Jej Aikwij Ke juõn Messiah?

KWOJ aikwij kajitõkin yuk kin kajitõk in, “Jej aikwij ke juõn Messiah?” Aet, enaj juõn menin meletlet ñan ad kajitõk kin ta tokjen eo ñan kij elañe enaj wõr juõn Messiah.

Bible eo ej jiroñ kij ilo alikar bwe kij jej lukkun aikwiji juõn Messiah. Juõn eo etijemlok ilo kien Ri Jew ro ilo ebeben eo kein kajuõn ear jeje kin Messiah eo: “Bwe e ej ‘Aet’ eo ñõn kallimur ko otemjej an Anij.” Inem ear kalikar jerbal eo eaorõk an Messiah eo ilo karõk eo an Ri Kõmanmõn eo ad ñan kajerammõn ri ailiñ ko otemjej ilo lal. (2 Dri Korint 1:20) Jerbal eo an Messiah eo elukkun aorõk bwe itok eo an im mour eo an ijin ilo lal kar men ko elap an kar kanan eo ilo Bible konono kake. Ak itok eo an ej ke juõn men in aikwij? Etke ej aikwij wõr am itoklimo kin menin?

“Messiah” melelen “Eo Emwij Kabiti” im ej bareinwõt melelen “Christ.” In eutiej ear aikwij in itok kinke armij ro moktata, Adam im Eve, rar kwalok air jumae. Kar kõmanman ir ilo wãppen, kin jerammõn eo kin mour indio ilo Paradise, ak rar luji jerammõn in. Juõn enjel in jumae, eo ear erom Satan Devil eo, ear jiroñ rein bwe Ri Kõmanman eo air ejjab kõnan bwe ren kõmman men eo rekõnan im bwe enaj emõn elañe renaj bebe ñan ir make kin ta eo emõn ak nana.​—Jenesis 3:1-5.

Kar mone Eve im ear tõmak riap eo. Adam, alikar elap an kar kaorõk kõtan eo an ibben lio belen ilõñin tiljek eo an ñan Anij, ear kobalok ibben jumae eo an Devil eo. (Jenesis 3:6; 1 Timote 2:14) Ikijen kõmman ko air, rar jab baj luji wõt jerammõn eo air ñan mour indio ilo Paradise. Rar lelok ñan ajiri ro nejiir rejañin lotak jerawiwi im tokjen eo, mij.​—Dri Rom 5:12.

Ri Kõmanman eo ad, Jehovah, ilo mõkaj ear bebe bwe en karol tokjen ko renana me rej bojak in walok itok wõt jen jumae eo. Ke ear naruõn Devil eo, Jehovah Anij ear ba ilo kanan eo moktata ilo Bible: “I naj likit kijirãt ikõtam im kõra eo, im ikõtan ineõm im inen: e naj kokkure bõrõm, a kwo naj kokkure jimwin neen.” (Jenesis 3:15) Juõn emaan ri kabel in Bible ear ba bwe Messiah eo ej kein jerbal eo an Anij me “enaj ukõt jorrãn eo ear itok ikijen jerawiwi eo an armij ro moktata” im ilo ejja ien in wõt bõktok jerammõn ko ñan armij otemjej.​—Dri Hibru 2:14, 15.

Ak, kwo maroñ kile, bwe ilo ien in armij otemjej rejjab bed ilo jerammõn. Jen an eindein, armij otemjej rej bed ilo eñtan im jorrãn. Inem, The World Book Encyclopedia ej ba bwe “elõñ Ri Jew ro rej kõtmene wõt kin itok eo an juõn Messiah” im bwe “enaj kajimwe bwid ko im kokkure ri kijirãt ro an armij.” Bõtab, Bible eo ej ba bwe Messiah eo emwij an itok, im ej kwalok Jesus einwõt Messiah eo. Jemaroñ liki ta eo Bible eo ej ba.