“Komin Ekil”​—Awa In Ekajet Eo Emottok!

Kamelele ko ilo katak in rej wawa ion brochure eo Keep on the Watch! (Komin Ekkõl Wõt) me rar kwalok e ilo kwelok ko relap ibelakin lal ilo yiõ ko 2004/05.

“Komin ekil; bwe kom jaje ilo ran õt Iroij e naj itok.”​—MATU 24:42.

1, 2. Jesus ear keidi itok eo an ñan ta?

 TA EO kwonaj kar kõmmane elañe kwar jelã bwe juõn ri kwot ear bojak in kwot jen moko ilo bukwon eo am? Ñan kejbãrok jitenburu ro am im men ko mweiõm, kwonaj kar ekkõl wõt. Kwonaj kõmman eindein kinke kwoj jelã bwe juõn ri kwot ejjab kejelãik armij kin ñããt eo enaj itok. Jen an eindein, ej ajãdikdiktok ilo ien eo jejjab kõtmene kake.

² Elõñ alen, Jesus ear kajerbal wãwen ko an juõn ri kwot einwõt juõn wanjoñok. (Luk 10:30; Jon 10:10) Ikijen men ko renaj walok ilo ien eo ien jemlokin im renaj tellok ñan ien eo enaj itok in ekajete armij, Jesus ear kwalok nan in kakkõl in: “Komin ekil; bwe kom jaje ilo ran õt Iroij e naj itok. A komin jela men in, elañe ãtõk in mweo e ar jela ilo mmij õt dri kwot ej itok, e naj kar ekil, im jamin kar kõtlok bwe en rupe imõn.” (Matu 24:42, 43) Inem Jesus ear keidi itok eo an ñan ien eo juõn ri kwot ej itok—ilo ien eo jejjab kõtmene kake.

3, 4. (a) Bokake nan in kakkõl eo an Jesus kin itok eo an ej kitibuj ta? (b) Ta kajitõk ko rej bõkmantak?

³ Wanjoñok in ear jejjet, kinke ejelok jabdewõt armij ejelã kin ran et eo Jesus enaj kar itok. Moktalok, ilo ejja kanan in wõt, Jesus ear ba: “A ran eo im auõ eo ejelok juõn e jela kake, im jab enjel ro i lõñ, jab Nejin, a Jema wõt.” (Matu 24:36) Inem, Jesus ear rejañ ro rar roñjake e: “Kin men in komin bareinwõt pojõk: bwe ilo auõ komij jab lemnok, Nejin armij ej itok.” (Matu 24:44) Ro rar bokake nan in kakkõl in an Jesus renaj kar bojak wõt, im emmakit ilo jimwe, jekdon ñããt eo enaj itok einwõt Eo Ej Kajejjet Nan in Ekajet eo an Jehovah.

⁴ Jet kajitõk ko raorõk rej bõkmantak: Nan in kakkõl eo an Jesus ej ñan ri lal in wõt ke, ak Ri Christian ro rej aikwij “ekil” bareinwõt? Etke eaorõk bwe jen “ekil,” im ej kitibuj ta?

Juõn Nan in Kakkõl ñan Wõn?

5. Ewi wãwen ad jelã bwe nan in kakkõl in “komin ekil” ej jerbal ñan Ri Christian ro remol?

⁵ Elukkun mol bwe itok eo an Iroij eo enaj einwõt juõn ri kwot ñan armij ro an lal, me rej kajekdon nan in kakkõl eo kin jorrãn eo ej itok. (2 Piter 3:3-7) Bõtab, ta kin Ri Christian ro remol? Ri jilek Paul ear jejelok ñan ri tõmak ro mõttan: “Bwe kom kanuij jela bwe ran eo an Iroij ej itok einwõt dri kwot ilo boñ.” (1 Dri Tessalonika 5:2) Ejelok bere bwe “ran eo an Iroij” ej itok wõt. Ak men in ej kadiklok ke aikwij eo ñan ad ekil? Lale bwe Jesus ear ba ñan ri kalor ro an: “Ilo auõ komij jab lemnok, Nejin armij ej itok.” (Matu 24:44) Moktalok,  ke ear rejañ ri kalor ro an bwe ren bukõt mokta Ailiñ eo, Jesus ear kakkõl ir: “Komin pojõk bareinwõt: bwe Nejin armij E naj itok ilo auõ eo ñe kom jab lemnok kake.” (Luk 12:31, 40) Alikar bwe Jesus ear lemnak kin ri kalor ro an ke ear kakkõl: “Komin ekil” wõt?

6. Etke jej aikwij “ekil” wõt?

⁶ Etke jej aikwij “ekil” im “pojõk”? Jesus ear kamelele: “Ien eo ruo armij re naj ber ilo jikin kallip; naj bõk juõn, im likit juõn. Ruo kõra re naj irir kin ken irir; naj bõk juõn, im likit juõn.” (Matu 24:40, 41) Ro rej bojak naj “bõk” ak lomor ir, ñe ri nana ro renaj jako. Ro jet “naj likit” ir bwe ren jorrãn kinke rar jibadõk juõn wãwen mour ekibbon. Emaroñ koba ro me rar bõk meram jen Anij mokta ak rar jab ekkõl wõt.

7. Ad jab jelã kin ñããt eo ien jemlokin, ta eo ej kõtlok bwe jen kõmmane?

⁷ Ad jab lukkun jelã kin ñããt eo ien jemlokin jukjuk im bed in emor enaj walok ej letok juõn ien emõn ñan kalikar bwe jej karejar ñan Anij kin juõn buru emol. Etke jej ba eindein? Jet rej lemnak bwe etto an itok jemlokin. Ekaburomõjmõj bwe, jet ri Christian rej lemnak rot in, rar kõmman bwe kijejeto eo air kin jerbal eo an Jehovah en mololok. Ak, ke jaar wujleplok mour eo ad, jaar bojak in lelok aolepen aad ñan Jehovah ñan karejar ñan e. Ro rejelã kajjen Jehovah rej jelã bwe ejjab buñburuen elañe jej kõttar mae ien jemlokin inem jerbal ilo kijejeto ñan e. Ej lo ta eo ej bed ilo buruõd.​—1 Samuel 16:7.

8. Ewi wãwen yokwe Jehovah ej kamakit kij bwe jen ekkõl wõt?

⁸ Kinke jej yokwe Jehovah kin aolepen buruõd, ekanuij lap ad lañliñ ñan kõmanman ankil an. (Sam Ko 40:8; Matu 26:39) Im jekõnan karejar ñan Jehovah ñan indio. Kejatdikdik in ejañin diklok kinke eaetoklok jidik ad kõttar mae ien ej itok jemlokin. Men eo eaorõktata, jej ekkõl wõt kinke jej kijoror wõt kin ta eo ran eo an Jehovah enaj kõmmane ñan kajejjet kitien karõk eo an. Kõnan eo ad ñan kabuñburuen Anij ej kamakit kij ñan jerbale nan in kakabilek ko ilo Nan eo an im likit mokta Ailiñ eo an ilo mour eo ad. (Matu 6:33; 1 Jon 5:3) Jen lale kin ewi wãwen ad ekkõl wõt enaj jelet bebe ko ad im wãwen mour eo ad jen ran ñan ran.

Ta Eo Kwoj Kõmmane kin Mour Eo Am?

9. Etke ewõr juõn aikwij ekaiuriur ñan armij ro ilo lal in ñan air kile ta melelen ien kein ad?

⁹ Elõñ armij rainin rej kile bwe abañ ko rekauwatata im men in kailbõkbõk ko rej walok ran otemjej, im rejjab mõnõnõ kin ta eo rej make kõmmane ilo mour eo air. Bõtab, relukkun jelã ke kin ta melelen wãwen ko rej loi ijin ion lal? Rej jelã ke bwe jej bed ilo “ien jemlokin”? (Matu 24:3) Rej kile ke bwe lemnak ko rekibbon, lej, im nana rej jededlok iaolepen lal rej kalikar bwe ien kein rej “ran ko eliktata”? (2 Timote 3:1-5) Ewõr juõn aikwij ekaiuriur ñan kile ta aorõkin men kein aolep im ñan lemnak kin ta eo rej kõmmane kiõ kin mour eo air.

10. Ta eo jej aikwij kõmmane bwe jen ekkõl wõt?

¹⁰ Ta kin kij? Ran otemjej jej aikwij kõmman bebe ko rej kitibuj jerbal ko ad, ejmour eo ad, im kabuñ eo ad. Jej jelã kin ta eo Bible ej ba, im jej kate kij ñan jerbale ilo mour eo ad. Kin men in, jej aikwij kajitõk ilo buruõd: ‘I ar kõtlok ke bwe inebata ko an mour ren kamad iõ jen aõ jibadõk mejenkajjik ko ilo jitõb? Ij kõtlok ke bwe katak ko im lemnak ko an lal, ren tel iõ ñan kãlet mejenkajjik ko aõ?’ (Luk 21:34-36; Dri Kolosse 2:8) Jej aikwij wõnmanlok im kwalok ad liki Jehovah kin aolepen buruõd im jab atartar ion lemnak ko ad make. (Jabõn Kennan Ko 3:5) Ilo wãwen in, jenaj debij “mour eo emol.”​—1 Timote 6:12, 19.

11-13. Ta eo jemaroñ katak jen wanjoñok ko rar walok (a) ilo ran ko an Noah? (b) ilo ran ko an Lot?

¹¹ Elõñ wanjoñok ko ilo Bible remaroñ jibañ kij ñan ekkõl wõt. Lemnak kin ta eo ear  walok ilo ran ko an Noah. Elõñ yiõ ko lok iman, Anij ear kakkõl armij ro. Ak Noah im family eo an wõt rar ekkõl im bojak. (2 Piter 2:5) Ikijen men in, Jesus ear ba: “Im einwõt ran ko an Noa, e naj ein drein an Nejin armij itok. Bwe einwõt ilo ran ko mokta jen ibij liplip eo, r’ar mõña im irak, r’ar belele im lelok bwe ren belele, ñõn ran eo Noa e ar dreloñ iloan wa eo. Im re jaje ñõn ter eo ibij liplip ej itok, im bõklok ir otemjej; e naj ein drein an Nejin armij itok.” (Matu 24:37-39) Ta eo jemaroñ katak jen menin? Elañe jabdewõt iad ej kõtlok bwe inebata ko—ak men ko jej kõmmani jen ran ñan ran—ren kautameik kij jen ad kõmmani jerbal ko ilo jitõb me Anij ej rejañ kij ñan likit mokta ilo mour eo ad, jej aikwij lukkun lemnak kin ta wãwen mour eo ad.​—Dri Rom 14:17.

¹² Bareinwõt, lemnak kin ran ko an Lot. Jikin kwelok in Sodom, ijo me Lot im family eo an rar jokwe ie, kar juõn jikin emweie ak ear lukkun etton mwilin armij ro ie. Jehovah ear jilkintok enjel ro an ñan kokkure jikin kwelok in. Enjel ro rar rejañ Lot im family eo an bwe ren ko jen Sodom im jab reiliklok. Elikin an enjel ro rejañ ir, rar illok jen jikin kwelok eo. Bõtab, ear bin an lio belen Lot jolok lemnak ko an kin mweo imõn ilo Sodom. Kin an kiblia, ear reiliklok, kin men in ear mij. (Jenesis 19:15-26) Ilo kõkkar, Jesus ear kakkõl: “Komin kememej lio belen Lot.” Kwoj bokake ke nan in kakkõl in?​—Luk 17:32.

¹³ Ro rar bokake nan in kakkõl ko rar mour wõt. Kar eindein Noah im family eo an im Lot im ledik ro nejin. (2 Piter 2:9) Ñe jej kalmenlokjen kin wanjoñok kein, jej bõk rejañ bareinwõt jen nan ko ie ikijen wãwen eo ro rej yokwe wãnik rej bõk lomor. Men in ej kobrak buruõd kin kejatdikdik ko jemaroñ liki bwe Anij enaj kajejjet kitien kallimur eo an kin “lõñ ko rekal im lõl ekal” me “kwojarjar [enaj] jokwe iloan.”—2 Piter 3:13.

‘Awa in Ekajet Eo Emottok’!

14, 15. (a) “Auõ” in ekajet eo ej koba ta? (b) ‘Mijak Anij im lelok aibujuij ñan e’ ej kitibuj ta?

¹⁴ Ñe jej ekkõl wõt, ta eo jemaroñ kõtmene kake? Book in Reveles̃õn ej kwalok kin buñten nee ko Anij ear kõlajraki ñan kajejjet kitien karõk ko an. Elañe jekõnan kamol bwe jej bojak wõt, jej aikwij jerbal ekkar ñan buñten nee kein. Ilo alikar nan in kanan in ej kamelele kin ta men ko renaj waloktok ilo “ran in Iroij” eo, me ear jino ke Christ ear bõk throne eo ilo 1914. (Reveles̃õn 1:10) Reveles̃õn ej kareilok kij ñan juõn enjel eo kar lelok ñan e “gospel ej in drio, bwe en kwalok e.” Ear kwalok ilo juõn ainikien elap im ba: “Komin mijõk Anij im lelok aibujuij ñõn E, bwe auõ in ekajet eo An emottok.” (Reveles̃õn 14:6, 7) “Auõ” in ekajet in ej juõn ien ekadu, im ej kobaik jimor nan in kejelã eo im ien eo ñan kajejjet kitien ekajet eo kar kwalok kake ilo kanan in. Jej bed ilo ien eo kiõ.

¹⁵ Kiõ, mokta jen jemlokin ien ekajet in, jej aikwij: “Mijõk Anij im lelok aibujuij ñõn E.” Ta eo men in ej kitibuji? Mijak Anij ilo jimwe en kar kamakit kij ñan illok jen nana. (Jabõn  Kennan Ko 8:13) Elañe jej kautiej Anij, jenaj bokake e. Jejamin kõtlok bwe makitkit ko jet ren kamad kij jen ad keini read Bible ran otemjej. Jejamin kadiklok aorõkin nan in kakabilek eo an ñan ad bed ilo kwelok ko an Christian. (Dri Hibru 10:24, 25) Jenaj kaorõk jerammõn eo ñan ad kwalok kin news eo emõn kin Ailiñ eo an Anij im kõmmane ilo kijejeto. Jenaj liki Jehovah ien otemjej im kin aolepen buruõd. (Sam Ko 62:8) Kinke jej kile bwe Jehovah ej Iroij Bõtata eo ijoko otemjej ilañ im ion lal, jej kautiej e ilo ad mõnõnõ in kõttãik kij ñan e einwõt Iroij eo ilo mour eo ad. Kwoj lukkun mijak ke Anij im lelok aibujuij ñan e ilo wãwen kein?

16. Etke jemaroñ ba bwe nan in ekajet eo nae Babylon Elap ilo Reveles̃õn 14:8 emwij an jejjet kitien?

¹⁶ Reveles̃õn chapter 14 ej wõnmanlok im kwalok kin men ko jet renaj walok ilo awa in ekajet eo. Ej konono mokta kin Babylon eo Elap, ak aolep kabuñ ko rewan ion lal: “Im bar juõn enjel ken ka ruo e ar lore im ba, Ebuñ, ebuñ Babilõn elap.” (Reveles̃õn 14:8) Aet, ekkar ñan lemnak eo an Anij, emwij an Babylon Elap buñ. Ilo yiõ eo 1919, ri kabit ri karejar ro an Jehovah rar anemkwoj jen air kamakoko ñan katak im manit ko Babylon eo elap ear kajerbali ñan kajibokweik armij ro im ailiñ ko iumin elõñ buki yiõ ko. (Reveles̃õn 17:1, 15) Jen ien eo mantak rar kate ir ñan kowõnmanlok kabuñ eo emol. Jen ien eo rar kwalok kin news eo emõn kin Ailiñ in Anij ibelakin lal.​—Matu 24:14.

17. Ta eo jej aikwij kõmmane ñan diojtok jen Babylon eo Elap?

¹⁷ Ebar wõr men ko jet rekoba ilo nan in ekajet eo an Anij nae Babylon eo Elap. Ejjabto im jeebeplok eo eliktata enaj itok. (Reveles̃õn 18:21) Eñin unin, Bible eo ej rejañ armij ro ijoko otemjej: “Komin drioijtok jen e [Babylon eo Elap] . . . bwe komin jab bõk jen men in kaiñtan ko an.” (Reveles̃õn 18:4, 5) Ewi wãwen ad maroñ diojtok jen Babylon eo Elap? Ej kitibuj elõñlok men ko jen ad baj illok jen kabuñ ko rewan. Katak ko an Babylon eo Elap rej ekkejel ibben elõñ kwojkwoj im manit ko rebuñbuñ, lemnak in anemkwoj ikijen belele ko rewan, men in kamõnõnõ ko einwõt anijnij, im manit ko eierlok wõt. Ñan ekkõl wõt, eaorõk bwe kõmman im kõnan ko ilo buruõd, ren kamol bwe jej etolok jen Babylon eo Elap ilo wãwen otemjej.

18. Ekkar ñan Reveles̃õn 14:9, 10, ta eo Ri Christian ro me rej ekkõl im bojak wõt rej kejbãrok ir jen e?

¹⁸ Ilo Reveles̃õn 14:9, 10, ej kamelele kin bar juõn men enaj walok ilo ‘awa in ekajet eo.’ Bar juõn enjel ej ba: “Elañe jabrewõt armij ej kabuñ ñõn kiru eo, im men in e an, im bõk kakõlen eo ion dremõn ak pein, E naj irak wain in illu an Anij emwij kapoj im jab kãreike ilo kõp in illu eo An.” Etke? “Kiru eo, im men in e an” rej kõkkar kin wãwen iroij eo an armij, me ejjab kile iroij bõtata eo an Jehovah. Ri Christian ro me rej ekkõl im bojak wõt rej kejbãrok ir jen air bo ak bõk kakõllan kidu eo, ilo lemnak ak kõmman ko air, bwe rej karejar ñan ro rej jumae iroij bõtata  eo an Anij eo emol, Jehovah. Ri Christian ro rej jelã bwe Ailiñ eo an Anij emwij an jutak ilo lañ, im enaj bõktok jemlok ñan aolep kien ko an lal, im enaj make bed ñan indio.—Daniel 2:44.

Kwon Jab Luji Jitõb in Ekaiuriur Eo!

19, 20. (a) Ñe jej ebaktok tujemlokin ran ko eliktata, ta eo jej jelã bwe Satan enaj kõmmane? (b) Ta eo jen beek ñan ad kõmmane?

¹⁹ Ñe jej ebaktok jemlokin ran ko eliktata, ijjibed im men in kabo ko renaj laplok. Toan wõt ad bed ilo jukjuk im bed in enana me jej eñtan kin mour eo ad ejjab wãppen, elõñ abañ ko jenaj jelmaiki. Abañ kein rekoba, nañinmij, bwijwõlã, mij eo an ro rejitenburu, lõkatip kin men ko armij ro rej kõmmani nae kij, buromõj kin an armij jab itoklimo kin jerbal eo ad ñan kwalok nan kin Nan in Anij, im men ko eierlok wõt. Kememej bwe Satan ekõnan kajerbal inebata ko jej jelmaiki ñan kabwer kij—ñan kabõjrak ad kwalok kin new eo emõn ak bwe en bõjrak ad mour ekkar ñan Kien ko an Anij. (Dri Epesõs 6:11-13) Kiõ, ejjab juõn ien emõn ñan ad kakije ilo jitõb!

²⁰ Jesus ear jelã bwe jenaj jelmae elõñ melejoñ ko renaj kabwer kij, inem ear kakabilek kij: “Inem komin ekil; bwe kom jaje ilo ran õt Iroij e naj itok.” (Matu 24:42) Inem, jen ekkõl im bojak wõt im lale tu ia jej bed ie ilo tõrein. Jen ekkõl wõt nae aujid ko an Satan me remaroñ kabañ ak kabwer kij. Jen beek ilo buruõd bwe jen kalaplok kijejeto eo ad ñan kwalok kin news eo emõn kin Ailiñ eo an Anij. Aet, jen debij juõn jitõb ekaiuriur im bokake nan in kakkõl eo an Jesus: “Komin ekil.” Ilo ad kõmman eindein, jenaj nebar Jehovah im jenaj ibwiljin ro renaj bõk jerammõn ko an ñan indio.

Ewi Wãwen Kwonaj Uak?

• Ewi wãwen ad jelã bwe nan ko an Jesus bwe jen “ekil” wõt ej jerbal ñan Ri Christian ro remol?

• Ta wanjoñok ko kin kakkõl ilo Bible rej jibañ kij ñan “ekil” wõt?

• Ta in awa in ekajet eo, im ta eo jej aikwij kõmmane mokta jen an naj jemlok?

[Kajitõk ko ñan katak]

[Pija eo ilo peij 9]

Jesus ear keidi itok eo an einwõt ñe juõn ri kwot ej itok

[Pija eo ilo peij 10]

Jeebeplok eo an Babylon eo Elap Ej Ebak

[Pija ko ilo peij 11]

Jen beek ilo buruõd bwe jen kalaplok kijejeto eo ad ñan kwalok nan