Jehovah Ad Shepherd

“Jeova aõ S̃epherd, I jamin aikwij.”​—SAM KO 23:1.

1-3. Etke ejjab juõn men in bwilõñ bwe David ear keidi Jehovah ñan juõn ri lale sheep?

 ELAÑE rar kajitõk ibbam ñan kwalok kin ewi wãwen Jehovah ej lale armij ro an, ta eo kwonaj kar ba? Ikijen kejbãrok eo an ejoij kin ri karejar ro an retiljek, ta eo kwonaj kar keidi e ñan e? Elõñlok jen 3,000 yiõ ko remotlok, King David ear jeje ilo juõn sam juõn kamelele eaibujuij kin Jehovah, ilo an kajerbal juõn wanjoñok ear bõke jen jerbal eo an ilo jinoin mour eo an.

² Ke ear juõn likao, David ear juõn shepherd ak ri lale sheep, inem ear jelã kin wãwen kejbãrok sheep. Ear jelã bwe sheep, elañe ejelok ej lale, ebidodo air jebwãbwe im ri kwot ro im men in mour ko rawia remaroñ bõki. (1 Samuel 17:34-36) Elañe ejelok juõn ri lale sheep ñan kejbãrok ir, rejjab maroñ lo juõn melaj elõñ ujoj ko ie. Ke ear ritto, ejelok bere bwe David ear emlok tok awa ko ear joloki ñan tel, kejbãrok, im najidik sheep ko.

³ Ejjab juõn men in bwilõñ bwe David ear lemnak kin jerbal in ri lale sheep ke ear kwalok kin wãwen an Jehovah kejbãrok armij ro an. Sam 23, me David ear jeje kake, ej jino kin nan kein: “Jeova aõ S̃epherd, I jamin aikwij.” Jen lale etke ejejjet nan kein. Inem, ilo ad kajerbal Sam 23, jenaj lale ilo wãwen et ko Jehovah ej kejbãrok ri kabuñ ro an einwõt juõn ri lale sheep ej kejbãrok sheep ko an.​—1 Piter 2:25.

Juõn Wanjoñok Ejejjet

4, 5. Ewi wãwen Bible eo ej kwalok kin wãwen sheep ko?

⁴ Bible eo ej kajerbal elõñ title ko ñan jitõñlok ñan Jehovah, ak nan in “Shepherd” elaptata an kwalok kin an joij. (Sam Ko 80:1) Bwe en emõnlok ad melele kin etke ejejjet ñan naetan Jehovah juõn Shepherd, jej aikwij jelã kin ruo men ko: mokta, wãwen sheep ko im kein karuo, eddo ko im kadkad ko kadkadin juõn shepherd emõn.

⁵ Emakijkij an Bible eo konono kin wãwen sheep ko, im ej kwalok kin ir bwe rebojak in emmakit ñan yokwe eo an shepherd eo (2 Samuel 12:3), rejjab wõtan (Aiseia 53:7), im rejjab maroñ jojomar ir make. (Micah 5:8) Juõn ri jeje eo ear lale sheep iumin elõñ yiõ ko ear kile: “Sheep rejjab ‘kejbãrok ir make’ einwõt jet rej lemnak. Elaplok air aikwiji juõn bwe  en kejbãrok im lale ir, jen jabdewõt ian menin mour ko jet.” Ñan air mour, sheep kein rej aikwiji juõn shepherd ej yokwe ir.​—Ezekiel 34:5.

6. Ewi wãwen an juõn Bible dictionary kamelele kin mour eo an juõn shepherd ilo ien ko etto?

⁶ Ilo ien ko etto, ta men ko juõn shepherd ear aikwij kõmmani ilo juõn ran? Juõn Bible dictionary ear kamelele: “Ilo jibboñ ear tel bwij eo jen worwor eo, im etetal imair ñan jikin eo ijo renaj mõñã ie. Ej lale ir ijin aolepen ran eo, im kejbãrok bwe ejelok juõn sheep en jebwãbwe, im elañe juõn ej etal jen bwij eo, ej tiljek in bukõte mae ien ej loe im karoltok e. . . . Ilo boñ ej karol bwij eo ñan worwor eo, im bwini ir ke rej le iumin alal eo iturin aor eo ñan kamol bwe ejelok juõn ejako. . . . Ekkã an aikwij kejbãrok bwij eo ilo ien marok jen kidu ko rawia, ak jen ri kwot ro.” *

7. Jet ien etke juõn shepherd ej aikwij kwalok meanwõd im joij?

⁷ Ewõr ien ñe juõn sheep, elaptata sheep kokõrã ko rebõroro im kon ko, elap air aikwij meanwõd im joij. (Jenesis 33:13) Juõn book in kamelele Bible ej ba: “Ekkã an sheep kokõrã ko kemour ilo jikin ko etolok ion tol ko. Shepherd eo ej tiljek in kejbãrok jinen ilo ien ej kemour im ej jibwe kon eo im bõke ñan bwij eo. Iumin jejjo ran ko, mae ien emaroñ etetal, emaroñ bõke ilo pein ak likite ilo kobe eo an.” (Aiseia 40:10, 11) Alikar, juõn shepherd emõn ej aikwij kwalok kadkad ko rekajur im bareinwõt joij.

8. Ta eo David ej kwalok kin unin an liki Jehovah?

⁸ “Jeova aõ S̃epherd”​—ejjab ke juõn kamelele ejejjet kin Jemed ilañ? Ñe jej etale Sam 23, jenaj lo ewi wãwen Anij ej kejbãrok kij kin kajur im joij eo an juõn shepherd. Ilo eon 1, David ear kwalok an liki bwe Anij enaj kabwe aolep aikwij ko an sheep ro An bwe ‘ren jamin aikwij.’ Ilo eon ko tok ilal, David ej kwalok jilu un ko unin liki in: Jehovah ej tel, kejbãrok, im najidik sheep ro An. Jen etale men kein kajjojo, juõn kin juõn.

“Ej Tel Iõ”

9. Ta wãwen eo eainemõn David ej kwalok kake, im ewi wãwen sheep ko remaroñ itok ñan juõn jikin rot in?

⁹ Moktata, Jehovah ej tel armij ro an. David ej jeje: “Ej kababu iõ ilo melaj in ujoij e maroro. Ej tel iõ iturin dren ko relae. Ej jarok aõ. Ej tel iõ ilo ial ko rejime kin etan.” (Sam Ko 23:2, 3) Juõn bwij eo ej babu ilo ainemõn ibwiljin elõñ ekan—nan kein an David ej kwalok kin air bed ilo mõnõnõ, elõñ ekan, im jokane. Nan in Hebrew eo rej ukõte “melaj” emaroñ melelen “jikin ko remõn.” Sheep ko rejjab maroñ make bukõt jikin ko remõn ñan air babu ilo ainemõn. Shepherd eo air ej aikwij tel ir ñan juõn “jikin emõn.”

10. Ewi wãwen an Anij kwalok an liki kij?

¹⁰ Ewi wãwen an Jehovah tel kij rainin? Juõn wãwen ej ikijen joñok eo an. Nan eo an ej rejañ kij bwe jen “dri kajeoñwe Anij.” (Dri Epesõs 5:1) Eon ko ibelakin nan kein rej konono kin tiriamokake, jolok bwid, im yokwe. (Dri Epesõs 4:32; 5:2) Emol, Jehovah ej likit joñok eo emõntata ikijen an kwalok kadkad kein rejoij. Ñe ej ba bwe jen kajeoñe e, ej kajitõk ke kin juõn men jejjab maroñ kõmmane? Jaab. Ilo mol, nan in kakabilek in ekakõrmol an Anij ej kwalok an liki kij. Ilo wãwen et? Anij ear kõmanman kij ilo wãwen wõt E, melelen bwe ear letok ñan kij kadkad ko ñan jelã mwil emõn im nana im maroñ eo ñan tõmak kin men ko lor jitõb. (Jenesis 1:26) Kin men in, Jehovah ejelã bwe meñe jejjab wãppen, ewõr ad maroñ ñan kaddek ejja kadkad ko wõt ej kwaloki. Baj lemnak mõk—Anij eo ad ej kwalok yokwe ej liki bwe jemaroñ einwõt e. Elañe jej lor joñok eo an, enaj tel kij, ilo juõn wãwen kõkkar, ñan juõn ‘jikin kakije’ emõn. Ibwiljin juõn lal elej, jenaj ‘bed ilo ainemõn,’ ilo ad jelã bwe Anij ej buñburuen kake kij.​—Sam Ko 4:8; 29:11.

11. Ilo an tel sheep ro an, ta eo Jehovah ej lemnak kake, im ewi wãwen men in ej alikar ilo men eo ej kajitõk bwe jen kõmmane?

 ¹¹ Ñe ej tel kij, Jehovah ej kwalok an yokwe im meanwõd. Juõn shepherd ej lemnak kin maroñ ko an sheep ko an, inem ej tel ir ekkar ñan joñan “an kiru ko rej etal [iman] maroñ.” (Jenesis 33:14) Jehovah ej bareinwõt tel sheep ak armij ro an ekkar ñan “maroñ” ko air. Ej lemnak kin maroñ im wãwen ko ibbed. Ilo juõn wãwen kõkkar, ej ukõt joñan mõkaj in ad etetal, im ejjab kajitõk jabdewõt men ele jen ad maroñ. Men eo ej aikwiji jen kij ej bwe jen kõmmani men ko kin aolepen buruõd. (Dri Kolosse 3:23) Ak ta elañe kwoj ritto im kwojjab maroñ kõmmani men ko einwõt kar mokta? Ak ta elañe ewõr juõn nañinmij elap ibbam me ej kõmman bwe en wõr joñan am maroñ jerbal? Iumin wãwen rot kein ej menin kainemõn kij ñan jelã bwe men eo ej aikwiji ej bwe jen jerbal kin aolepen buruõd ak joñan wõt ad maroñ. Aolep armij reoktak jen don. Jerbal kin aolepen buruõm ej melelen bwe kwoj kajerbal kajur im maroñ ko am ilo joñan wõt am maroñ ilo jerbal eo an Anij. Meñe mõjno ko ad remaroñ jelet joñan ad maroñ jerbal, Jehovah ej kaorõk ad kabuñ ñan e kin aolepen buruõd.​—Mark 12:29, 30.

12. Wanjoñok et eo ilo Kien eo ikijen Moses ej kalikar bwe Jehovah ej tel sheep ro an ekkar ñan joñan“maroñ” ko air?

¹² Ñan kwalok juõn wanjoñok kin ewi wãwen Jehovah ej tel sheep ro an ekkar ñan joñan “maroñ” ko air, lemnak kin ta eo ej ba kin men in katok kin ruõn iumin Kien eo ikijen Moses. Jehovah ear kõnan bwe ren lelok men in katok ko remõn me ej itok jen juõn buru eobrak kin kamolol. Ilo ejja ien eo wõt, rar karõk men in katok ko ekkar ñan maroñ eo an eo ej lelok men in katok eo. Kien eo ej ba: “Elañe men ko mweien re jab bwe ñõn juõn lam, inem en bõktok . . . ruo tõrtel dõv ak ruo muli remõn drer.” Im elañe men ko mweien rejjab bwe ñan ruo muli ko? Inem ear maroñ bõktok jidik “flauo kwerik.” (Livitikõs 5:7, 11) Men in ej kalikar bwe Anij ear jab kajitõk kin men ko ele jen maroñ eo an eo ej bõktok men in katok eo. Kinke Anij ejjab oktak, ej kainemõn kij ñan jelã bwe ejamin kajitõk kin juõn men ele jen ad maroñ lelok; jen an eindein, ej mõnõnõ in bõk ta eo jemaroñ lelok ñan e. (Malachi 3:6) Ej kamõnõnõik kij bwe juõn Shepherd ejoij ej tel kij!

“I Jamin Mijõk Jabrewõt Nana, bwe Kwoj Ber Iba”

13. Ilo Sam Ko 23:4, ewi wãwen an kar David konono kin juõn eo ebak e, im etke men in ejjab juõn men in bwilõñ?

¹³ David ear kwalok un eo kein karuo unin liki eo an: Jehovah ej kejbãrok sheep ro an. Jej konono: “Meñe ij etal ilo komlõl in anõñin mij, I jamin mijõk jabrewõt nana, bwe Kwoj ber iba; Am alal im jokwõnõm, rej kainemõn iõ.” (Sam Ko 23:4) David ej kiõ konono kin Jehovah einwõt juõn eo ebak e, ilo an kajerbal nan eo “Kwoj.” Ejjab juõn  men in bwilõñ, bwe David ej konono kin ewi wãwen Anij ear jibañ e ñan kijenmij kin wãwen ko rebin. David ear etetal ilo elõñ komlal ko remarok—ien ko ke mour eo an ear bed ilo kauwatata. Ak ear jab kõtlok bwe mijak en kajur ion, bwe ear jelã bwe Anij​—kin “alal” im ‘jokwõn’ eo An rebojak—​ear bed ibben. Jelã kin kejbãrok in ear kainemõn David im ejelok bere ear kõmman bwe en ruaklok ñan Jehovah. *

14. Ta eo Bible eo ej kamol ñan kij ikijen kejbãrok eo an Jehovah, ak ta eo ejjab melelen?

¹⁴ Ewi wãwen an Jehovah kejbãrok sheep ro an rainin? Bible eo ej kamol ñan kij bwe ejelok ri jumae ro​—demon ak armij—​renaj lo tõbrak ilo air kajeebeplok sheep ro an jen lal in. Jehovah ejamin kõtlok bwe men in en walok. (Aiseia 54:17; 2 Piter 2:9) Bõtab, men in ejjab melelen bwe Shepherd eo ad enaj kejbãrok kij jen aolep jorrãn ko. Jej iion melejoñ ko me ekkã air walok ibben armij ro, im jej jelmae jumae eo ej walok ñan aolep Ri Christian ro remol. (2 Timote 3:12; Jemes 1:2) Ewõr ien jemaroñ “etal ilo komlõl in anõñin mij,” einwõt ba ilo nan in kõkkar. Ñan wanjoñok, jemaroñ bed ebak ñan mij kin an walok matõrtõr ak juõn jorrãn eo ej jelet ejmour eo ad. Ak bõlen juõn eo ejitenburu ibbed ej iten mij ak ej mij. Ilo ien in ebintata, Shepherd eo ad ej bed ibbed, im enaj kejbãrok kij. Ewi wãwen?

15, 16. (a) Ilo wãwen et ko Jehovah ej jibañ kij jerbale abañ ko jej jelmaiki? (b) Kwalok juõn wanjoñok me ej kwalok kin ewi wãwen Jehovah ej jibañ kij ilo ien melejoñ.

¹⁵ Jehovah ejjab kallimur ñan kejbãrok kij ilo kabwilõñlõñ. * Ak jemaroñ liki kin men in: Jehovah enaj jibañ kij kijenmij kin jabdewõt abañ jemaroñ jelmaiki. Emaroñ letok ñan kij meletlet eo jej aikwiji ñan kijenmij kin “melejoñ kaju wãweir.” (Jemes 1:2-5) Juõn shepherd ej kajerbal alal ak jokon eo an ejjab ñan kako wõt menin mour ko rawia ak bareinwõt ñan iun sheep ko an ilo ial eo ejimwe. Jehovah emaroñ “iun” kij, bõlen ikijen juõn ri tõmak eo mõttad, ñan jerbale nan in kakabilek eo ej wawa ion Bible me emaroñ lap an jibañ kij. Bareinwõt, Jehovah emaroñ letok ñan kij kajur eo ñan kijenmij. (Dri Pilippai 4:13) Ikijen jitõb kwojarjar eo an, emaroñ letok “maroñ eo e kanuij lap.” (2 Dri Korint 4:7) Jitõb eo an Anij ej kamaroñ kij ñan kijenmij kin jabdewõt melejoñ Satan ej bõktok iod. (1 Dri Korint 10:13) Elap an kainemõn kij ñan jelã bwe Jehovah ebojak ien otemjej ñan jibañ kij.

¹⁶ Aet, jekdon ta komlal eo jej bed iloan, jejjab aikwij make etetal ie. Shepherd eo ad ej bed ibbed, im ej jibañ kij ilo wãwen ko me jejjab maroñ kile ilo jinoin. Lemnak kin juõn elder eo me doctor ro rar lo bwe ewõr juõn tumor ilo kamelij eo an. “Ilo jinoin iar lemnak elañe Jehovah ear illu ibba ak elañe emol an yokwe iõ. Ak iar bebe ilo buruõ bwe in jab ilok jen Jehovah. Jen an eindein, iar kwalok inebata ko aõ ñan e. Im Jehovah ear jibañ iõ, emakijkij aõ bõk kainemõn jen ro jeiõ im jatiõ maan im kõrã. Elõñ rar kwalok melele ko air rej wawa ion men ko rar make iioni ke rar bõk juõn nañinmij elap. Nan ko air rejokkin wõt juõn ear kakememej iõ bwe men eo iar iioni ear jab oktak. Jibañ ko rekeie, ekoba jet men in letok ko rejoij, rar kamol ñan iõ bwe Jehovah ear buñburuen kake iõ. Emol, ij aikwij kijenmij wõt kin nañinmij eo aõ, im ijaje ta eo enaj walok ilo jemlokin. Ak ij jelã bwe Jehovah ej bed ibba im enaj wõnmanlok im jibañ iõ ilo melejoñ in.”

 “Kwoj Kapoj Juõn Tebel Imaõ”

17. Ewi wãwen an David kwalok kin Jehovah ilo Sam Ko 23:5, im etke men in ejjab idaptõk ibben wanjoñok eo kin juõn shepherd?

¹⁷ David ej kwalok kiõ un eo kein kajilu unin an liki Shepherd eo an: Jehovah ej najidik sheep ro an, im elap an litoki. David ear je: “Kwoj kapoj juõn tebel imaõ iman mejen ro rej kijirãt iõ. Kw’ar kabit bõra kin oil; aõ kõp ej elõñmejirjir.” (Sam Ko 23:5) Ilo eon in, David ear kwalok kin Shepherd eo an einwõt ri kõmman kwojkwoj emmol me elap an letok mõñã im den. Wanjoñok kein ruo​—juõn shepherd eo ej kwalok yokwe im juõn ri kõmman kwojkwoj emmol—​rejjab idaptõk ibben don. Bwe, juõn shepherd emõn ejelã jikin ko elõñ mõñã ko im aebõj ko ie bwe bwij eo an “e jamin aikwij.”​—Sam Ko 23:1, 2.

18. Ta eo ej kwalok bwe Jehovah ej juõn ri kõmman kwojkwoj emmol?

¹⁸ Shepherd eo ad ej juõn ri kõmman kwojkwoj emmol bareinwõt ke? Aet! Lemnak kin joñan emõnin, lõñin, im kajjo kain mõñã ko lor jitõb jej lañliñ kaki. Ikijen class in ri karejar eo etiljek im meletlet, Jehovah ear letok ñan kij book ko rekeie im program ko emõn air katakin ilo kwelok ko, assembly ko, im convention ko—aolepeir rej kabwe aikwij ko ad ilo jitõb. (Matu 24:45-47) Emol bwe ejelok likjap ñan jidik kin ekan ko lor jitõb. “Dri korijer etiljek im meletlet” ear kõmman elõñ million Bible ko im book ko rej jibañ kij melele kin Bible eo, im book kein rej walok ilo 413 kajin ko. Jehovah ear letok ekan kein ilo jitõb ilo elõñ kain wãwen ko​—jen “milk,” irinekatak ko ilo Bible, ñan “ekõn ko rebin,” katak ko remũlallok. (Dri Hibru 5:11-14) Tokjen men in, ñe jej jelmae abañ ko ak jej aikwij kõmman jet bebe ko, ekkã ad maroñ lo katak ko rejejjet jej aikwiji. Jenaj kar lukkun jorrãn elañe kar ejelok ekan kein ilo jitõb? Shepherd eo ad emol an juõn ri letok emmol!​—Aiseia 25:6; 65:13.

“I Naj Jokwe ilo Imõn Jeova ñõn In Drio”

19, 20. (a) Ilo Sam Ko 23:6, ta eo David ear liki kake, im ewi wãwen emaroñ wõr ad liki rot in? (b) Ta eo jenaj bwebwenato kake ilo katak in tok juõn?

¹⁹ Elikin an lemnak kin wãwen ko an Shepherd im Eo ej kabwe aikwij ko an, David ej kajemlok: “Emõn wõt im joij re naj lor iõ ran ko otemjej ij mour, im I naj jokwe ilo imõn Jeova ñõn in drio.” (Sam Ko 23:6) David ear konono jen juõn buru eobrak kin kamolol im tõmak—kamolol ilo an kememej kin ien ko remotlok im tõmak ke ej reimanlok ñan ilju im jeklaj. David ear jelã bwe elañe ej bed ebak ñan Shepherd eo an ilañ, einwõt ej jokwe ilo mweo imõn, Jehovah enaj kejbãrok e.

²⁰ Elap ad maroñ kamolol kin nan kein raibujuij ilo Sam 23! David ear lo wãwen eo emõntata ñan kwalok kin ewi wãwen Jehovah ej tel, kejbãrok, im najidik sheep ro an. Kar kejbãrok nan kein remãnãn an David ñan kõmman ad liki bwe kij bareinwõt jemaroñ reilok ñan Jehovah einwõt Shepherd eo ad. Aet, elañe jej bed ebak ñan Jehovah, einwõt juõn Shepherd eo ej yokwe enaj kejbãrok kij “ñõn in drio.” Bõtab, einwõt sheep ro an, ewõr eddo eo ibbed ñan etetal ibben Shepherd eo ad elap, Jehovah. Ilo katak in tok juõn jenaj bwebwenato kin ta eo men in ej kitibuji.

[Kamelele ko itulal]

Kwoj Kememej Ke?

• Etke ejejjet an David keidi Jehovah ñan juõn shepherd?

• Ewi wãwen Jehovah ej tel kij ilo tiriamokake?

• Ilo wãwen et ko Jehovah ej jibañ kij kijenmij ilo melejoñ ko?

• Ta eo ej kwalok bwe Jehovah ej juõn ri kõmman kwojkwoj emmol?

[Kajitõk ko ñan katak]

[Pija eo ilo peij 24]

Einwõt juõn shepherd ilo Israel, Jehovah ej tel sheep ro An