Kwoj Ke “Mweie Ñõn Anij”?

ILO aolepen parable ko an Jesus Christ, ear wõr juõn kin ri mweie eo. Kin an kõnan bwe en emõn ilju im jeklaj eo ñan e make, ri mweie eo ear bebe in kalek moko relaplok. Bõtab, ilo wanjoñok eo an Jesus, kar naetan leo “kwo bwebwe.” (Luk 12:16-21) Jet ukok ko in Bible rej bareinwõt kajerbal nan in “bwebwe.” Etke nan in ekajet eo nae e ear eddo?

Alikar, ri mweie in ear jab kobaik Anij ilo bebe ko an; bareinwõt ear jab lelok nebar ñan Anij kin an kõmman bwe ene en kadõk leen. (Matu 5:45) Jen menin, ear ba: “Aõ, elõñ mweiuk ko mweiõm emwij pojõk ñõn elõñ yiõ; kwon kakije, mõña, irak im lõñliñ.” Aet, ear lemnak bwe jibadbad ko an bwe en mweie renaj kar kejbãroke einwõt juõn “worwor e utiej.”​—Jabõn Kennan Ko 18:11.

Ilo an kakkõl nae jitõbõn utiej buru in, ri kalor eo James ear jeje: “Komin lale mõk, komeo komij ba: ‘Rainin ak ilju kim naj etal ñõn jikin kwelok en, im bed ijo iomin juõn yiõ, im wia im jibarek mweiuk ko,’ Ijoke kom jaje ta eo e naj walok ilju. Ta ami mour? Komij einwõt tap eo ej walok jirik ien inem ej monlok.”​—Jemes 4:13, 14.

Emol nan kein, kar ba ñan ri mweie eo ilo parable eo an Jesus: “Kwo bwebwe, boñinin naj kajitõk ibõm kin am. Inem e naj an wõn men ko kw’ar kapoji?” Einwõt tap eo ej jakolok, ri mweie eo enaj jako mokta jen an naj lo an jejjet kitien kõtõbar ko an. Jej melele ke kin katak in? Jesus ear ba: “Ein drein eo ej likit mweiuk ko mweien ñõn e wõt, im e jab mweie ñõn Anij.” Kwoj ke “mweie ñõn Anij”?