Juõn Wãwen Ñan Kajejjet Kitien Karõk Eo An Anij

“[Anij] ej jerbale men otemjej ilo bebe in ankil An.”​—DRI EPESÕS 1:11.

1. Etke aolep congregation ko an Ri Kennan ro an Jehovah renaj kwelok ilo April 12, 2006?

 ILO jotenin Wednesday, April 12, 2006, enañin 16 million armij renaj kwelok ibben don ñan kememe Kwojkwoj in Kejota eo an Iroij. Ilo jikin ko kajjojo renaj kwelok ie, enaj wõr ion table eo bread ejjab uwe, eo ej kõkkar kin enbwinin Christ, im wine bũrõrõ, eo ej pijaik dran eo ear katorlok. Ilo tujemlokin katak eo enaj kamelele kin unin Kwojkwoj in Kememej mij eo an Christ, im renaj leto-letak mokta bread eo, inem wine eo ñan aolep ri kwelok ro. Ilo jet wõt congregation ko an Ri Kennan ro an Jehovah, juõn ak elõñlok ian ro rej kwelok renaj mõñã bread im wine. Bõtab, elõñ wõt ian congregation ko enaj ejelok juõn ej bõki. Etke jejjo wõt Ri Christian ro me kejatdikdik eo air ej ñan mour ilañ, rej bõki, ak jarlepju eo, me renaj mour indio ijin ion lal, rejjab?

2, 3. (a) Ewi wãwen an kar Jehovah jino jerbal in kõmanman eo an ekkar ñan ankil an? (b) Etke Jehovah ear kõmanman lal in im armij?

² Jehovah ej juõn Anij in karõk. Ilo an kajejjet kitien karõk eo an, ej “jerbale men otemjej ilo bebe in ankil An.” (Dri Epesõs 1:11) Mokta ear kõmanman Nejin ej make wõt ear keotak. (Jon 1:1, 14; Reveles̃õn 3:14) Inem, ikijen Nejin, Jehovah ear kõmanman juõn family in jitõb ro nejin im tokelik men in kõmanman ko ilañ jej loi, ekoba lal in im armij ro.—Job 38:4, 7; Sam Ko 103:19-21; Jon 1:2, 3; Dri Kolosse 1:15, 16.

³ Jehovah ear jab kõmanman lal in einwõt juõn jikin ñan melejoñe armij ñan lale elañe ej tellokiir ñan koba ibwiljin jitõb ro nejin ilañ, einwõt elõñ kabuñ ko rewan me rej ba rej Christian rej katakin kake. Ear wõr unin an kõmanmane, bwe armij ren “jokwe ie.” (Aiseia 45:18) Anij ear kõmanman lal in kin armij im armij kin lal in. (Sam Ko 115:16) Kar karõk bwe aolepen lal in en juõn paradise, eobrak kin armij ro rewãnik, me renaj jerbal im kejbãroke. Anij ear jab lelok ñan armij ro ruo moktata kejatdikdik eo ñan etal ñan lañ.—Jenesis 1:26-28; 2:7, 8, 15.

Kar Jumae Karõk eo an Jehovah

4. Ewi wãwen kar aitwerõke wãwen eo Jehovah ear jerbale iroij bõtata eo an ilo jinoin bwebwenato eo an armij?

⁴ Juõn jitõb nejin Anij ear jumae im beek ilo buruen ñan an kokkure karõk eo an Jehovah, im ilo wãwen in jab kajerbal maroñ in kãlet eo an ilo jimwe. Ear kokkure ainemõn  eo an aolep ro rej kõttãik ir ilo yokwe ñan iroij bõtata eo an Jehovah. Satan ear tel armij ro ruo moktata bwe ren ilok jen Anij. (Jenesis 3:1-6) Ear jab karmijete mol eo kin an Jehovah kajur, ak ear aitwerõke wãwen eo Ej jerbale iroij bõtata eo an ak maroñ in iroij eo An. Kin men in, aitwerõk eo kin iroij bõtata eo an Jehovah ear walok ijin ion lal, ilo jinoin bwebwenato eo an armij.

5. Ta aitwerõk eo kar bõkmantak, im ej kitibuj tiljek eo an wõn ro?

⁵ Koba ibben aitwerõk eo elap kin iroij bõtata eo ijoko otemjej ej bar juõn aitwerõk me Satan ear bõkmantak ilo ran ko an Job. Satan ear kõmman bwe en wõr bere kin unin an armij kõttãik ir im karejar ñan Jehovah. Satan ear ba bwe armij rej kõmmane men kein kin un ko ewõr kibbon ie im bwe, elañe rej bõk melejoñ, renaj karmijete Anij. (Job 1:7-11; 2:4, 5) Meñe aitwerõk in ear jelet juõn ian ro ri karejaran Jehovah ijin ion lal, ear bareinwõt kitibuj jitõb ro nejin Anij, ekoba Nejin eo ej make wõt ear keotak.

6. Ewi wãwen an kar Jehovah kalikar an tiljek ñan karõk eo an im ñan etan?

⁶ Ilo an tiljek ñan karõk eo an im melele eo kin etan, Jehovah ear kõmman bwe en erom juõn Ri Kanan im juõn Ri Lomor. * Ear jiroñ Satan: “I naj likit kijirãt ikõtam im kõra eo, im ikõtan ineõm im inen: e naj kokkure bõrõm, a kwo naj kokkure jimwin neen.” (Jenesis 3:15) Ikijen Inen “kõra” eo, ak mõttan dolul eo an ilañ, Jehovah enaj uake aitwerõk eo an Satan im lelok ñan ro nejin Adam kejatdikdik eo ñan bõk lomor im mour.—Dri Rom 5:21; Dri Galetia 4:26, 31.

“Men eo Etino in Ankil An”

7. Jehovah ear kwalok karõk et eo ikijen ri jilek Paul?

⁷ Ilo letter eo an ñan Ri Christian ro ilo Ephesus, ri jilek Paul ear kamelele kin ewi wãwen Jehovah ej kõmmani men ko ñan kajejjet karõk eo an. Paul ear je: “E ar kajelaik kij kin men eo etino in ankil An, ekar ñõn An lemnok emõn eo E ar bebe ilo E. Ñõn jerbal an ien ko rejejit, bwe En kobaik men ko otemjej ilo Kraist, men ko i lõñ, im men ko i lõl.” (Dri Epesõs 1:9, 10) Ej karõk eo an Jehovah ñan kaburukuk men in kõmanman ko an ilañ im ilal me rej kõttãik ir ñan iroij bõtata eo an. (Reveles̃õn 4:11) Ilo wãwen in enaj kokwojarjar etan, im kamol bwe Satan ej juõn ri riap, im naj kõtõbrak ankil an Anij “i lõñ, bareinwõt ion lõl.”—Matu 6:10.

8. Ta melelen nan eo rej ukõte einwõt “jerbal”?

⁸ Ilo juõn wãwen “jerbal” Jehovah enaj kajejjet kitien “lemnok emõn” ak karõk eo an. Paul ear kajerbal juõn nan me ej melelen  “lolorjake juõn family.” Ej jitõñlok, jab ñan juõn kien, einwõt Ailiñ in Messiah eo, ak ñan juõn wãwen lolorjake men ko. * Wãwen eo emõn me Jehovah enaj lolorjake men ko ñan kõtõbrak karõk eo an ej kitibuj juõn “men eo etino” eo enaj alikarlok jidik kin jidik iumin elõñ buki yiõ ko.—Dri Epesõs 1:10; 3:9.

9. Ewi wãwen an kar Jehovah kwalok jidik kin jidik kin men eo ettino kin ankil an?

⁹ Ikijen juõn lelkan in bujen ko, jidik kin jidik Jehovah ear kwalok bwe karõk eo an kin Ine eo me kar kallimur kake ilo Eden enaj jejjet kitien. Bujen eo an ibben Abraham ear kalikar bwe Inen kallimur eo enaj itok ñan lal ilo menmenbwij eo an Abraham im eñin naj wãwen eo “ailiñ otemjej” renaj jerammõn. Bujen in ear bareinwõt kwalok bwe ro jet renaj koba ibben mõttan eo elap in Ine eo. (Jenesis 22:17, 18) Bujen Kien eo kar kõmmane ibben Israel ilo kanniek ear kwalok bwe kar karõk eo an Jehovah bwe en wõr juõn “ailiñ in pris ro.” (Exodus 19:5, 6) Bujen eo ibben David ear kwalok bwe Ine eo enaj Bõran Ailiñ eo ñan indio. (2 Samuel 7:12, 13; Sam Ko 89:3, 4) Ke bujen Kien eo ear tel Ri Jew ro ñan Messiah eo, Jehovah ear kwalok wãwen ko jet kin jejjet in kitien karõk eo an. (Dri Galetia 3:19, 24) Armij ro me renaj koba ibben mõttan eo elap in ine eo renaj ejaake “ailiñ in pris ro” me kar kanan kake im renaj  deloñ ilo “bujen ekãl” einwõt “Israel” eo ekãl, ilo jitõb.—Jeremiah 31:31-34; Dri Hibru 8:7-9. *

10, 11. (a) Ewi wãwen an kar Jehovah kwalok kin Ine eo emwij an kallimur kake? (b) Etke Nejin ej make wõt Anij ear keotak ear itok ñan lal in?

¹⁰ Ñan kajejjet kitien karõk eo an Anij, ear jejjet ien eo bwe Ine eo emwij an kallimur kake en itok ion lal. Jehovah ear jilkintok enjel Gabriel ñan jiroñ Mary bwe enaj keotak juõn nejin maan eo naj naetan Jesus. Enjel eo ear ba ñan e: “E naj laplap, im naj naetan Nejin Eo Eutiejtata: im Iroij Anij e naj lelok ñõn E tron eo an Devid jemen: Im E naj iroij ion imõn Jekõb in drio: im ailiñ eo An e jamin jemlok in drio. (Luk 1:32, 33) Ear alikarlok wõn eo kar Inen kallimur eo.—Dri Galetia 3:16; 4:4.

¹¹ Nejin Jehovah eo ej make wõt ear keotak ear aikwij itok ñan lal im bõk melejoñ eo elap. Uak eo ewãppen ñan aitwerõk eo an Satan enaj ilo pein Jesus. Enaj ke tiljek wõt ñan Jemen? Men in ear kitibuj juõn men eo ettino. Ri jilek Paul ear kamelele tokelik kin jerbal eo an Jesus: “Men eo etino ilo jerbal in Anij; Eo ar kwalok E ilo kõniek, im Jitõb e ar kamol E, im enjel ro r’ar lo E, ar kwalok kin E ñõn dri ailiñ ko, ar liki E ilo lõl, emwij bokliñlok E ilo aibujuij.” (1 Timote 3:16) Aet, ilo an kar tiljek ñan mij, Jesus ear letok uak eo emõntata ñan aitwerõk eo an Satan. Ak tibdik in melele ko jet kin men eo ettino ear nojak wõt.

“Men eo Etino an Ailiñ in Anij”

12, 13. (a) Ta juõn ian wãwen ko kin “men eo etino an ailiñ in Anij”? (b) Ta eo ekoba ilo an Jehovah kãlet juõn joñan oran armij ro renaj etal ñan lañ?

¹² Ilo juõn ian trip in kwalok nan eo an ilo Galilee, Jesus ear kwalok bwe men eo ettino ear wõr kõtan ñan Ailiñ in Messiah eo. Ear jiroñ ri kalor ro an: “Bwe lewoj ñõn kom bwe komin jela men ko retino an ailiñ in lõñ [“ailiñ in Anij,” Mark 4:11].” (Matu 13:11) Juõn wãwen kin men in ittino in ear kitibuj an Jehovah kãlet juõn “bwij erik” in 144,000 armij ro me renaj koba ibben Nejin einwõt mõttan Ine eo, ñan iroij ibben ilañ.​—Luk 12:32; Reveles̃õn 14:1, 4.

¹³ Kinke kar kõmanman armij ñan mour ijin ion lal, ear melelen ear juõn “men in kõmõnmõn ekal” an Jehovah ñan kõmman bwe jet armij ren wanliñlok ñan lañ. (2 Dri Korint 5:17) Ilo an konono einwõt juõn ian ro kar kãlet ir ñan bõk kejatdikdik in ñan mour ilañ, ri jilek Peter ear je: “En mõnõnõ Anij Jemen ar Iroij Jisõs Kraist, Eo, ilo An tiriamokake elap, E ar bar keutak kij ñõn kejatrikrik emour kin jerkakbiji an Jisõs Kraist jen ro remij, ñõn jolit eo e jamin wabõnbõn im jab etton ak mejkwun, im emwij likit e ilõñ ñõn kom.”​—1 Piter 1:3, 4.

14. (a) Ewi wãwen ro rejjab Ri Jew rar koba ilo “men eo etino an ailiñ in Anij”? (b) Etke jemaroñ melele kin “men ko re mũlõl an Anij”?

¹⁴ Bar juõn mõttan in men eo ettino kin kien Ailiñ eo me enaj itok kar ankil an Anij ñan kobaik ro rejjab Ri Jew bwe ren ibwiljin oran eo edik in armij ro renaj iroij ibben Christ ilañ. Paul ear kamelele kin wãwen in kin “jerbal” eo an Jehovah, ak wãwen lolorjake jejjet in kitien karõk eo an: “Men eo ilo ebeben ko mokta ar jab kalikare ñõn ro nejin armij, einwõt kiõ emwij kwalok e ñõn ro dri jilikan rokwojarjar, kab ro dri kanan ilo Jitõb; Eñin, bwe ro dri ailiñ ko rej dri jolit ibeir, im ilo juõn wõt enbwin, im dri bõk air kij ibeir ilo kalimur an Kraist Jisõs kin gospel.” (Dri Epesõs 3:5, 6) Melele eo kin mõttan in kin men eo ettino kar kalikare ñan “ro dri jilikan rokwojarjar.” Eindein rainin, elañe kar ejelok jibañ jen jitõb kwojarjar, jeban kar melele kin “men ko re  mũlõl an Anij.”​—1 Dri Korint 2:10; 4:1; Dri Kolosse 1:26, 27.

15, 16. Etke Jehovah ear kãlet iroij ro mõttan Christ jen ibwiljin armij ro?

¹⁵ “Jibuki eñoul im emen tausan” ro me kar lo air jutak ibben “Lam” eo ion tol Zaiõn kar “wiaik ir jen lõl,” im kar “wiaik ir jen ian armij ro, einwõt jomõkõj ñõn Anij im ñõn Lam” eo, Christ Jesus. (Reveles̃õn 14:1-4) Jehovah ear kãlet juõn ian ro nejin ilañ bwe en erom mõttan eo elap in Ine eo kar kallimur kake ilo Eden, ak etke ear kãlet ro mõttan Christ jen ibwiljin armij ro? Ri jilek Paul ear kamelele bwe oran in ewõr joñan kar “kir ir ekar ñõn An bebe,” “ekar ñõn lemnok emõn in ankil An.”​—Dri Rom 8:17, 28-30; Dri Epesõs 1:5, 11; 2 Timote 1:9.

¹⁶ Ej karõk eo an Jehovah ñan kokwojarjar ãt eo etan elap im ñan kamol an jimwe iroij bõtata eo an. Ikijen “jerbal” emeletlet, ak wãwen lolorjake men ko me ejelok en emaroñ keidi ñan e, Jehovah ear jilkintok manje eo Nejin ñan lal, ijo kar melejoñe ñan mij. Bareinwõt, Ear bebe bwe Ailiñ in Messiah eo an Nejin en koba armij ro me rar bareinwõt kamole air tiljek ñan iroij bõtata eo An mae ien rar mij.—Dri Epesõs 1:8-12; Reveles̃õn 2:10, 11.

17. Etke jemaroñ mõnõnõ bwe Christ im iroij ro mõttan rar mour einwõt armij ro mokta?

¹⁷ Jehovah ear kwalok yokwe eo an elap kin ro nejin Adam ilo an karõk bwe Nejin en itok ñan lal im ilo an kãlet ro renaj iroij ibben Nejin ilo kien Ailiñ eo jen ibwiljin armij ro. Ewi wãwen men in emaroñ wõr tokjen ñan ro jet me rar kamol air tiljek ñan Jehovah, jen Abel liktak? Kin air lotak im jolet jerawiwi im mij, armij ro rejjab wãppen rej aikwij bõk kejmour ilo enbwin im mour in Christian eo air bwe ren wãppen, ilo errã ibben ankil an Jehovah kin armij jen jinoin. (Dri Rom 5:12) Ej juõn menin kainemõn ñan aolep ro rej reimanlok ñan bõk mour indio ion lal ñan air jelã bwe King eo air enaj kwalok yokwe im tiriamokake ñan ir einwõt ear kwaloki ñan ri kalor ro an ke ear jerbal ion lal! (Matu 11:28, 29; Dri Hibru 2:17, 18; 4:15; 7:25, 26) Im elap an kõketak ir ilo air jelã bwe king im priest ro mõttan Christ renaj maan im kõrã ro retiljek me rar kate ir kin mõjno ko air make im rar iion abañ ko an mour, einwõt jej iioni!—Dri Rom 7:21-25.

Karõk eo an Jehovah Eban Likjap

18, 19. Etke nan ko an Paul ilo Dri Epesõs 1:8-11 ej alikarlok ñan kij, im ta eo jenaj etale ilo katak in tok juõn?

¹⁸ Kiõ emõnlok ad melele kin ta melelen nan ko an Paul ñan Christian ri kabit ro, jej loi ilo Dri Epesõs 1:8-11. Ear ba bwe Jehovah ear kwalok ñan ir “men eo etino kin ankil An,” bwe rar “An jolit” ibben Christ, im “emwij bebe kin [ir] mokta ekar ñõn lemnok an Eo ej jerbale men otemjej ilo bebe in ankil An.” Jej kile bwe men in ej ekkar ñan “jerbal” eo eaibujuij an Jehovah ñan kajejjet karõk eo an. Men in ej bareinwõt jibañ kij ñan melele kin etke jejjo wõt Ri Christian ro rej bed ilo Kwojkwoj in Kejota eo an Iroij rej bõk mõttan bread im wine eo.

¹⁹ Ilo katak in tok juõn, jenaj lo ta melelen Kwojkwoj in Kememej mij eo an Christ ñan Ri Christian ro me kejatdikdik eo air ej ñan mour ilañ im etke elõñ million ro renaj mour indio ijin ion lal rej aikwij lukkun itoklimo kin ta eo Kwojkwoj eo ej kõkkar kake.

[Kamelele ko itulal]

Ilo Elij

• Etke Jehovah ear kõmanman lal in im likit armij ion?

• Etke Nejin Jehovah eo ej make wõt ear keotake ear aikwij bõk melejoñ ion lal?

• Etke Jehovah ear kãlet iroij ro mõttan Christ jen ibwiljin armij ro?

[Kajitõk ko ñan katak]