Armij “Jen Konono Otemjej” Roñjake News Eo Emõn

“Joñoul ri ailiñ ko renaj etal ñõn ibben juõn ri Jew im ba, ‘Kim kõnan iwõj ibbemi kinke kimar roñ ke Anij ej bed ibbemi.’”​—ZECHARIAH 8:23.

1. Ewi wãwen an kar Jehovah letok bwe ien eo im jikin eo en jejjet ñan jino congregation eo an Christian ilo elõñ kajin ko im ailiñ ko?

 IEN eo im jikin eo ear lukkun jejjet. Kar ran in Pentecost eo ilo 33 C.E. Ilo week ko moktalok, Ri Jew im proselyte ro jen 15 bukwon ko rej bed iumin Ailiñ eo an Rom rar kobrak Jerusalem ñan air kememe ien Kijone eo. Ilo ran eo, elõñ thousand rar roñ—jab ilo bwok, einwõt kar armij ro ilo Babel eo etto, ak kin melele—armij ro rettã robrak kin jitõb kwojarjar rar kwalok kin news eo emõn ilo elõñ kajin ko jen jikin ko otemjej. (Jerbal 2:1-12) Ilo ien in ear jino congregation eo an Christian im jerbal in katakin eo ilo elõñ kajin im ailiñ ko ibelakin lal eo me ej wõnmanlok wõt ñan rainin.

2. Ewi wãwen ri kalor ro an Jesus rar ‘kabwilõñ’ ri roñjake ro air ilo Pentecost 33 C.E.?

² Ri kalor ro an Jesus remaroñ kar konono kajin Greek, kajin eo ekkã air kajerbale ilo ran ko. Rar bareinwõt kajerbal kajin Hebrew, kajin eo rej konono kake ilo temple eo. Bõtab, ilo ran in Pentecost eo, rar “kabwilõñ” ri roñjake ro kinke rar konono ilo kajin ko an armij ro. Kar ta jemlok eo? Mol ko raorõk me rar roñ ilo kajin eo air make ear kamakit burueir. Ilo jemlokinlok ran eo, ri kalor ro eiet uair rar lõñlok ñan joñan in elõñlok jen 3,000!​—Jerbal 2:37-42.

3, 4. Ewi wãwen jerbal in kwalok nan ear laplok ke ri kalor ro rar emmakit jen Jerusalem, Judaea, im Galilee?

³ Ejjab to elikin ien in eaorõk, elap matõrtõr ear walok ilo Jerusalem, im “inem ro r’ar jibliklok, rej etetal im kwalok nan.” (Jerbal 8:1-4) Ñan wanjoñok, jej read ilo Jerbal chapter 8 kin Philip, juõn ri evanjel eo ej konono kajin Greek. Philip ear kwalok nan ñan ri Samaria ro. Ear bareinwõt kwalok nan ñan juõn ri utiej in Ethiopia eo ear rel kin ennan eo kin Christ.​—Jerbal 6:1-5; 8:5-13, 26-40; 21:8, 9.

⁴ Ke Ri Christian ro rar emmakit im bukõt jikin ko ñan air jokwe ilikin jikin kein ilo Jerusalem, Judaea, im Galilee, rar iion armij ro jen kajjojo ailiñ im kajin ko. Jet iair remaroñ kar kwalok nan ñan Ri Jew ro wõt. Ak ri kalor eo Luke ear ba: “Im jet iair dri Saiprõs im dri Sairine, ke rej itok ñõn Antiok, rej bareinwõt konono ñõn ro dri Grik, im kwalok Iroij Jisõs. Im pein Iroij ej ber ibeir: im elõñ ro rej tõmak, rej okõtõk ñõn Iroij.”​—Jerbal 11:19-21.

Juõn Anij Ejjab Kalijeklok—Juõn Ennan Ñan Aolep

5. Ewi wãwen jerbal in kwalok news eo emõn ej kalikar bwe ejelok kalijeklok ibben Jehovah?

⁵ Wõnmanlok kein rej ekkejellok ibben wãwen ko an Anij; ejelok kalijeklok ibben. Elikin an Jehovah jibañ ri jilek Peter ñan an kajimwe lemnak eo an kin armij ro ilo ailiñ ko jet, ear ba ilo an kamolol: “Emol, ij kili bwe Anij e jab lemnok kin okõtõn armij: A ilo ailiñ otemjej eo ej mijõk E, im jerbale kwojarjar, ej kabuñburuen.” (Jerbal 10:34, 35; Sam Ko 145:9) Ke ri jilek Paul, eo ekin matõrtõre Ri Christian ro mokta, ear kwalok bwe Anij “e kõnan lomoren  armij otemjej,” ear bar kalikar bwe Anij ejelok kalijeklok ibben. (1 Timote 2:4) An Ri Kõmanman eo jab kalijeklok ej alikar kinke kejatdikdik eo kin Ailiñ eo ej bellok ñan armij ro otemjej maan, kõrã, kil, ailiñ, ak kajin.

6, 7. Ta kanan ko ilo Bible rej kwalok kin jerbal in kajededlok news eo emõn ibelakin lal ilo elõñ kajin ko?

⁶ Laplok in ibelakin lal kar kanan kake elõñ ebeben ko moktalok. Ekkar ñan kanan eo an Daniel, “ear bõk maroñ im utiej im kajur an iroij, bwe ri ailiñ otemjej im bwij ko otemjej im kajin ko kajjojo ren jerbal ñõne.” (Daniel 7:14) Kinke magazine in emwij jeje ilo 151 kajin ko im leto letak ibelakin lal, ej kamaroñ yuk ñan am read kin Ailiñ eo an Jehovah, men in ej kajejjet kitien kanan eo ilo Bible.

⁷ Bible eo ear kanan kin ien eo ñe armij ro jen kajin ko kajjojo renaj roñ kin ennan eo ej letok-mour. Kameleleik kin ewi wãwen kabuñ eo emol enaj kaitoklimoen elõñ, Zechariah ear kanan: “Ñe ien eo enaj itok, joñoul ri ailiñ ko [ak armij ro jen aolep kajin ko an ailiñ ko, NW] renaj etal ñõn ibben juõn ri Jew [Christian ri kabit ilo-jitõb, mõttan “Israel eo an Anij”], im ba, ‘Kim kõnan iwõj ibbemi kinke kimar roñ ke Anij ej bed ibbemi.’” (Zechariah 8:23; Dri Galetia 6:16) Ilo an kwalok kin ta eo ear loe ilo vision eo, ri jilek John ear ba: “Lo! jar elap, eo ejelok armij ej maroñ in bwinir, jen ailiñ otemjej, im ian bwij otemjej, im driloabjen otemjej, im konono otemjej, rej jutõk iman tron eo im iman mejen Lam, kõnõki kin nuknuk ko remouj, im pam ko ilo peir.” (Reveles̃õn 7:9) Emwij ad lo an kanan kein jejjet im mol.

 Jibadõk Armij ro jen Kil ko Otemjej

8. Ta wãwen ko ilo ran kein rej kõmman bwe en wõr oktak ko ilo jerbal in kwalok nan eo ad?

⁸ Rainin, elaplok an armij ro emmakit jen jikin ñan jikin. Kinke ailiñ ko ibelakin lal rej kõmman business ibben don menin ear kabellok juõn ebeben ekãl in armij ro rej emmakit jen jikin ñan jikin. Jarlepju in armij ro jen jikin ko elap tarinae ie im jikin ko ebin wãwen mour ie rar emmakit ñan jikin ko ediklok abañ kein ie, ñan air bukõt juõn wãwen mour emõnlok. Ilo elõñ ene ko, an jab bõjrak an armij ro im ro rej ko jen ijoko jikiir emmakitlok, ear kõmman bwe ilo elõñ ailiñ ko ren kalek elõñ bukwon ko rej konono ilo kajin ko rekajju jen don. Ñan wanjoñok, ilo Finland elõñlok jen 120 kajin ko rej konono kaki, ilo Australia elõñlok jen 200. Ilo juõn wõt jikin kwelok ilo United States​—San Diego—​elõñlok jen 100 kajin ko jemaroñ roñ!

9. Ta lemnak eo jej aikwij bõke kin bed eo an armij ro rej konono kajin ko reoktak jen don ilo territory eo ad?

⁹ Einwõt Christian ri katakin ro jej watõk ke bed eo an armij rein rej konono kajin ko reoktak jen don einwõt juõn abañ ñan jerbal in kwalok nan eo ad? Ejjab ñan jidik! Jen menin, jej loe einwõt juõn laplok eo ekamõnõnõ kin territory in kwalok nan eo ad—‘jikin kallip ko remouj ilo ien marmir.’ (Jon 4:35) Jej kate kij ñan ad jibañ armij ro rej aikwiji men ko lor jitõb, jekdon ri ia ak kajin ta eo air. (Matu 5:3) Tõbrak eo, kajjojo yiõ oran armij ro ej orlok wõt jen ‘konono otemjej’ rej erom ri kalor ro an Jesus. (Reveles̃õn 14:6) Ñan wanjoñok, ilo kar August 2004 eo jerbal in kwalok nan eo ilo Germany rar kõmmane ilo enañin 40 kajin ko. Ilo ejja ien eo wõt, kar kwalok kin news eo emõn ilo Australia ilo enañin 30 kajin ko, elaplok jen joñoul yiõ ko remotlok kar 18 wõt. Ilo Greece, Ri Kennan ro an Jehovah rar tõbar armij ro ilo enañin 20 kajin ko reoktak jen don. Ibelakin lal, enañin 80 percent in Ri Kennan ro an Jehovah rej konono bar juõn kajin ijellokin kajin English, kajin eo ekkã an aolep kajerbale ibelakin lal.

10. Ta ijo kunan juõn ri kwalok ilo kõmman “ri ailiñ ko otemjej” bwe ren ri kalor ro?

¹⁰ Aet, nan in jiroñ eo an Jesus ñan “kõmõn dri ailiñ ko otemjej bwe ren dri kalora” ej wõnmanlok! (Matu 28:19) Ilo mõnõnõ Ri Kennan ro an Jehovah ilo 235 ailiñ ko rej niknik in bõk kunair ilo air leto letak book ko ilo elõñlok jen 400 kajin ko. Meñe dolul eo an Jehovah ej letok kein katak ko jej aikwiji ñan jibañ armij ro, ri kwalok ro kajjojo kin Ailiñ eo rej aikwij make bõk ijo kunair ñan tilmake ennan eo ilo Bible ñan “armij otemjej” ilo kajin eo remaroñ melele kake. (Jon 1:7) Ilo ad jimor kate ñan jibañ enaj kamaroñ million armij ro jen kajin ko reoktak jen don ñan bõk tokjen jen news eo emõn. (Dri Rom 10:14, 15) Aet, kij kajjojo ewõr tokjen ijo kunad!

Wõnmae Aitwerõk Eo

11, 12. (a) Ta aitwerõk ko jej aikwij jelmae, im ewi wãwen an jitõb kwojarjar eo jibañ? (b) Etke kwalok nan ñan armij ro ilo kajin ko air make ekkã an jibañ?

¹¹ Rainin, elõñ ri kwalok ro kin Ailiñ eo rekõnan katak bar juõn kajin, ak rejjab maroñ atartar ion ak kõtmene kin menin letok ko rekabwilõñlõñ jen jitõb eo an Anij. (1 Dri Korint 13:8) Katak juõn kajin ekãl ej juõn men elap. Meñe ro rej konono ruo kajin ko renaj aikwij ukoktak ilo wãwen air lemnak im kilen air kebak armij ro bwe ren maroñ kõmman bwe ennan eo ilo Bible en kaitoktoklimo ñan armij  ro rej konono kajin eo ak eoktak wãwen im manit ko air. Bareinwõt, ro rekãl jen ailiñ ko jet ekkã air ejookok, ñan ad melele wãwen air lemnak ej juõn jerbal elap.

¹² Meñe eindein, jitõb kwojarjar eo ej jerbal wõt ibwiljin ri karejar ro an Jehovah ilo air kate ir ñan air jibañ armij ro rej konono kajin ko jet. (Luk 11:13) Ijellokin an letok ilo kabwilõñlõñ maroñ ko ñan konono kajin ko jet, jitõb kwojarjar eo emaroñ kalaplok kõnan eo ad ñan bwebwenato ibben armij ro me rejjab konono kajin eo ad. (Sam Ko 143:10) Kwalok nan ak katakin kin ennan eo ilo Bible ñan armij ro ilo kajin eo ejjab air emaroñ tõbar lemnak eo air. Bõtab, ñan tõbar buruen ri roñjake ro ad, emõn elañe jej kajerbal kajin eo air make—kajin eo ej tõbar ijo emũlaltata, kõnan ko ilo buruõd, im kejatdikdik ko.​—Luk 24:32.

13, 14. (a) Ta eo ej kamakit jet ñan air bõk kunair ilo jerbal in kwalok nan ilo bar juõn kajin? (b) Ewi wãwen jitõb in lelok kij make ej alikar?

¹³ Elõñ ri kwalok ro kin Ailiñ eo rar bõk kunair ilo jerbal in kwalok nan ilo bar juõn kajin ke rar lo bwe elõñ rar mõnõnõ in roñjake ennan eo emol jen Bible eo. Ro jet rar kajurlok ke jerbal eo air ear binlok im kaitoktoklimo. “Elõñ ro rar itok jen Rear in Europe rej maro kin mol eo,” branch office eo an Ri Kennan ro an Jehovah ilo turõk in Europe ej ba. Elap ad mõnõnõ in jibañ rein rej itoklimo kin mol eo!—Aiseia 55:1, 2.

¹⁴ Bõtab, ñan lo tõbrak ilo jerbal in, jej aikwij kate kij im mõnõnõ in lelok kij make. (Sam Ko 110:3) Ñan wanjoñok, elõñ family in ri Japan ro rej Ri Kennan ro an Jehovah rar etal jen moko imwiir remõn ilo jikin kwelok ko relap im emmakitlok ñan jikin ko retolok ñan jibañ Ri China ro me rar emmakittok jen ailiñ eo air ñan melele Bible eo. Ilo turilik in United States, ri kwalok ro rej keini air ettõr kin wa ko wair juõn lok ñan ruo awa ko ñan ijoko retolok jikin Ri Philippine ro ñan air katak Bible ibbeir. Ilo Norway, ruo ri belele rej katak ibben juõn family jen Afganistan. Ri Kennan ri belele rein rej kajerbal brochure eo Ta Eo Anij Ekõnan bwe Jen Kõmmõne? * Juõn  ilo kajin English im eo juõn ilo kajin Norway. Family eo ej readi paragraph ko ilo kajin Persia, juõn kajin ebaklok ñan kajin eo air make Dari. Rej konono ñan don ilo kajin English im Norway. Jitõb in lelok kij make im jelã ukoktak ej juõn jerammõn elap ñe armij ro jen ailiñ ko jet rej mõnõnõ in roñjake news eo emõn.

15. Ewi wãwen ad aolep maroñ bõk kunad ilo jerbal in kwalok nan in ilo elõñ kajin ko?

¹⁵ Kwomaroñ ke bõk kunam ilo jerbal in ilo elõñ kajin ko? Etke kwojjab jino ilo am lale kajin ta ko jen ailiñ ko jet elap air kajerbali ilo territory eo am? Inem kwomaroñ bõk jet tract ak brochure ko ilo kajin kein kajjojo. Booklet eo Good News for People of All Nations,(News eo Emõn ñan Armij ro Jen Ailiñ Ko) me kar ajeje ilo 2004 eo, elap an kar lukkun jibañ ilo kajededlok kejatdikdik eo kin Ailiñ eo ilo bidodo, juõn ennan emõn ilo elõñ kajin ko.—Lale katak eo “Good News for People of All Nations,” ilo page 32.

“Yokwe Drua Maijet Eo”

16. Ewi wãwen elder ro remaroñ kalikar air lelok ir make ñan jibañ armij ro rej konono kajin ko jet?

¹⁶ Meñe jej katak bar juõn kajin ak jaab, kij aolep jemaroñ jibañ kin jerbal in katakin eo ilo jitõb ilo kajin ko jet ilo jikin ko jej bed ie. Jehovah ear jiroñ armij ro an bwe ren “yokwe drua maijet eo.” (Duteronomi 10:18, 19) Ñan wanjoñok, ilo juõn jikin kwelok elap ilo tueañ in America, lalem congregation ko rej kajerbal juõn wõt Kingdom Hall. Einwõt ilo elõñ mõn kwelok ko, aolep yiõ ej oktak awa in kwelok ko im menin emaroñ kar kõmman bwe awa in kwelok eo an Ri China ro ijo en kõmman ilo awa ko elik ilo Sunday. Alikar enaj kar melelen bwe elõñ ian rein ro me rej jerbal ilo restaurant ko rejjab maroñ bed ilo kwelok eo. Elder ro ilo congregation ko jet rar ilo joij kõmman oktak ko bwe ien kwelok eo an Ri China ro ren maroñ kõmmane moktalok jen kwelok ko jet ilo Sunday.

17. Ewi wãwen ad lemnak ñe jet rej bebe in emmakit ñan jibañ bar juõn kumi in kajin?

¹⁷ Overseer ro rej kwalok yokwe (ri bõk eddon) ilo air nebar ro jeid im jatid ewõr air maroñ im iminene me rekõnan emmakit ñan jibañ kumi in kajin ko jet. Jemaroñ buromõj kin ri katakin Bible rein ñe rej emmakit ñan congregation ko jet rej aikwij jibañ armij ilo kajin ko jet, ak overseer ro rej bõk ejja eñjake eo wõt einwõt kar elder ro ilo Lystra im Iconium. Elder ro rar jab debij Timothy jen an itoitak ibben Paul, meñe Timothy ear juõn jerammõn elap ñan congregation eo air make. (Jerbal 16:1-4) Bareinwõt, ro rar tel ilo jerbal in kwalok nan rejjab ebwer kin lemnak ko reoktak, manit ko, ak wãwen mwil armij ro jen ailiñ ko jet. Jen an eindein, rej mõnõnõ kin oktak kein im bukõt wãwen ko ñan kaddeklok kõtan ko remõn kin news eo emõn.​—1 Dri Korint 9:22, 23.

18. Ta aur eo elap kin jerbal ej bellok ñan aolep?

¹⁸ Einwõt kar kanan kake, news eo emõn emwij kwalok kake ilo aolep kajin ko jen “ailiñ” ko. Ej wõr wõt ien ko remõn ñan laplok eo ilo kajin ko jen ailiñ ko jet. Elõñ thousand ri kwalok ro ewõr maroñ ko ibbeir emwij air deloñ ilo “aur elap” me ej tellok ñan jerbal in. (1 Dri Korint 16:9) Bõtab, jej aikwij kõmman elõñlok men ko bwe jen maroñ kaddeklok territory ko ad, einwõt an katak in tok ilal naj kwalok kake.

[Kamelele eo itulal]

Kwomaroñ Ke Kamelele?

• Ewi wãwen jemaroñ anõk Jehovah ilo ad jab kwalok kalijeklok ñan armij otemjej?

• Ewi wãwen jej aikwij watõk armij ro ilo territory eo ad me rejjab konono kajin eo ad?

• Etke ej juõn menin jibañ ñan ad kwalok nan ñan armij ro ilo kajin eo air make?

• Ewi wãwen jemaroñ kwalok ad itoklimo kin armij ro jen ailiñ ko jet?

[Kajitõk ko ñan katak]

[Mab/Pija eo ilo peij 4]

(Ñan lale pija eo, jouj im lale ilo bok eo)

Rome

CRETE

ASIA

PHRYGIA

PAMPHYLIA

PONTUS

CAPPADOCIA

MESOPOTAMIA

MEDIA

PARTHIA

ELAM

ARABIA

LIBYA

EGYPT

JUDAEA

Jerusalem

[Bodies of water]

Lomalo Mediterranean

Lomalo Ekilmej

Lomalo Ekilmir

Lomalo in Persia

[Pija]

Ilo Pentecost 33 C.E., armij ro jen 15 jikin ko rej bed iumin Ailiñ in Rom rar roñ kin news eo emõn ilo kajin ko air make

[Pija ilo page 5]

Juõn sign ilo Kingdom Hall kar je ilo lalem kajin ko

[Pija ko ilo page 6]

Elõñ ri ailiñ ko jet rej mõnõnõ in bõk mol eo ilo Bible