Kwoj Ke Einwõt Juon Wijki Lagani Auna?

ILO juõn bukwon ej bed iturin Port Moresby, ilo Papua New Guinea, ruo ri kwalok rej rol ñan mweo imwiir elikin airro kar kwalok nan. Ke erro ej etal, rej lo juõn wijki aibujuij. “Reilok mõk, juõn lagani auna!” leo eritto ear ba. Ej reilok ñan likao eo juõn, im ba: “Melelen ãt in, ‘wijki in aolep yiõ.’ Wijki in eoktak jen wijki ko ijoko jet kinke aolep yiõ ej wõtlok aolep bwilikõn im einwõt emij. Bõtab, ñe ej wũt, ebar mour, im kalle elõñ wit ko, im ebar walok an aibujuij.”

Jemaroñ katak jen wijki lagani auna, me ekkã naetan royal poinciana ak flame tree ilo kajin English. Ekkar ñan jet ri meletlet ro, ej juõn ian wijki ko lalem ilo lal in me rej make wõt im aibujuij wit ko leen. Meñe ej wõtlok wit ko im bwilikin ilo ien ko ejjab wũt, wijki in ej kakon elõñ den. Okran ebin im emaroñ eddek ibulen dekã ko iumin bũdej. Menin ej kõmman bwe en bin wõt im jab makitkit ñe ej wõr kõto ko relap. Einwõt ba, ej eddek ilo an kõmman oktak ko ekkar ñan wãwen ko rebin.

Jemaroñ iion wãwen ko me rej melejoñe joñan tõmak eo ad. Ta eo enaj jibañ kij bwe jen kijenmij? Einwõt lagani auna eo, jemaroñ bõk im debij dennin mour eo Nan in Anij. Jej aikwij bareinwõt debdeb wõt im bin ñan ‘ad ejman,’ Jehovah, im bareinwõt dolul eo an. (2 Samuel 22:3) Emol, lagani auna eo ej juõn kein kakememej emõn kinke meñe nana ej bed ibelakid, jemaroñ kejbãrok wõt ad aibujuij im kajur einwõt Christian elañe jej kate wõt kij ñan bõk jibañ ko jen Jehovah. Ilo ad kõmmane menin, jenaj “jolit men in kalimur ko” ear kõmmani, ekoba kallimur eo kin mour indio.​—Dri Hibru 6:12; Reveles̃õn 21:4.