Kobaik Men Ko Ilañ Im Men Ko Ion Lal
Kobaik Men Ko Ilañ Im Men Ko Ion Lal
“Ekar ñõn An lemnok emõn eo E ar bebe ilo E . . . bwe En kobaik men ko otemjej ilo Kraist, men ko i lõñ, im men ko i lõl.”—DRI EPESÕS 1:9, 10.
1. Ta “lemnok emõn” eo an Jehovah kin lañ im lal?
AINEMÕN IJOKO OTEMJEJ ILAÑ IM ILAL! Eñin karõk eo eaibujuij an Jehovah, “Anij in ainemõn” eo. (Dri Hibru 13:20) Ear kakõrmol ri jilek Paul ñan an je bwe ej “lemnok emõn” eo An “bwe En kobaik men ko otemjej ilo Kraist, men ko i lõñ, im men ko i lõl.” (Dri Epesõs 1:9, 10) Ta melelen nan ko ilo eon in me rej ukõte ‘bar kobaik?’ Ri meletlet eo kin Bible J. B. Lightfoot ear ba: “Nan kein rej kwalok kin burukuk eo ijoko otemjej ilañ im ilal, ijo ejelok jabdewõt men rej idaptõk ibben don im kõmman jebel, ak bwe aolep men ko renaj burukuk ilo Christ. Jerawiwi im mij, buromõj im likjap im eñtan, renaj jako.”
“Men ko I Lõñ”
2. Wõn “men ko ilõñ” me naj kobaik ir?
2 Ri jilek Peter ear kamelele kin kejatdikdik eo eaibujuij an Ri Christian ro remol ke ear je: “A ekar ñõn kalimur eo An, jej kõtõmene kin lõñ ko rekal im lõl ekal, eo kwojarjar ej jokwe iloan.” (2 Piter 3:13) “Lõñ ko rekal” kar kallimur kake ej jitõñlok ñan juõn kien ekãl, Ailiñ in Messiah eo. “Men ko ilõñ” me Paul ear konono kaki ilo letter eo an ñan Ri Ephesus ro naj kobaiki “ilo Kraist.” Rej mõttan kumi in armij ro ewõr joñan orair im kar kãlet ir bwe ren iroij ibben Christ ilañ. (1 Piter 1:3, 4) Christian ri kabit rein 144,000 kar “wiaik ir jen lõl,” “wiaik ir jen ian armij ro,” bwe ren iroij ro mõttan Christ ilo Ailiñ eo an ilañ.—Reveles̃õn 5:9, 10; 14:3, 4; 2 Dri Korint 1:21; Dri Epesõs 1:11; 3:6.
3. Etke jemaroñ ba bwe ri kabit ro rej ‘jijet ijo ilañ’ meñe rej bedwõt ion lal?
3 Christian ri kabit ro rar bar lotak ikijen jitõb kwojarjar ñan air erom lõmaro nejin Jehovah ilo jitõb. (Jon 1:12, 13; 3:5-7) Kinke Jehovah ear bõk ir einwõt ro ‘nejin,’ rej erom ro jatin Jesus. (Dri Rom 8:15; Dri Epesõs 1:5) Kin air eindein, meñe rej bed ion lal, rej ba kin ir bwe ear ‘kajerkak ir ibben, im kajijet ir ibben ijo ko ilañ, ilo Christ Jesus.’ (Dri Epesõs 1:3; 2:6) Rej bed ilo jikin in eutiej ilo jitõb kinke “Jitõb in kalimur Eo ekwojarjar E ar sil kom, Eo mõkõjkõj in jolit eo ar.” (Dri Epesõs 1:13, 14; Dri Kolosse 1:5) Inem, rein rej “men ko ilõñ,” me Jehovah ear kajejjet orair im aikwij kobaik ir.
Jerbal in Kakoba eo ej Jino
4. Ñããt im ewi wãwen ear jino jerbal in kakobaik “men ko ilõñ”?
4 Ekkar ñan “jerbal,” ak wãwen lolorjake men ko an Jehovah, kobaik “men ko ilõñ” ear aikwij jino “ilo ien ko rejejit.” (Dri Epesõs 1:10) Ien eo ear jejjet ilo Pentecost 33 C.E. Ilo ran eo, kar lutõk jitõb kwojarjar ion ri jilek ro im juõn kumi in ri kalor ro, maan im kõrã. (Jerbal 1:13-15; 2:1-4) Men in ear juõn kein kamol bwe bujen eo ekãl ear jino an jerbal, im ear kakõlleik jinoin an jerbal congregation eo an Christian im ailiñ eo ekãl an Israel eo ilo jitõb, “Israel an Anij.”—Dri Galetia 6:16; Dri Hibru 9:15; 12:23, 24.
5. Etke Jehovah ear kõmman juõn “ailiñ” ekãl ñan bõk jikin Israel eo ilo kanniek?
5 Bujen Kien eo kar kõmmane ibben Israel ilo kanniek ear jab kwalok juõn “ailiñ in pris ro, im ailiñ e kwojarjar” me enaj kar jerbal ñan indio ilañ. (Exodus 19:5, 6) Jesus ear jiroñ ri tel ro an kabuñ eo an Ri Jew ro: “Ij ba ñõn kom, naj bõk ailiñ in Anij jen kom, im lelok ñõn dri ailiñ rej kõmõn leen kaki.” (Matu 21:43) Ailiñ in, Israel eo ilo jitõb, ej ejaak in Christian ri kabit ro me kar bõk ir ilo juõn bujen ekãl. Ñan rein, ri jilek Peter ear je: “A kom ebeben emwij kãlete, pris ro im iroij ro, dri ailiñ rokwojarjar, armij ro an Anij wõt, bwe komin kennaneklok men ko remõn an Eo e ar kir kom jen marok im ñõn iloan maram eo An e men in bwilõñ; Ilo ien ko remotelok kom kin jab dri ailiñ, a kiõ kom dri ailiñ an Anij.” (1 Piter 2:9, 10) Israel eo ilo kanniek ear luji jerammõn eo bwe ren armij ro an Jehovah. (Dri Hibru 8:7-13) Einwõt Jesus ear kanan, jerammõn eo ejej uan kin air mõttan Ailiñ in Messiah eo kar bõke jen ir im lelok ñan 144,000 ro uan Israel ilo jitõb.—Reveles̃õn 7:4-8.
Kar Bõk Ir ilo Bujen Ailiñ Eo
6, 7. Ta bujen eo ejej uan Jesus ear kõmmane ibben ri kabit ro jatin, im ta melelen men in ñan ir?
6 Ilo boñin eo Jesus ear kõmmane Kwojkwoj in Kememej mij eo an, ear jiroñ ri jilek ro an retiljek: “A komeo, ro r’ar ber iba ilo men ko r’ar kabo Iõ kaki. Im Ij likit ñõn kom juõn ailiñ einwõt Jema e ar likit ñõn Iõ: Bwe komin mõña im irak iturin Aõ tebel ilo Aõ ailiñ; im kom naj jijõt ion tron ko, im ekajet joñoul im ruo bwijin Israel.” (Luk 22:28-30) Ijin Jesus ear konono kin juõn bujen ejej uan ear kõmmane ibben 144,000 ro jatin emwij kabit ir kin jitõb kwojarjar, ro me renaj “tiljek ñõn mij” im kamol bwe rej ‘ro rej bõk anjo.’—Reveles̃õn 2:10; 3:21.
7 Ro ilo kumi in rej karmijeteik aolep kejatdikdik ko ñan bõk mour indio ion lal einwõt armij ro ilo kanniek im bõtõktõk. Renaj iroij ibben Christ ilañ, im jijet ion throne ko ñan ekajete armij. (Reveles̃õn 20:4, 6) Jen etale kiõ eon ko jet me rej jerbal ñan ri kabit ro wõt im rej kwalok kin etke “sheep ro jet” rejjab bõk mõttan bread im wine ilo ien Kwojkwoj in Kememej eo.—Jon 10:16.
8. Ta eo ri kabit ro rej kalikar ñe rej bõk bread eo?
8 Ri kabit ro rej iion eñtan ko einwõt kar Christ, im rej mõnõnõ in mij einwõt e. Einwõt juõn uan kumi in, Paul ear ba bwe ear bojak in lelok jabdewõt men bwe en “jibarek Kraist . . . bwe in jela E, im kajur in jerkakbiji eo An, im kõmao in iñtan ko An.” Aet, Paul ear mõnõnõ in “mij” einwõt e. (Dri Pilippai 3:8, 10) Elõñ Christian ri kabit ro rar aikwij kijenmij ilo enbwinin kanniek kin “mij an Jisõs.”—2 Dri Korint 4:10.
9. Bread eo ilo ien Kwojkwoj eo ear kõkkar kin enbwin et eo?
9 Ke ear kõmmane Kwojkwoj in Kejota eo an Iroij, Jesus ear ba: “Men in enbwiniõ.” (Mark 14:22) Ear konono kin lukkun enbwinin kanniek, me ejjabto enaj kar jorrãn kin an armij ro mõn e. Bread eo ejjab uwe ear kõkkar kin enbwinin. Etke? Kinke ilo Bible, leaven ear kõkkar kin jerawiwi ak nana. (Matu 16:4, 11, 12; 1 Dri Korint 5:6-8) Jesus ear wãppen, im kanniekin ear jab jerawiwi. Enaj lelok enbwinin ewãppen einwõt juõn katok in binmour ak kein mirik. (Jon 6:51) An kõmman eindein enaj kar wõr tokjen ñan aolep Ri Christian ro retiljek, meñe kejatdikdik eo air kar ñan mour ilañ ak mour indio ilo juõn paradise ion lal.—Dri Hibru 7:26; 1 Jon 2:2.
10. Ewi wãwen ro rej bõk wine eo ilo ien Kwojkwoj in Kememej eo rej ‘kõmao in bõtõktõkin Kraist’?
10 Ikijen wine eo me Christian ri kabit ro rej bõke ilo ien Kwojkwoj eo, Paul ear je: “Kõp in jerammõn, eo kimij jare, e jab kõmao in bõtõktõkin Kraist ke?” (1 Dri Korint 10:16) Ilo wãwen et eo ro rej bõk wine eo rej ‘kõmao in bõtõktõkin Kraist’? Rejjab bõk kunair ilo lelok katok in binmour eo, kinke ir make rej aikwij bwe juõn en binmouri ir. Ikijen tõmak eo air ilo kajur in binmour kin bõtõktõkin Christ, rej bõk jeorlok bwid kin jerawiwi ko air im ej kowãnik ir kin mour ilañ. (Dri Rom 5:8, 9; Taitõs 3:4-7) Ej ikijen aorõkin bõtõktõkin Christ emwij katorloke me ej “kokwojarjar,” kajenolok, ak karreoik 144,000 iroij ro mõttan Christ jen jerawiwi bwe ren “ro dron Anij Laplap.” (Dri Hibru 10:29; Daniel 7:18, 27; Dri Epesõs 2:19) Aet, ej ikijen bõtõktõkin emwij katorloke me Christ ear “wiaik ñõn Anij ilo bõtõktõkõm armij jen bwij otemjej, im konono otemjej, im driloabjen otemjej, im ailiñ otemjej, im . . . kõmõn bwe ren kiñ im pris ro; im rej kiñ ion lõl.”—Reveles̃õn 5:9, 10.
11. Air idak wine eo ilo Kwojkwoj in Kememej eo ej kõkkar kin ta?
11 Ke Jesus ear kõmmane Kwojkwoj in Kememej mij eo an, ear lelok cup in wine eo ñan ri jilek ro an retiljek im ba: “Komin otemjej irak jen e. Bwe men in draõ dra in kalimur, eo e torlok kin elõñ ñõn jurlok jerawiwi ko.” (Matu 26:27, 28) Einwõt bõtõktõkin cow koman ko im goat ko rar kabin bujen Kien eo ikõtan Anij im ailiñ in Israel, bõtõktõkin Jesus ear kabin bujen eo ekãl me Jehovah ear kõmmane ibben Israel eo ilo jitõb, jino ilo Pentecost 33 C.E. (Exodus 24:5-8; Luk 22:20; Dri Hibru 9:14, 15) Ilo air idak wine eo me ej kõkkar kin “bõtõktõk in bujen,” ri kabit ro rej kalikar bwe emwij air deloñ ilo bujen eo ekãl im rej bõk tokjen ko jen e.
12. Ewi wãwen ri kabit ro rej baptais ilo mij eo an Christ?
12 Ej bareinwõt kakememej ri kabit ro kin bar juõn men. Jesus ear jiroñ ri kalor ro an retiljek: “Kom naj irak kõp eo Ij irak; im kom naj baptais ilo baptais eo Ij baptais.” (Mark 10:38, 39) Ri jilek Paul ear konono tokelik kin Ri Christian einwõt air “baptais ilo An [Christ] mij.” (Dri Rom 6:3) Mour eo an ri kabit ro ej juõn mour in katok. Mij eo air ej juõn katok kinke rej karmijeteik jabdewõt kejatdikdik ñan mour indio ijin ion lal. Baptais eo an Christian ri kabit rein ilo mij eo an Christ enaj dedelok ñe rej mij ilo tiljek im rej jerkakbiji einwõt jitõb ro ñan “kiñ iben” Christ ilañ.—2 Timote 2:10-12; Dri Rom 6:5; 1 Dri Korint 15:42-44, 50.
Bõk Bread im Wine
13. Etke ro me kejatdikdik eo air ej ñan mour ilal rejjab bõk bread im wine eo, ak etke rej kweloktok ilo ien Kwojkwoj in Kememej eo?
13 Kinke bõk bread im wine eo rej leto-letak ilo Kwojkwoj im Kememej eo ej kitibuj aolep men kein, ejjab ekkar an ro me kejatdikdik eo air ej ñan mour ijin ion lal ren bõk men kein. Ro me renaj mour ilal rej kile bwe rejjab uan ri kabit ro mõttan enbwinin Christ, im rejjab deloñ ilo bujen eo ekãl me Jehovah ear kõmmane ibben ro renaj iroij ibben Jesus Christ. Kinke “kõp” eo ej kõkkar kin bujen eo ekãl, ro wõt im rej mõttan bujen eo ekãl rej tellokiir ñan bõk bread im wine eo. Ro rej reimanlok ñan air bõk mour indio einwõt armij ro rewãppen ion lal iumin Ailiñ eo rejjab baptais ilo mij eo an Jesus im iroij ibben ilañ. Elañe rar bõk bread im wine eo, enaj kar kakõllan juõn men me ejjab jerbal ñan ir. Kin men in, rejjab bõki, meñe rej kwelok ilo ien Kwojkwoj eo einwõt ro rej lale. Rej kamolol kin aolep men ko Jehovah ear kõmmani ñan ir ikijen Nejin, ekoba jeorlok air bwid ion bedbed in bõtõktõkin Christ emwij katorloke.
14. Ewi wãwen ri kabit ro rej bõk kakajur ilo jitõb ñe rej bõk bread im wine eo?
14 Sil eo eliktata an oran in edik in Ri Christian ro me renaj iroij ibben Christ ilañ ebak an dedelok. Mae ien mij eo air ion lal, ri kabit rein rej bõk kakajur ilo jitõb ilo air bõk bread im wine eo. Rej eñjake air burukuk ibben ri kabit ro jeiir im jatiir maan im kõrã. Air bõk bread im wine ej kakememej ir kin eddo eo ñan air tiljek ñan mij.—2 Piter 1:10, 11.
Kobaik “Men ko I Lõl”
15. Wõn ro rar kweloktok ibben Christian ri kabit ro?
15 Jen tuiolapin yiõ ko ilo 1930, oran eo elaplok in “sheep ro jet,” me rejjab mõttan kumi in “bwij erik” ak rej kejatdikdik ñan air mour indio ion lal, rar kobalok ibben ri kabit ro. (Jon 10:16; Luk 12:32; Zechariah 8:23) Rar erom ro mõttan ‘ro jatin’ Christ retiljek, im rej jibañ ir kwalok “gospel in an ailiñ in lõñ” kin men in kennan ñan ailiñ otemjelok. (Matu 24:14; 25:40) Ilo air kõmmane menin, Christ emaroñ watõk ir einwõt “sheep” ro an im likit ir “i anbijmaroñõn” ñe enaj itok in ekajete ailiñ ko. (Matu 25:33-36, 46) Ikijen tõmak ilo bõtõktõkin Christ, renaj ejaak ‘jar eo elap,’ me rej deor jen “iñtan eo elap.”—Reveles̃õn 7:9-14.
16. “Men ko i lõl” rej kitibuj wõn ro, im ewi wãwen aolep rein remaroñ bõk ien eo emõn ñan air erom “ro nejin Anij”?
16 Sil eo eliktata an 144,000 enaj kõmman bwe ren maroñ kõtlok “kõto ko” in kokkure nae jukjuk im bed eo enana an Satan ion lal. (Reveles̃õn 7:1-4) Iumin Juõn Thousand Yiõ in Iroij eo an Christ im king im priest ro mõttan, juõn joñan elap in armij ro renaj jerkakbiji renaj koba ibben jar eo elap. (Reveles̃õn 20:12, 13) Rein renaj bõk ien eo emõn ñan air erom ro me King in Messiah eo, Christ Jesus, enaj iroij ioir. Ilo tujemlokin Juõn Thousand Yiõ in Iroij eo, aolep “men ko i lõl” renaj bõk melejoñ eo eliktata. Ro retiljek naj bõk ir einwõt “ro nejin Anij” ion lal.—Dri Epesõs 1:10; Dri Rom 8:21; Reveles̃õn 20:7, 8.
17. Ewi wãwen enaj jejjet kitien karõk eo an Jehovah?
17 Ilo wãwen in, ikijen “jerbal,” ak wãwen eo emeletlet ñan lolorjake men ko, Jehovah enaj kajejjet karõk eo an ñan “kobaik men ko otemjej ilo Kraist, men ko i lõñ, im men ko i lõl.” Aolep men in kõmanman ko remeletlet ilañ im ilal naj kobaik ir ibben don ilo ainemõn ibelakin lañ im lal, im renaj mõnõnõ in kõttãik ir ñan iroij bõtata eo ewãnik an Anij eo elap me ej kajejjet kallimur ko an, Jehovah.
18. Ewi wãwen ri kabit ro im ro mõttair renaj bõk tokjen jen air bed ilo Kwojkwoj in Kememej eo?
18 Enaj lap an kakajur tõmak eo an oran eo edik in ri kabit ro im elõñ million sheep ro jet mõttair ñan kwelok ibben don ilo April 12, 2006! Renaj kememe Kwojkwoj in Kememej mij eo an Christ, einwõt Jesus ear kakien: “Komin kõmõn men in ilo ememej Iõ.” (Luk 22:19) Aolep ro rej kwelok rej aikwij kememej kin ta eo Jehovah ear kõmmane ñan ir ikijen Nejin ejitenburu ibben, Christ Jesus.
Ilo Elij
• Ta karõk eo an Jehovah kin men ko ilañ im men ko ion lal?
• Wõn ro rej “men ko ilõñ,” im ewi wãwen kar kakobaik ir?
• Wõn ro rej “men ko i lõl,” im ta kejatdikdik eo air?
[Kajitõk ko ñan katak]
[Bo̦o̦k eo ilo peij 25]
“Enbwinin Kraist”
Ilo 1 Korint 10:16, 17, ke Paul ear bwebwenato kin men eo eaorõk ñan ri kabit ro jatin Christ, ear konono kin “enbwin” eo ilo juõn wãwen ejej uan. Ear ba: “Bred eo kim ruje, e jab kõmao in enbwinin Kraist ke? Bwe kij jelõñ jej juõn bred, juõn enbwin: bwe kij otemjej bõk mõtõn bred wõt juõn.” Ñe Christian ri kabit ro rej bõk bread ilo ien Kwojkwoj eo, rej kwalok kin burukuk eo air ilo congregation eo an ri kabit ro, eo ej einwõt juõn enbwin im Christ ej bõran.—Matu 23:10; 1 Dri Korint 12:12, 13, 18.
[Pija ko ilo peij 25]
Etke ri kabit ro wõt rej bõk bread im wine eo?
[Pija eo ilo peij 27]
Ikijen jerbal ak wãwen lolorjake eo an Jehovah, aolep men in kõmanman ko an ilañ im ilal renaj burukuk ibben don