Kameleleik Kakõlle ko Ej juõn Men Eaorõk!

“Ilo jinoin iar lemnak bwe ladik eo nejim Andreas ej baj metak wõt bõran. Bõtab ear makoko in mõñã im ear lukkun lap an bwil. Ear laplok an metak bõran, im iar jino inebata. Ke leo beleiõ ear roltok ñan mweo, kim ar bõklok Andreas ñan doctor eo an. Ear kakõlkõle wãwen ko ibben im jilkinlok Andreas ñan hospital eo. Abañ eo ear laplok an kauwatata jen metak bõr. Andreas ear bõk nañinmij in meningitis. Rar kamadmõde nañinmij eo an im ejjab to tokelik ear bar ejmour.”​—Gertrud, juõn jinen ilo Germany.

BWEBWENATO in an Gertrud bõlen elõñ ro jemen im jinen emwij air iion e. Rej lo kakõlle ko rej kalikar bwe ajiri eo nejiir emaroñ nañinmij. Meñe ejjab aolep nañinmij ekauwatata, ro jemen im jinen rejjab aikwij kajekdon kakõlle ko kin nañinmij ibben ajiri ro nejiir. Lale kakõlle ko im emmakit ilo jimwe emaroñ kõmman juõn oktak elap. Ej juõn men elap an aorõk.

Menin emol ilo wãwen ko jet ijellokin ejmour. Juõn wanjoñok ej kin jorrãn eo jen tsunami (no elap) eo ilo December 2004 ilo jikin ko rej kabol Indian Ocean eo. Dolul ko ilo jikin ko einwõt Australia im Hawaii rar lo juõn makitkit lal elap ilo tu eañ in Sumatra im rar lolok iman kin joñan kauwatata eo enaj kar walok elikin jorrãn in. Bõtab, ear ejelok dolul ko ilo jikin in ñan an bõk ak lelok nan in kakkõl ko ñan armij ro rej bed ilo jikin kein rekauwatata. Tokjen men in, elõñlok jen 220,000 armij rar mij.

Kakkõle ko Elaplok Air Aorõk

Ke Jesus Christ ear bed ion lal, ear katakin ri roñjake ro an kilen lale kakõlle ko im jerbal ekkar ñani. Ear konono kin juõn men elaplok an aorõk. Bible eo ej kwalok: “Im Parisi ro im Sadusi ro r’ar itok im kõnan kabo E, im rej kajitõk iben bwe En kwalok ñõn ir kakõle jen lõñ. E uak im ba ñõn ir, ‘Ke ejota, kom ba, e naj emõn lõñ: bwe ekilmir kõro. Im ke ejiboñ, E naj nana lõñ ranin; bwe ekilmir kõro im tap. Kom jela katujo ilõñ; a kom jab maroñ jela kakõle ko ilo ien ko.’”​—Matu 16:1-3.

Ilo an ba kin “kakõle ko ilo ien ko,” Jesus ear kalikar bwe ri roñjake Ri Jew ro ilo  ebeben eo kein kajuõn ren kar kile aorõkin ien ko rar bed ie. Mõttan jidik juõn jorrãn elap enaj kar itok ion lal eo an Ri Jew ro me enaj jelet ir aolep. Jet ran ko mokta jen an mij, Jesus ear konono ñan ri kalor ro an kin juõn bar kakõlle—kakõlle eo kin an naj bed. Ta eo ear ba ilo ien eo ej lukkun aorõk ñan kij aolep rainin.