Juõn “Men In Kennan Ñõn Ailiñ Otemjelok”
Juõn “Men In Kennan Ñõn Ailiñ Otemjelok”
“Kom naj Aõ dri kennan . . . ñõn eneo etolok tata i lõl.”—JERBAL 1:8.
1. Ñããt im ia eo ri kalor ro rar jino roñ kin nan in kanan eo ilo Matu 24:14?
Elõñ iad jej kiili nan ko an Jesus ilo Matu 24:14. Im ej juõn kanan ekanuij emõn! Alikar bwe ri kalor ro rar lukkun bwilõñ ke rej jino roñ kin men in! Ear walok ilo 33 C.E. Ri kalor ro rar bed ibben Jesus iumin jilu yiõ, im kiõ rej itok ñan Jerusalem ibben. Rar lo men in bwilõñ ko ear kõmmani im roñjake nan in katakin ko an. Meñe rar mõnõnõ kin katak ko remol im aorõk rar bõk jen Jesus, rar jelã bwe ejab aolep armij rar mõnõnõ kaki. Ekar lõñ ri kijirãt ro rekajur an Jesus.
2. Ta kauwatata im aitwerõk ko ri kalor ro rar jelmaiki?
2 Ilo Tol Oliv, emen ri kalor ro rar jijet ibben Jesus, im rar lukkun roñjake ke ear konono kin kauwatata im aitwerõk ko renaj kar jelmaiki. Mokta, Jesus ear jiroñ ir bwe armij ro renaj mõn e. (Matu 16:21) Kiõ ear kalikar bwe ir bareinwõt renaj bõk ejja eñtan rot in wõt. Ear ba, “re naj ketõk kom ñõn iñtan, im re naj mõn kom.” “Im dri ailiñ otemjelok re naj kijirãte kom kin eta.” Men in kaeñtan kein rar jab jemlok. Ri kanan wan ro renaj mone elõñ armij. Jet renaj lõkatip, im ketõke dron, im kijirãte dron. Ak armij ro jet, ilo mol “elõñ,” renaj kõtlok bwe yokwe eo air ñan Anij im Nan eo an en mololok.—Matu 24:9-12.
3. Etke nan ko an Jesus ilo Matu 24:14 relukkun kabwilõñlõñ?
3 Ri kalor ro rar bwilõñ kin ennan in Jesus ear kwalok kinke ear ba men in elikin an kwalok aolep melejoñ ko renaj kar jelmae. Ear ba: “Im naj kwalok gospel in an ailiñ in lõñ i aolepen lõl kin men in kennan ñõn ailiñ otemjelok: ilo ien eo e naj itok jemlokõn.” (Matu 24:14) Aet, jerbal eo Jesus ear jinoe ilo Israel—ñan “kennan kin mol”—enaj wõnmanlok im tõbar aolepen lal. (Jon 18:37) Ej juõn nan in kanan ekabwilõñlõñ! Ñan kõmman bwe jerbal in en jededlok “ñõn ailiñ otemjelok,” enaj bwe an bin kõmmane; im ñan kõtõbrak jerbal in ñe “dri ailiñ otemjelok re naj kijirãte” ir enaj juõn men ekabwilõñlõñ bareinwõt. Tõbrakin jerbal in elap ejjab kaibujuij iroij bõtata eo an Jehovah im kajur eo an wõt ak ej bareinwõt kaibujuij yokwe, tiriamo, im meanwõd eo an. Bareinwõt ej lelok ñan ri karejar ro an juõn ien emõn ñan kwalok tõmak im tiljek eo air.
4. Wõn ro rar bõk jerbal in kwalok nan, im ta nan in kainemõn eo Jesus ear lelok ñan ir?
4 Jesus ear lukkun kalikar ñan ri kalor ro an bwe rej bõk juõn jerbal ekanuij lap an aorõk. Mokta jen an kar wanliñlok ñan lañ, Jesus ear weaklok imair im ba: “A kom naj bõk maroñ ñe emwij an Jitõb Kwojarjar itok iomi: im kom naj Aõ dri kennan ilo Jerusalem, im i aolepen Judia, im i Sameria, im ñõn eneo etolok tata i lõl.” (Jerbal 1:8) Emol, bwe ebar wõr ro jet renaj kobalok ibbeir. Meñe eindein, oran ri kalor ro kar eiet wõt. Ear juõn men in kainemõn elap ñan jelã bwe jitõb kwojarjar eo an Anij enaj kar kamaroñ ir ñan kõtõbrak jerbal in jen Anij!
5. Ta eo ri kalor ro rar jab jelã kake kin jerbal in kwalok nan?
5 Ri kalor ro rar jelã bwe rar aikwij kwalok nan kin news eo emõn im “kõmõn dri ailiñ ko otemjej bwe ren dri [kaloran].” (Matu 28:19, 20) Ak rar jab jelã kin ewi joñan air aikwij kwalok nan, im rar jab jelã ñããt eo enaj itok ien jemlokin. Jejaje kin men kein bareinwõt. Jehovah wõt ej bebe kin men kein. (Matu 24:36) Ñe Jehovah ej juburu kin joñan eo kar kõmmane jerbal in kwalok nan, enaj bõktok jemlok eo ñan jukjuk im bed in enana. Ilo ien en Ri Christian ro renaj kile bwe jerbal in kwalok nan eo air ear tõbrak ekkar ñan karõk eo an Jehovah. Ri kalor ro jinoin rar jab lemnak kin ewi joñan lapin jerbal eo naj kar kõtõbrake ilo jemlokin.
Jerbal in Kwalok Nan ilo Ebeben eo Kein Kajuõn
6. Ta eo ear walok ilo Pentecost 33 C.E. im jejjo ran tokelik?
6 Ilo ebeben eo kein kajuõn, rar lo elap tõbrak ilo jerbal in kwalok nan kin Ailiñ eo im kõmman ri kalor ro. Ilo ran in Pentecost eo 33 C.E., enañin 120 ri kalor ro rar kwelok ilo bo eo ilo Jerusalem. Jitõb kwojarjar eo an Anij ear lutõklok ioir, ri jilek Peter ear kwalok juõn katak ekaitoktoklimo im ear kamelele kin ta melelen men in bwilõñ eo armij ro rar loe ilo ien eo, im tarrin 3,000 armij rar erom ri tõmak im baptais. Men kein rar jinoin wõt jerbal eo. Meñe ri tel ro an kabuñ ko rar kate ir ñan kabõjrak jerbal in kwalok nan kin news eo emõn, “Iroij ej kobaik na ibeir ro re naj mour, ilo ran otemjej.” Ejjabto tokelik, “oran armij ro e nañin lailim tausan.” Bar tokelik, “ro dri tõmak rej koba im orlok na iben Iroij, elõñ man im kõra.”—Jerbal 2:1-4, 8, 14, 41, 47; 4:4; 5:14.
7. Etke ukwelok im oktak eo an Cornelius ear juõn oktak eaorõk im lap?
7 Ilo yiõ eo 36 C.E. rar lo bar juõn men eaorõk ear walok—Cornelius, juõn Ri Gentile, ear oktak im baptais. Ilo an tel ri jilek Peter ñan lein eo ear tõmak ilo Anij, Jehovah ear kalikar bwe nan in kaiñi eo an Jesus ñan “kõmõn dri ailiñ ko otemjej bwe ren [dri kalor ro]” ear jab ñan Ri Jew ro wõt ilo ailiñ ko. (Jerbal 10:44, 45) Kar ewi lemnak eo an ro rar tel ilo jerbal in? Ke ri jilek ro im lõmaro ilo Judaea rar melele bwe rar aikwij kajededlok news eo emõn ñan ri ailiñ ko—ro rejjab Ri Jew—rar kaibujuij Anij. (Jerbal 11:1, 18) Ijoke, tõbrakin jerbal in kwalok nan ear wõnmanlok wõt ibwiljin Ri Jew ro. Jet yiõ ko tokelik, bõlen ilo 58 C.E., ijellokin elõñ Ri Gentile ro “elõñ tausan dri Ju ro [rar] tõmak.”—Jerbal 21:20.
8. Ewi wãwen news eo emõn ej jelet armij ro kajjojo?
8 Meñe orlokin Ri Christian ro ilo ebeben eo kein kajuõn ear juõn men ekabwilõñlõñ, jen jab meloklok bwe rej armij ro kajjojo. Ennan eo jen Bible rar roñjake ear lukkun kajur. (Dri Hibru 4:12) Ear lukkun ukõt mour ko an armij ro rar tõmak. Armij ro kajjojo rar karreoik mour eo air, kõnak armij eo ekãl, im Anij ear bõk ir. (Dri Epesõs 4:22, 23) Ej eindein ilo ran kein. Aolep ro rej bõk news eo emõn rej bõk juõn kejatdikdik ñan bõk mour indio.—Jon 3:16.
Ri Jerbal Ro Mõttan Anij
9. Ta eddo im jerammõn eo Ri Christian ro mokta rar bõke?
9 Ri Christian ro mokta rar jab ba bwe aolep tõbrak ko air rar walok jen maroñ ko air make. Rar kile bwe jerbal ko air einwõt ri jerbal ro an Anij rar wawa ion “kajur an Jitõb Kwojarjar.” (Dri Rom 15:13, 19) Jehovah ear bõk eddo eo ñan kaddeklok mour in Christian eo air. Ilo ejja ien eo wõt, Ri Christian rein rar jelã bwe rar bõk juõn eddo im jerammõn eo einwõt “dri jerbal iben Anij.” (1 Dri Korint 3:6-9) Kin men in, ekkar ñan nan in kakkõl eo an Jesus, rar kate ir ñan kõmman jerbal eo rar aikwij kõmmane.—Luk 13:24.
10. Ta eo jet Ri Christian ro mokta rar kõmmane ñan kwalok nan ilo ailiñ ko otemjej?
10 Einwõt juõn “dri jilik ñõn dri ailiñ ko,” Paul ear itoitak iumin elõñ thousand mile ko ilojet im ion ene, im ear kajutak elõñ congregation ko ilo Asia im Greece. (Dri Rom 11:13) Bareinwõt ear etal ñan Rome im bõlen Spain. Ilo ejja ien eo wõt, ri jilek Peter ear bõk “gospel” ñan ro rej “mijmij,” ilo Babylon, juõn jikin eaorõk ibben Ri Jew ro rej bed ilo kabuñ eo an Ri Jew ilo ien eo. (Dri Galetia 2:7-9; 1 Piter 5:13) Jet ian ro rar bõk jerbal eo an Iroij kar Tryphaena im Tryphosa. Bar juõn kõrã etan Persis, “elap an jerbal ilo Iroij.”—Dri Rom 16:12.
11. Ewi wãwen an kar Jehovah kajerammõn makitkit ko an ri kalor ro?
11 Jehovah ear lukkun kajerammõn Ri Christian rein im ri jerbal ro jet rekijejeto. Eietlok jen 30 yiõ ko elikin an Jesus kanan bwe jerbal in kwalok nan enaj walok ilo ailiñ ko otemjej, Paul ear jeje kin “gospel” eo bwe “emwij kwalok e ñõn ro otemjej rej ber iomin lõñ.” (Dri Kolosse 1:23) Ien jemlokin ear itok ke ilo ien eo? Ilo juõn wãwen ear. Ear buñ ion jukjuk im bed eo an Ri Jew ro ilo yiõ eo 70 C.E. ke ri tarinae ro an Rome rar kokkure Jerusalem im temple eo. Ak, Jehovah ear bebe bwe juõn jerbal elaplok kin kwalok nan enaj kar walok mokta jen an bõktok jemlokin jukjuk im bed eo an Satan ibelakin lal.
Jerbal in Kwalok Nan ilo Ran Kein
12. Kar ewi melele eo an Ri Katak Bible ro mokta kin kien eo ñan kwalok nan?
12 Ilo tujemlokin ebeben eo kein ka 19, elikin juõn ien eaetok ke kabuñ ko rebuñ jen tõmak rar kajur, kabuñ eo emol ear bar jutak. Ri Kennan ro an Jehovah mokta, rar lukkun melele kin kien eo ñan kõmman ri kalor ro iaolepen lal. (Matu 28:19, 20) Ilo yiõ eo 1914, 5,100 ri kwalok ro rar bõk kunair ilo jerbal in, im news eo emõn ear jededlok im tõbar enañin 68 ailiñ ko. Bõtab, Ri Katak Bible rein mokta rar jab lukkun melele kin aorõkin nan ko ilo Matu 24:14. Ilo tujemlokin ebeben eo kein ka 19, jikin kõmman Bible ko rar ukõt Bible eo, me ewõr news eo emõn ak gospel iloan, ilo elõñ kajin ko im leto-letak i ibelakin lal. Inem, iumin elõñ yiõ ko, Ri Katak Bible ro ak Ri Kennan ro an Jehovah rar lemnak bwe jerbal in kwalok nan ibelakin lal ear dedelok kõmmane.
13, 14. Ta melele eo ealikarlok kin ankil an Anij im karõk eo an rar kwaloke ilo juõn magazine in The Watch Tower ilo 1928?
13 Jidik kin jidik, Jehovah ear kameramlok lemnak eo an armij ro an kin ankil an im karõk eo an. (Jabõn Kennan Ko 4:18) Ilo magazine eo The Watch Tower (Imõniaroñroñ) ilo December 1, 1928, ear ba: “Jemaroñ ke ba bwe jerbal in kõmman im leto-letak Bible ko me jikin kõmman Bible ko rar kõmmane ear kõtõbrak jerbal in kwalok nan kin ailiñ eo me kar kanan kake? Emol jaab! Kumi eo edik in ri kennan ro an Anij rej aikwij kõmman wõt book ko rej kamelele kin karõk eo an Anij im bukõt armij ro ilo jabdewõt jikin ko rar lelok Bible ko ie. Elañe rejjab kõmmane, armij ro rejamin jelã kin karõk eo ñan kajutak kien Messiah eo ilo ran kein ad.”
14 Magazine eo The Watch Tower ear bareinwõt ba: “Ilo 1920, . . . Ri Kennan ro an Jehovah mokta rar bõk juõn melele ejimwe kin kanan eo an Iroij ilo Matu 24:14. Inem rar kile bwe “gospel in” rar aikwij kwalok kake ibelakin lal kin men in kennan ñan Ri Gentile ro ak ailiñ ko otemjelok, ear jab juõn gospel kin juõn ailiñ me enaj itok ak ear juõn gospel kin King in Messiah eo emwij an jino an iroij ibelakin lal.”
15. Ewi wãwen jerbal in kwalok nan ear laplok wõt jen yiõ ko ilo 1920?
15 “Kumi eo edik in ri kennan ro” ilo yiõ ko ilo 1920 rar jab eiet wõt. Elõñ yiõ ko tokelik, rar kile wõn ro rar “jar [eo] elap” im “bar jet . . . s̃ip” im rar jino aintok ir. (Reveles̃õn 7:9; Jon 10:16) Rainin, ewõr 6,613,950 ri kwalok nan ro kin news eo emõn ilo 235 ailiñ ko ion lal. Ej juõn jejjet in kitien ekabwilõñlõñ kin kanan in! Ejañin wõr einwõt mokta kain tõbrak rot in kin jerbal in kwalok “gospel in an ailiñ in lõñ” mae kiõ. Elõñlok ri karejar ro retiljek an Jehovah ijin ion lal kiõ jen mokta.
16. Ta eo kar kõtõbrake ilo jerbal in kwalok nan ilo yiõ eo lok? (Lale chart ko ilo page 13-16.)
16 Ibben don, jar in elap in Ri Kennan rein rar boub wõt ilo jerbal in kwalok nan ilo yiõ in jerbal eo ilo 2005. Rar kwalok nan kin news eo emõn elõñlok jen juõn billion awa ko ilo 235 ailiñ ko. Rar bar jeblak im katak Bible ibben elõñ million armij ro. Ri Kennan ro an Jehovah, me rar kajerbal ien ko im mweiuk ko air make ñan leto-letak Nan eo an Anij ibben ro jet, rar kõtõbrak jerbal in. (Matu 10:8) Ikijen jitõb kwojarjar eo an ekajur, Jehovah ej wõnmanlok im kakajur ri karejar ro an ñan kõtõbrak ankil an.—Zechariah 4:6.
Kate Wõt ñan Kwalok Nan
17. Ewi wãwen armij ro an Jehovah rej uake nan ko an Jesus ñan kwalok nan kin news eo emõn?
17 Meñe emotlok enañin 2,000 yiõ ko jen ke Jesus ear ba bwe renaj kwalok kin news eo emõn, kijejeto eo an armij ro an Anij ejañin diklok. Jej jelã bwe ñe jej kijenmij im kõmman emõn, jej kwalok kadkad ko kadkadin Jehovah einwõt yokwe, tiriamo, im meanwõd. Einwõt e, jejjab kõnan bwe jabdewõt armij en mij ak jekõnan bwe ren ukwelok im jeblak ñan Jehovah. (2 Dri Korint 5:18-20; 2 Piter 3:9) Ilo bõplolin kin jitõbõn Anij, Ri Kennan ro an Jehovah rej kijejeto ilo air wõnmanlok in kwalok kin news eo emõn ñan jabõn ko jabõn lal. (Dri Rom 12:11) Kin men in, armij ro ijoko otemjej rej bõk mol eo im bokake tel eo an Jehovah. Lale kin jet wanjoñok ko.
18, 19. Ta bwebwenato ko kwomaroñ kwalok kin jet ian ro rar bõk news eo emõn ilo mõnõnõ?
18 Charles ear juõn ri kallip ilo Kenya. Ilo 1998 ear wiakake elõñlok jen 18,000 paun in tobacco im ear bõk ãt eo einwõt Ri Kallip in Tobacco eo Emõntata. Ilo ien eo, ear jino an katak Bible. Ejjabto tokelik ear kile bwe juõn armij eo ej kallip tobacco im wiakake ej kokkure kien eo an Jesus ñan yokwe ri turin. (Matu 22:39) Ke ear melele bwe ‘ri kallip tobacco eo emõntata’ ej lukkun ‘ri uror eo emõntata,’ Charles ear kokkure aolep tobacco ko kin poison. Ear wõnmanlok ilo jitõb im wujleplok im baptais im kiõ ej juõn regular pioneer im ministerial servant.
19 Ejelok bere bwe Jehovah ej bikbikiri ailiñ ko ikijen jerbal in kwalok nan eo ibelakin lal, im men ko remõn—armij ro—rej deloñtok wõt. (Haggai 2:7) Pedro, eo ej jokwe ilo Portugal, ear etal ñan juõn school in kabuñ ke ear 13 an yiõ. Mejenkajjik eo an kar bwe en erom juõn missionary im katakin armij kin Bible. Bõtab, ejjabto tokelik, ear illok jen school eo kinke ear jab kanuij lap an school eo katakin ri school ro kin Bible. Jiljino yiõ ko tokelik ear bed ilo juõn university ilo Lisbon ñan an katak kin wãwen lemnak im mwilin armij. Ear jokwe ibben juõn nukin, eo ear juõn ian Ri Kennan ro an Jehovah, im ear rejañ e bwe en katak Bible. Ilo ien eo, Pedro ear jab lukkun tõmak bwe Anij ear bed, im ear jab maroñ bebe elañe ear kõnan katak Bible ak jab. Ear bwebwenato ibben ri kaki eo an kin bere eo an. Ri kaki eo an ear ba bwe katak kin wãwen lemnak im mwilin armij ej katakin bwe armij rej ebbururu ak ajkuk ilo ruo lemnak im rekin bõk mour eo air. Inem, Pedro ear beek in katak Bible. Ear baptais ilo ran ko rej kab motlok im ej katakin armij ro jet kin Bible bareinwõt.
20. Etke jemaroñ mõnõnõ bwe jerbal in kwalok nan ej walok ilo ailiñ ko ibelakin lal?
20 Ñan kiõ jejañin jelã ñan joñan et eo jenaj kõmmane jerbal in kwalok nan ilo ailiñ ko, im jejaje bareinwõt kin ran eo im awa eo ien jemlokin enaj itok. Jej jelã wõt bwe mõttan jidik enaj itok. Jej mõnõnõ bwe jerbal in kwalok nan ibelakin lal ej juõn ian kakõlle ko rej kamol bwe ien eo Ailiñ eo an Anij enaj kokkure kien ko an armij ej ebak. (Daniel 2:44) Ñe ej motlok yiõ ko kajjojo, jej lelok ñan elõñ million armij ro ien eo emõn ñan air uak ilo emõn ñan news eo emõn, im men in ej kaibujuij Anij eo ad, Jehovah. Jen beek ilo buruõd bwe jen tiljek im boub wõt ibben ri tõmak ro mõttad ilo jerbal in kwalok nan eo ibelakin lal. Ilo ad kõmman eindein, jenaj lomoren kij make im ro rej roñjake kij.—1 Timote 4:16.
Kwoj Kememej Ke?
• Etke Matu 24:14 ej juõn nan in kanan ekabwilõñlõñ?
• Ta jibadbad ko Ri Christian ro mokta rar kõmmani ñan kwalok nan, im ta tõbrak ko rar walok?
• Ewi wãwen Ri Kennan ro an Jehovah rar melele kin aikwij eo ñan kwalok nan ilo ailiñ ko otemjelok?
• Ñe kwoj lale aolep jerbal ko an armij ro an Jehovah ilo yiõ eo lok, ta eo kwoj bwilõñ kaki?
[Kajitõk ko ñan katak]
[Jaat ilo peij 13-16]
REPORT IN KWALOK NAN EO AN RI KENNAN RO AN JEHOVAH ILO YIÕ EO 2005
(Lale bok in)
[Mab/Pija ko ilo peij 11]
Paul ear itoitak iumin elõñ thousand mile ko ion ene im lojet bwe en kwalok nan kin news eo emõn
[Pija eo ilo peij 10]
Jehovah ear tel Peter bwe en kwalok nan ibben Cornelius im family eo an