Etetal Ilo Ial Eo Ej Meramlok Wõt
Etetal Ilo Ial Eo Ej Meramlok Wõt
“A ial an ro dru wãnik ej einwõt maram ilo ien rantak, eo ej maramlok wõt ñõn ran e wãppen.”—JABÕN KENNAN KO 4:18.
1, 2. Ta eo armij ro an Anij rar loi kin air bõk meram eo elaplok wõt ilo jitõb jen Jehovah?
WÕN eo emaroñ kamelele kin wãwen an al tak jelet marok eo ilo boñ emõnlok jen Unjen meram eo, Jehovah Anij? (Sam Ko 36:9) ‘Ñe al en tak im ej jibwe lõl,’ Anij ej ba, ‘meram in ran ej kalikkar tol ko im komlõl ko einwõt kammõlũlũ in juõn nuknuk, im einwõt jenkwan juõn sil ion clay.’ (Job 38:12-14) Ke meram eo jen al ej meramlok wõt, jekjekin lal in ej alikarlok wõt, einwõt oktak eo ej walok ñe jej jibede juõn kein kakõlle ion clay ebidodo.
2 Jehovah ej unjen meram eo ilo jitõb. (Sam Ko 43:3) Meñe lal ej bedwõt ilo marok jiliñliñ, Anij eo emol ej wõnmanlok im kõmman bwe meram en romak ion armij ro an. Ta eo ej walok jen men in? Bible eo ej uak: “A ial an ro dru wãnik ej einwõt maram ilo ien rantak, eo ej maramlok wõt ñõn ran e wãppen.” (Jabõn Kennan Ko 4:18) Meram eo elaplok wõt jen Jehovah ej wõnmanlok im kameram ial eo an armij ro an im kakõmõnmõnlok ir einwõt juõn dolul, ikijen katak ko, im mour erreo eo air.
Meram eo Elaplok ilo Jitõb Ej Kakõmõnmõnlok Karõk ko ilo Dolul eo
3. Ta eo kar kallimur kake ilo Aiseia 60:17?
3 Ikijen ri kanan Isaiah, Jehovah ear kanan: “Kin jinibõrõrõ I naj bõktok gold, im kin mãl I naj bõktok silver, im kin alal ko, jinibõrõrõ, im kin dreka ko, mãl.” (Aiseia 60:17) Einwõt ñe jej jolok juõn mãl eo enana im kõkãle kin bar juõn emõnlok ej melelen kwoj kakõmõnmõnlok e, eindein Ri Kennan ro an Jehovah rar kakõmõnmõnlok karõk ko ilo dolul eo air ilo “ran ko eliktata.”—2 Timote 3:1.
4. Ta karõk eo ear ijjino ilo 1919, im kar ewi tokjen?
4 Ilo tujinoin ran ko eliktata, congregation ko an Ri Katak Bible ro, kar ãt eo etan Ri Kennan ro an Jehovah ilo ien eo, rar kãlet ri tel ro air einwõt elder im deacon ro. Bõtab, jet elder ro rar jab kanuij kijejeto ilo jerbal in evanjel ak kwalok nan. Jet iair rar jab makoko wõt in kwalok nan ak rar kabwer ro jet jen air bõk kunair ilo jerbal in. Inem ilo 1919 bar juõn jerbal ear ijjino ilo congregation ko kajjojo—jerbal in tel jerbal in kwalok nan. Ri tel eo kin jerbal in kwalok nan, congregation eo ear jab kãlete, ak ro reutiej ilo ra eo an armij ro an Anij rar jitõñ ir ekkar ñan kien ko an Anij. Eddo ko an ri tel in ear koba kõmman karõk kin jerbal in kwalok nan, kwalok jikin ko ñan air kwalok nan ie, im rejañ ro jet bwe ren bõk kunair ilo jerbal in kwalok nan. Ilo yiõ ko tokelik, jerbal in kwalok nan kin Ailiñ eo ear laplok wõt.
5. Ta karõk eo ekãl ear ijjino ilo yiõ ko ilo 1920?
5 Aolep ilo congregation eo rar elloetak kin kejelã eo “Kejelã, kejelã, kejelã, kin King eo im ailiñ eo an,” eo ear walok ilo yiõ eo 1922 ilo convention eo an Ri Katak Bible ro ilo Cedar Point, Ohio. Tok ñan 1927 joñan an kar jerbal in kwalok nan kwon rar karõk bwe ran in Sunday en ran eo emõntata ñan kwalok nan jen em-ñan-em. Etke ran eo ear emõn? Kinke Sunday kar ran eo enañin aolep armij rej kakije jen air jerbal ilo jikin jerbal ko air. Rainin Ri Kennan ro an Jehovah rej kwalok ejja jitõb eo wõt ilo air kate ir ñan kebak armij ro ilo ien ko rej bed ilo moko imwiir, einwõt ilo ran ko itujemlokin week eo im ilo jota.
6. Ilo 1931, ta bebe eo rar kowãppeni, im ewi wãwen ear jelet jerbal in kwalok nan kin Ailiñ eo?
6 Juõn men me ear kamõkajlok jerbal in kwalok nan kin Ailiñ eo ear walok ilo elikin raelepen Sunday, July 26, 1931, ke rar kowãppen juõn bebe ilo convention eo moktata ilo Columbus, Ohio, im tokelik ibelakin lal. Mõttan in bebe in ear ba: “Jej ri karejar ro an Jehovah Anij me jaar bõk juõn jerbal ilo etan, im ilo bokake kien eo an, jej kwalok kin ennan eo me Jesus Christ ear kwalok kake, im kejelãik armij bwe Jehovah ej Anij eo emol im Ekajur Bõtata; kin men in jej mõnõnõ in bõk ãt eo me loñin Iroij Anij ear naetan, Ri Kennan ro an Jehovah.” (Aiseia 43:10) Elap an ãt in kalikar kin jerbal eo elaptata aolep ro rej bõk ãt in rej aikwij kõmmane! Aet, Jehovah ear letok juõn jerbal bwe aolep ri karejar ro an ren kõmmane. Emol bwe elõñ rar elloetak!
7. Ta oktak eo ear walok ilo 1932, im etke?
7 Elõñ elder ro rar jerbal ilo ettã buru im boub wõt ilo jerbal in kwalok nan. Bõtab, ilo jet jikin ko, elder ro emwij kãlet ir rar jumae lemnak eo bwe aolep ilo congregation eo ren bõk kunair ilo jerbal in kwalok nan. Bõtab, ien kakõmõnmõnlok jerbal ko jet rar ebak. Ilo 1932 congregation ko rar bõk nan in jiroñ ko ilo magazine in Imõniaroñroñ bwe ren kabõjrak air kãlet elder ro im deacon ro. Jen men in, rar aikwij kãlet juõn kumi in maan ro reritto ilo jitõb rar naetan service committee eo me rar bõk kunair ilo jerbal in kwalok nan. Inem rar lelok jerbal in tel eo ñan ro rar niknik in kwalok nan, im jerbal in ear wõnmanlok.
Elaplok Meram Ej Melelen Elõñlok Men ko ñan Kakõmõnmõnloki
8. Ta karõk eo rar kakõmõnmõnloke ilo 1938?
8 Meram eo ear “maramlok wõt.” Ilo 1938 rar kabõjrak air kãlet ri tel ro. Iumin tel eo an “ri korijer e tiljek im meletlet” rar atartar ion kien ko an Anij ñan jitõñ ir. (Matu 24:45-47) Ilo mõnõnõ aolep congregation ko an Ri Kennan ro an Jehovah rar bõk oktak in ekãl, im jerbal in kwalok nan ear jebar leen.
9. Ilo 1972, ta karõk eo ear ijjino, im etke rar kõmmane oktak in?
9 Jen October 1, 1972, bar juõn oktak ilo congregation eo ikijen wãwen tel ear walok. Karõk eo ñan ejaak juõn kumi in elder ro ear jino ilo congregation ko an Ri kennan ro an Jehovah ibelakin lal, im ear bõk jikin karõk eo bwe juõn wõt overseer ilo congregation en tel. Karõk in ekãl ear lukkun rejañ maan ro me ewõr air maroñ ilo jitõb bwe ren tel congregation eo. (1 Timote 3:1-7) Kin men in, elõñlok brother ro rar kamineneik ir ñan air bõk elõñ jerammõn ko ilo congregation eo. Rar lukkun aorõk ilo jerbal in lale elõñ armij ro rekãl ñan bõk katak ko remol ilo Bible ilo yiõ ko tokelik!
10. Ta karõk eo ear ijjino ilo 1976?
10 Ro uan Governing Body eo rar karõk bwe en wõr jiljino kumi ko, im jino jen January 1, 1976, aolep jibadbad ko an dolul in im congregation ko ibelakin lal rar bed iumin kumi kein. Ear juõn jerammõn elap bwe aolep jerbal ko an Ailiñ eo en bed iumin tel eo an “elõñ dri bebe”!—Jabõn Kennan Ko 15:22; 24:6.
11. Ta men eo rar kakõmõnmõnloke ilo 1992, im etke?
11 Ilo yiõ eo 1992 bar juõn jerbal rar kakõmõnmõnloke, eo ear einlok wõt men eo rar kõmmane elikin an Ri Israel ro im ro jet jeblak ñan Jerusalem jen air ri jibokwe ilo Babylon. Ilo ien eo, ear jabwe oran Ri Livai ro ñan air jerbal ilo temple eo. Inem Ri Nethinim ro rejjab Ri Jew rar bõk elõñlok eddo ko ilo air jibañ Ri Livai ro. Inem, ñan jibañ ri karejar eo etiljek im meletlet bwe en kejbãrok men ko ilo jitõb rej laplok wõt ion lal, ilo 1992 rar kõtlok bwe jet jen ro uan “s̃ip ro jet” ren bõk elõñlok eddo ko. Rar jitõñ ir einwõt ri jibañ ro ñan kumi in Governing Body eo.—Jon 10:16.
12. Ewi wãwen an kar Jehovah bõktok ‘gold im jab jinibõrõrõ’?
12 Ta eo ear walok jen men kein aolep? “I naj kõmõn dri kabwijrõk ro am, ainemõn; im iroij ro am, wãnik,” Jehovah ej ba. (Aiseia 60:17) Ewõr “ainemõn” ibben ri karejar ro an Jehovah rainin, im air yokwe “wãnik” ear erom ‘dri kabwijrõk ro air’—kajur eo ej kamakit ir ñan air karejar ñan Anij. Relukkun bojak ñan air kajejjet jerbal in kwalok nan kin Ailiñ eo im kõmman ri kalor ro.—Matu 24:14; 28:19, 20.
Jehovah Ej Kameramlok Katak ko
13. Ewi wãwen Jehovah ear kameramlok ial eo an armij ro an ikijen katak ko ilo yiõ ko ilo 1920?
13 Jehovah ej wõnmanlok wõt in kameramlok katak ko ñan armij ro an. Reveles̃õn 12:1-9 ej kwalok juõn wanjoñok. Bwebwenato eo ej konono kin jilu men in kõkkar ko: “kõra eo” ebõroro, juõn “drakon,” im “juõn nejin, eman.” Kwo jelã ke ta eo men kein jilu rej kõkkar kaki? Katak eo “Lotak eo an Ailiñ eo,” ilo The Watch Tower ilo March 1, 1925 ear kamelele kin men kein. Katak in ear kõmman bwe en laplok an armij ro an Anij melele kin kanan ko kin lotak eo an Ailiñ eo, juõn melele me ear kalikar bwe ewõr ruo dolul ko—an Jehovah im an Satan. Inem ilo 1927/28, armij ro an Anij rar kile bwe Christmas im kemem ko rejõkkar ñan Christian inem rar bõjrak jen air kõmmani men kein.
14. Ta katak ko ilo Bible rar alikarlok ilo yiõ ko ilo 1930?
14 Ilo yiõ ko ilo 1930 rar bar kalikarlok melele ko kin jilu katak ko remol. Iumin elõñ yiõ ko, kumi in Ri Katak Bible ro rar melele bwe “jar eo elap,” me Reveles̃õn 7:9-17 ej konono kake ear einjuõn jen 144,000, me renaj iroij ibben Christ einwõt king im priest ro. (Reveles̃õn 5:9, 10; 14:1-5) Bõtab, ejañin kar alikar kin wõn jar eo elap. Einwõt an meram eo ej walok ilo ien rantak ej kalikarlok jekjekin im uno in men ko, eindein ilo 1935 rar kile bwe jar eo elap kar armij ro me renaj ellã jen “iñtan elap,” im bõk mour indio ion lal. Tokelik ilo ejja yiõ eo wõt rar bõk juõn melele me ear jelet ri school ro an Ri Kennan ro an Jehovah ilo elõñ ailiñ ko. Ilo ien eo ke elõñ armij rar kalikar air tiljek ñan ailiñ ko air ibelakin lal, Ri Kennan ro an Jehovah rar kile bwe kotak peiir ñan flag eo an ailiñ eo ear wõr juõn melele elaplok. Juõn yiõ tokelik, rar kamelele bwe Christ ear mij ion juõn joor, jab juõn debail.—Jerbal 10:39.
15. Ñããt eo im ewi wãwen rar bõkmantak katak in kin kwojarjar in bõtõktõk?
15 Ilo yiõ ko elikinlok wõt an jino Bata eo an Lal kein ka Ruo, ilo ien eo ke armij ro rar jino kamineneik ir ñan lelok bõtõktõk ñan ri tarinae ro, ear wõr juõn melele ealikarlok kin aorõkin bõtõktõk. Ilo magazine in The Watchtower (Imõniaroñroñ Eo), July 1, 1945, ear rejañ bwe “aolep ri kabuñ ro an Jehovah me rekõnan bõk mour indio ilo lal eo an ekãl im wãnik ñan air kautiej im kokwojarjar bõtõktõk im ukõt mour eo air ekkar ñan kien ko rewãnik an Anij ikijen katak in eaorõk.”
16. Ñããt eo ear jino ukok in Bible eo etan New World Translation of the Holy Scriptures, im ta men ko ruo remõn iloan?
16 Ilo 1946 rar lo aikwij eo kin juõn ukok ekãl kin Bible eo me ear wawa ion jelãlokjen im katak eo ekãl im ear jab kobaik katak im manit ko an kabuñ ko rewan me rej ba rej Christian. Jerbal in ukok in ear jino ilo December 1947. Ilo 1950 ear walok ukok in Bible eo ekãl etan New World Translation of the Christian Greek Scriptures ilo kajin English. Rar ukõt mõttan eo jinoin ilo Bible etan Hebrew Scriptures ilo kajin English ilo lalem mõttan ko im elikin air ukõt mõttan kein kajjojo rar jino lelok. Rar jino kõmmane men in ilo 1953. Mõttan eo eliktata ear jino walok ilo 1960, elõñlok jen 12 yiõ ko elikin jerbal in ukok eo ear jinoe. Ukok eo eyu kin New World Translation of the Holy Scriptures ear jino walok ilo 1961. Kiõ emwij ukõte ilo elõñ kajin ko, im elõñ men ko remõn iloan. Ej kajerbal ãt eo ekwojarjar, Jehovah. Bareinwõt, wãwen an ukõt eon ko ekkar ñan ukok ko moktata ej letok juõn bedbed ñan kalaplok ad melele kin mol ko rekwojarjar.
17. Ta melele eo ealikarlok ear walok ilo 1962?
17 Ilo 1962 rar kamelele kin “ro routiej” me Dri Rom 13:1 ear konono kake im ewi joñan an Ri Christian ro aikwij kõttãik ir ñan ri utiej rein. Rar etale ilo tibdikin chapter 13 ilo book in Rom im eon ko jet einwõt Taitõs 3:1, 2 im 1 Piter 2:13, 17 im ear alikar bwe “ro routiej” rej jitõñlok ñan ro reutiej an kien ko an armij, im jab Jehovah Anij im Jesus Christ.
18. Ta jet ian katak ko remol rar kamelele kaki ilo yiõ ko ilo 1980?
18 Ilo yiõ ko tokelik, ial eo an ro rewãnik ear laplok an meram. Ilo 1985 ear laplok air melele kin ta melelen kowãnik “in mour” im wãnik einwõt jeran Anij. (Dri Rom 5:18; Jemes 2:23) Ilo 1987 ear let wãwen air kamelele kin ta melelen Jubili eo an Christian.
19. Ewi wãwen an Jehovah kalaplok meram eo ilo jitõb ñan armij ro ilo yiõ ko ilo ran kein?
19 Ilo 1995 ear laplok air melele kin jerbal in kejebel sheep im goat ko. Ilo 1998 ear wõr juõn kamelele ilo tibdikdik kin vision eo an Ezekiel kin temple eo, me ej jejjet kitien kiõ. Ilo 1999 juõn kamelele ear walok ikijen ñããt eo im ewi wãwen an ‘men eo e kanuij nana im elap an kokkure jutak iloan jikin kwojarjar.’ (Matu 24:15, 16) Im ilo 2002 rar bõk juõn melele ealikarlok kin ta melelen kabuñ ñan Anij “ilo Jitõb im ilo mol.”—Jon 4:24.
20. Bar ta wãwen ko armij ro an Anij rar kakõmõnmõnlok?
20 Ijellokin wãwen ko rar kakõmõnmõnloki ikijen dolul eo im katak ko, rar bareinwõt kakõmõnmõnlok wãwen ko ikijen mwilin Christian. Ñan wanjoñok, ilo 1973 rar lo bwe kõbatat ak kajerbal tobacco ear juõn manit “etton” ilo kanniek im rar watõke einwõt juõn bwid elap. (2 Dri Korint 7:1) Joñoul yiõ ko tokelik ilo magazine in The Watchtower, ilo July 15, 1983, ear kamelele kin ewi lemnak eo ad kin kajerbal bu ko. Melele kein rar jet ian wanjoñok ko meram eo ilo jitõb ear laplok wõt ilo ien kein ad.
Etetal Manlok ilo Ial eo Ej Laplok Wõt An Meram
21. Ta lemnak eo emaroñ jibañ kij ñan ad wõnmanlok wõt ilo ial eo ej laplok wõt an meram?
21 “Ñe ej walok juõn oktak emaroñ bin ñan ad ukõt lemnak eo ad ilo ekkar emaroñ bin kõmmane,” juõn eo etto an jerbal einwõt juõn elder ear ba. Ta eo ear jibañ e ñan an jerbali oktak ko ear loi iumin 48 yiõ ko ear jerbal einwõt juõn ri keañ an Ailiñ eo? Ej uak: “Men eo eaorõk ej bwe jen bõk juõn lemnak ejimwe. Ñe jej makoko in jerbale juõn nan in jiroñ ñan kakõmõnmõnlok mour eo ad ej melelen jej jenliktak ak dolul eo an Anij ej wõnmanlok wõt. Elañe ij lo bwe ebin ñan aõ jerbale nan in kajimwe ko, ij kalmenlokjen kin nan ko an Peter ñan Jesus: ‘Kim naj ilok ñõn wõn? ibõm nan ko nan in mour in drio.’ Inem Ij kajitõk ibba make, ‘Ia eo inaj ilok ñane—ñan lal eo emarok ke?’ Men in ej jibañ iõ ñan aõ tiljek wõt ñan dolul eo an Anij.”—Jon 6:68.
22. Ewi wãwen ad maroñ bõk tokjen ñe jej etetal ilo meram?
22 Aolepen lal in ej bed ilo marok jiliñliñ. Ñe Jehovah ej kameramlok armij ro an, kõtan eo ikõtair im ro ri lal in enaj laplok wõt. Ta eo meram in ej kõmmane ñan kij? Eokwe, juõn teeñki emaroñ kameram im kalikar juõn roñ ilo ial eo emarok ak eban jolok roñ eo, eindein bareinwõt meram eo jen Nan in Anij, ejjab maroñ jolok aolep melejoñ ko. Ak, meram jen Anij ej kejbãrok kij jen melejoñ ko bwe jen maroñ etetal manlok wõt ilo ial eo ej laplok wõt an meram. Inem, jen wõnmanlok wõt im bokake nan in kanan eo an Jehovah, im watõke “einwõt maram ej romak ijo e marok.”—2 Piter 1:19.
Kwoj Kememej Ke?
• Ta wãwen ko ñan kakõmõnmõnlok dolul eo, Jehovah ear lelok ñan armij ro an?
• Meram eo ej laplok wõt ear bõktok ta oktak ko kin katak ko?
• Ta oktak ko kwe make kwar loe, im ta eo ear jibañ yuk ñan bõki?
• Etke kwokõnan etetal manlok ilo ial eo ej meram lok wõt?
[Kajitõk ko ñan katak]
[Pija ko ilo peij 15]
Convention eo ilo Cedar Point, Ohio, ilo 1922, ear kairujruj Ri Katak Bible ro bwe ren kõmmane jerbal eo an Anij
[Pija ilo page 16]
Ukok in Bible eo “New World Translation of the Christian Greek Scriptures” N.H. Knorr ear leloke ilo 1950
[Etan eo ear kõmman pija ilo peij 13]
© 2003 BiblePlaces.com