Jesus ej Anij. Jet rej ba bwe Anij ej juõn Trinity ak (jilu Anij ilo juõn). Ekkar ñan katak in, “Jemen ej Anij, Nejin ej Anij, im Jitõb Kwojarjar ej Anij, im meñe eindein rejjab jilu Anij ak juõn wõt Anij.” Rej tõmak bwe rein jilu “rej mour ñan indio im utiej ir wõt juõn.” (The Catholic Encyclopedia) Lemnak kein rejimwe ke?

Jehovah Anij ej Ri Kõmanman eo. (Reveles̃õn 4:11) Eo ejelok jinoin ak jemlokin, im Eo eutiejtata. (Sam 90:2) Ijo tu rãjet, Jesus, ear wõr jinoin. (Dri Kolosse 1:15,16) Ilo an jitõñlok ñan Anij einwõt Jemen, Jesus ear ba: “Jema elap jen Ña.” (Jon 14:28) Jesus ear bareinwõt kamelele bwe elõñ jet men ko e ak enjel ro rar jab jelã kaki ak rar alikar wõt ñan Jemen.—Mark 13:32.

Bareinwõt, Jesus ear jar ñan Jemen: “A en jab ankil Aõ a Am wõt.” (Luk 22:42) Ñan wõn eo Jesus ear jar ñane, elañe ejjab ñan juõn Eo eutiejlok jen e? Bareinwõt, kar Anij eo ear kajerkakbiji Jesus jen mij, jab Jesus make. (Jerbal 2:32) Alikar bwe, Jemen im Nejin rar jab joñan wõt juõn mokta jen an kar Jesus itok ñan lal ak ilo ien mour eo an ijin ion lal. Ta kin elikin jerkakbiji eo an Jesus ñan lañ? Juõn Dri Korint 11:3 ej ba: “Bõran Kraist Anij.” Ilo mol, Nejin enaj aolep ien kõttãik e ñan Anij. (1 Dri Korint 15:28) Kin menin Jeje ko rej kwalok bwe Jesus ejjab Anij eo Eutiejtata. Jen menin, e ej Nejin Anij.

Eo me rej ba armij eo kein kajilu ilo Trinity—jitõb kwojarjar eo—ejjab juõn armij. Ilo an konono ñan Anij ilo jar, ri jeje sam ear ba: “Kwoj jilkinlok jitõb eo Am, inem emwij kõmõnmõn ir.” (Sam 104:30) Jitõb in ejjab Anij make, ej kajur eo me ej jilkintok ak kajerbale ñan kõmmane jabdewõt kõnan ko an. Ikijen kajur in, Anij ear kõmanman lañ ko, lal eo, im aolep men ko rej mour im makitkit. (Jenesis 1:2; Sam 33:6) Anij ear kajerbal jitõb kwojarjar eo an ñan kakõrmole maan ro rar je Bible eo. (2 Piter 1:20, 21) Alikar bwe, Trinity, ejjab juõn katak ej bedbed ion Bible eo. * “Jeova ar Anij, E wõt Jeova,” Bible eo ej ba.—Duteronomi 6:4.

[Kamelele eo itulal]

[Pija eo ilo peij 5]

Ilo ien eo ear baptais, Jesus ear erom Ri Kabit eo an Anij

[Pija eo ilo peij 7]

Jesus ear kamaat an maroñ ñan kõmmane jerbal eo Anij ear lelok ñan e

[Pija eo ilo peij 7]

Rainin, Jesus ej juõn King ekajur