Ewi Joñan An Bin Liki Eo Am Ilo Anij?

“A komin bukot mokta ailiñ in Anij.”​—MATU 6:33.

1, 2. Ikijen jikin jerbal eo an, ta oktak eo juõn likao ear kõmmane, im etke?

 JUÕN likao ear kõnan kalaplok kunan ilo congregation eo. Ak jikin jerbal eo an ear kabañ e jen an keini an bed ilo kwelok ko. Ewi wãwen ear kamadmõde wãwen eo? Ear kabidodolok wãwen mour eo an, to jen jikin jerbal eo, im bukõt juõn jerbal me ear jab kabañ makitkit in Christian ko an. Rainin, ediklok wõnãn an jerbal jen mokta, ak emaroñ wõt kabwe aikwij ko an family eo im emõnlok an maroñ jibañ congregation eo.

² Kwo melele ke kin unin an likao eo kõmman oktak rot kein? Kwonaj ke kar kõmman oktak kein elañe kwar bed ilo ejja wãwen ko wõt einwõt lein? Ej juõn men in nebar bwe elõñ Ri Christian ro rar kõmmani, im makitkit ko air rej kwalok air liki kallimur eo an Jesus: “A komin bukot mokta ailiñ in Anij, im kwojarjar eo An; im naj koorlok men kein otemjej ñõn kom.” (Matu 6:33) Rej liki Jehovah ñan bõk kejbãrok im jab lal in.​—Jabõn Kennan Ko 3:23, 26.

3. Etke jet remaroñ lemnak elañe ej juõn men in meletlet ñan air likit bwe Ailiñ in Anij en moktata ilo air mour?

³ Ilo lemnak kin ien ko rebin jej mour ie, jet remaroñ lemnak elañe ear emõn bebe eo lein ear kõmmane. Rainin, jet armij rej lukkun jorrãn kin jeramel ak ro jet rej bed ilo juõn wãwen mour emõn im lap air mweie jen jabdewõt ien ilo bwebwenato in armij. Elõñ armij ilo ailiñ ko rejeramel renaj mõnõnõ in bõk jabdewõt ien ko remõn ñan kakõmanmanlok wãwen mour ko air. Ijo turãjet, elõñ ilo ailiñ ko remweie rej eñjake ijjibed eo ñan air kejbãrok wãwen mour ko air meñe rej jelmae an jorrãnlok aorõkin money, an oktaklok jikin jerbal ko, im boss ro rej kajitõk elaplok ien air jerbal. Ilo lemnak kin ijjibed kein ñan air kabwe aikwij ko air, jet remaroñ lemnak, ‘Ej juõn men in kõmmanwa ke ñan air bukõt mokta Ailiñ eo?’ Ñan uake kajitõk in, lemnak kin wõn ro Jesus ear konono ñan ir.

“Komin Jab Inebata Buruemi”

4, 5. Wanjoñok et eo Jesus ear kajerbale ñan kwalok bwe armij ro an Anij rejjab aikwij le jen joñan air inebata kin aikwij ko air jen ran ñan ran?

⁴ Jesus ear bed ilo Galilee, im ear konono ñan juõn jar elap me rar itok jen elõñ jikin ko. (Matu 4:25) Eiet ian armij rein rar mweie. Ilo mol, elõñ rar jeramel. Ak, Jesus ear rejañ ir bwe ren jibadõk mokta, jab air korlok mweiuk, ak ñan air korlok juõn men elaplok an aorõk—mweiuk ko ilo jitõb. (Matu 6:19-21, 24) Ear ba: “Komin jab inebata buruemi kin ami mour, ta eo kom naj mõña, ak ta eo kom naj irak; im bareinwõt kin enbwinemi, ta kom naj balle. Mour e jab lap jen ekõn ke, im enbwin e jab aurõk jen balle ke?”​—Matu 6:25.

⁵ Ñan elõñ ian ro rej roñjake, nan kein an Jesus ear jab men in kõmmanwa. Rar jelã bwe elañe rar jab kate ir im jerbal, family ko air renaj eñtan. Bõtab, Jesus ear kakememej ir kin bao ko. Ran otemjej bao ko rej aikwij kabuk kijeir im jikin air kiki, ak Jehovah ej kejbãrok ir. Jesus ear bareinwõt jitõñlok ñan wãwen eo Jehovah ej kejbãrok wũt ko, ko me elaplok air aibujuij jen Solomon ilo wuj eo an. Elañe Jehovah ej kejbãrok bao ko im wũt ko, enaj laplok an kejbãrok kij. (Matu 6:26-30) Einwõt Jesus ear ba, kinke Jehovah ear letok ñan kij mour im juõn enbwin, emaroñ bareinwõt letok  mõñã ko ñan kejbãrok mour im nuknuk ñan kalibubu enbwinid. Elañe jej kamaat aolep jibadbad ko ad ñan najidik im kanuknuk kij make, ilo ejelok ien ñan karejar ñan Jehovah, jenaj kajettokjen unin mour.—Ekklisiastis 12:13.

Juõn Lemnak Ejokkin Wõt Juõn

6. (a) Ri Christian ro rej bõk eddo eo kin ta? (b) Ia eo Ri Christian ro rej likit air liki ie?

⁶ Emol, Jesus ear jab rejañ ri roñjake ro an bwe ren kabõjrak air jerbal im kõttar wõt an Anij kabwe aikwij ko an family ko air. Bao ko rej aikwij kabuk kijeir ñan ir make im jojo ko nejiir. Kin men in, Ri Christian ro rar aikwij jerbal elañe rar kõnan mõñã. Rar aikwij lale eddo ko an family eo. Christian ri karejar ro im ri kamakoko ro rar aikwij jerbal ilo tiljek ñan karo ro air. (2 Dri Tessalonika 3:10-12; 1 Timote 5:8; 1 Piter 2:18) Ekkã an kar ri jilek Paul jerbal einwõt juõn ri kõmman em nuknuk ñan an kabwe aikwij ko an make. (Jerbal 18:1-4; 1 Dri Tessalonika 2:9) Ak, Ri Christian rein rar jab atartar ion jerbal eo air ñan bõk kejbãrok. Rar liki Jehovah. Tokjen men in, rar lañliñ kin ainemõn eo iloa me ro jet rar jaje kake. Ri jeje sam ear ba: “Ro rej liki Jeova rej einwõt tol Zaiõn eo, re ban kamõkit e, a ej ber ñõn in drio.”​—Sam 125:1.

7. Juõn eo ejjab liki Jehovah emaroñ bõk lemnak et eo?

⁷ Ro rejjab liki Jehovah emaroñ oktak lemnak ko air. Jarlepju in armij ro rej watõk bwe mweie kin men ko lor kanniek elap an aorõk ñan bõk jokane. Kin men in, ro jemen im jinen rej rejañ ro nejiir bwe ren jolok elap ien ñe rej jodikdik ñan jibadõk school ko relaplok, ilo air kejatdikdik ñan bõk jerbal ko elap wõnãir. Ekaburomõjmõj bwe, jet Christian family ko rar lukkun jorrãn, ke ro nejiir rar bõjrak jen air bukõt men ko lor jitõb im jino jibadõk mejenkajjik ko lor kanniek.

8. Jokkin wõt juõn et eo Ri Christian ro rej kejbãroke?

⁸ Kin men in, Ri Christian ro remeletlet rej kile bwe nan in kakabilek eo an Jesus ej jerbal ilo ran kein einwõt ear ilo ebeben eo kein kajuõn, im rej kate ir bwe en jokkin wõt juõn lemnak ko air. Meñe rej jolok elõñ awa ko ilo jikin jerbal eo bwe ren kajejjet eddo ko air ekkar ñan Bible eo, rejjab kõtlok bwe jããn ko ren kõmman bwe ren kajekdon men ko lor jitõb me elaplok air aorõk.—Ekklisiastis 7:12.

 Nan in Kakabilek Ko Jet Bwe “Komin Jab Inebata”

9. Ewi wãwen Jesus ej rejañ ro rej liki Jehovah?

⁹ Ilo Katak eo An ion Tol eo, Jesus ear rejañ ri roñjake ro an: “Inem komin jab inebata buruemi im ba, Ta je naj mõña? Ak ta je naj irak? Ak e naj kijkan ar balle? Bwe ro dri ailiñ ko rej bukot men kein otemjej; bwe Jememiuij i lõñ E jela ami aikwij men kein otemjej.” (Matu 6:31, 32) Nan kein elap air kõketak! Elañe jej liki Jehovah, ien otemjej enaj jibañ kij. Bõtab, nan kein an Jesus rej bareinwõt kamakit lemnak ko ad. Rej kakememej kij bwe elañe jej “bukõt” men ko lor kanniek, lemnak ko ad renaj einwõt “dri ailiñ ko,” armij ro rejjab Ri Christian ro remol.

10. Ke juõn likao ear kebak Jesus ñan an bõk nan in kakabilek, ewi wãwen an kar Jesus kwalok ta eo ear bed ilo buruen likao eo?

¹⁰ Juõn ien, juõn likao emweie ear kajitõk ibben Jesus kin ta eo ej aikwij kõmmane ñan an bõk mour indio. Jesus ear kakememej e kin men in aikwij ko iumin Kien eo, eo ear jerbal wõt ilo ien eo. Likao eo ear kamol ñan Jesus: “Nan kein otemjej I ar bokaki: ewi men eo I jañin tõbare?” Ñan elõñ, uak eo an Jesus emaroñ kar einwõt ñe ejjab men in kõmmanwa. Ear ba: “Elañe kwo kõnan bwe kwon wãppen, kwon ilok im wiakaki men ko am, im lelok ñõn ro rejeramel, im e naj or mweiõm i lõñ: im kwon itok im lor Iõ.” (Matu 19:16-21) Likao eo ear buromõj im illok, kinke ear jab kõnan luji mweiuk ko an. Meñe ear yokwe Jehovah, elaplok an kar yokwe men ko mweien.

11, 12. (a) Ta nan ko rej kamakit lemnak eo Jesus ear konono kake kin mweie? (b) Ewi wãwen mweiuk ko remaroñ juõn kein bõprae ad karejar ñan Jehovah?

¹¹ Men in ear kamakit Jesus ñan an ba juõn men rar jab kõtmene kake: “Armij e mweie e kanuij bin in dreloñ ilo ailiñ in lõñ. . . . Ebiruru an kiru kamel dreloñlok ilo drelel in ii, jen an armij e mweie dreloñ ilo ailiñ in Anij.” (Matu 19:23, 24) Nan kein an Jesus ej melelen ke bwe ejelok armij emweie emaroñ deloñ ilo Ailiñ eo? Jaab, bwe ear wõnmanlok im ba: “Anij e maroñwe men otemjej.” (Matu 19:25, 26) Emol, kin jibañ jen Jehovah jet ri mweie ro ilo ien eo rar erom Christian ri kabit ro. (1 Timote 6:17) Mekarta, ewõr unin an Jesus ba nan kein. Ear kwalok juõn nan in kakkõl.

¹² Elañe juõn armij elap an yokwe men ko mweien einwõt kar likao eo, men kein remaroñ bõprae an karejar ñan Jehovah kin juõn buru eyu. Men in emaroñ jimor jerbal ñan ro remweie im ro “re kanuij kõnan bwe ren dri mweie.” (1 Timote 6:9, 10) Elañe juõn armij elap an liki men ko lor kanniek, men in emaroñ kõmman bwe en diklok an lemnak kin ‘men ko lor jitõb.’ (Matu 5:3) Kin men in, emaroñ lemnak bwe ejjab aikwiji jibañ eo an Jehovah. (Duteronomi 6:10-12) Emaroñ kõtmene bwe ro jet ilo congregation eo rej aikwij jerbal ñan e ilo juõn wãwen ejej uan. (Jemes 2:1-4) Im emaroñ jolok elap ien ilo an lañliñ kin men ko mweien jen an karejar ñan Jehovah.

Kaddeklok Lemnak eo Ejimwe

13. Ta lemnak eo ebwid ear bed ibben ro ilo Laodicea?

¹³ Juõn kumi me ear bwid lemnak eo air kin mweiuk ko kar congregation in Laodicea ilo ebeben eo kein kajuõn. Jesus ear ba ñan ir: “Bwe kwoj ba, Ij mweie, im I ar koorlok mweiuk ko, im ejelok aõ aikwij; im kwo jaje bwe kwoj nanatõmmõm im dri ememlokjen, im jeramel, im bilo im kelwan.” Air mweie ear jab men eo ear kõmman bwe ro ilo Laodicea ren jeramel ilo jitõb. Ak un eo ej kinke rar liki mweiuk ko elaplok jen air liki Jehovah. Kin men in, rar mãnãn jidik ilo jitõb, im Jesus ear bojak in “mwõjakelok ir” jen loñin.​—Reveles̃õn 3:14-17.

14. Etke Ri Hebrew Christian ro ear tellokiir bõk nebar eo jen Paul?

¹⁴ Ijo turãjet, Paul ear nebar Ri Hebrew Christian ro kin lemnak eo air ilo juõn ien matõrtõr mokta. Ear ba: “Komar bar iñtan ibben  ri prison ro, im mwijin air rakimi mweiuk ko mweiemi, komar mõnõnõ im jab inebata, kinke komar jelã bwe eor wõt ibbemi men ko remmõnlok, ko renaj bed ñõn indrio.” (Dri Hibru 10:34) Ri Christian rein rar jab le jen joñan air buromõj kin an jako men ko mweieir. Rar lañliñ wõt kinke rar debiji mweiuk eo air eaorõktata, “men ko remmõnlok, ko renaj bed ñõn indrio.” Einwõt ri wia eo ilo parable eo an Jesus eo ear wiakake men ko otemjej an ñan an wiaik juõn bõr eaorõk, rein rar bebe ñan air debij wõt kejatdikdik eo kin Ailiñ eo, jekdon ta. (Matu 13:45, 46) Ej juõn lemnak elap an emõn!

15. Ewi wãwen juõn Christian jiroñ ilo Liberia ear likit men ko an Ailiñ eo bwe ren moktata ilo an mour?

¹⁵ Elõñ rainin rar kaddeklok ejja lemnak in wõt emõn. Ilo Liberia, ñan wanjoñok, kar lelok ñan juõn Christian jiroñ juõn jerammõn ñan an illok in katak ilo juõn university. Ilo ailiñ in, rar watõk men in einwõt juõn wãwen bõk juõn ilju ejokane. Bõtab, lio ear juõn pioneer, juõn ri kwalok nan full-time, im ear bõk juõn nan in kir ñan an jerbal einwõt juõn special pioneer iumin jet wõt alliñ. Ear kãlet ñan an bukõt mokta Ailiñ eo im ear bedwõt ilo jerbal in kwalok nan full-time. Ear etal ñan jikin eo kar karõk an jerbal ie im ear jino 21 ri katak Bible ro iumin jilu alliñ. Sister in im elõñ thousand ro jet einwõt e rej bukõt mokta Ailiñ eo, meñe rej luji jerammõn ko kin men ko lor kanniek. Ewi wãwen rej kejbãrok juõn lemnak rot in ilo juõn lal ej arõk mweiuk? Rar kaddeklok elõñ kadkad ko remõn. Jen bwebwenato kin jet iair.

16, 17. (a) Ñan liki Jehovah, etke eaorõk ad kwalok ettã buru? (b) Etke jej aikwij kaddeklok ad liki kallimur ko an Anij?

¹⁶ Ettã Buru: Bible eo ej ba: “Kwon liki Jeova kin aolepen buruõm, im kwon jab atartar ion jelalokjen eo am: Kwon kwalok E ilo ial ko am otemjelok, inem E naj bakajen ial ko am. Kwon jab meletlet wõt ilo mejõm.” (Jabõn Kennan Ko 3:5-7) Jet ien, juõn ial emaroñ keie ekkar ñan lemnak eo an lal in. (Jeremiah 17:9) Ak, juõn Ri Christian emol ej reilok ñan Jehovah ñan bõk nan in tel. (Sam Ko 48:14) ‘Ilo ial ko an otemjej’—ilo men ko an congregation eo, ilo school ak jikin jerbal eo, ien kakije, ak jabdewõt men ko jet—ilo ettã buru ej bukõt nan in tel ko jen Jehovah.—Sam Ko 73:24.

 ¹⁷ Liki kallimur ko an Jehovah: Paul ear ba: “Eo ej itok ñõn Anij, emõn en tõmak kin an Anij ber, im kin An lelok jinekjij ñõn ro rej kabukot E.” (Dri Hibru 11:6) Elañe jej bere bwe Jehovah enaj kajejjet kitien kallimur ko an, jemaroñ lemnak bwe ekkar bwe jen ‘kanuij jerbale lõl in.’ (1 Dri Korint 7:31) Ijo turãjet, elañe ekajur tõmak eo ad, jenaj bebe ilo buruõd ñan bukõt mokta Ailiñ eo. Ewi wãwen jemaroñ kaddeklok juõn tõmak ekajur? Ilo ad karuaklok kij ñan Jehovah ilo ad jar jen buruõd im ikijen ad keini katak ibbed make. (Sam Ko 1:1-3; Dri Pilippai 4:6, 7; Jemes 4:8) Einwõt King David, jemaroñ jar: “A I ar liki Yuk, O Jeova, I ar ba, Kwe aõ Anij. O enañin lap Am emõn!”​—Sam 31:14, 19.

18, 19. (a) Ewi wãwen niknik ilo jerbal ej kakajurlok liki eo ad ilo Jehovah? (b) Etke juõn Ri Christian ej aikwij mõnõnõ in karmijeteik men ko an?

¹⁸ Niknik ilo jerbal eo an Jehovah: Paul ear kakobaik liki kin kallimur ko an Jehovah ibben niknik ke ear je: “A kim kõnan bwe komin otemjej niknikemi wõt juõn ñõn obrõk in kejatrikrik, aet, ñõn jemlokõn.” (Dri Hibru 6:11) Elañe jej boub ilo jerbal eo an Jehovah, enaj jibañ kij. Kajjojo ien jej lo an jibañ kij, enaj kajurlok liki eo ad, im jenaj “jutak bin im jab ebbwer.” (1 Dri Korint 15:58) Tõmak eo ad ej kajurlok, im ej kabine kejatdikdik eo ad.​—Dri Epesõs 3:16-19.

¹⁹ Mõnõnõ in karmijeteik men ko ad: Paul ear karmijeteik juõn jerbal emõn bwe en lor Jesus. Alikar bwe ear kõmman juõn jokãlet ejimwe, meñe jet ien ear iion ien ko rebin ikijen men ko lor kanniek. (1 Dri Korint 4:11-13) Jehovah ejjab kallimur bwe enaj letok ñan kij juõn wãwen mour emweie, im jet ien ri karejar ro an rej aikwij kijenmij kin wãwen ko rebin. Mõnõnõ eo ad ñan kabidodoik wãwen mour eo ad im ñan karmijeteik men ko ad rej kamol kajur in bebe eo ad ñan karejar ñan Jehovah.​—1 Timote 6:6-8.

20. Etke meanwõd eaorõk elañe juõn armij ekõnan likit bwe Ailiñ eo en moktata ilo an mour?

²⁰ Meanwõd: Ri kalor eo James ear rejañ Ri Christian ro mõttan: “Inem ro jãtiõ, komin mijmijlolõmi mae ien an Iroij itok.” (Jemes 5:7) Ilo lal in eboub, ebin ad kwalok meanwõd. Jekõnan bwe men ko ren walok ilo mõkaj. Ak Paul ear rejañ kij ñan kajeoñe ro “rej bõk air jolit men in kalimur ko, kin tõmak im kijenmij.” (Dri Hibru 6:12) Komin mõnõnõ in kõttar wõt Jehovah. Mour indio ilo juõn paradise ion lal—emol an wõr tokjen kõttar kake!

21. (a) Ta eo jej kalikare ñe jej likit bwe Ailiñ eo en moktata ilo ad mour? (b) Ta eo jenaj bwebwenato kake ilo katak in tok juõn?

²¹ Aet, ekkar an Jesus kakabilek kij bwe jen bukõt mokta Ailiñ eo. Ñe jej kõmmane, jej kalikar bwe je lukkun liki Jehovah im jaar kãlet wãwen eo wõt emõn ñan an juõn Ri Christian mour. Bõtab, Jesus ear bareinwõt kakabilek bwe jen “bukot mokta . . . kwojarjar eo An [Anij].” Ilo katak in tok juõn, jenaj lale etke elap ad aikwiji nan in rejañ in rainin.

Kwomaroñ Ke Kamelele?

• Ikijen men ko lor kanniek, jokkin wõt juõn et eo Jesus ear rejañ bwe en wõr ibbed?

• Ta eo jej katak jen wanjoñok eo kin camel eo im roñ in iie?

• Kadkad et ko kadkadin Christian remaroñ jibañ kij ñan bukõt mokta Ailiñ in Anij?

[Kajitõk ko ñan katak]

[Pija eo ilo peij 19]

Elõñ ro rar roñjake nan ko an Jesus rar jeramel

[Pija eo ilo peij 21]

Likao eo emweie ear yokwe men ko mweien elaplok jen an yokwe Anij

[Pija eo ilo peij 21]

Ri wia eo ilo parable eo an Jesus ear wiakake men otemjej an ñan an wia bõr eo eaorõk

[Pija eo ilo peij 22]

Elañe jej boub ilo jerbal eo an Jehovah enaj jibañ kij